ᒨᓯᓯ ᓯᕗᓪᓖᑦ 42
42
ᔫᓯᐱᐅᑉ ᐊᖓᔪᖏᑕ ᐄᑦᔨᑉᑎᒧᐊᕐᓂᖓᑦ ᓂᐅᕕᕆᐊᕐᓗᑎᒃ ᓂᐊᖂᔭᒃᓴᓂᒃ
1ᔧᑯᓕ ᑐᓴᕋᒥ ᐄᑦᔨᑉᑎᒥ ᓂᐊᖂᔭᒃᓴᕐᑕᖃᕐᓂᖓᓂᒃ, ᐃᕐᓂᕐᒥᓄᑦ ᐅᖃᕐᐳᖅ, “ᓱᖕᒪᑦ ᐃᓕᑦᓯᓐᓄᑦ ᑕᑯᓐᓇᖃᑦᑕᐅᑎᑐᐃᓐᓇᕐᐱᓰ?” 2#ᐋᐴᓯᑕᓖᑦ 7:12.ᐅᖃᐅᑎᒃᑲᓂᕐᐰᑦ, “ᑕᑯᒋᑦ, ᑐᓴᕐᓯᒪᕗᖓ ᐄᑦᔨᑉᑎᒥᒎᖅ ᓂᐊᖂᔭᒃᓴᕐᑕᖃᕐᒪᑦ; ᑕᐅᓄᖓ ᐂᓚᐅᕆᑦᓯ ᓂᐅᕕᕆᐊᕐᓗᓯ ᓂᐊᖂᔭᒃᓴᒥᒃ ᓂᕿᒃᓴᑦᑎᓐᓂᒃ, ᐱᕐᓕᕐᓂᕐᒧᑦ ᑐᖁᖁᓇᑕ.” 3ᑕᕝᕙ ᔫᓯᐱᐅᑉ ᐊᖓᔪᖏᑦ ᖁᓕᑦ ᑕᐅᓄᓐᖓᓕᕐᐳᑦ ᓂᐅᕕᕆᐊᕐᓗᑎᒃ ᓂᐊᖂᔭᒃᓴᒥᒃ ᐄᑦᔨᑉᑎᒥᑦ. 4ᔧᑰᓪᓕ ᐱᓐᔭᒥᓂ ᔫᓯᐱᐅᑉ ᓄᑲᖓ ᐃᓚᐅᖁᓚᐅᓐᖏᓛ ᐊᖓᔪᖏᓐᓄᑦ, ᓯᕘᕋᓪᓗᓂ ᑖᓐᓇ ᖃᓄᐃᓐᓇᕐᑐᒧᑦ ᑎᑭᑕᐅᓂᐊᕋᓱᒋᓪᓗᒍ.
5ᑕᕝᕙ ᐃᓴᕆᐊᓕᐅᑉ ᐃᕐᓂᖏᑦ ᓂᐅᕕᕆᐊᕐᑐᓄᑦ ᐃᓚᒋᔭᐅᓚᐅᕐᐳᑦ, ᐃᓄᖕᓄᑦ ᐊᓯᒥᖕᓄᑦ ᓂᐅᕕᕆᐊᕐᑐᓄᑦ, ᓄᓇ ᑬᓇᓂᒥ ᑳᖕᓇᕐᑐᕐᔪᐊᕐᒧᑦ ᑎᑭᑕᐅᓚᐅᕐᒥᖕᒪᑦ. 6ᔫᓯᐱᓕ ᓄᓇᒥ ᐊᐅᓚᑦᓯᔨᐅᒐᒥ; ᓄᓇᓂᑦ ᓂᐅᕕᕆᐊᕐᑐᓕᒫᓄᑦ ᓂᐅᕕᕐᕕᐅᖃᑦᑕᓚᐅᕐᐳᖅ. ᔫᓯᐱᐅᓪᓗ ᐊᖓᔪᖏᑦ ᑎᑭᑉᐳᑦ, ᑖᑦᓱᒪᓗ ᓵᖓᓄᑦ ᐅᑯᕗᑦ ᖃᐅᖏᑦ ᓄᓇᒧᑦ ᐊᒃᑐᕐᓗᑎᒃ. 7ᔫᓯᐱᐅᓪᓕ ᐊᖓᔪᓂ ᑕᑯᒐᒥᒋᑦ, ᐃᓕᑕᕆᕔᑦ, ᖃᐅᔨᒪᓐᖏᑕᒥᑐᓪᓕ ᐱᓂᐊᕐᕕᒋᕔᑦ ᓂᑲᒋᓇᒋᓪᓗ ᐅᖃᕐᕕᒋᕔᑦ. ᐅᖃᕐᓗᓂ, “ᓇᑭᓐᖔᕐᓯᒪᕕᓰ?”
