ᔨᕆᒤᐊᐅᑉ ᐊᒡᓚᖏᑦ 52
52
ᔨᕉᓴᓕᐅᑉ ᐊᔪᓕᕐᖕᓂᖓ
ᐊᑕᓃᑦ ᐂᑉᐸᖏᑦ 24:18—25:7
1ᔨᑎᑬᐊ ᐊᖓᔪᖅᑳᕐᔪᐊᓐᖑᓚᐅᖅᐳᖅ ᐊᕐᕌᒍᖃᓕᖅᓗᓂ 21ᓂᒃ, ᐊᖓᔪᖅᑳᕐᔪᐊᕆᔭᐅᓚᐅᖅᐳᕐᓗ ᔨᕉᓴᓕᒥ ᐊᕐᕌᒍᓂᒃ 11ᓂᒃ, ᐊᓈᓇᖓ ᐊᑎᖃᖅᐳᖅ ᕼᐊᒧᑕᓕᒥᒃ ᔨᕆᒤᐊᐅᑉ ᐸᓂᖓ ᓕᑉᓇᒥ ᓄᓇᖃᖅᓗᓂ. 2ᔨᑎᑬᐊ ᐊᑕᓂᐅᑉ ᓵᖓᓂ ᐊᔪᖅᑐᓕᓚᐅᕆᕗᖅ ᔨᕼᐅᐃᐊᑭᒻᑎᑐᑦ. 3ᐊᑕᓂᐅᑉ ᓂᓐᖓᒡᕕᒋᓚᐅᕐᖕᒪᒋᑦ ᔨᕉᓴᓕᒥᐅᑦ ᔫᑕᒥᐅᓪᓗ ᐊᓯᕈᖅᑕᐅᓚᐅᖅᐳᑦ, ᐊᑕᓂᐅᓪᓗ ᐃᒋᓚᐅᖅᐰᑦ ᓵᒥᓂᑦ.
ᔨᑎᑬᐊᓕ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓂᒃ ᐊᑭᕋᖅᑐᓕᓚᐅᐳᖅ. 4#ᐃᓯᑭᐊᓕ 24:2.ᔨᑎᑬᐊᐅᑉ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᖏᑦᑕ 9ᖓᓐᓂ ᑕᖅᑮᑦ 10ᖓᓐᓂ, ᐅᓪᓗᖏᑦᑕ 10ᒋᓕᖅᑕᖓᓐᓂ ᓂᐱᑯᓁᓴ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦ ᐅᓇᑕᕆᐊᓕᓚᐅᖅᐳᖅ ᔨᕉᓴᓕᒥᐅᓂᒃ, ᐅᓇᑕᖅᑎᖁᑎᓕᒫᓂ ᐃᓚᒋᓪᓗᒋᑦ, ᔨᕉᓴᓕᐅᓪᓗ ᐊᕙᓗᕐᔪᐊᖓᑕ ᓯᓚᑖᓂ ᐊᕙᓗᓯᒪᓪᓗᒍ ᑕᖕᒫᖅᑎᓚᐅᖅᐳᑦ ᔨᕉᓴᓕᒥᐅᑦ ᐊᓂᔪᓐᓁᓪᓕᑎᓪᓗᒋᑦ. 5ᐃᒡᓗᒐᓴᒡᔪᐊᓪᓗ ᑍᒫᒃ ᐊᔪᓕᖅᑎᑕᐅᓯᒪᓚᐅᖅᐳᑦ, ᔨᑎᑬᐊᐅᑉ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᖏᑦᑕ 11ᖓᑦ ᑎᑭᓪᓗᒍ. 