ᒨᓯᓯ ᓯᕗᓪᓖᑦ 43
43
ᔫᓯᐱᐅᑉ ᐊᖓᔪᖏᑕ ᐅᑎᕐᓂᖓ ᐄᑦᔨᑉᑎᒧᑦ ᐱᓐᔭᒥᓂᒥᒃ ᐃᓚᖃᓕᕐᓗᑎᒃ
1ᑳᖕᓇᕐᑐᕐᔪᐊᕐᓕ ᓄᓇᒧᑦ ᐱᕙᓪᓕᐊᑐᐃᓐᓇᕐᐳᖅ. 2ᓂᐊᖂᔭᒃᓮᓪᓗ ᐄᑦᔨᑉᑎᒥᑦ ᓇᒃᓴᓚᐅᕐᑕᖏᑦ ᓄᖑᒻᒪᑕ, ᐊᑖᑕᖓᑦᑕ ᐅᖃᐅᑎᕔᑦ, “ᐊᐅᓪᓚᓚᐅᕐᒥᒋᑦᓯ, ᓂᐅᕕᕆᐊᕐᓗᓯ ᓂᕿᒃᓴᑦᑎᓐᓂᒃ.”
3ᔫᑕᐅᓪᓕ ᐅᖃᐅᑎᕙ, “ᑖᑦᓱᒪ ᐊᖑᑎᐅᑉ ᑯᒃᓴᓇᕐᑐᓪᓚᕆᐊᓗᖕᒥᒃ ᐅᖃᐅᑎᓚᐅᕐᐹᑎᒍᑦ, ᐅᖃᕐᓗᓂ, ‘ᑮᓇᕋ ᑕᑯᓂᐊᓐᖏᓚᓯ, ᓄᑲᓯ ᐃᓚᒋᓐᖏᑐᐊᕈᑦᓯᐅᒃ.’ 4ᓄᑲᕗᑦ ᐅᕙᑦᑎᓐᓄᑦ ᒪᓕᒃᑎᓐᓂᐊᑐᐊᕈᕕᐅᒃ, ᑕᕝᕙ ᑕᐅᓄᖓ ᐊᐅᓪᓚᕐᓂᐊᕐᐳᒍᑦ ᓂᕿᒃᓴᓂᒃ ᓂᐅᕕᕆᐊᕐᓗᑕ; 5ᑭᓯᐊᓂᓕ ᐅᕙᑦᑎᓐᓄᑦ ᒪᓕᒃᑎᓐᓂᐊᓐᖏᑐᐊᕈᕕᐅᒃ, ᑕᐅᓄᖓ ᐊᐅᓪᓚᕐᓂᐊᓐᖏᓚᒍᑦ, ᑖᑦᓱᒪ ᐊᖑᑎᐅᑉ ᐅᖃᐅᑎᓚᐅᕐᒪᑎᒍᑦ, ‘ᑮᓇᕋ ᑕᑯᓂᐊᓐᖏᓚᓯ, ᓄᑲᓯ ᐃᓚᒋᓐᖏᑐᐊᕈᑦᓯᐅᒃ.’”
6ᐃᓴᕆᐊᓕ ᐅᖃᕐᐳᖅ, “ᖃᓄᐃᒻᒪᑦ ᐅᕙᓐᓄᑦ ᐱᐅᖏᑦᑐᐊᓗᖕᒥᒃ ᐱᓂᐊᕐᓯᒪᕕᓯ ᐊᖑᑦ ᐅᖃᐅᑎᓚᐅᕋᑦᓯᐅᒃ ᓱᓕ ᓄᑲᖃᒃᑲᓐᓂᕐᓂᕋᕐᓗᓯ?”
