ᐃᓐᖏᕈᑎᑦ 119
119
ᐊᓕᑉ
ᐊᑕᓂᐅᑉ ᐱᖁᔭᖏᑦ
1ᑐᓱᓐᓇᕐᐳᑦ ᐸᓯᔭᒃᓴᐅᖏᑦᑐᒥᒃ ᐃᓅᓯᖃᕐᑐᑦ,
ᐃᓅᔪᑦ ᐊᑕᓂᐅᑉ ᐱᖁᔭᖏᑦ ᒪᓕᒡᓗᒋᑦ.
2ᑐᓱᓐᓇᕐᐳᑦ ᑖᑦᓱᒪ ᐅᓐᓂᕐᑑᑎᒋᔭᖏᓐᓂᒃ ᒪᓕᒃᑐᑦ,
ᑖᑦᓱᒥᖓ ᕿᓂᕐᑐᑦ ᐆᒻᒪᒻᒧᑦ ᐊᑕᖏᕐᑐᒧᑦ.
3ᐱᐅᖏᑦᑐᓕᓂᕐᒥᒃ ᐊᑐᖏᑦᑐᑦ,
ᑖᑦᓱᒪᓕ ᐊᑐᕐᑕᐅᖁᔭᖏᓐᓂᒃ ᒪᓕᒃᑐᑦ.
4ᐱᖁᓚᐅᕐᐸᑦᑎᒍᑦ ᐊᑐᕐᑕᐅᖁᔭᕐᓂᒃ ᒪᓕᖁᓪᓗᑕ
ᑖᒃᑯᐊᓗ ᒪᓕᑦᓯᐊᕐᓗᒋᑦ ᑲᔪᓯᑦᓯᐊᖁᓪᓗᑕ.
5ᖃᓄᕐᑐᖅ ᐃᓅᓯᓐᓂ ᒪᓕᑦᓯᐊᕈᓐᓇᓚᐅᕐᓚᒃᑲ
ᐊᑐᕐᑕᐅᖁᔭᑎᑦ ᐊᑐᑦᓯᐊᕈᓐᓇᕐᓗᒋᑦ.
6ᑕᕝᕙ ᐱᖁᔭᓕᒫᑎᑦ ᐊᑐᑦᓯᐊᕈᒃᑭᑦ,
ᑲᓐᖑᓱᒃᑎᑕᐅᓂᐊᓐᖏᓚᖓ.
7ᓂᕐᑐᕐᓂᐊᕐᐸᒋᑦ ᐆᒻᒪᒻᒧᑦ ᓇᓛᒎᕐᑐᒧᑦ,
ᖃᐅᔨᒍᒪ ᓇᓛᒎᕐᑐᒥᒃ ᒪᓕᒃᑕᐅᖁᔭᕐᓂᒃ.
8ᐊᑐᕐᑕᐅᖁᔭᑎᑦ ᐊᑐᕈᒪᕙᒃᑲ;
ᐊᑏ ᕿᒪᑦᓯᐊᒻᒪᕆᒃᑍᓕᓐᖓ!
ᐱᑦ
ᐊᑕᓂᐅᑉ ᐱᖁᔭᖏᓐᓂᒃ ᓈᓚᖕᓂᖅ
9ᖃᓄᖅ ᐃᓅᓱᒃᑐᖅ ᐃᓅᓯᕐᒥᓂᒃ ᐸᓯᔭᒃᓴᐅᖏᑦᑑᑎᑦᓯᔪᓐᓇᕐᐹ?
ᐅᖃᐅᓯᕐᓂᒃ ᒪᓕᑦᓯᐊᕐᓗᓂ ᐱᓂᐊᕈᓂ.
10ᐆᒻᒪᒻᒧᑦ ᐃᓗᖏᕐᓱᕐᓗᖓ ᕿᓂᓚᐅᕐᐸᒋᑦ;
ᑍᒤᒻᒪᑦ ᐱᖁᔭᕐᓂᒃ ᕿᒤᑎᑦᑍᓕᓐᖓ.
11ᐅᖃᐅᓯᕐᑎᑦ ᑐᖅᑯᕐᐸᒃᑲ ᐆᒻᒪᑎᓐᓄᑦ,
ᐊᔪᕐᑐᓕᖁᓇᖓ ᐃᓕᖕᓄᑦ.
12ᐊᑕᓃᖅ ᓂᕐᑐᕐᑕᐅᒋᑦ; ᐃᓕᓴᕐᑎᓚᐅᓐᖓ ᐊᑐᕐᑕᐅᖁᔭᕐᓂᒃ.
13ᖃᓂᒃᑯᑦ ᐅᖃᐅᓯᕆᓚᐅᕐᐸᒃᑲ
ᒪᓕᒃᑕᐅᖁᓪᓗᒋᑦ ᐅᖃᐅᓯᕆᓚᐅᕐᑕᓕᒫᑎᑦ.
14ᐊᑐᕐᑕᐅᖁᓪᓗᒋᑦ ᐃᓕᓮᑦᔪᑎᒋᓚᐅᕐᑕᑎᑦ ᖁᕕᐊᒋᕙᒃᑲ,
ᐊᔪᕐᓴᖏᑦᔪᑕᐅᔪᓐᓇᕐᑐᓕᒫᓂᑦ ᖁᕕᐊᒋᓂᕐᓴᕆᕙᒃᑲ.
15ᑐᑭᓯᓇᓱᐊᕐᓂᐊᕐᐸᒃᑲ ᐃᒫᖎᓚᑦᔪᑎᒋᔭᑎᑦ,
ᕿᒥᕐᕈᐊᑦᓯᐊᕐᓂᐊᕐᐸᒃᑲᓗ ᐱᓂᐊᕐᑕᐅᖁᔭᑎᑦ.
16ᐊᑐᕐᑕᐅᖁᔭᑎᑦ ᖁᕕᐊᒋᕙᒃᑲ; ᐅᖃᐅᓯᕐᑎᑦ ᐳᐃᒍᕐᓂᐊᓐᖏᓚᒃᑲ.
ᒋᒥᐅᓪ
ᐊᑕᓂᐅᑉ ᐱᖁᔭᖏᓐᓂᒃ ᖁᕕᐊᓲᑎᖃᕐᓂᖅ
17ᐱᔩᑦ ᓇᔪᕐᓗᒍ ᐱᑦᓯᐊᕐᕕᒋᒍᒃ,
ᐃᓅᖁᓪᓗᖓ, ᒪᓕᑦᓯᐊᖁᓪᓗᖓᓗ ᐅᖃᐅᓯᕐᓂᒃ.
18ᐃᔩᒃᑲᒃ ᑕᑯᑎᒃᑭᒃ, ᑕᑯᖁᓪᓗᖓ
ᐱᖁᔭᕕᑦ ᑲᒪᓇᕐᑐᐊᓘᓂᖏᓐᓂᒃ.
19ᓄᓇᒥ ᓂᐅᕐᕈᐊᖑᑐᐃᓐᓇᕋᒪ;
ᐱᖁᔭᑎᑦ ᐃᔨᕐᓯᒪᓂᐊᕐᓇᒋᑦ ᐅᕙᓐᓄᑦ.
20ᑕᕐᓂᕋ ᓯᖁᒥᓯᒪᕗᖅ ᕿᓚᓈᕐᓂᕐᒧᑦ
ᒪᓕᒃᑕᐅᖁᔭᕐᓂᒃ ᑐᑭᓯᕙᓪᓕᐊᔪᒪᓪᓗᖓ ᑍᒪᓐᖓᓕᒫᖅ.
21ᐱᐅᔪᕆᔪᑦ ᓱᒋᐊᕐᐸᑎᑦ;
ᓯᕗᓂᕐᓗᒃᑎᑕᐅᓕᑦ ᐱᖁᔭᕐᓂᒃ ᓈᓚᒍᓐᓃᕐᑐᑦ.
22ᒥᑕᐅᑎᖃᕐᓂᖏᓐᓂᑦ ᐃᒤᑦᑑᑎᑦᓯᓇᓱᐊᕐᓂᖏᓐᓂᓪᓗ ᕿᓚᕈᑦᔮᕐᑎᓐᖓ;
ᐃᓕᓮᑦᔪᑎᒋᔭᑎᑦ ᓈᓚᓚᐅᕋᒃᑭᑦ.
23ᐊᖓᔪᖅᑳᖑᔪᑦ ᑲᑎᒪᓪᓗᑎᒃ ᐅᕙᓐᓂᒃ ᐊᑭᕋᕐᑐᕋᓱᐊᕐᐳᑦ,
ᐱᔩᓪᓕ ᐊᑐᕐᑕᐅᖁᔭᕐᓂᒃ ᐃᓱᒪᒃᓴᕐᓯᐅᕈᑎᖃᕐᓂᐊᕐᐳᖅ.