6ᑕᖅᑮᑦ ᓯᑕᒪᒋᓕᖅᑕᖓᓐᓂ ᐅᓪᓗᖏᑦᑕ 9ᖓᓐᓂ ᑳᖕᓇᖅᑐᕐᔪᐊᖃᓕᓚᐅᖅᐳᖅ ᑕᕝᕙᓂ, ᐃᓄᐃᑦ ᓂᕿᒃᓮᕈᑎᓚᐅᕐᖕᒪᑕ. 7#ᐃᓯᑭᐊᓕ 33:21.ᔨᕉᓴᓕᐅᑉ ᐊᕙᓗᕐᔪᐊᖓ ᐊᖕᒪᖅᑕᐅᖕᒪᑦ, ᐅᓇᑕᖅᑎᖁᑎᖏᑦ ᕿᒫᓚᐅᖅᐳᑦ, ᐅᓐᓄᐊᒃᑯᑦ ᐊᓂᐅᕋᖅᓗᑎᒃ ᐃᑎᖅᑕᕐᕕᒃᑯᑦ ᐊᕙᓗᕐᔪᐊᒃ ᒪᕐᕉᒃ ᐅᖓᓕᕇᒃ ᐊᑯᓐᓂᖓᓃᑦᑐᒃᑯᑦ, ᐊᖓᔪᖅᑳᕐᔪᐊᑉ ᐱᕈᖅᓰᕕᖁᑎᖓᑕ ᖃᓂᒋᔮᒍᑦ, ᑲᐅᓪᑎᐊᒥᐅᑦ ᐊᕙᑕᖏᖅᓯᓯᒪᒐᓗᐊᖅᑎᓪᓗᒋᑦ, ᕿᒫᕗᑦ ᓄᓇᐅᑉ ᐊᕋᐹᒥᒃ ᐊᑎᖃᖅᑑᑉ ᓇᓛᓄᑦ. 8ᑲᐅᓪᑎᐊᒥᐅᓪᓕ ᐅᓇᑕᖅᑐᒃᓴᖁᑎᖏᑕ ᔨᑎᑬᐊᒃᑯᑦ ᒪᓕᒃᑲᒥᑦᔪᒃ, ᐊᖑᕚᑦ ᔨᕆᑰᑉ ᓇᑎᕐᖕᓇᕐᔪᐊᖓᓂ, ᔨᑎᑬᐊᐅᓪᓗ ᐅᓇᑕᖅᑎᖁᑎᖏᑦ ᑕᕝᕙᓂ ᐊᕕᒃᑐᖅᓗᑎᒃ ᓇᒧᑐᐃᓐᓇᖅ ᕿᒫᕗᑦ, ᕿᒤᓪᓗᑎᒃ ᐊᖓᔪᖅᑳᒥᖕᓂᒃ. 9ᔨᑎᑬᐊᓗ ᑎᒍᔭᐅᕗᖅ, ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᓇᔪᖅᑕᖓᓄᑦ ᐋᑕᐅᕗᖅ ᕆᑉᓚᒦᑎᓪᓗᒍ ᕼᐊᒫᑎᐅᑉ ᓄᓇᖓᓂ, ᐃᖅᑲᖅᑐᖅᐹᓗ. 10ᓄᓇᒥ ᕇᑉᓚᒥ ᔨᑎᑬᐊᐅᑉ ᐃᕐᖕᓂᖏᑦ ᑐᖁᕋᖅᑕᐅᑎᑉᐰᑦ, ᔨᑎᑬᐊ ᑕᑯᓐᓇᖅᑎᓪᓗᒍ. ᔫᑕᒥᐅᑦ ᐊᖓᔪᖅᑳᖁᑎᖏᑦ ᑕᒪᕐᖕᒥᒃ ᑐᖁᑕᐅᑎᒃᑭᕔᑦ. 11#ᐃᓯᑭᐊᓕ 12:13.ᔨᑎᑬᐊᐅᑉ ᐃᔨᖏᒃ ᖄᖅᑕᐅᓚᐅᖅᐴᒃ, ᐊᖅᓵᖅᑑᔭᓄᓪᓗ ᐊᑦᓱᖏᖅᓯᒪᓕᖅᑎᓪᓗᒍ ᐹᐱᓘᓂᒧᐊᕈᑎᕚᑦ, ᑎᒍᔭᐅᓯᒤᓐᓇᓕᖅᓗᓂᓗ ᑐᖁᑐᐃᓐᓇᓚᐅᖅᐳᖅ.