7ᑖᒃᑯᐊ ᑭᐅᕗᑦ, “ᐊᖑᑎᐅᑉ ᐊᐱᕐᓱᓚᐅᕐᒪᑎᒍᑦ ᖃᐅᔨᓇᓱᐊᕐᓗᑕ ᐃᓚᕗᓪᓗ ᖃᐅᔨᓇᓱᐊᕐᓗᓂᒋᑦ, ᐅᖃᕐᓗᓂ, ‘ᐊᑖᑕᓯ ᓱᓕ ᐆᒪᕚ? ᓄᑲᖃᒃᑲᓐᓂᕐᐱᓰ?’ ᑕᕝᕙ ᐅᖃᐅᑎᓚᐅᕐᐸᕗᑦ ᐊᐱᖅᑯᑎᒋᔭᖓᓂᒃ ᑭᐅᓪᓗᑕ; ᖃᓄᕐᓕ ᖃᐅᔨᒪᒐᔭᓚᐅᕐᐱᑖ ᑖᑦᓱᒧᖓ ᐅᖃᐅᑎᔭᐅᓂᐊᕐᒪᖔᑦᑕ, ‘ᓄᑲᓯ ᐃᓕᑦᓯᓐᓄᑦ ᑎᑭᖃᑕᐅᖁᕙᕋ’?”
8ᔫᑕᓗ ᐅᖃᕐᐳᖅ ᐃᓴᕆᐊᓕᒧᑦ ᐊᑖᑕᒥᓄᑦ, “ᑖᓐᓇ ᓄᑲᑉᐱᐊᖅ ᐅᕙᓐᓄᑦ ᑲᒪᒋᔭᐅᑎᓚᐅᕈᒃ, ᑕᕝᕙ ᐸᕐᓇᒡᓗᑕ ᐊᐅᓪᓚᕐᓂᐊᕐᐳᒍᑦ, ᐱᕐᓕᖁᓇᑕ, ᑕᒪᑦᑕ ᐅᕙᒍᑦ ᐃᕝᕕᓪᓗ ᕿᑐᕐᖓᓕᒫᕗᓪᓗ. 9ᐅᕙᖓ ᓵᑕᒃᓴᐅᓂᐊᕐᐳᖓ ᑖᑦᓱᒧᖓ, ᑐᖁᑕᐅᑎᒃᑲᔭᕐᐸᕐᒪ. ᐃᓕᖕᓄᑦ ᐅᑎᕐᑎᖏᒃᑯᒃᑯ, ᑕᑯᒃᑲᓐᓂᕋᔭᖏᒃᑯᕕᐅᒡᓗ, ᑕᕝᕙ ᐅᕙᖓ ᐸᓯᔭᒃᓴᐅᑦᔪᑎᒋᓂᐊᕐᐸᕋ ᐃᓱᖃᖏᑦᑐᒧᑦ; 10ᑕᕝᕙ ᑭᖑᕙᐅᑎᒃᓴᖃᓚᐅᖏᒃᑯᑦᑕ, ᒫᓐᓇ ᒪᕐᕈᕕᒡᓗᑕ ᐅᑎᕐᓯᒪᓪᓗᐊᓕᕐᐳᒍᑦ.”
11ᑕᕝᕙ ᐊᑖᑕᖓᑦᑕ ᐃᓴᕆᐊᓕᐅᑉ ᐅᖃᐅᑎᕔᑦ, “ᑍᒤᑦᓴᕆᐊᖃᕐᐸᑦ, ᑍᒤᓕᐅᓕᕆᑦᓯ: ᓄᓇᑦᑕ ᐱᕈᕐᑐᖏᓐᓂᑦ ᐱᐅᓂᕐᐹᓂ ᓰᕐᓇᕐᑐᓂᒃ ᓇᒃᓴᕐᓗᓯ, ᑖᑦᓱᒧᖓ ᐊᖑᒻᒧᑦ ᐂᑦᑑᑎᒃᓴᐅᖁᓪᓗᒋᑦ, ᐸᐅᕐᖓᑯᓗᖕᓂᒃ ᕼᐊᓂᑯᓗᖕᓂᒡᓗ, ᑎᐱᑦᓯᐊᕆᒃᓴᐅᑎᓂᒃ, ᒧᕋᒥᒃ, ᖃᖅᑯᐊᒐᓂᒡᓗ ᐱᔅᑕᑦᓯᐅᓂᒃ, ᖃᖅᑯᐊᒐᓂᓗ ᐋᓪᒪᓐᓂᒃ. 