24ᐃᓛᒃ ᐃᓕᓮᑦᔪᑎᒋᔭᑎᑦ ᖁᕕᐊᒋᕙᒃᑲ,
ᐃᓱᒪᑖᕐᑎᑦᓯᔨᒋᖃᑦᑕᕐᓗᒋᓪᓗ.
ᑖᓕᑦ
ᑲᑦᓱᖎᕐᓯᒪᓂᖅ ᐊᑕᓂᐅᑉ ᐱᖁᔭᖏᓐᓂᒃ ᓇᓚᒍᒪᓗᓂ
25ᑕᕐᓂᕋ ᐅᕐᕈᖓᕗᖅ ᓴᓂᕐᓂ;
ᒪᑭᑎᒃᑲᓐᓂᓚᐅᓐᖓ ᐅᖃᐅᓯᕐᑎᑦ ᒪᓕᒡᓗᒋᑦ.
26ᐱᓂᐊᕐᓂᒃᑲ ᐅᖃᐅᓯᕆᒐᒃᑭᑦ, ᑕᕝᕙ ᑭᐅᓚᐅᕐᐸᕐᒪ;
ᐊᔪᕆᕐᑐᓚᐅᓐᖓ ᐊᑐᕐᑕᐅᖁᔭᕐᓂᒃ.
27ᑐᑭᓯᑎᓚᐅᓐᖓ ᐱᓂᐊᕐᑕᐅᖁᔭᕕᑦ ᑐᑭᖏᓐᓂᒃ,
ᑕᕝᕙ ᐃᓱᒪᒃᓴᕐᓯᐅᕈᑎᒋᓂᐊᕐᐸᒃᑲ ᑲᒪᓇᕐᑐᓕᓂᑎᑦ.
28ᑕᕐᓂᕋ ᐃᓱᒪᔮᕐᓂᕐᒧᑦ ᐊᐅᓕᕐᐳᖅ;
ᓲᖑᓯᑎᓚᐅᓐᖓ ᐅᖃᐅᓯᕐᑎᑦ ᒪᓕᒡᓗᒋᑦ.
29ᐱᓂᐊᕐᓃᑦ ᓱᓕᖏᑦᑐᑦ ᐅᕙᓐᓂᑦ ᐅᖓᓯᒃᓯᑎᓚᐅᒃᑭᑦ;
ᐱᑦᓯᐊᕐᓂᕐᓄᓪᓕ ᐱᖁᔭᕐᓂᒃ ᐃᓕᓴᕐᑎᓚᐅᓐᖓ.
30ᓱᓕᑦᓯᐊᕐᑐᒥ ᐃᓅᓯᖃᕈᒪᓂᖅ ᓂᕈᐊᓚᐅᕐᐸᕋ;
ᐊᑐᕐᑕᐅᖁᔭᑎᑦ ᓯᕗᓂᕆᓚᐅᕐᐸᒃᑲ.
31ᐊᑕᓃᖅ, ᐃᓕᓮᑦᔪᑎᑎᑦ ᐊᓐᓂᕆᕙᒃᑲ;
ᑍᒤᒻᒪᑦ ᑲᓐᖑᓇᕐᑐᒧᐊᕐᑎᑦᑍᓕᓐᖓ.
32ᑐᑭᓯᕚᓪᓕᕐᑎᒃᑯᕕᖓ ᐆᒻᒪᑎᒃᑯᑦ
ᑕᕝᕙ ᐱᖁᔭᑎᑦ ᑲᑦᓱᖎᒻᒪᕆᒡᓗᖓ ᐱᓇᓱᐊᕐᓂᐊᕐᐸᒃᑲ.
ᕼᐃ
ᑐᑭᓯᑎᑕᐅᔪᒪᓂᕐᒧᑦ ᑐᒃᓯᐊᕐᓂᖅ
33ᐊᑕᓃᖅ ᐊᔪᕆᕐᑐᓚᐅᓐᖓ, ᐊᑐᕐᑕᐅᖁᔭᕐᐱᑦ ᑐᑭᖏᓐᓂᒃ;
ᑕᕝᕙ ᒪᓕᖕᓂᐊᕐᐸᒃᑲ ᐃᓅᓯᕐᒪ ᓈᓂᖓᓄᑦ.
34ᑐᑭᓯᔪᓐᓇᕐᑎᓚᐅᓐᖓ, ᐱᖁᔭᕐᓂᒃ ᒪᓕᒍᓐᓇᕐᓯᖁᓪᓗᖓ;
ᑕᕝᕙ ᐊᑐᓕᕐᓂᐊᕐᐸᒃᑲ ᐆᒻᒪᒻᒧᑦ ᐊᑕᖏᕐᑐᒧᑦ.
35ᐱᖁᔭᕐᓂᒃ ᓈᓚᒍᓐᓇᕐᓯᓂᕐᒧᑦ ᑕᓯᐅᓚᐅᓐᖓ,
ᑕᒪᒃᑯᐊ ᖁᕕᐊᓇᕐᑐᕐᓯᐊᕆᓯᒪᒐᒃᑭᑦ.
36ᐃᓕᓮᑦᔪᑎᒋᔭᕐᓂᒃ ᓈᓚᒍᒪᓂᕐᒥᒃ ᐆᒻᒪᑎᓐᓄᐊᕐᓯᒋᑦ,
ᐊᔪᕐᓴᕈᓐᓃᕈᒪᓂᐊᓗᑐᐃᓐᓇᕐᒥᒃ ᐱᖁᓇᖓ.
37ᐃᔩᒃᑲᒃ ᑲᒪᒋᒃᑭᒃ ᐊᑑᑎᖃᖏᑦᑐᓂᒃ ᑕᑯᓐᓇᖁᓇᒋᒃ;
ᐃᓅᓯᖃᕐᑎᓐᖓ ᐃᓅᓯᐅᖁᔭᕐᓂᒃ.
38ᐊᖏᕈᑎᒋᓯᒪᔧᑦ ᐱᔨᖕᓄᑦ ᖁᓚᕐᓇᕈᓐᓃᕐᑎᓚᐅᕈᒃ,
ᐃᓕᖕᓂᒃ ᓯᕘᕋᒋᔭᓕᖕᓄᑦ ᑕᒪᒃᑯᐊ ᑐᓂᔭᐅᓯᒪᖕᒪᑕ.
39ᓇᕐᕈᒋᔭᐅᑦᔪᑎᒋᔭᕋ ᓴᖑᑎᒍᒃ ᐅᕙᓐᓂᑦ ᐊᑐᕈᒪᖏᓐᓇᒃᑯ;
ᐊᑐᕐᑕᐅᖁᔭᑎᑦ ᐱᐅᔫᖕᒪᑕ.
40ᑕᑯᒋᑦ, ᐱᓂᐊᕐᑕᐅᖁᔭᕐᓂᒃ ᑲᔪᖏᕆᔭᖃᕐᐳᖓ;
ᓇᓛᒎᕐᓂᕐᓄᑦ ᓄᑖᒥᒃ ᐃᓅᓯᕐᑖᕐᑎᓚᐅᓐᖓ.
ᐅᐊᐅ
ᐊᑕᓂᐅᑉ ᐱᖁᔭᖏᓐᓂᒃ ᑕᑎᖃᕐᓂᖅ
41ᐊᑕᓃᖅ, ᓇᒡᓕᒍᓱᖕᓃᑦ ᓱᖁᓯᔪᐃᑦᑐᖅ ᐅᕙᓐᓄᑦ ᑎᑭᐅᑎᑎᓚᐅᕈᒃ,
ᐱᐅᓕᒃᓯᓃᓪᓗ ᐅᖃᐅᓯᕐᑎᑦ ᒪᓕᒡᓗᒋᑦ.
42ᑭᐅᔪᓐᓇᖁᓪᓗᖓ ᐅᖃᕐᓂᕐᓗᒡᕕᒋᔨᓐᓂᒃ,
ᐅᖃᐅᓯᕐᓂᒃ ᑕᑎᖃᕋᒪ.
43ᐅᖃᐅᓯᕐᑎᑦ ᓱᓕᔪᑦ ᖃᓂᓐᓂᑦ ᐲᕐᑎᑦᑍᓕᒃᑭᑦ,
ᒪᓕᒃᑕᐅᖁᔭᕐᓂᒃ ᓂᕆᐅᒋᔭᖃᕋᒪ.
44ᐱᖁᔭᑎᑦ ᑍᒪᓐᖓᑦ ᓈᓚᒍᒪᕙᒃᑲ,
ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ.
45ᕿᓚᕈᑦᔮᕐᑕᐅᓯᒪᓗᖓ ᐃᓅᓂᐊᕐᐳᖓ,
ᐱᓂᐊᕐᑕᐅᖁᔭᕐᓂᒃ ᕿᓂᕐᓯᒪᒐᒪ.