ᑖᒃᑯᐊ ᑭᐅᕗᑦ, “ᓄᓇᒥᑦ ᑬᓇᓂᒥᑦ ᐱᓯᒪᕗᒍᑦ, ᓂᐅᕕᕆᐊᕐᓗᑕ ᓂᕿᒃᓴᒥᒃ.”
8ᔫᓯᐱᐅᑉ ᐊᖓᔪᓂ ᐃᓕᑕᕆᒐᓗᐊᕐᒪᒋᑦ, ᑖᒃᑯᐊᓕ ᐃᓕᑕᕐᓯᓚᐅᓐᖏᓚᑦ ᑖᑦᓱᒥᖓ. 9#ᒨᓯᓯ ᓯᕗᓪᓖᑦ 37:5-10.ᔫᓯᐱᓕ ᐃᖅᑬᕗᖅ ᓯᓐᓇᒃᑑᒪᓂᕆᓚᐅᕐᓯᒪᔭᒥᓂᒃ ᑖᒃᑯᐊ ᐱᓪᓗᒋᑦ; ᐅᖃᐅᑎᓪᓗᒋᓪᓗ, “ᐃᔨᕋᕐᑐᕐᓗᓯ ᖃᐅᔨᓴᕆᐊᕐᓯᒪᕗᓯ; ᓄᓇ ᓇᐅᒃᑯᑦ ᓵᓚᒋᔭᒃᓴᐅᖕᒪᖔᑦ ᖃᐅᔨᔪᒪᓪᓗᓯ.”
10ᑖᒃᑯᐊ ᐅᖃᐅᑎᕚᑦ, “ᐊᖓᔪᖅᑳᖅ ᑍᒤᓐᖏᓚᒍᑦ, ᐃᓕᖕᓄᑦ ᐱᔨᐅᕗᒍᑦ ᓂᕿᒃᓴᓂᒃ ᓂᐅᕕᕆᐊᑐᐃᓐᓇᕐᐳᒍᑦ. 11ᐊᖑᒻᒧᑦ ᐊᑕᐅᓯᕐᒧᑦ ᑕᒪᑦᑕ ᐃᕐᓂᕆᔭᐅᕗᒍᑦ; ᓴᒡᓗᕿᑦᓯᔨᐅᓇᑕ, ᐃᓕᖕᓄᑦ ᐱᔨᐅᕗᒍᑦ ᓄᓇᒥᒃ ᖃᐅᔨᓴᕐᑎᐅᓐᖏᓚᒍᑦ ᐃᔨᕋᕐᑐᕐᓂᒃᑯᑦ.”
12ᑖᑦᓱᒪ ᐅᖃᐅᑎᕔᑦ, “ᑍᒤᓐᖏᓚᖅ, ᓄᓇ ᓇᐅᒃᑯᑦ ᓵᓚᒋᔭᒃᓴᐅᖕᒪᖔᑦ ᑕᑯᔭᕐᑐᕐᐸᓯ.”