12ᓂᐅᕕᐅᑎᒃᓴᓂᒃ ᒪᕐᕈᕕᓪᓗᐊᕐᑐᓂᒃ ᑮᓇᐅᔭᒡᒋᕐᓗᓯ; ᑍᒃᑯᐊᓗ ᐃᒃᐱᐊᕐᔪᖁᑎᑦᓯᓐᓂ ᑮᓇᐅᔧᑦ ᐴᕐᓯᒪᓪᓗᑎᒃ ᐅᑎᕐᑎᑕᐅᓚᐅᕐᑐᑦ ᓇᒃᓴᕐᓂᐊᕐᐸᓯ; ᑕᒻᒪᐅᑎᕕᓂᐅᑐᐃᓐᓇᕆᐊᖃᕐᒪᑕ. 13ᓄᑲᓯ ᓇᒃᓴᕐᓗᓯᐅᒃ, ᐸᕐᓇᒡᓗᓯ ᐊᐅᓪᓚᓕᕆᑦᓯ, ᐊᖑᑦ ᑍᓐᓇ ᐅᐸᒃᑲᓐᓂᕐᓗᒍ; 14ᒎᑎᐅᑉ ᐊᔪᒐᖃᖏᑦᑑᑉ ᓂᑲᒋᔭᐅᔪᓐᓇᕐᑎᓪᓕᓯ ᑖᑦᓱᒧᖓ ᐊᖑᒻᒧᑦ, ᐅᑎᕈᓐᓇᖁᓪᓗᓯ ᖃᑕᓐᖑᑎᓯ ᐃᓚᒋᓕᕐᓗᒍ ᐱᓐᔭᒥᓂᓗ. ᐅᕙᖓᓕ ᕿᑐᕐᖓᓐᓄᑦ ᕿᒃᓵᒃᑎᑕᐅᔭᕆᐊᖃᕈᒪ, ᑕᕝᕙ ᕿᒃᓵᖕᓂᐊᕐᐳᖓ.”
15ᑕᕝᕙ ᑖᒃᑯᐊ ᐂᑦᑑᑎᒃᓴᓂᒃ ᓇᒃᓴᕐᐳᑦ, ᑮᓇᐅᔧᓪᓗ ᒪᕐᕈᕕᓪᓗᐊᕐᑐᑦ ᓇᒃᓴᕆᕔᑦ, ᐱᓐᔭᒥᓂᓗ ᐃᓚᒋᓪᓗᒍ; ᐸᕐᓇᒃᑲᒥᒃ ᐊᐅᓪᓚᕐᐳᑦ ᐄᑦᔨᑉᑎᒧᑦ, ᑎᑭᓐᓇᒥᒡᓗ ᔫᓯᐱᒧᐊᕐᐳᑦ. 16ᔫᓯᐱᐅᓪᓗ ᐱᓐᔭᒥᓂ ᐃᓚᒋᔭᐅᔪᖅ ᑕᑯᒐᒥᐅᒃ, ᐱᔨᑲᑖᓂ ᐅᖃᐅᑎᕚ, “ᐅᑯᐊ ᐊᖑᑏᑦ ᐃᒡᓗᓐᓄᐊᕈᑎᓚᐅᒃᑭᑦ, ᐆᒪᔪᒥᒡᓗ ᑐᖁᑦᓯᓗᓯ ᓂᕿᒃᓴᓕᐅᓕᕆᑦᓯ, ᐅᑯᐊ ᐊᖑᑏᑦ ᐅᓪᓘᑉ ᕿᑎᕋᓕᕐᓂᖓᓂ ᓂᕆᖃᑎᒋᓂᐊᕋᒃᑭᑦ.” 17ᐊᖑᑦ ᑖᓐᓇ ᔫᓯᐱᐅᑉ ᐅᖃᐅᓯᖏᑦ ᒪᓕᒡᓗᒋᑦ ᐱᓇᓱᐊᕐᐳᖅ, ᐊᖑᑎᓪᓗ ᔫᓯᐱᐅᑉ ᐃᒡᓗᖓᓄᑦ ᐂᑎᓕᕐᐰᑦ.