ᑐᒃᓯᐊᕐᕕᒡᔪᐊᑉ ᓯᖁᑦᑎᖅᑕᐅᓂᖓ
ᐊᑕᓃᑦ ᐂᑉᐸᖏᑦ 25:8-17
12ᓂᐱᑯᓁᓴᐅᑉ ᐊᖓᔪᖅᑲᐅᓂᖓᑕ ᐹᐱᓘᓂᒥ ᐊᕐᕌᒍᖏᑕ 19ᖓᓐᓂ ᑕᖅᑮᑦ ᑕᓪᓕᒪᖓᓐᓂ, ᐅᓪᓗᖏᑕ ᖁᓕᖓᓐᓂ, ᓂᐳᔭᕋᑕᓐ ᐊᖓᔪᖅᑳᕐᔪᐊᑉ ᐅᓇᑕᖅᑎᖁᑎᖏᑕ ᐊᖓᔪᖅᑳᖓᑦ ᐱᔨᑦᓯᖅᓗᓂ ᐊᖓᔪᖅᑳᕐᔪᐊᒥᓂᒃ ᔨᕉᓴᓕᒧᑦ ᐃᑎᖅᐳᖅ. 13#ᐊᑕᓃᑦ ᓯᕗᓪᓖᑦ 9:8.ᑐᒃᓯᐊᕐᕕᒡᔪᐊᕐᓗ ᐃᑯᐊᓪᓚᒃᐹ, ᐊᖓᔪᖅᑳᕐᔪᐊᓪᓗ ᐃᒡᓗᖏᑦ ᐃᒡᓗᒐᓴᒡᔪᐊᓕᒫᓪᓗ ᔨᕉᓴᓕᒥ, ᐃᒡᓗᐃᑦ ᐱᒻᒪᕆᐅᓂᓕᒫᖏᑦ ᐃᑯᐊᓪᓚᒃᐰᑦ. 14ᑲᐅᓪᑎᐊᒥᐅᑦ ᐅᓇᑕᖅᑎᖏᑦ ᐊᖓᔪᖅᑳᒥᖕᓂᒃ ᐃᓚᓖᑦ ᔨᕉᓴᓕᐅᑉ ᐊᕙᓗᕐᔪᐊᓕᒫᖓ ᓯᖁᑦᑎᓚᐅᖅᐹᑦ. 15ᓂᐳᔭᕋᑕᓐ ᐊᖓᔪᖅᑳᒻᒪᕆᒋᔭᐅᔪᖅ ᐅᓇᑕᖅᑎᓄᑦ ᐊᐅᓪᓚᕈᑦᔨᓚᐅᖅᐳᖅ, ᐃᒡᓗᒐᓴᒡᔪᐊᕐᖕᓂ ᐊᒥᐊᒃᑰᔪᕕᓂᕐᖕᓂᒃ, ᐹᐱᓘᓂᐅᓪᓗ ᐊᖓᔪᖅᑳᕐᔪᐊᖓᓐᓄᑦ ᑐᓂᑦᔪᑎᒋᓂᑯᓂᒃ. 16ᓂᐳᔭᕋᑕᓐ ᕿᒤᓚᐅᐳᖅ ᐊᔪᖅᓴᕐᖕᓂᖅᐹᑦ ᐃᓚᖏᓐᓂᒃ ᐱᕈᖅᓰᕕᖕᓂ ᑲᒪᔨᐅᖁᓪᓗᒋᑦ.
17 #
ᐊᑕᓃᑦ ᓯᕗᓪᓖᑦ 7:15-47. ᑲᐅᓪᑎᐊᒥᐅᑦ ᓯᖁᑦᑎᕆᓚᐅᕆᕗᑦ ᐊᑕᓂᐅᑉ ᐃᒡᓗᖓᓂᒃ, ᑲᓐᓄᔭᓂᑦ ᓴᓇᓯᒪᔪᑦ ᐃᒡᓘᑉ ᓱᑲᖏᓐᓂᒃ, ᐃᑯᕐᕋᒃᓮᓪᓗ ᑕᒫᓃᕐᕆᔪᑦ, ᖃᑦᑕᕐᔪᐊᓪᓗ ᑲᓐᓄᔭᒥᑦ ᓴᓇᓯᒪᔪᑦ, ᓱᓇᑐᐃᓐᓁᓪᓗ ᑲᓐᓄᔭᐅᑐᐊᕐᖕᒪᑕ ᑕᒪᕐᖕᒥᒃ ᓇᒃᓴᖅᐰᑦ ᐹᐱᓘᓂᒧᑦ. 18ᒪᑯᐊᑦᑕᐅᖅ ᓇᒃᓴᖅᑕᐅᓚᖅᐳᑦ, ᐅᒃᑯᓰᑦ, ᐳᐊᕐᕆᑏᓪᓗ, ᑕᖅᑯᑏᓪᓗ, ᒪᒃᑲᐅᔧᑦ ᓯᖅᐸᖅᓮᑦᔪᑏᑦ, ᖃᔪᓕᕆᑦᔪᑏᑦ, ᓱᓇᑐᐃᓐᓁᓪᓗ ᑲᓐᓄᔭᒥᑦ ᓴᓇᓯᒪᔪᑦ ᑐᒃᓯᐊᕐᕕᒡᔪᐊᕐᖕᒥ ᐊᑐᖅᑕᐅᖃᑦᑕᖅᑐᓕᒫᑦ. 