13ᑖᒃᑯᐊ ᐅᖃᕐᐳᑦ, “ᐃᓕᖕᓄᑦ ᐱᔨᐅᕗᒍᑦ, ᓄᑲᕇᖑᓪᓗᑕ 12ᕗᒍᑦ, ᐊᖑᒻᒧᑦ ᐊᑕᐅᓯᕐᒧᑦ ᐃᕐᓂᕆᔭᐅᓪᓗᑕ ᑬᓇᓂᒥ ᓄᓇᒥ; ᑕᑯᒋᑦ ᓄᑲᕐᓯᕐᐹᕗᑦ ᐅᓪᓗᒥ ᐊᑖᑕᑦᑎᓐᓃᑉᐳᖅ, ᐊᑕᐅᓯᖅ ᐱᑕᖃᕈᓐᓃᕐᐳᖅ.”
14ᔫᓯᐱᐅᓪᓕ ᐅᖃᐅᑎᕔᑦ, “ᓲᕐᓗ ᐅᖃᐅᑎᖅᑲᐅᒐᑦᓯ ᓱᓕᕗᑦ, ᐅᖃᖅᑲᐅᒐᒪ, ‘ᓄᓇᒥᒃ ᐃᔨᕋᕐᑐᕐᓗᓯ ᖃᐅᔨᓴᕆᐊᕐᓯᒪᕗᓯ!’ 15ᑍᒤᒻᒪᑦ ᐃᒫᒃ ᖃᐅᔨᓴᕐᑕᐅᓂᐊᕐᐳᓯ: ᐰᕉ ᐃᓅᖕᒪᑦ, ᑕᒫᓐᖓᑦ ᐊᐅᓪᓚᕐᓂᐊᓐᖏᓚᓯ ᓄᑲᕐᓯᕐᐹᕆᔭᓯ ᑕᒪᐅᓐᖓ ᑎᑭᑎᑕᐅᖅᑳᕐᑎᓐᓇᒍ. 16ᐃᓚᓯ ᐊᑕᐅᓯᖅ ᑎᓕᓚᐅᕐᓯᐅᒃ, ᓄᑲᕐᓯᕐᐹᑦᓯᓐᓂᒃ ᐂᒃᓯᖁᓪᓗᒍ, ᐃᓕᑦᓯᓕ ᐅᕙᓂ ᑎᒍᔭᐅᓯᒪᕕᖕᒦᖕᓂᐊᕐᐳᓯ, ᐅᖃᐅᓯᓯ ᓱᓕᖕᒪᖔᑕ ᖃᐅᔨᓴᕐᑕᐅᓂᖏᓐᓂ, ᓱᓕᓂᖃᕐᒪᖔᑦᓯ; ᑍᒤᖏᑉᐸᓪᓕ, ᐰᕉ ᐃᓅᖕᒪᑦ, ᖁᓚᕐᓇᖏᑦᑐᒥᒃ ᓄᓇᒥᒃ ᐃᔨᕋᕐᑐᕐᓗᓯ ᖃᐅᔨᓴᕆᐊᕐᓯᒪᕗᓯ.” 17ᑕᕝᕙ ᑲᑎᓐᖓᓪᓗᑎᒃ ᑎᒍᔭᐅᓯᒪᕕᖕᒧᐊᕐᑎᑉᐰᑦ ᐅᓪᓗᓂᒃ ᐱᖓᓱᓂᒃ.
18ᐅᓪᓗᐃᑦ ᐱᖓᔪᖓᓐᓂ ᔫᓯᐱᐅᑉ ᐅᖃᐅᑎᕔᑦ, “ᐃᓅᔪᒪᒍᑦᓯ ᐃᒤᓕᐅᕐᑐᒃᓴᐅᕗᓯ, ᒎᑎ ᓯᕘᕋᒋᒐᒃᑯ: 19ᓴᒡᓗᕿᑦᓯᔨᐅᓐᖏᒍᑦᓯ, ᖃᑕᓐᖑᑎᑦᓯ ᐃᓚᖓᑦ ᐊᑕᐅᓯᖅ ᐅᕙᓂ ᑎᒍᔭᐅᓯᒪᓚᐅᕐᓕ ᐃᓂᒋᔭᑦᓯᓐᓂ, ᐃᓕᑦᓯ ᑕᒪᑦᓯ ᐊᐅᓪᓚᕐᑎᓪᓗᓯ ᓂᐊᖂᔭᒃᓴᓂᒃ ᓇᒃᓴᕐᓗᓯ ᐃᒡᓗᒥᐅᖃᑎᓯᓐᓄᑦ ᑳᖕᓇᕐᑐᕐᔪᐊᖅ ᐱᑦᔪᑎᒋᓪᓗᒍ, 20ᓄᑲᕐᓯᕐᐹᓯᓗ ᐅᕙᓐᓄᑦ ᕾᑎᑕᒃᓴᕆᕙᓯ; ᐅᖃᐅᓯᓯ ᑕᕝᕙ ᐅᒃᐱᕆᓕᕐᓂᐊᕐᐸᒃᑲ, ᑐᖁᑕᐅᓂᐊᕋᓯᓗ.”