46ᐃᓕᓮᑦᔪᑎᒋᔭᑎᑦ ᐅᖃᐅᓯᕆᓂᐊᕐᐸᒃᑲ ᐊᖓᔪᖅᑳᕐᔪᐊᓄᑦ,
ᑕᒪᑐᒧᖓᓗ ᑲᓐᖑᓱᒃᑎᑕᐅᓂᐊᕐᓇᖓ.
47ᐱᖁᔭᕐᐱᑦ ᖁᕕᐊᓇᕐᓂᖏᓐᓂᒃ ᖃᐅᔨᓯᒪᓕᕋᒪ,
ᐊᓐᓂᕆᓕᕐᓗᒋᓪᓗ.
48ᐊᒡᒐᒃᑲ ᖁᒻᒧᐊᒃᑎᓐᓂᐊᕐᐸᒃᑲ ᐱᖁᔭᑎᑦ ᐅᐱᒋᓗᒋᑦ, ᐊᓐᓂᕆᒐᒃᑭᑦ,
ᐊᑐᕐᑕᐅᖁᔭᑎᓪᓗ ᐃᓱᒪᒃᓴᕐᓯᐅᕈᑎᒋᓂᐊᕐᐸᒃᑲ.
ᓴᐃᓐ
ᐊᑕᓂᐅᑉ ᐱᖁᔭᖏᓐᓂᒃ ᖁᓚᕆᔭᖃᖏᓐᓂᖅ
49ᐃᖅᑲᐅᒪᒃᑭᑦ ᐱᔨᖕᓄᑦ ᐅᖃᐅᓯᕆᓚᐅᕐᑕᑎᑦ,
ᑖᒃᑯᓄᖓ ᓂᕆᐅᒋᔭᕐᑖᕐᑎᓯᒪᒐᕕᖓ.
50ᐋᓐᓂᐊᓂᓐᓂ ᐊᖏᕈᑎᒋᓯᒪᔭᕐᓄᑦ ᐃᑲᔪᕐᑕᐅᕗᖓ
ᐅᖃᐅᓯᕐᑎᑦ ᐃᓅᓯᓐᓂᒃ ᑕᓯᐅᕐᓯᖕᒪᑕ.
51ᐱᐅᔪᕆᔪᑦ ᐊᖏᔪᒥᒃ ᒥᑕᐅᑎᒋᕚᖓ,
ᓱᓕᓕ ᐱᖁᔭᕐᓂᒃ ᖁᔭᓈᕐᓯᓐᖏᓚᖓ.
52ᐊᑯᓂᓂᑕᕐᓂᒃ ᐱᓇᓱᐊᕐᓂᕕᓂᕐᓂᒃ ᐃᖅᑲᐅᒪᓕᕋᒪ,
ᐊᑕᓃᖅ, ᑕᕝᕙ ᒪᓂᒍᕐᑕᐅᕗᖓ.
53ᐱᐅᖏᑦᑐᑦ ᐊᖏᔪᒥᒃ ᐃᓗᐃᓪᓕᕈᑎᒋᕙᒃᑲ,
ᐱᖁᔭᕐᓂᒃ ᕿᒤᓯᒪᓂᖏᑦ ᐱᓪᓗᒋᑦ.
54ᐊᑐᕐᑕᐅᖁᔭᑎᑦ ᐃᓐᖏᕈᑎᒋᖃᑦᑕᓚᐅᕐᐸᒃᑲ
ᑕᕝᕙᓂ ᐃᓅᓯᓐᓂ ᐃᖏᕐᕋᓂᕆᔭᓐᓂ.
55ᐊᑕᓃᖅ, ᐅᓐᓄᐊᒃᑯᑦ ᐃᖅᑲᐅᒪᖃᑦᑕᕐᐸᒋᑦ,
ᐱᖁᔭᑎᓪᓗ ᓈᓚᒃᐸᒃᑲ.
56ᑕᒪᓐᓇ ᖁᕕᐊᓇᕐᑐᕐᓯᐊᕆᓯᒪᕙᕋ,
ᐱᓂᐊᕐᑕᐅᖁᔭᕐᓂᒃ ᓈᓚᖕᓂᖅ.
ᕼᐃᑦ
ᐃᑦᔪᕐᓁᑦᑑᑎᑦᓯᓂᖅ ᐊᑕᓂᐅᑉ ᐱᖁᔭᖏᓐᓂᒃ
57ᐊᑕᓃᖅ ᐃᕝᕕᑐᐊᖅ ᐱᑐᐊᕆᔪᒪᕙᒋᑦ;
ᐊᖏᓚᐅᕋᒪ ᐅᖃᐅᓯᕐᑎᑦ ᓈᓚᒍᒪᓪᓗᒋᑦ.
58ᐱᕕᓕᒫᓐᓄᑦ ᐃᓕᖕᓄᑦ ᐃᓱᐊᕆᔭᐅᔪᒪᓪᓗᖓ ᕿᓄᕗᖓ,
ᓂᑲᒋᓚᐅᓐᖓ ᐊᖏᕈᑎᒋᓯᒪᔧᑦ ᒪᓕᒡᓗᒍ.
59ᐱᓂᐊᕐᓂᒃᑲ ᐃᓅᓯᓐᓂ ᐃᓱᒪᒃᓴᕐᓯᐅᕈᑎᒋᒐᒃᑭᑦ;
ᐃᓕᓮᑦᔪᑎᒋᔭᕐᓄᑦ ᐃᓅᓯᓐᓂ ᒪᓕᒃᓴᕈᒪᓕᕐᐳᖓ.
60ᐊᑯᓂᒍᓱᓕᕐᓗᖓ ᑐᐊᕕᓕᕐᐳᖓ,
ᐱᖁᔭᑎᑦ ᐅᑕᖅᑭᖏᓪᓗᖓ ᓈᓚᒍᒪᓕᕐᐸᒃᑲ.
61ᐱᐅᖏᑦᑐᑦ ᐅᕙᓐᓂᒃ ᐊᒃᓱᓈᓄᑦ ᓂᒐᕐᑎᑦᓯᓇᓱᐊᕐᐳᑦ,
ᐱᖁᔭᑎᓪᓕ ᐳᐃᒍᓚᐅᓐᖏᓚᒃᑲ.
62ᐅᓐᓄᐊᒃᑯᑦ ᑐᐸᒐᒪ ᓂᕐᑐᓕᕐᐸᒋᑦ,
ᐊᑐᕐᑕᐅᖁᔭᑎᑦ ᓈᒻᒪᓈᕐᑐᑦ ᐱᓪᓗᒋᑦ.
63ᐃᓕᖕᓂᒃ ᓯᕘᕋᒋᔭᖃᕐᑐᓕᒫᑦ ᐃᓚᒋᕙᒃᑲ,
ᐱᓂᐊᕐᑕᐅᖁᔭᕐᓂᒃ ᑖᒃᑯᐊ ᓈᓚᖕᒪᑕ.
64ᐊᑕᓃᖅ, ᓄᓇ ᓈᓯᒪᕗᖅ ᓇᒡᓕᒍᓱᖕᓂᕐᓄᑦ ᓱᖁᓯᔪᐃᑦᑐᒧᑦ;
ᐊᔪᕆᕐᑐᓚᐅᓐᖓ ᐊᑐᕐᑕᐅᖁᔭᕐᓂᒃ.
ᑏᑦ
ᐊᑕᓂᐅᑉ ᐱᖁᔭᖏᑕ ᐊᑑᑎᒃᓴᖃᕐᓂᖏᑦ
65ᐊᑕᓃᖅ, ᐱᔩᑦ ᐱᓇᓱᐊᑦᓯᐊᕐᕕᒋᓯᒪᕙᑦ,
ᐅᖃᐅᓯᕐᑎᑦ ᐊᖏᕈᑎᒋᓯᒪᔭᑎᑦ ᒪᓕᒡᓗᒋᑦ.
66ᐊᔪᕆᕐᑐᓚᐅᓐᖓ ᐃᓅᖃᑎᓐᓄᑦ ᓈᒻᒪᓈᕐᓯᒪᔪᒥᒃ ᑕᑯᓐᓇᕐᓂᕐᒥᒃ
ᖃᐅᔨᒪᑦᓯᐊᕐᓂᕐᒥᒡᓗ, ᐱᖁᔭᑎᑦ ᐅᒃᐱᕆᒐᒃᑭᑦ.
67ᐃᓕᖕᓄᑦ ᐋᓐᓂᐊᑎᑕᐅᓚᐅᖅᑳᕐᓇᖓ ᑕᒻᒪᕐᓯᒪᓚᐅᕐᐳᖓ;
ᒫᓐᓇᓕ ᐅᖃᐅᓯᕐᑎᑦ ᓈᓚᓕᕐᐸᒃᑲ.
