ᒨᓯᓯ ᓯᕗᓪᓖᑦ 7
7
ᓄᓇᕐᔪᐊᑉ ᐅᓕᕕᒃᔪᐊᖃᕐᖕᓂᖓ
1ᐊᑕᓂᕐᓗ ᓄᐊᕐᖕᒧᑦ ᐅᖃᖅᐳᖅ, “ᐅᒥᐊᕐᔪᐊᒧᑦ ᐃᑭᓕᕆᑦ, ᐃᓚᓕᒫᑎᑦ ᐃᓚᒋᓗᒋᑦ; ᖃᐅᔨᓯᒪᓕᕋᒪ ᓵᓐᓂ ᓯᓚᕐᔪᐊᓕᒫᒥ ᐃᓱᐊᖅᑐᒥᒃ ᐱᓇᓱᐊᖅᑐᑑᒐᕕᑦ ᒫᓐᓇ ᐃᓅᔪᓂ. 2ᓂᕐᔪᑎᓂᒃ ᓴᓗᒪᓂᕋᖅᑕᐅᔪᓂᒃ ᒪᕐᕉᑦᑕᖅᑎᓪᓗᒋᑦ 7ᓂᒃ ᐊᑦᔨᒌᖏᑦᑐᓂᒃ ᓇᒃᓴᕐᖕᓂᐊᖅᐳᑎᑦ, ᐊᖑᑎᓂᒃ ᐊᕐᖕᓇᓂᒡᓗ; ᐊᓯᖏᓐᓂᒡᓗ ᓂᕐᔪᑎᑦ ᒪᕐᕉᓈᖅᑎᖅᓗᒋᑦ ᓴᓗᒤᑦᑑᓂᕋᖅᑕᐅᔪᓂᒃ, ᐊᖑᑎᓂᒃ ᐊᕐᖕᓇᓂᓗ. 3ᑎᖕᒥᐊᓂᒃᑕᐅᖅ 7ᓂᒃ ᐊᑐᓂᑦ ᐊᑦᔨᒌᖏᑦᑐᓂᒃ ᒪᕐᕉᑦᑕᖅᑎᓪᓗᒋᑦ ᓇᒃᓴᕐᖕᓂᐊᖅᐳᑎᑦ, ᐊᖑᑎᓂᒃ ᐊᕐᖕᓇᓂᒡᓗ, ᑍᒤᓕᐅᖅᓗᑎᑦ ᑕᕝᕙ ᐆᒪᔪᓕᒫᑦ ᐊᑦᔨᒌᖏᑦᑐᑦ ᑎᖕᒥᐊᓪᓗ ᐆᒪᑎᑕᐅᖏᓐᓇᕈᓐᓇᕐᖕᓂᐊᖅᐳᑦ ᐊᑦᔨᒥᖕᓂᒃ ᕿᑐᕐᖏᐅᒃᑲᓐᓂᕈᓐᓇᖁᓪᓗᒋᑦ ᓄᓇᕐᔪᐊᕐᖕᒥ. 4ᐅᓪᓗᑦ 7 ᓈᒃᐸᑕ ᓯᓚᓗᒃᑎᑦᓯᓛᕋᒪ ᓄᓇᒧᑦ ᐅᓪᓗᓂᒃ ᐅᓐᓄᐊᓂᒡᓗ 40ᓂᒃ; ᐆᒪᔪᓕᒪᑦ ᑕᒪᕐᖕᒥᒃ ᓴᓇᓯᒪᔭᒃᑲ ᓄᓇᒦᑦᑐᑦ ᓄᖑᓪᓗᒋᑦ.” 5ᓄᐊᓗ ᐱᓇᓱᐊᓚᐅᖅᐳᖅ ᑕᒤᓐᓂᒃ ᐊᑕᓂᐅᑉ ᑎᓕᓯᑦᔪᑎᒋᓚᐅᖅᑕᖏᑦ ᒪᓕᒡᓗᒋᑦ.