19ᐊᒻᒪᑦᑕᐅᖅ ᐅᓇᑕᖅᑏᑦ ᐊᖓᔪᖅᑳᒻᒪᕆᖓᑦᑕ ᑎᒍᓚᓚᐅᕆᕔᑦ, ᐅᐊᓴᕐᕖᑦ, ᐊᓪᓕᕅ, ᒪᒃᑲᐅᔧᑦ, ᖃᑦᑍᑦ, ᓇᓂᕈᐊᖃᕐᕖᑦ, ᖃᔪᓕᕆᑦᔪᑏᑦ, ᐃᒥᐅᑏᑦ, ᓱᓇᑐᐃᓐᓁᓪᓗ ᒎᓗᒥᑦ ᓯᐅᓪᕕᕆᒥᓪᓘᓐᓃᑦ ᓴᓇᔭᐅᓯᒪᔪᑦ. 20ᑖᒃᑯᐊ ᑲᓐᓄᔭᓂᑦ ᓴᓇᓯᒪᔪᑦ ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᓴᓇᔭᐅᑎᓚᐅᖅᑕᕕᓂᖏᑦ ᑐᒃᓯᐊᕐᕕᒃᔪᐊᓕᐅᖅᑎᑦᓯᒐᒥ, ᑲᑎᓐᓇᒥᒃ ᑕᒪᒃᑯᐊ ᐅᖁᒤᑦᑐᐊᓘᓚᐅᖅᐳᑦ, ᓱᑳᒡᓗ ᒪᕐᕉᒃ ᐃᑯᕐᕋᒃᓮᑦ, ᐃᒪᖃᐅᑏᓪᓗ, ᐃᒻᒧᒃᓯᐅᒊᓪᓗ ᐊᖑᓴᓪᓗᓐᖑᐊᖏᑦ 12 ᐅᕐᕈᑦᔧᒃᑯᑎᒋᔭᖏᑦ, ᑖᒃᑯᐊ ᑲᑎᓪᓗᒋᑦ ᐅᖁᒤᓐᓂᕐᖕᓂᐊᕆᐊᖏᑦ ᐅᖁᒤᓗᐊᓚᐅᖅᐳᑦ. 21ᓱᑳᒡᓗ ᑕᑭᓂᖃᖅᐴᒃ 27ᓂᒃ ᐃᑎᒐᖕᓂᒃ, 18ᓂᒃ ᐃᑎᒐᖕᓂᒃ ᓯᓕᖕᓂᖃᖅᓗᑎᒃ, ᐃᑦᔪᓂᖃᖅᓗᑎᒡᓗ ᐊᒡᒐᐅᑉ ᓯᓕᖕᓂᖓᑐᑦ ᓱᓪᓗᓕᐅᓪᓗᑎᒃ. 22ᐊᑐᓂᑦ ᓴᓇᓐᖑᐊᕐᕕᒋᓯᒪᓪᓗᑎᒃ ᖄᖓᒍᑦ ᐊᖓᔪᖅᑳᕐᔪᐊᑉ ᓇᓗᓁᒃᑯᑕᖓᓂᒃ 7ᓂᒃ ᕿᑎᖅᑲᒥᒡᓗ ᐃᑎᒐᖕᓂᒃ ᐊᖏᓂᖅᑲᖅᑑᖕᓂᒃ, ᑕᒪᕐᖕᒥᒃ ᓴᓇᓐᖑᐊᕐᕕᒋᓯᒪᓪᓗᑎᒃ ᑲᓐᓄᔭᓂᒃ ᐹᒥᒍᕌᓐᖑᐊᓂᒃ ᑕᑯᒥᓇᕈᑎᒃᑲᓐᓂᕐᖕᓂᒃ. 23ᑕᑯᒥᓇᕈᑎᓕᐅᖅᓯᒪᒃᑲᓐᓂᕆᓪᓗᓂ ᓴᓂᕌᒍᑦ ᐹᒥᒍᕌᓐᖑᐊᓂᒃ 96ᓂᒃ; ᐹᒥᒍᕌᓐᖑᐊᑦ ᑕᑯᒥᓇᖅᓴᐅᑎᖏᑦ ᑲᑎᓪᓗᒋᑦ 100ᐅᓚᐅᖅᐳᑦ.