68ᐱᐅᔫᒐᕕᑦ, ᐱᑦᓯᐊᕐᓗᑎᓪᓗ; ᐊᔪᕆᕐᑐᓚᐅᓐᖓ ᐊᑐᕐᑕᐅᖁᔭᕐᓂᒃ.
69ᐱᐅᔪᕆᔪᑦ ᓱᓕᓇᑎᒃ ᐅᕙᓐᓂᒃ ᐅᖃᐅᓯᖃᕐᐳᑦ,
ᐆᒻᒪᒻᒧᓪᓕ ᓱᓕᔪᒧᑦ ᐱᓂᐊᕐᑕᐅᖁᔭᑎᑦ ᓈᓚᖕᓂᐊᕐᐸᒃᑲ.
70ᐆᒻᒪᑎᖏᑦ ᐅᕐᓱᑎᑐᑦ ᑭᓂᕆᓂᑯᑎᑐᑦ ᑍᒤᑉᐳᑦ;
ᐅᕙᖓᓕ ᐱᖁᔭᑎᑦ ᖁᕕᐊᓲᑎᒋᕙᒃᑲ.
71ᐅᕙᓐᓄᑦ ᐱᐅᔫᕗᖅ ᐋᓐᓂᐊᑎᑕᐅᓯᒪᓂᕋ,
ᐃᓕᑦᓯᔪᓐᓇᕐᓯᑎᑕᐅᓯᒪᒐᒪ ᐊᑐᕐᑕᐅᖁᔭᕐᓂᒃ.
72ᖃᓂᕐᐱᑦ ᐅᖃᐅᓯᕆᔭᖏᑦ ᐱᖁᔧᑦ ᐱᐅᒋᓂᕐᓴᕆᕙᒃᑲ
ᒎᓗᓂᑦ ᓯᐅᓪᕕᕆᓂᓪᓗ ᑮᓇᐅᔭᒐᓴᕐᔪᐊᓂᑦ.
ᔮᑦ
ᐊᑕᓂᐅᑉ ᐱᖁᔭᖏᑕ ᐃᓄᖕᓂᒃ ᐋᑦᔨᒌᒃᑎᑦᓯᓂᖏᑦ
73ᐊᒡᒐᒃᐱᑦ ᓴᓇᓚᐅᕐᐹᖓ ᐋᖅᑭᒃᓱᕐᓗᖓᓗ;
ᑐᑭᓯᑎᓚᐅᓐᖓ ᐱᖁᔭᕐᓂᒃ ᐃᓕᑦᓯᔪᓐᓇᖁᓪᓗᖓ.
74ᐃᓕᖕᓂᒃ ᓯᕘᕋᔪᑦ ᖁᕕᐊᓱᖕᓂᐊᕐᐳᑦ ᐅᕙᓐᓂᒃ ᑕᑯᒍᑎᒃ,
ᐅᖃᐅᓯᕐᓂᒃ ᓂᕆᐅᒋᔭᖃᕐᓂᕋ ᐱᑦᔪᑎᒋᓗᒍ.
75ᐊᑕᓃᖅ, ᖃᐅᔨᒪᕗᖓ ᐋᖅᑭᒃᓱᐃᓃᑦ ᓈᒻᒪᓈᕐᓯᒪᖕᒪᑦ,
ᓱᖁᓯᔪᐃᑦᑑᓂᕐᓄᑦ ᐋᓐᓂᐊᑎᑕᐅᓂᒃᑯᑦ ᐋᖅᑭᒋᐊᓚᐅᕋᕕᖓ.
76ᑍᒪᓐᖓᓪᓕ ᓇᒡᓕᒍᓱᖕᓂᕕᑦ ᓱᖁᓯᔪᐃᑦᑑᑉ ᓮᒻᒪᕐᑎᓪᓕᖓ,
ᐱᔨᖕᓄᑦ ᐊᖏᕈᑎᒋᓯᒪᔧᑦ ᒪᓕᒡᓗᒍ.
77ᓂᑲᒍᓱᖕᓃᑦ ᐅᕙᓐᓄᑦ ᑎᑭᐅᑎᓚᐅᕐᓕ,
ᐃᓅᔪᓐᓇᖁᓪᓗᖓ; ᐱᖁᔭᑎᑦ ᖁᕕᐊᓲᑎᒋᒐᒃᑭᑦ.
78ᐱᐅᔪᕆᔪᑦ ᑲᓐᖑᓱᒃᑎᑕᐅᓕᑦ,
ᐱᑦᔪᑎᒃᓴᖃᕋᑎᒃ ᐅᕙᓐᓂᒃ ᓴᒡᓗᑦᔪᑎᖃᕐᓯᒪᖕᒪᑕ;
ᐅᕙᖓᓕ ᐱᓂᐊᕐᑕᐅᖁᔭᑎᑦ ᐃᓱᒪᒃᓴᕐᓯᐅᕈᑎᒋᓂᐊᕐᐸᒃᑲ.
79ᐃᓕᖕᓂᒃ ᓯᕘᕋᔪᑦ ᐅᕙᓐᓄᑦ ᓵᓚᐅᕐᓕᑦ,
ᑖᒃᑯᐊ ᐃᓕᓮᑦᔪᑎᒋᔭᕐᓂᒃ ᖃᐅᔨᓯᒪᔪᑦ.
80ᐆᒻᒪᑎᒐ ᐸᓯᔭᒃᓴᐅᓂᖃᕐᑍᓕᓕ ᐊᑐᕐᑕᐅᖁᔭᕐᓄᑦ, ᑲᓐᖑᓱᒃᑎᑕᐅᖁᓇᖓ.
ᑳᑉ
ᓴᐳᑦᔭᐅᔪᒪᓂᕐᒧᑦ ᑐᒃᓯᐊᕐᓂᖅ
81ᓱᕖᕈᑎᓕᕐᐳᖓ ᐃᓕᖕᓄᑦ ᐱᐅᓕᔭᐅᔪᒪᓂᕐᒧᑦ;
ᐅᖃᐅᓯᕐᑎᑦ ᓂᕆᐅᒡᕕᒋᕙᒃᑲ.
82ᐃᔩᒃᑲ ᐅᖃᐅᓯᕐᓂᒃ ᕿᒥᕐᕈᐊᕐᓂᕐᒧᑦ ᑕᖃᓕᕐᐴᒃ,
ᐊᐱᕐᓱᕐᓗᖓᓗ, “ᖃᖓᓕ ᐃᑲᔪᕐᓂᐊᕐᐱᖔ?”
83ᕔᓂᖃᐅᑎᑐᑦ ᕿᓯᒃᑐᑦ ᐳᔪᕐᒧᑦ ᐃᕿᑎᑕᐅᔪᑎᑐᑦ ᑍᒤᓕᕐᐳᖓ;
ᑭᓯᐊᓂᓕ ᐊᑐᕐᑕᐅᖁᔭᑎᑦ ᓱᓕ ᐳᐃᒍᓐᖏᓚᒃᑲ.
84ᖃᓄᖅ ᐊᑯᓂᐅᑎᒋᔪᖅ ᓱᓕ ᐱᔩᑦ ᐅᑕᖅᑭᔭᕆᐊᖃᕐᐹ?
ᖃᖓᓖᒃᑯᐊ ᐆᒥᒋᔨᒃᑲ ᓱᒋᐊᓛᕐᑕᑎᑦ?
85ᐱᐅᔪᕆᔪᑦ ᐃᑎᕐᓴᓕᐅᕐᓯᒪᕗᑦ ᑲᑕᒡᕕᒃᓴᓐᓂᒃ,
ᑖᒃᑯᐊ ᐱᖁᔭᕐᓂᒃ ᒪᓕᖏᑦᑐᑦ.
86ᐱᖁᔭᓕᒫᑎᑦ ᐅᒃᐱᕆᔭᒃᓴᐅᕗᑦ;
ᓱᓕᖏᑦᑐᒧᓪᓕ ᐊᑭᕋᕐᑐᕐᐹᖓ; ᐃᑲᔪᓚᐅᓐᖓ!
87ᑖᒃᑯᓇᓐᖓᑦ ᑐᖁᑕᐅᑲᓴᓚᐅᕐᐳᖓ;
ᐅᕙᖓᓕ ᐱᓇᓱᐊᕐᑕᐅᖁᔭᑎᑦ ᕿᒪᓚᐅᓐᖏᓚᒃᑲ.
88ᓇᒡᓕᒍᓱᖕᓂᕐᓄᑦ ᓱᖁᓯᔪᐃᑦᑐᒧᑦ ᐃᓅᓯᕋ ᓴᐳᑎᓚᐅᕈᒃ;
ᖃᓂᕐᐱᑦ ᐅᖃᐅᓯᕆᔭᖏᓐᓂᒃ ᓈᓚᒍᓐᓇᖁᓪᓗᖓ.