6ᓄᐊ 600ᓂᒃ ᐊᕐᕌᒍᖃᖅᑎᓪᓗᒍ ᓄᓇ ᐅᓕᕕᒃᔪᐊᖃᓚᐅᖅᐳᖅ. 7#ᒫᑎᐅᓯ 24:38,39; ᓘᑲᓯ 17:27.ᓄᐊᓗ ᓄᓕᐊᖓᓗ, ᐃᕐᖕᓂᖏᑕᓗ ᓄᓕᐊᖏᑦ ᐃᓚᒋᓪᓗᒋᑦ, ᐅᒥᐊᕐᔪᐊᒧᑦ ᐃᑎᓚᐅᖅᐳᑦ, ᐅᓕᕕᒃᔪᐊᒥᑦ ᓴᐳᑎᔭᐅᖁᓪᓗᒋᑦ. 8ᓂᕐᔪᑎᓕᒫᓪᓗ ᓴᓗᒪᓂᕋᖅᑕᐅᔪᑦ, ᓂᕐᔪᑎᓪᓗ ᓴᓗᒤᓐᓂᕋᖅᑕᐅᔪᑦ, ᑎᖕᒥᐊᓪᓗ, ᐹᕐᖑᖅᑐᓕᒫᓪᓗ ᓄᓇᒥ, 9ᒪᕐᕉᓈᖅᑎᖅᓗᑎᒃ, ᐊᖑᑎᑦ ᐊᕐᖕᓁᓪᓗ, ᐅᒥᐊᕐᔪᐊᒧᑦ ᐃᑎᓚᐅᖅᐳᑦ ᓄᐊ ᐃᓚᒋᓪᓗᒍ, ᒎᑎᐅᑉ ᑍᒫᒃ ᐱᖁᓚᐅᕐᖕᒪᒍ. 10ᐅᓪᓗᐃᑦ 7 ᓈᖕᒪᑕ ᓄᓇ ᐅᓕᕕᒃᔪᐊᕐᖕᒧᑦ ᑎᑭᑕᐅᓕᖅᐳᖅ.
11 #
2 ᐲᑦᑐᕉᓯ 3:6. ᓄᐊᓗ 600ᓂᒃ ᐊᕐᕌᒍᖃᓕᖅᑎᓪᓗᒍ, ᑕᖅᑭᐅᑉ ᐂᑉᐸᖓᑕ ᐅᓪᓗᖏᑕ 17ᖓᓐᓂ ᓄᓇᐅᑉ ᐊᑖᓂᑦ ᐃᑎᔪᒥ ᑰᒃᑐᓕᒫᑦ ᓇᐅᒃᑯᑐᐃᓐᓇᖅ ᓱᐱᓕᓚᐅᖅᐳᑦ, ᕿᓚᐅᓪᓗ ᐃᒐᓛᖏᑦ ᑕᒪᕐᖕᒥᒃ ᒪᑐᐃᖅᓱᑎᒃ. 12ᓯᓚᓗᓕᓚᐅᖅᐳᕐᓗ ᐅᓪᓗᓂᒃ 40ᓂᒃ ᐅᓐᓄᐊᓂᒡᓗ 40ᓂᒃ. 13ᐅᓪᓗᒥ ᑕᕝᕙᓂᑦᓮᓐᓇᖅ ᓄᐊᓗ ᐃᕐᖕᓂᖏᓪᓗ ᓰᒻ, ᕼᐋᒻ ᔮᐱᑎᓗ, ᓄᐊᓪᓗ ᓄᓕᐊᖓ ᐃᕐᖕᓂᖏᑕᓗ ᓄᓕᐊᖏᑦ ᐱᖓᓱᑦ ᐅᒥᐊᕐᔪᐊᒧᑦ ᐃᑎᖅᐳᑦ. 14ᑖᒃᑯᐊ ᐆᒪᔪᐃᓪᓗ ᐊᑦᔨᒌᖏᑦᑐᑦ, ᐆᒪᔪᖁᑎᓪᓗ ᐊᑦᔨᒌᖏᑦᑐᑦ, ᐹᕐᖑᖅᑐᓂᒡᓗ ᑕᒤᓐᓂᒃ ᓄᓇᒥ ᖃᓄᐃᑦᑑᓂᑎᒃ ᒪᓕᒡᓗᒋᑦ, ᑎᖕᒥᐊᓪᓗ ᐊᑐᓂᑦ ᖃᓄᐃᑦᑑᓂᖏᑦ ᒪᓕᒡᓗᒋᑦ, ᑎᖕᒥᐊᑦ ᖃᓄᐃᑦᑐᑐᐃᓐᓁᑦ ᐊᑦᔨᒌᖏᑦᑐᑦ. 15ᐅᒥᐊᕐᔪᐊᒧᑦ ᐃᑎᓚᐅᖅᐳᑦ ᓄᐊ ᐃᓚᒋᓪᓗᒍ, ᒪᕐᕉᑦᑕᖅᓗᑎᒃ ᐆᒪᔪᓕᒫᑦ ᐊᓂᖅᓵᖅᑐᖅᑐᑦ. 16ᐃᑎᖅᑐᓪᓗ, ᐊᖑᑎᑦ ᐊᕐᖕᓁᓪᓗ ᑎᒥᖃᖅᑐᓕᒫᑦ, ᐃᑎᓚᐅᖅᐳᑦ ᒎᑎᐅᑉ ᑍᒫᒃ ᐱᖁᓚᐅᕐᖕᒪᒍ; ᐊᑕᓂᐅᓪᓗ ᑕᕝᕙ ᒪᑐᑦᔪᑎᕚ.