ᔫᑕᐅᑉ ᐃᓄᖏᑕ ᐹᐱᓘᓂᒧᐊᕈᑦᔭᐅᓂᖏᑦ
ᐊᑕᓃᑦ ᐂᑉᐸᖏᑦ 25:18-21,27-30
24ᐅᓇᑕᖅᑐᒃᓮᑦ ᐊᖓᔪᖅᑳᒻᒪᕆᖓᑦ ᐊᐅᓪᓚᕈᑦᔨᓚᐅᕆᕗᖅ ᑎᒍᔭᒥᓂᒃ ᑐᓂᕐᕈᓯᖅᑎᑦᓯᔨᒥᒃ ᓯᕅᐊᒥᒃ ᑐᓂᕐᕈᓯᖅᑎᑦᓯᔨᓄᑦ ᐊᖓᔪᖅᑳᖑᔪᒥᒃ, ᔨᐸᓁᐊᒥᒡᓗ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖓᑦᑕ ᑐᖓᓕᖓᓂᒃ, ᐱᖓᓱᓪᓗ ᐃᑎᖅᑕᕐᕕᖕᒥ ᑲᒪᔨᐅᔪᑦ. 25ᐃᒡᓗᒐᓴᒡᔪᐊᓂ ᐊᒥᐊᒃᑰᔪᕕᓃᑦ ᐱᖃᓯᐅᑎᓚᐅᕆᕔᑦ, ᐅᓇᑕᖅᑐᒃᓴᓄᑦ ᐊᖓᔪᖅᑳᖑᔪᑦ, ᐊᖓᔪᖅᑳᕐᔪᐊᑉ ᐃᑲᔪᖅᑎᖏᑦ 7, ᑎᑎᕋᖅᑎᐅᔪᓪᓗ ᐊᖓᔪᖅᑳᕐᔪᐊᑉ ᑎᑎᕋᖁᑎᖏᓐᓂᒃ ᑲᒪᔩᑦ ᐃᓄᐃᑦ ᑎᑎᕋᖅᑕᐅᓯᒪᓂᖏᓐᓂᒃ ᐊᐅᓚᑦᓯᔪᑦ, 60ᐅᔪᓪᓗ ᐱᒻᒪᕆᐅᔪᑦ ᐊᖓᔪᖅᑳᕐᔪᐊᕐᖕᒧᑦ. 26ᓂᐳᔭᕋᑕᐅᑉ ᐅᓇᑕᖅᑏᑦ ᐊᖓᔪᖅᑳᒻᒪᕆᖓᑦᑕ ᑖᒃᑯᐊ ᑎᒍᔭᓂ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᐊᕈᑎᕔᑦ ᕆᑉᓚᒦᑦᑐᒧᑦ. 27ᑕᕝᕙᓂᓗ ᕆᑉᓚᒦᓪᓗᑎᒃ ᓱᓕ ᐹᐱᓘᓂᐅᑉ ᐊᖓᔪᖅᑳᕐᔪᐊᖓᑕ ᑖᒃᑯᐊ ᑐᖁᑕᐅᑎᑉᐰᑦ ᕼᐊᒫᑎᒥ, ᑕᕝᕙ ᔫᑕᒥᐅᑦ ᐃᓄᖏᑦ ᑎᒍᔭᐅᓚᐅᖅᐳᑦ ᐊᐅᓪᓚᕈᑦᔭᐅᓪᓗᑎᒡᓗ ᓄᓇᑐᖃᒥᖕᓂᑦ. 