ᑖᒃᑯᐊᓗ ᑕᒪᑐᒥᖓ ᐊᖏᕐᐳᑦ. 21ᑕᕝᕙ ᐃᒻᒥᖕᓄᑦ ᐅᖃᖃᑦᑕᐅᑎᓕᕐᐳᑦ, “ᑕᒃᑰᒡᓕ ᑕᒪᑐᒧᖓ ᐸᓯᔭᒃᓴᐅᕗᒍᑦ ᓄᑲᕆᓚᐅᕐᑕᕗᑦ ᐱᑦᔪᑎᒋᓪᓗᒍ, ᑕᑯᓐᓇᓚᐅᕋᑦᑎᒍ ᐅᕙᑦᑎᓐᓄᑦ ᐃᑲᔪᕐᑕᐅᔪᒪᓪᓚᕆᒃᑎᓪᓗᒍ ᓈᓚᓚᐅᓐᖏᓐᓇᑦᑎᒍ, ᑍᒤᒻᒪᑦ ᑕᕝᕙ ᑕᒪᑐᒧᖓ ᐊᒃᓱᕈᕐᑎᑕᐅᓂᕐᒧᑦ ᑎᑭᑕᐅᕗᒍᑦ.”
22 #
ᒨᓯᓯ ᓯᕗᓪᓖᑦ 37:21,22. ᕉᐱᓂᐅᑉ ᐅᖃᐅᑎᕔᑦ, “ᐅᖃᐅᑎᓚᐅᕐᓯᒪᓐᖏᓚᑦᓰ ᐊᔪᕐᑐᓕᖁᓇᓯ ᓄᑲᑉᐱᐊᒧᑦ? ᐃᓕᑦᓯᓕ ᓈᓚᒍᒪᓚᐅᓐᖏᓚᓯ, ᑕᕝᕙ ᑖᑦᓱᒪ ᐊᐅᖓᓄᑦ ᐊᑭᓂᐊᕐᑕᐅᓕᕐᐳᒍᑦ.” 23ᖃᐅᔨᒪᓚᐅᓐᖏᓚᓪᓕ ᔫᓯᐱᒧᑦ ᑐᑭᓯᔭᐅᖕᒪᖔᕐᒥᒃ, ᑖᒃᑯᐊ ᐅᖃᓪᓚᖃᑦᑕᐅᑎᓕᕌᖓᒥ ᑐᓵᔨᖃᖃᑦᑕᕋᒥᒃ. 24ᔫᓯᐱᓕ ᑖᒃᑯᓇᓐᖓᑦ ᕿᒪᕉᑎᓪᓗᓂ ᕿᐊᕗᖅ; ᐅᑎᕐᕕᒋᒐᒥᒋᓪᓗ ᐅᖃᓪᓚᒡᕕᒋᕔᑦ. ᓯᒥᐅᓂᓕ ᑖᒃᑯᓇᓐᖓᑦ ᑎᒍᓪᓗᒍ ᕿᓚᒃᓱᕐᐹ ᑕᑯᓐᓇᕐᑎᓪᓗᒋᑦ.