17ᐅᓕᑉᐸᓪᓕᐊᖏᓐᓇᓚᐅᖅᐳᖅ ᓱᓕ ᐅᓪᓗᓂᒃ 40ᓂᒃ ᓄᓇᒥ; ᐃᒪᐅᑉ ᐃᑎᓯᕙᓪᓕᐊᓂᖓᓄᑦ ᐅᒥᐊᕐᔪᐊᖅ ᐳᒃᑕᑎᑕᐅᓕᖅᐳᖅ, ᓄᓇᐅᑉ ᖁᓛᓃᓕᖅᓗᓂ. 18ᐃᒪᖅ ᐃᑎᓯᕙᓪᓕᐊᖕᒪᑦ ᐃᑎᔪᕐᔪᐊᖑᓕᓚᐅᖅᐳᖅ ᓄᓇᒥ; ᐅᒥᐊᕐᔪᐊᕐᓗ ᐳᒃᑕᓕᖅᐳᖅ ᐃᒫᓂ. 19ᐃᒪᕐᔪᐊᓪᓗ ᐃᑎᓯᓗᐊᕐᖕᓂᖓᓄᑦ ᖃᖅᑳᓗᐃᑦ ᐳᖅᑐᓂᖅᐹᑦ ᐊᒡᓛᑦ ᐅᓗᑦᔭᐅᕗᑦ ᕿᓚᐅᑉ ᐊᑖᓂ; 20ᐃᑎᓯᕙᓪᓕᐊᖏᓐᓇᓚᐅᖅᐳᕐᓗ ᖃᖅᑳᓗᐃᑦ ᐳᖅᑐᔪᑦ ᖁᓛᑎᒍᑦ, ᐅᓕᒡᓗᒋᑦ ᐆᒃᑐᕋᐅᑎᓂᒃ 15ᓂᒃ ᑭᐅᐱᑦᓯᓂᒃ ᐃᑎᓂᖃᓕᖅᓗᓂ. 21ᑕᒪᕐᖕᒥᒃ ᑎᒥᖃᖅᑐᑦ ᑐᖁᓚᐅᖅᐳᑦ ᓄᓇᕐᔪᐊᕐᖕᒥ ᐊᐅᓚᕙᒃᑐᑦ; ᑎᖕᒥᐊᓪᓗ, ᐆᒪᔪᖁᑏᑦ, ᓄᔪᐊᖅᑐᓪᓗ, ᑲᑎᓐᖓᔪᐊᓘᕙᒃᑐᓪᓗ ᓄᓇᒥ, ᐃᓄᐃᓪᓗ ᑕᒪᕐᖕᒥᒃ. 22ᑕᒪᕐᖕᒥᒃ ᓄᓇᒥ ᐸᓂᖅᑐᒥ ᕿᖓᕐᖕᒥᒍᑦ ᐊᓂᖅᓵᖅᑐᖅᑐᑦ ᑐᖁᓚᐅᖅᐳᑦ. 23ᐊᑕᓂᐅᑉ ᐆᒪᔪᓐᓇᖅᑐᓕᒫᑦ ᓄᓇᕐᔪᐊᕐᖕᒥ, ᐃᓄᐃᑦ, ᐆᒪᔪᑦ, ᐹᕐᖑᖅᑐᓪᓗ, ᑎᖕᒥᐊᓗ ᖃᖓᑕᕙᒃᑐᑦ; ᓄᖑᓚᐅᖅᐰᑦ ᓄᓇᒥ. ᓄᐊ ᐊᒥᐊᒃᑯᑑᓚᐅᖅᐳᖅ, ᐅᒥᐊᕐᔪᐊᕐᖕᒦᖃᑎᖏᓪᓗ. 24ᐅᓪᓗᐃᓪᓕ 150 ᓈᓚᐅᖅᐳᑦ ᓱᓕ ᑎᓂᑉᐸᓪᓕᐊᓚᐅᖅᑎᓐᓇᒍ.
Currently Selected:
ᒨᓯᓯ ᓯᕗᓪᓖᑦ 7: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.