28ᐅᑯᐊ ᑕᕝᕙ ᐃᓄᐃᑦ ᐅᓄᕐᖕᓂᖏᑦ ᓂᐱᑯᓁᓴᐅᑉ ᐊᐅᓪᓚᕈᑎᓚᐅᖅᑕᖏᑦ; ᐊᕐᕌᒍᐃᑦ 7ᖓᓐᓂ ᐊᐅᓪᓚᕈᑦᔨᓚᐅᖅᐳᖅ ᔫᑎᓂᒃ ᐅᓄᕐᖕᓂᖃᖅᑐᓂᒃ 3,023ᓂᒃ. 29ᓂᐱᑯᓁᓴᐅᑉ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᐃᑦ 18ᖓᓐᓂ ᐊᐅᓪᓚᕈᑦᔨᓚᐅᖅᐳᖅ ᔨᕉᓴᓕᒥᐅᓂᒃ 832ᓂᒃ. 30ᓂᐱᑯᓁᓴᐅᑉ ᐊᖓᔪᖅᑳᕐᔪᐊᖑᓂᖓᑕ 23ᖓᓐᓂ ᐊᐅᓪᓚᕈᑦᔨᓚᐅᖅᐳᖅ ᔫᑎᓂᒃ 745ᓂᒃ. ᓂᐳᔭᕋᑕᓐ ᐅᓇᑕᖅᑏᑦ ᐊᖓᔪᖅᑳᒻᒪᕆᖓᑦᑕ ᐊᐅᓪᓚᕈᑎᔭᖏᑦ ᑲᑎᓕᒫᖅᓗᒋᑦ 4,600ᐅᓚᐅᖅᐳᑦ ᐃᓄᐃᑦ.
31ᔫᑕᒥᐅᑦ ᐊᖓᔪᖅᑳᕐᔪᐊᖓᑦᑕ ᔨᕼᐅᐃᐊᑭᐅᑉ ᐊᐅᓪᓚᕈᑦᔭᐅᓯᒪᓂᖓᑕ 37ᖓᓐᓂ ᐃᕗᓪᒥᕈᑖᒃ ᐊᖓᔪᖅᑳᕐᔪᐊᖑᓕᖅᑎᓪᓗᒍ ᐹᐱᓘᓂᒥ, ᔨᕼᐅᐃᐊᑭᓐ ᑎᒍᔭᐅᓯᒪᕕᖕᒥᑦ ᐊᓂᑎᓚᐅᖅᐹ ᑕᖅᑮᑦ 12ᖓᑦᑕ ᐅᓪᓗᖏᑦᑕ 25ᖓᓐᓂ. 32ᐱᑦᓯᐊᕐᕕᒋᓚᐅᖅᐹᓗ, ᐃᓂᑖᖅᑎᓪᓗᓂᐅᒡᓗ ᐅᐱᓐᓇᕐᖕᓂᖅᐹᖑᖃᑕᐅᔪᒥ ᐊᖓᔪᖅᑳᕐᔪᐊᓂᑦ ᑎᒍᔭᐅᓯᒪᖃᑎᒋᔭᖏᓐᓂᑦ ᐹᐱᓘᓂᒥ. 33ᔨᕼᐅᐃᐊᑭᐅᑉ ᑎᒍᔭᐅᓯᒪᓪᓗᓂ ᐊᓐᓄᕌᑦ ᐊᑐᖅᑕᕕᓂᓂ ᐲᖅᓗᓂᒋᑦ, ᐊᓯᖏᓐᓂᒃ ᐊᑎᓪᓗᓂ ᓂᕆᖃᑕᐅᖏᓐᓇᖃᑦᑕᓕᓚᐅᖅᐳᖅ ᐃᓅᓯᓕᒫᒥᓂ ᐊᖓᔪᖅᑳᕐᔪᐊᑉ ᓂᕆᕕᒋᕙᒃᑕᖓᓂ. 34ᖃᐅᑕᒫᓪᓗ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐃᓅᑦᔪᑎᒃᓴᖏᓐᓂᒃ ᑐᓂᓯᕕᒋᓚᐅᖅᐹ ᐃᓅᓂᓕᒫᖓᓂ, ᑐᖁᓂᖓ ᑎᑭᓪᓗᒍ.
Currently Selected:
ᔨᕆᒤᐊᐅᑉ ᐊᒡᓚᖏᑦ 52: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.