18ᑖᒃᑯᐊᓕ ᓯᕘᕋᓕᕐᐳᑦ ᔫᓯᐱᐅᑉ ᐃᒡᓗᖓᓄᐊᖁᔭᐅᒐᒥᒃ, ᐅᖃᕐᓗᑎᒡᓗ, “ᑮᓇᐅᔧᑦ ᐃᒃᐱᐊᕐᔪᖁᑎᑦᑎᓐᓄᑦ ᐴᕐᑕᐅᓯᒪᔪᑦ ᐅᑎᕈᑎᓚᐅᕐᑕᕗᑦ ᐱᑦᔪᑎᒋᔭᐅᓪᓚᕆᓕᕐᐳᑦ, ᑕᕝᕗᓐᖓ ᐃᑎᕐᑎᑕᐅᓚᕿᕗᒍᑦ, ᐊᑭᓂᐊᕈᒪᓪᓗᑕ ᑎᒍᔪᒪᓪᓗᑕᓗ, ᓯᐊᓛᕐᑖᕆᔪᒪᓪᓗᑕ ᓯᐅᑎᖅᑯᕐᑐᔪᖁᑎᕗᓪᓗ ᐱᑖᕆᔪᒪᓪᓗᒋᑦ.” 19ᑕᕝᕙ ᔫᓯᐱᐅᑉ ᐱᔨᖓ ᒪᓕᒡᓗᒍ ᔫᓯᐱᐅᑉ ᐃᒡᓗᖓᓄᐊᓕᕐᐳᑦ, ᐃᒡᓘᓪᓗ ᐃᑎᕐᑕᕐᕕᖓᓂ ᑖᓐᓇ ᐅᖃᖃᑎᒋᓕᕐᐹᑦ, 20ᐅᖃᕐᓗᑎᒃ, “ᐊᖓᔪᖅᑳᒃ, ᓯᕗᓪᓕᕐᒥᒃ ᓂᐅᕕᕆᐊᓚᐅᕋᑦᑕ ᓂᕿᒃᓴᑦᑎᓐᓂᒃ; 21ᑭᓯᐊᓂᓕ ᓯᓂᒃᑕᕋᓱᐊᓕᕐᓗᑕ ᐃᒃᐱᐊᕐᔪᖁᑎᕗᑦ ᕿᓚᕈᑦᔮᕋᑦᑎᒍ, ᐊᖑᑏᑦ ᑮᓇᐅᔭᓕᒫᖏᑦ ᐃᒃᐱᐊᕐᔪᖁᑎᖏᓐᓃᑦᑐᑦ ᓇᓂᓚᐅᕐᐸᕗᑦ, ᐊᑭᓕᐅᑎᒋᓇᓱᓚᐅᕐᑕᕗᑦ ᐊᑕᖏᑦᓯᐊᕐᓗᑎᒃ; ᑕᕝᕙ ᑖᒃᑯᐊ ᑮᓇᐅᔧᑦ ᓇᒃᓴᒃᑲᓐᓂᓚᐅᕐᐸᕗᑦ ᑕᒪᐅᖓ, 22ᑮᓇᐅᔭᒃᑲᓐᓂᕐᓂᒡᓗ ᓇᒃᓴᒃᑲᓐᓂᕐᐳᒍᑦ ᓂᕿᒃᓴᓄᑦ ᓂᐅᕕᐅᑎᒃᓴᑦᑎᓐᓂᒃ. ᖃᐅᔨᒪᓐᖏᓚᒍᑦ ᑭᓇᒧᑦ ᑖᒃᑯᐊ ᑮᓇᐅᔭᕗᑦ ᐃᒃᐱᐊᕐᔪᖁᑎᑦᑎᓐᓄᑦ ᐴᕐᑕᐅᓐᓂᕐᒪᖔᑕ.”
23ᑖᓐᓇ ᑭᐅᕗᖅ, “ᐃᓱᒫᓗᖏᓪᓗᓯ, ᓯᕘᕋᓂᐊᕋᓯ; ᒎᑎᑦᓯ ᐊᑖᑕᑦᓯᓗ ᒎᑎᖓᑦᑕ ᐃᒻᒪᖄ ᑮᓇᐅᔭᓯ ᐃᒃᐱᐊᕐᔪᖁᑎᑦᓯᓐᓄᐊᕐᓂᕐᐰᑦ; ᐊᑭᓕᐅᑎᒋᓚᐅᕐᑕᓯ ᑮᓇᐅᔧᑦ ᐱᓯᒪᕙᒃᑲ.” ᑕᕝᕙ ᓯᒥᐅᓂ ᑖᒃᑯᓄᓐᖓᐅᑎᕚ.