ᓚᒥᑦ
ᐊᑕᓂᐅᑉ ᐱᖁᔭᖏᓐᓂᒃ ᐅᒃᐱᕈᓱᖕᓂᖅ
89ᐊᑕᓃᖅ, ᐅᖃᐅᓯᕐᑎᑦ ᕿᓚᖕᒥ ᓱᖁᓯᔪᐃᑦᑑᕗᑦ ᐃᓱᖃᖏᑦᑐᒧᑦ.
90ᓱᖁᓯᔪᐃᑦᑑᓃᑦ ᑭᖑᕚᕇᓕᒫᓄᑦ ᑐᕌᕐᐳᖅ;
ᓄᓇᕐᔪᐊᖅ ᐋᖅᑭᓚᐅᕋᕕᐅᒃ, ᑕᕝᕙᓃᖏᓐᓇᓕᕐᐳᖅ ᓱᖁᓯᓚᐅᕋᓂ.
91ᑎᓕᓯᑦᔪᑎᒋᓯᒪᔭᑎᑦ ᓱᓕ ᐅᓪᓗᒥᒧᑦ ᑎᑭᓪᓗᒍ ᑲᔪᓯᕗᑦ;
ᑕᒪᕐᒥᑦᓯᐊᖅ ᐱᔨᑦᓯᕐᑎᒋᒐᕕᒋᑦ.
92ᐱᖁᔭᑎᑦ ᖁᕕᐊᓱᓕᕐᑎᑕᐅᑦᔪᑎᒋᓚᐅᖏᒃᑯᒃᑭᑦ,
ᐊᓯᐅᑎᑕᐅᓯᒪᓕᕋᔭᓚᐅᕐᐳᖓ ᐅᖁᒤᒃᓴᕐᑎᑕᐅᓂᒃᑰᓕᕐᑎᓪᓗᖓ.
93ᐱᓇᓱᐊᕐᑕᐅᖁᔭᑎᑦ ᐳᐃᒍᓚᐅᕐᓯᒪᓂᐊᓐᖏᓚᒃᑲ;
ᑖᒃᑯᑎᒎᓇᖅ ᐅᕙᓐᓂᒃ ᐃᓅᓯᕐᑖᕐᑎᑦᓯᓯᒪᒐᕕᑦ.
94ᐱᖁᑎᒋᒐᕕᖓ, ᐱᐅᓕᓚᐅᓐᖓ; ᐱᓇᓱᐊᕐᑕᐅᖁᔭᑎᑦ ᕿᓂᕐᓯᒪᒐᒃᑭᑦ.
95ᐱᐅᖏᑦᑐᑦ ᐅᕙᓐᓂᒃ ᐅᑕᖅᑭᐅᕐᐳᑦ ᑐᖁᑦᓯᔪᒪᓪᓗᑎᒃ;
ᐅᕙᖓᓕ ᐃᓕᓮᑦᔪᑎᒋᔭᑎᑦ ᕿᓂᕐᓂᐊᕐᐸᒃᑲ.
96ᐃᓄᐃᑦ ᐱᑦᓯᐊᕋᓱᒃᑲᓗᐊᕐᓗᑎᒃ ᐃᓱᓕᔭᓐᓂᖏᑦ ᑕᑯᓯᒪᕙᒃᑲ,
ᐱᖁᔭᕕᓪᓕ ᐱᐅᓂᖏᑦ ᐃᓱᓕᕝᕕᖃᓐᖏᓚᑦ.
ᒥᒻ
ᐊᑕᓂᐅᑉ ᐱᖁᔭᖏᓐᓂᒃ ᐅᖓᒋᔭᖃᕐᓂᖅ
97ᐃᓛᒃ, ᐱᖁᔭᑎᑦ ᐊᖏᔪᒥᒃ ᐅᖓᒋᕙᒃᑲ!
ᐅᓪᓗᓕᒫᖅ ᐃᓱᒪᒃᓴᕐᓯᐅᕈᑎᒋᖃᑦᑕᕐᐸᒃᑲ.
98ᐱᖁᔭᕕᑦ ᓯᓚᑐᓂᕐᓴᐅᑎᑉᐹᖓ ᐊᑭᕋᕐᑐᕐᑎᒋᔭᓐᓂᑦ,
ᑖᒃᑯᐊᓗ ᐱᓯᒤᓐᓇᕐᓂᐊᕐᐸᒃᑲ.
99ᖃᐅᔨᒪᓂᕐᓴᐅᕗᖓ ᐃᓕᓮᔨᒋᓯᒪᔭᓕᒫᓐᓂᑦ,
ᐃᓕᓮᑦᔪᑎᒋᓯᒪᔭᑎᑦ ᐃᓱᒪᒃᓴᕐᓯᐅᕈᑎᒋᓯᒪᒐᒃᑭᑦ.
100ᑐᑭᓯᓯᒪᓂᕐᓴᐅᓕᕐᐳᖓ ᐃᓄᑐᖃᐅᔪᓂᑦ,
ᐱᓇᓱᐊᕐᑕᐅᖁᔭᑎᑦ ᓈᓚᒐᒃᑭᑦ.
101ᐱᐅᖏᑦᑐᓕᓂᓕᒫᓂᒃ ᐊᑐᕐᑍᓕᒪᓚᐅᕐᐳᖓ,
ᐅᖃᐅᓯᕐᓂᒃ ᓈᓚᒍᓐᓇᖁᓪᓗᖓ.
102ᐊᑐᕐᑕᐅᖁᔭᕐᓂᒃ ᓈᒻᒪᓈᕐᑐᓂᒃ ᕿᒤᓚᐅᓐᖏᓚᖓ,
ᐃᕝᕕᑦ ᓇᖕᒥᓂᖅ ᐃᓕᓴᕐᑎᓚᐅᕋᕕᖓ.
103ᐅᖃᐅᓯᕐᑎᑦ ᐅᕙᓐᓄᑦ ᒪᒪᕐᑑᕗᑦ!
ᐄᓛᒃ, ᒪᒪᕐᓂᕐᓴᐅᕗᑦ ᐊᒡᓛᑦ ᕼᐊᓂᒥᑦ!
104ᐱᓇᓱᐊᕐᑕᐅᖁᔭᕐᓄᑦ ᖃᐅᔨᒪᑎᑕᐅᓕᕐᐳᖓ;
ᑍᒤᒻᒪᑦ ᓱᓕᖏᑦᑐᓕᒫᓂᒃ ᐱᐅᒃᓴᓐᖏᓚᖓ.
ᓇᓐ
ᐊᑕᓂᐅᑉ ᐱᖁᔭᖏᓐᓄᑦ ᖃᐅᒪᔪᒦᑎᑕᐅᓂᖅ
105ᐅᖃᐅᓯᕐᑎᑦ ᓇᓂᕈᐊᖑᕗᑦ ᐃᓅᓯᓐᓄᑦ,
ᐊᖅᑯᑎᒋᓂᐊᕐᑕᓐᓂᒡᓗ ᖃᐅᒪᑎᑦᓯᓪᓗᑎᒃ.
106ᐊᖏᒻᒪᕆᒃᓗᖓ ᐅᖃᕐᓯᒪᕗᖓ ᐊᑐᕈᒪᓪᓗᖓ,
ᓈᓚᒍᒪᓂᕋᕐᓗᖓ ᐊᑐᕐᑕᐅᖁᔭᕐᓂᒃ ᓇᓛᒎᕐᑐᓂᒃ.
107ᐊᖏᔪᒥᒃ ᐋᓐᓂᐊᓇᕐᑐᒦᑉᐳᖓ;
ᐊᑕᓃᖅ, ᒪᑭᑎᒃᑲᓐᓂᓚᐅᓐᖓ, ᐅᖃᐅᓯᕐᑎᑦ ᒪᓕᒡᓗᒋᑦ!
108ᐊᑕᓃᖅ, ᖃᓂᕐᒪ ᑐᓂᕐᕈᑎᖏᑦ ᓂᕐᑐᐃᓃᑦ ᐃᓚᓕᐅᒃᑭ,
ᐊᔪᕆᕐᑐᓚᐅᓐᖓᓗ ᐊᑐᕐᑕᐅᖁᔭᕐᓂᒃ.
109ᐃᓅᓯᕋ ᑐᓂᑐᐃᓐᓇᕆᐊᖃᕐᑕᑦᑐᑦ ᑎᒍᒥᐊᖏᓐᓇᕐᐸᕋ,
ᐱᖁᔭᑎᓪᓕ ᓱᓕ ᐳᐃᒍᓚᐅᓐᖏᓚᒃᑲ.