ᔫᓯᐱᐅᑉ ᐊᖓᔪᖏᑕ ᐅᑎᕐᓂᖓ ᑬᓇᓂᒧᑦ
25ᔫᓯᐱᓗ ᑎᓕᓯᕗᖅ ᐃᒃᐱᐊᕐᔪᖁᑎᖏᑦ ᐃᓗᓪᓕᕐᓱᕐᑕᐅᖁᓪᓗᒋᑦ ᓂᐊᖂᔭᒃᓴᓂᒃ, ᑮᓇᐅᔧᓪᓗ ᐊᑭᓕᐅᑎᖏᑦ ᐃᒃᐱᐊᕐᔪᖁᑎᖏᓐᓄᑦ ᐊᑐᓂᑦ ᐴᖃᓯᐅᑦᔭᐅᖁᕔᑦ, ᐃᖏᕐᕋᑎᓪᓗᒋᓪᓗ ᑕᖁᐊᒃᓴᖏᓐᓂᒃ ᓇᒃᓴᕐᑎᑕᐅᖁᕔᑦ. ᑕᕝᕙ ᑍᒤᓕᐅᕐᕕᐅᓚᐅᕐᐳᑦ. 26ᑕᕝᕙ ᓯᐅᑎᖅᑯᕐᑐᔪᖁᑎᒥᖕᓂᒃ ᓇᖕᒥᕐᓱᐃᕗᑦ ᓂᐊᖂᔭᒃᓴᕐᑖᒥᖕᓂᒃ, ᐊᐅᓪᓚᕐᓗᑎᒡᓗ. 27ᐃᓚᖓᓪᓕ ᓯᓂᒃᑕᕐᓂᐊᓕᕋᒥᒃ ᐃᒃᐱᐊᕐᔪᖁᑎᒥᓂᒃ ᕿᓚᕈᑦᔮᕐᓯᕗᖅ ᓯᐅᑎᖅᑯᕐᑐᔪᖁᑎᒥᓂᒃ ᓂᕆᑎᑦᓯᔪᒪᓪᓗᓂ, ᑕᑯᓪᓗᓂᓗ ᑮᓇᐅᔭᒥᓂᒃ ᐊᑭᓕᐅᑎᒋᓚᐅᕐᑕᒥᓂᒃ ᐃᒃᐱᐊᕐᔪᖁᑎᖓᑕ ᐹᖓᓃᑦᑐᓂᒃ; 28ᐃᓚᒥᓄᓪᓗ ᐅᖃᕐᐳᖅ, “ᑮᓇᐅᔭᒃᑲ ᐅᑎᕐᑎᑕᐅᓐᓂᕐᐳᑦ; ᑕᑯᒋᑦ ᐃᒃᐱᐊᕐᔪᖁᑎᒪ ᐹᖓᓃᑉᐳᑦ!” ᑕᕝᕙ ᑲᑉᐱᐊᓱᓕᕐᐳᑦ ᖁᐊᕐᓵᖓᓕᕐᓗᑎᒡᓗ, ᓴᔪᓕᕐᓗᑎᒡᓗ ᐃᒻᒥᖕᓄᑦ ᐅᖃᖃᑦᑕᐅᑎᓕᕐᐳᑦ, ᐅᖃᕐᓗᑎᒃ, “ᒎᑏᓐᓇ ᖃᓄᐃᓕᐅᓕᕐᑐᖅ ᐅᕙᑦᑎᓐᓄᑦ?”