24ᑕᕝᕙ ᐊᖑᑎᐅᑉ ᑖᒃᑯᐊ ᐊᖑᑏᑦ ᔫᓯᐱᐅᑉ ᐃᒡᓗᖓᓄᑦ ᐃᑎᕐᑎᑉᐰᑦ, ᐃᒥᕐᒥᒡᓗ ᑐᓂᓯᕕᒋᕔᑦ, ᑖᒃᑯᐊᓗ ᐃᑎᒐᖕᒥᖕᓂᒃ ᐃᕐᕈᕐᑐᐃᕗᑦ, ᓯᐅᑎᖅᑯᕐᑐᔪᖁᑎᖏᓪᓗ ᓂᕿᒃᓴᖏᓐᓂᒃ ᐊᑐᐃᓐᓇᕈᐃᕕᒋᕔᑦ, 25ᑖᒃᑯᐊᓕ ᐂᑦᑑᑎᒃᓴᒥᖕᓂᒃ ᐊᑐᐃᓐᓇᕈᐃᕗᑦ ᔫᓯᐱ ᕿᑎᕋᓕᕐᒥ ᕾᒃᐸᑦ ᑐᓂᔭᒃᓴᒥᖕᓂᒃ, ᑐᓴᐅᒪᒐᒥᒃ ᑕᕝᕙᓂ ᓂᕆᖃᑎᒋᓂᐊᕐᒪᒋᑦ. 26ᔫᓯᐱᓕ ᐊᖏᕐᕋᕐᒪᑦ, ᐃᒡᓗᒧᑦ ᐃᑎᐅᑦᔨᕗᑦ ᐂᑦᑑᑎᒃᓴᒥᖕᓂᒃ ᓇᒃᓴᓚᐅᕐᑕᒥᖕᓂᒃ, ᑖᑦᓱᒧᖓᓗ ᐅᑯᕗᑦ ᓄᓇᒧᑦ ᐹᒻᒪᒃᓗᑎᒃ. 27ᖃᓄᐃᒻᒪᖔᑕᓗ ᐊᐱᕐᓱᕐᐰᑦ, ᐅᖃᕐᓗᓂ, “ᐊᑖᑕᓯ, ᑍᓐᓇ ᐃᓄᑐᖃᐅᓕᕐᑐᖅ ᐅᖃᐅᑎᒋᓚᐅᕐᑕᓯ ᖃᓄᐃᓐᖏᓛᖅ? ᓱᓕ ᐃᓅᕚ?”
28ᑖᒃᑯᐊ ᐅᖃᕐᐳᑦ, “ᐱᔩᑦ ᐊᑖᑕᕗᑦ ᖃᓄᐃᖏᑦᓯᐊᕐᓗᓂᓗ; ᓱᓕ ᐃᓅᕗᖅ.” ᑖᒃᑯᐊᓗ ᓂᐊᖁᖏᑦ ᐅᑯᕗᑦ ᐹᒻᒪᒃᑎᕐᓗᑎᒡᓗ ᑖᑦᓱᒧᖓ.