110ᐱᐅᖏᑦᑐᑦ ᐅᕙᓐᓂᒃ ᓂᒐᕐᕕᒃᓴᓕᐅᕐᓯᒪᕗᑦ,
ᐅᕙᖓᓕ ᐱᓇᓱᐊᕐᑕᐅᖁᔭᕐᓂᒃ ᓱᓕ ᓈᓚᒍᓐᓃᓚᐅᓐᖏᓚᖓ.
111ᐃᓕᓮᑦᔪᑎᒋᓯᒪᔭᑎᑦ ᑭᖑᕐᖑᑎᔭᒃᓴᕐᑖᕆᕙᒃᑲ ᐃᓱᖃᖏᑦᑐᒧᑦ;
ᐄᓛᒃ, ᑖᒃᑯᐊ ᐆᒻᒪᑎᒪ ᖁᕕᐊᓱᒍᑎᒋᕔᑦ.
112ᐆᒻᒪᑎᒃᑯᑦ ᑐᑭᑖᕐᓯᒪᕗᖓ ᐊᑐᕐᑕᐅᖁᔭᑎᑦ
ᑕᐅᕗᖓᓕᒫᖅ ᓈᓚᒍᒪᓪᓗᒋᑦ, ᐃᓅᓯᕐᒪ ᐃᓱᐊᓄᑦ.
ᓴᒥᒃ
ᐊᑕᓂᐅᑉ ᐱᖁᔭᖏᑕ ᐊᑦᑕᓇᕐᑐᕐᑕᖃᖏᓐᓂᖏᑦ
113ᐃᓄᐃᑦ ᐃᓕᖕᓄᑦ ᒪᕐᕈᒍᓯᕐᑐᑦ ᖁᕕᐊᒋᓐᖏᓚᒃᑲ,
ᐱᖁᔭᑎᓪᓕ ᐅᖓᒋᕙᒃᑲ.
114ᐃᔨᕐᓯᒪᕕᒃᓴᕆᕙᒋᑦ ᓴᐴᓗᑕᕆᓪᓗᑎᓪᓗ;
ᐅᖃᐅᓯᕐᑎᑦ ᓂᕆᐅᒡᕕᒋᕙᒃᑲ.
115ᐅᕙᓐᓂᑦ ᕿᒪᕉᑎᒋᑦᓯ, ᐃᓕᑦᓯ ᐊᔪᕐᑐᓕᔪᓯ,
ᒎᑎᒪ ᐱᖁᔭᖏᑦ ᒪᓕᖕᓂᐊᕋᒃᑭᑦ.
116ᒪᑭᑕᑎᓚᐅᓐᖓ ᐊᖏᕐᓯᒪᓂᕆᔧᑦ ᒪᓕᒡᓗᒍ,
ᐃᓅᔪᓐᓇᖁᓪᓗᖓ, ᓂᕆᐅᖕᓂᖃᕐᓂᕋ ᑲᓐᖑᓲᑎᒃᓴᐅᓕᖁᓇᒍ.
117ᓇᖏᕈᓐᓇᕐᑎᓚᐅᓐᖓ, ᐊᑦᑕᕐᓇᕐᑐᒦᖁᓇᖓ
ᑕᕝᕙ ᐊᑐᕐᑕᐅᖁᔭᑎᑦ ᐃᒃᐱᒋᑦᓯᐊᖏᓐᓇᕈᓐᓇᕐᓂᐊᕐᐸᒃᑲ.
118ᐱᐅᒋᓐᖏᓚᑎᑦ ᑕᒪᕐᒥᒃ ᐊᑐᕐᑕᐅᖁᔭᕐᓂᒃ ᕿᒤᔪᑦ;
ᐄᓛᒃ, ᐅᐃᕖᕐᕆᒃᓯᓂᖏᑦ ᓴᒡᓗᓂᕐᒦᒻᒪᑕ.
119ᐱᐅᖏᑦᑐᓕᒫᑦ ᓄᓇᒦᑦᑐᑦ ᐱᐅᖏᓐᓂᕐᓗᑯᑎᑐᑦ ᑍᒤᑎᑉᐸᑎᑦ;
ᑍᒤᒻᒪᑦ ᐃᓕᓮᑦᔪᑎᑎᑦ ᐅᖓᒋᕙᒃᑲ.
120ᑎᒥᒐ ᓴᔪᒃᐳᖅ ᐃᓕᖕᓂᒃ ᓯᕘᕋᓂᕐᒧᑦ;
ᐃᖅᑲᕐᑐᐃᓃᓪᓗ ᑲᑉᐱᐊᒋᕙᕋ.
ᐂᓐ
ᐊᑕᓂᐅᑉ ᐱᖁᔭᖏᓐᓂᒃ ᓈᓚᖕᓂᖅ
121ᐱᐅᔪᒥᒃ ᓈᒻᒪᓈᕐᑐᒥᒡᓗ ᐱᓇᓱᐊᕐᓯᒪᕗᖓ;
ᑐᓂᑦᑍᓕᓐᖓ ᐊᑭᕋᕐᑐᕐᑎᒃᑲᓄᑦ.
122ᖁᓚᕐᓇᖏᑦᓯᐊᕐᑐᒥᒃ ᐱᔩᑦ ᐱᐅᔪᒧᑦ ᐃᑲᔪᕈᒃ;
ᐱᐅᔪᕆᔪᑦ ᐅᖁᒤᓪᓕᐅᕐᑎᑦᓯᖁᓇᒋᑦ ᐅᕙᓐᓂᒃ.
123ᐃᔩᒃᑲ ᑕᖃᓕᕐᐴᒃ ᐱᐅᓕᒃᓯᓂᕐᓂᒃ ᕿᓂᕐᓂᕐᒧᑦ,
ᐊᖏᕈᑎᒋᓯᒪᔭᕕᓪᓗ ᐃᓱᐊᕐᑑᑉ ᐊᑐᓕᕐᓂᒃᓴᖓᓂᒃ.
124ᐱᔩᑦ ᐱᓇᓱᐊᕐᕕᒋᓚᐅᕈᒃ ᓇᒡᓕᒍᓱᖕᓃᑦ ᓱᖁᓯᔪᐃᑦᑐᖅ ᒪᓕᒡᓗᒍ,
ᐊᔪᕆᕐᑐᓚᐅᓐᖓᓗ ᐊᑐᕐᑕᐅᖁᔭᕐᓂᒃ.
125ᐱᔨᒋᒐᕕᖓ; ᑐᑭᓯᑎᓚᐅᓐᖓ,
ᐃᓕᓮᑦᔪᑎᒋᔭᕐᓂᒃ ᖃᐅᔨᒪᔪᓐᓇᖁᓪᓗᖓ.
126ᐊᑕᓃᖅ, ᐱᒋᐊᕐᕕᒃᓮᑦ ᓇᓪᓕᐅᑎᕗᖅ,
ᐱᖁᔭᑎᑦ ᓯᖁᒥᑕᐅᓯᒪᓕᕐᒪᑕ.
127ᑍᒤᒻᒪᑦ ᐱᖁᔭᑎᑦ ᐅᖓᒋᓂᕐᓴᕆᕙᒃᑲ ᒎᓗᒥᑦ,
ᐄᓛᒃ, ᐊᒡᓛᑦ ᒎᓗᓂᑦ ᐱᐅᓂᕐᐹᓂᑦ.
128ᑍᒤᒻᒪᑦ ᐱᓇᓱᐊᕐᑕᐅᖁᔭᑎᑦ ᓈᓚᒻᒪᕆᒃᐸᒃᑲ;
ᐱᓂᐊᕐᓂᓕᒫᓪᓗ ᓱᓕᖏᑦᑐᑦ ᐱᐅᒋᓐᖏᓚᒃᑲ.
ᐱ
ᐊᑕᓂᐅᑉ ᐱᖁᔭᖏᓐᓂᒃ ᓈᓚᒍᒪᓂᖃᕐᓂᖅ
129ᐃᓕᓮᑦᔪᑎᒋᔭᑎᑦ ᐱᐅᔪᐊᓘᕗᑦ; ᑍᒤᒻᒪᑦ ᑕᕐᓂᕐᒪ ᓈᓚᒃᐰᑦ.
130ᐅᖃᐅᓯᕐᓂᒃ ᖃᐅᔨᑎᑕᐅᓕᕐᓗᓂ ᖃᐅᒻᒪᒃᑎᑕᐅᓇᕐᐳᖅ;
ᓯᓚᑐᓂᕐᑖᕐᑎᑦᓯᓪᓗᑎᒡᓗ ᖃᐅᔨᒪᖏᑦᑐᒥᒃ.
131ᖃᓂᕋ ᐂᑦᑕᕐᐸᕋ ᐃᒥᕈᖕᓂᕐᒧᑦ, ᐱᖁᔭᑎᑦ ᑲᔪᖏᕐᕕᒋᒐᒃᑭᑦ.
132ᐅᕙᓐᓄᑦ ᑕᑯᓴᕐᓗᑎᑦ, ᓂᑲᒋᓚᐅᓐᖓ,
ᑍᒫᓪᓗᐊᖅ ᐱᓂᐊᕐᕕᒋᕙᒃᑲᕕᒋᑦ ᐃᓕᖕᓂᒃ ᐅᖓᒋᔭᖃᕐᑐᑦ.
133ᐃᓅᓯᕋ ᒪᓕᑦᓯᐊᕐᑎᒍᒃ ᐅᖃᐅᓯᕐᓂᒃ,
ᐊᔪᕐᑐᓕᓂᕐᓄᑦ ᓇᓪᓕᐊᓐᓄᓪᓘᓐᓃᑦ ᐊᐅᓚᑕᐅᓕᖁᓇᖓ.
134ᐱᐅᓕᓚᐅᓐᖓ ᐃᓄᖕᓂᑦ ᐅᖁᒤᓪᓕᐅᕐᑎᑦᓯᔪᓂᑦ,
ᐱᓇᓱᐊᕐᑕᐅᖁᔭᕐᓂᒃ ᒪᓕᒍᓐᓇᖁᓪᓗᖓ.
135ᑮᓁᑦ ᖃᐅᒪᑎᓚᐅᕈᒃ ᐱᔨᖕᓄᑦ,
ᐊᔪᕆᕐᑐᕐᓗᖓᓗ ᐊᑐᕐᑕᐅᖁᔭᕐᓂᒃ.
136ᖁᕝᕕᐅᕐᓂᕐᒧᑦ ᐃᔩᒃᑲᒃ ᑯᕕᑐᐃᓐᓇᓕᕐᐴᒃ,
ᐱᖁᔭᕐᓂᒃ ᓈᓚᖏᑦᑐᑦ ᐱᑦᔪᑎᒋᓪᓗᒋᑦ.
ᓴᑎ
ᐊᑕᓂᐅᑉ ᐱᖁᔭᖏᑕ ᓈᒻᒪᓈᑦᓯᐊᕐᓯᒪᓂᖏᑦ
137ᐊᑕᓃᖅ ᐃᕝᕕᑦ ᓇᓛᒎᕐᐳᑎᑦ,
ᐋᖅᑭᒃᓱᐃᓂᑎᓪᓗ ᓈᒻᒪᓈᕐᓯᒪᓪᓗᑎᒃ.
138ᐃᓕᓮᑦᔪᑎᒋᓪᓗᒋᑦ ᐊᑐᕐᑕᐅᖁᓚᐅᕐᑕᑎᑦ,
ᓈᒻᒪᓈᕐᓯᒪᑦᓯᐊᕐᐳᑦ ᓱᖁᓯᔪᐃᑦᑑᓪᓗᑎᒡᓗ.
139ᓂᓐᖓᖕᓂᕐᒧᑦ ᑎᑭᑕᐅᑲᓪᓚᒃᐳᖓ,
ᐊᑭᕋᕐᑐᕐᑎᒪ ᐅᖃᐅᓯᕐᑎᑦ ᐳᐃᒍᕐᒪᒋᑦ.
140ᐅᖃᐅᓰᑦ ᐃᓚᓯᒪᖏᑦᓯᐊᕐᒪᑦ,
ᑍᒤᒻᒪᑦ ᐱᔨᕕᑦ ᐅᖓᒋᕔᑦ.
141ᐱᓪᓚᕆᐅᓐᖏᓚᖓ ᓇᕐᕈᒋᔭᐅᓪᓗᖓᓗ,
ᐱᓇᓱᐊᕐᑕᐅᖁᔭᑎᓪᓕ ᐳᐃᒍᕐᓯᒪᓐᖏᓚᒃᑲ.
142ᐃᓱᐊᕐᓃᑦ ᐃᓱᖃᖏᑦᑐᒧᑦ ᐃᓱᐊᕐᓂᐅᕗᖅ,
ᐱᖁᔭᑎᓪᓗ ᓱᓕᔫᓪᓗᑎᒃ.
143ᐊᑲᐅᖏᑦᔪᑎᒃᓴᓄᑦ ᐃᓱᒪᔮᕐᓇᕐᑐᓄᓪᓗ ᑎᑭᑕᐅᕗᖓ,
ᐱᖁᔭᑎᓪᓕ ᖁᕕᐊᓱᖕᓂᕐᑖᕐᕕᒋᕙᒃᑲ.
144ᐃᓕᓮᑦᔪᑎᑎᑦ ᐃᓱᐊᕐᓂᐅᕗᑦ ᐃᓱᖃᖏᑦᑐᒧᑦ;
ᑖᒃᑯᓂᖓ ᑐᑭᓯᑎᓚᐅᓐᖓ, ᑕᕝᕙ ᐃᓅᓂᐊᕐᐳᖓ.
ᖁᑉ
ᑐᒃᓯᐊᕐᓂᖅ ᓴᐳᑎᔭᐅᔪᒪᓂᕐᒧᑦ
145ᐆᒻᒪᑎᒃᑯᑦ ᐃᓗᖏᕐᓱᑦᓯᐊᕐᓗᖓ ᓂᓪᓕᐊᕕᒋᕙᒋᑦ;
ᐊᑕᓃᖅ, ᑭᐅᓚᐅᓐᖓ! ᐊᑐᕐᑕᐅᖁᔭᑎᑦ ᓈᓚᖕᓂᐊᕐᐸᒃᑲ.
146ᐃᓕᖕᓄᑦ ᓂᓪᓕᐊᕗᖓ; ᐱᐅᓕᓚᐅᓐᖓ,
ᐅᓐᓂᕐᓯᐅᑎᒋᔭᕐᓂᒃ ᓈᓚᒍᓐᓇᖁᓪᓗᖓ.
147ᖃᐅᒻᒪᓚᐅᕐᑎᓐᓇᒍ ᒪᑭᓪᓗᖓ
ᓂᓪᓕᐊᕕᒋᕙᒋᑦ ᐃᑲᔪᕐᑕᐅᔪᒪᓪᓗᖓ;
ᐅᖃᐅᓯᕐᑎᑦ ᓂᕆᐅᒋᕙᒃᑲ.
148ᐅᓐᓄᐊᓕᒫᖅ ᓇᓪᓚᖓᓪᓗᖓ ᓯᑯᓐᖏᓚᐅᓐᖏᓚᖓ,
ᐅᖃᐅᓯᕐᓂᒃ ᐃᓱᒪᒃᓴᕐᓯᐅᕈᑎᖃᕐᓗᖓ.
149ᐊᑕᓃᖅ ᓂᐱᒐ ᑐᓴᓚᐅᕈᒃ ᓇᒡᓕᒍᓱᖕᓂᕐᓄᑦ ᐃᓱᖃᖏᑦᑐᒧᑦ,
ᐃᓱᐊᕐᑑᓃᑦ ᒪᓕᒡᓗᒍ ᐃᓅᓯᕋ ᒪᑭᑎᒃᑲᓐᓂᓚᐅᕈᒃ.
150ᐊᑭᕋᕐᑐᕐᑎᒃᑲ ᐅᕙᓐᓄᑦ ᑎᑭᓕᕐᐳᑦ ᐱᐅᖏᑦᑐᒥᒃ ᒪᓕᒐᖃᕐᑐᑦ;
ᐱᖁᔭᕐᓂᒡᓗ ᒪᓕᒐᑎᒃ.
151ᐊᑕᓃᕐᓕ ᖃᓂᑦᑑᕗᑎᑦ, ᐱᖁᔭᑎᓪᓗ ᓱᓕᔪᐃᓐᓇᐅᓪᓗᑎᒃ.
152ᐊᑯᓂᐅᓕᕐᑐᖅ ᐃᓕᓮᑦᔪᑎᖕᓂᒃ ᖃᐅᔨᓯᒪᓕᕐᐳᖓ;
ᐃᓱᖃᖏᑦᑐᒥᒃ ᑐᓐᖓᓂᕐᑖᕐᑎᓚᐅᕋᕕᒋᑦ.
ᕆᔅ
ᐃᑲᔪᕐᑕᐅᔪᒪᓂᕐᒧᑦ ᕿᓄᓂᖅ
153ᐋᓐᓂᐊᑎᑕᐅᓂᒃᑲ ᑕᑯᓚᐅᒃᑭᑦ ᓴᐳᑎᓗᖓᓗ,
ᐱᖁᔭᑎᑦ ᐳᐃᒍᖏᓐᓇᒃᑭᑦ.