29ᔫᓯᐱᓗ ᑕᑯᓴᕋᒥ, ᓄᑲᓂ ᐱᓐᔭᒥᓂ ᑕᑯᕚ, ᐊᓈᓇᖓᑕ ᐃᕐᓂᖓ, ᐅᖃᕐᓗᓂᓗ, “ᐅᓇ ᑕᕝᕙ ᓄᑲᕐᓯᕐᐹᓰ, ᐅᕙᓐᓄᑦ ᐅᖃᐅᓯᕆᓚᐅᕐᑕᓯ? ᐃᕐᓃᒃ, ᒎᑎᐅᑉ ᐱᑦᓯᐊᕐᕕᒋᓕᑎᑦ!” 30ᔫᓯᐱᓗ ᑐᐊᕕᕐᓗᓂ ᐊᓂᕗᖅ, ᐆᒻᒪᑎᖓ ᓄᑲᕐᒥᓂᒃ ᓇᒡᓕᒍᓱᓗᐊᕐᓂᑯᖓᓄᑦ, ᕿᐊᕕᒃᓴᕐᓯᐅᓕᕐᐳᕐᓗ. ᓯᓂᒡᕕᖕᒥᓄᓪᓗ ᐃᑎᕋᒥ ᑕᕝᕙᓂ ᕿᐊᕗᖅ. 31ᑮᓇᓂᓗ ᐃᕐᕈᕐᑐᓚᐅᕐᓗᒍ ᐊᓂᕗᖅ; ᐃᒻᒥᓂᒃ ᐱᓯᒪᔪᓐᓇᕐᓯᒐᒥ ᐅᖃᕐᐳᖅ, “ᓂᕿᒃᓮᑦ ᐊᑐᐃᓐᓇᕈᕐᑕᐅᓕᕐᓕᑦ.” 32ᔫᓯᐱᓗ ᐃᒻᒥᒍᑦ ᓂᕆᕕᖃᕐᓗᓂ ᓂᕆᑎᑕᐅᕗᖅ, ᑖᒃᑯᐊᓗ ᐃᒻᒥᒍᑦ ᓂᕆᕕᖃᕐᒥᑎᓪᓗᒋᑦ, ᐄᑦᔨᑉᑎᒥᐅᓪᓗ ᓂᕆᖃᑕᐅᖕᒥᔪᑦ ᐃᒻᒥᒍᑦ ᓂᕆᕕᖃᕆᕗᑦ, ᐄᑦᔨᑉᑎᒥᐅᑦ ᐄᑉᕉᓂᒃ ᓂᕆᖃᑎᖃᕈᓐᓇᖏᒻᒪᑕ, ᑕᒪᓐᓇ ᐄᑦᔨᑉᑎᒥᐅᓄᑦ ᓇᕐᕈᓇᐅᑎᒃᓴᖃᕐᒪᑦ. 33ᑖᑦᓱᒪᓗ ᓵᒥᓂ ᐃᒃᓯᕙᖁᕔᑦ, ᐊᖓᔪᒃᓯᕐᐹᒥᑦ ᐱᒋᐊᕐᓗᑎᒃ ᑐᖓᓕᕇᒃᐸᓪᓕᐊᓂᖏᑦ ᒪᓕᒡᓗᒋᑦ ᓄᑲᕐᓯᕐᐹᒧᑦ ᐃᓅᓱᒃᑑᓛᖑᓂᖓᓂᒃ ᒪᓕᒡᓗᑎᒃ; ᐊᖑᑎᓪᓗ ᑖᒃᑯᐊ ᐃᒻᒥᖕᓄᑦ ᑕᑯᓴᖃᑦᑕᐅᑎᕗᑦ ᑲᒪᓗᐊᕐᓂᑯᒥᖕᓄᑦ. 34ᓂᕿᒃᓮᓪᓗ ᔫᓯᐱᐅᑉ ᓵᖓᓂᑦ ᐋᑎᕐᑕᐅᕗᑦ ᑖᒃᑯᓄᖓ, ᐱᓐᔭᒥᓂᐅᓪᓕ ᓂᕆᓂᐊᕐᑕᖏᑦ ᑕᓪᓕᒤᕐᑐᓪᓗᐊᕐᑐᒥᒃ ᐊᓯᓕᒫᒥᓂᑦ ᐊᖏᓂᕐᓴᐅᑎᓪᓗᒋᑦ ᐊᑐᐃᓐᓇᕈᕐᑎᕐᑕᐅᕗᑦ. ᑕᕝᕙ ᓂᕆᕗᑦ ᐃᒥᕐᓗᑎᒡᓗ ᖁᕕᐊᓱᖃᑎᖃᕐᓗᑎᒃ ᑖᑦᓱᒥᖓ.
Currently Selected:
ᒨᓯᓯ ᓯᕗᓪᓖᑦ 43: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