154ᓵᓐᖓᔭᐅᑦᔪᑎᒃᓴᕆᔭᕋ ᐲᕐᑎᓪᓗᒍ ᓴᐳᑎᓚᐅᓐᖓ;
ᐃᓅᓯᕐᒥᒃ ᑐᓂᓚᐅᓐᖓ ᐊᖏᕈᑎᒋᓯᒪᔧᑦ ᒪᓕᒡᓗᒍ.
155ᐱᐅᖏᑦᑐᑦ ᐱᐅᓕᔭᐅᓂᕐᒥᑦ ᐅᖓᓯᒃᐳᑦ,
ᐊᑐᕐᑕᐅᖁᔭᕐᓂᒃ ᕿᓂᖏᒻᒪᑕ.
156ᐊᑕᓃᖅ, ᓂᑲᒍᓱᖕᓃᑦ ᐊᖏᔪᕐᔪᐊᖑᕗᖅ;
ᐃᓅᓯᕐᑖᕐᑎᓚᐅᓐᖓ ᐊᑦᔨᒌᒃᑎᑦᓯᓃᑦ ᒪᓕᒡᓗᒍ.
157ᓵᓚᖃᕋᓱᒃᑐᑦ ᐊᑭᕋᕐᑐᕐᑎᒃᑲᓗ ᐅᓄᕐᑑᕗᑦ;
ᐃᓕᓮᑦᔪᑎᒋᓯᒪᔭᕐᓂᒡᓕ ᕿᒤᓚᐅᓐᖏᓚᖓ.
158ᓯᓔᕐᕆᒃᓯᔩᑦ ᑕᑯᓐᓇᓕᕋᒃᑭᑦ ᕿᒃᓵᓕᕐᐳᖓ;
ᐅᖃᐅᓯᕐᑎᑦ ᓈᓚᖏᒻᒪᒋᑦ.
159ᑕᑯᓚᐅᕆᑦ ᐱᓇᓱᐊᕐᑕᐅᖁᔭᕐᓂᒃ ᐅᖓᒋᔭᖃᕐᓂᓐᓂᒃ!
ᐊᑕᓃᖅ, ᐃᓅᓯᕋ ᓴᐳᑎᓚᐅᕈᒃ ᓇᒡᓕᒍᓱᖕᓂᕐᓄᑦ ᐃᓱᖃᖏᑦᑐᒧᑦ.
160ᐊᑕᖏᑦᓯᐊᕐᓱᑎᒃ ᐅᖃᐅᓯᕐᑎᑦ ᓱᓕᕗᑦ;
ᐃᓱᐊᕐᓂᕐᓄᓪᓗ ᐊᑦᔨᒌᒃᑎᑦᓯᓂᑎᑦ ᑲᔪᓯᓂᐊᕐᓗᑎᒃ ᐃᓱᖃᖏᑦᑐᒧᑦ.
ᓯᓐ
ᐊᑕᓂᐅᑉ ᐱᖁᔭᖏᓐᓄᑦ ᑐᓂᓯᒪᑦᓯᐊᕐᓂᖅ
161ᐊᖓᔪᖅᑳᕐᔪᐊᑦ ᐱᑦᔪᑎᒃᓴᖃᕋᑎᒃ ᓵᓚᒋᓇᓱᐊᕐᐹᖓ,
ᐆᒻᒪᑎᒪᓕ ᐅᖃᐅᓯᕐᑎᑦ ᐅᐱᒋᒻᒪᕆᒃᐰᑦ.
162ᐅᖃᐅᓯᕐᑎᑦ ᖁᕕᐊᓲᑎᒋᕙᒃᑲ,
ᐱᖁᑎᕐᔪᐊᕌᓗᖕᓂᒃ ᓇᓂᓯᔪᑎᑐᑦ.
163ᓴᒡᓗᓂᖅ ᐆᒥᒋᕙᕋ ᓇᕐᕈᒋᓪᓗᒍᓗ,
ᐱᖁᔭᑎᓪᓕ ᐅᖓᒋᕙᒃᑲ.
164ᐅᓪᓗᒥ ᐊᑕᐅᓯᕐᒥ 7ᐃᓱᕐᓗᖓ ᓂᕐᑐᖃᑦᑕᕐᐸᒋᑦ,
ᐃᓱᐊᕐᓂᕐᓄᑦ ᐊᑦᔨᒌᒃᑎᑦᓯᓂᕆᔭᑎᑦ ᐱᓪᓗᒋᑦ.
165ᐊᖏᔪᒥᒃ ᓮᒪᓂᖃᕐᐳᑦ ᐱᖁᔭᕐᓂᒃ ᐅᖓᒋᔭᖃᕐᑐᑦ;
ᓱᓇᒧᓪᓘᓐᓃᑦ ᐹᓪᓚᒃᑎᑕᐅᓂᐊᕋᑎᒃ.
166ᐊᑕᓃᖅ, ᐱᐅᓕᒃᓯᓃᑦ ᓂᕆᐅᒋᕙᕋ,
ᐱᖁᔭᑎᓪᓗ ᐊᑐᖃᑦᑕᕐᓗᒋᑦ.
167ᑕᕐᓂᕐᒪ ᐃᓕᓮᑦᔪᑎᒋᔭᑎᑦ ᓈᓚᒃᐰᑦ;
ᐊᖏᔪᕐᔪᐊᒥᒡᓗ ᑖᒃᑯᐊ ᐅᖓᒋᓪᓗᒋᑦ.
168ᐱᓇᓱᐊᕐᑕᐅᖁᔭᑎᑦ ᐃᓕᓮᑦᔪᑎᒋᔭᑎᓪᓗ ᓈᓚᓚᐅᕐᐸᒃᑲ,
ᐊᑐᕐᓯᒪᔭᓕᒫᒃᑲᓗ ᖃᐅᔨᒪᕙᑎᑦ.
ᑕᐅ
ᑐᒃᓯᐊᕐᓂᖅ ᐃᑲᔪᕐᑕᐅᔪᒪᓂᕐᒧᑦ
169ᐊᑕᓃᖅ, ᓂᓪᓕᐊᓂᕋ ᐃᓕᖕᓄᑦ ᑎᑭᐅᑎᓚᐅᕐᓕ;
ᑐᑭᓯᑎᓚᐅᓐᖓ ᐅᖃᐅᓯᕐᑎᑦ ᒪᓕᒡᓗᒋᑦ.
170ᑐᒃᓯᐊᕐᓂᕋ ᐃᓕᖕᓄᑦ ᑎᑭᐅᑎᓚᐅᕐᓕ;
ᓴᐳᑎᓗᖓᓗ ᐅᖃᐅᓰᑦ ᒪᓕᒡᓗᒍ.
171ᖃᓂᕋ ᐊᓂᑦᓯᓂᐊᕐᐳᖅ ᓂᕐᑐᐃᓂᕐᒥᒃ,
ᐊᑐᕐᑕᐅᖁᔭᕐᓂᒃ ᐊᔪᕆᕐᑐᕈᕕᖓ.
172ᐅᖃᕋ ᐅᖃᐅᓯᖃᕐᓂᐊᕐᐳᖅ ᐅᖃᐅᓯᕐᓂᒃ,
ᐱᖁᔭᓕᒫᑎᑦ ᐃᓱᐊᕐᑐᓕᓂᐅᖕᒪᑕ.
173ᐊᒡᒐᒃᐱᑦ ᐊᑐᐃᓐᓇᐅᕕᒋᓕᖓ ᐃᑲᔪᕐᑕᐅᖁᓪᓗᖓ,
ᐱᓇᓱᐊᕐᑕᐅᖁᔭᑎᑦ ᓂᕈᐊᕐᓯᒪᒐᒃᑭᑦ.
174ᐊᑕᓃᖅ, ᐱᐅᓕᒃᓯᓃᑦ ᐅᖓᒋᕙᕋ,
ᐱᖁᔭᑎᓪᓗ ᖁᕕᐊᓱᒃᑎᑕᐅᑦᔪᑎᒋᕙᒃᑲ.
175ᑕᕐᓂᕋ ᐃᓅᓕ, ᐃᓕᖕᓂᒃ ᓂᕐᑐᐃᔪᓐᓇᖁᓪᓗᖓ;
ᐋᖅᑭᒃᓱᐃᓂᕐᓄᓪᓗ ᐃᑲᔪᕐᓗᖓ.
176ᓰᐱᑎᑐᑦ ᐊᓯᐅᓯᒪᔪᑎᑐᑦ ᑕᒻᒪᓚᐅᕐᐳᖓ;
ᐱᔩᑦ ᕿᓂᕆᐊᓚᐅᕈᒃ, ᐱᖁᔭᑎᑦ ᐳᐃᒍᓚᐅᖏᓐᓇᒃᑭᑦ.
Currently Selected:
ᐃᓐᖏᕈᑎᑦ 119: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