29ᔧᑯᒧᓪᓕ ᐊᑖᑕᒥᖕᓄᑦ ᑎᑭᓐᓇᒥᒃ ᑬᓇᓂᒧᑦ, ᐅᓂᒃᑳᕐᕕᒋᕚᑦ ᑕᒤᓐᓂᒃ ᖃᓄᐃᓕᐅᕐᑕᐅᓂᕆᔭᒥᖕᓂᒃ, ᐅᖃᕐᓗᑎᒃ, 30“ᐊᖑᑎᐅᑉ, ᓄᓇᒥ ᐊᖓᔪᖅᑳᖑᔫᑉ, ᐃᓕᕋᓇᕐᑐᒥᒃ ᐅᖃᓪᓚᒡᕕᒋᓚᐅᕐᐹᑎᒍᑦ, ᓄᓇᒥᒃ ᐃᔨᕋᕐᑐᕐᓗᑕ ᖃᐅᔨᓴᕐᑎᐅᓂᕋᓚᐅᕐᐹᑎᒍᑦ. 31ᐅᖃᐅᑎᓚᐅᕐᐸᕗᓪᓕ, ‘ᓴᒡᓗᕿᑦᓯᔨᐅᖏᓐᓂᕋᕐᓱᑕ, ᓄᓇᒥᒡᓗ ᐃᔨᕋᕐᑐᕐᓗᑕ ᖃᐅᔨᓴᕆᐊᕐᓯᒪᖏᓐᓂᕋᕐᓱᑕ; 32ᖃᑕᓐᖑᑎᒌᖑᓪᓗᑕ 12ᕗᒍᑦ, ᐊᑕᐅᓯᕐᒥᒃ ᐊᑖᑕᖃᕐᓗᑕ; ᐊᑕᐅᓯᕐᓕ ᐱᑕᖃᕈᓐᓃᕐᐳᖅ, ᓄᑲᕐᓯᕐᐹᕗᓪᓕ ᐅᓪᓗᒥ ᐊᑖᑕᒥᓃᑉᐳᖅ ᓄᓇᒥ ᑬᓇᓂᒥ.’ 33ᑕᕝᕙ ᐊᖑᑎᐅᑉ, ᓄᓇᒥ ᐊᖓᔪᖅᑳᖑᔫᑉ, ᐅᖃᐅᑎᓚᐅᕐᐹᑎᒍᑦ, ‘ᑕᒪᑐᒧᖓ ᖃᐅᔨᓴᕐᓂᐊᕐᐸᑦᓯ ᓴᒡᓗᕿᑦᓯᔨᐅᖏᒻᒪᖔᑦᓯ: ᖃᑕᓐᖑᑎᑦᓯ ᐃᓚᖓᑦ ᐊᑕᐅᓯᖅ ᕿᒪᓚᐅᕐᓯᐅᒃ ᐅᕙᓐᓄᑦ, ᓂᐊᖂᔭᒃᓴᓂᒃ ᐃᒡᓗᒥᐅᖃᑎᓯᓐᓄᑦ ᓇᒃᓴᕐᓗᓯ ᑳᖕᓇᕐᑐᕐᔪᐊᖅ ᐱᑦᔪᑎᒋᓪᓗᒍ, ᐊᐅᓪᓚᓕᕆᑦᓯ. 34ᓄᑲᓯ ᓄᑲᕐᓯᕐᐹᖅ ᐅᕙᓐᓄᑦ ᕾᑎᓯᐅᒃ; ᑕᕝᕙ ᖃᐅᔨᓂᐊᕐᐳᖓ ᓄᓇᒥᒃ ᐃᔨᕋᕐᑐᕐᓗᓯ ᖃᐅᔨᓴᕐᑎᐅᖏᓐᓂᑦᓯᓐᓂ ᓴᒡᓗᕿᑦᓯᔨᐅᖏᓐᓂᑦᓯᓐᓂᒡᓗ, ᖃᑕᓐᖑᑎᓯᓗ ᐃᓕᑦᓯᓐᓄᑦ ᑐᓂᓂᐊᕐᐸᕋ, ᑕᕝᕙ ᓂᐅᕕᕈᓐᓇᕐᓯᓂᐊᕐᐳᓯ ᑕᕝᕙᓐᖓᑦ ᓄᓇᒥᑦ.’”
35ᐃᒃᐱᐊᕐᔪᖁᑎᒥᖕᓂᒡᓗ ᓈᕕᑎᕆᒐᒥᒃ, ᑕᑯᒋᑦ, ᐊᖑᑏᑦ ᑕᒪᕐᒥᒃ ᐊᑐᓂᑦ ᑮᓇᐅᔭᖏᑦ ᐴᕐᓯᒪᓪᓗᑎᒃ ᐃᒃᐱᐊᕐᔪᖁᑎᖓᓃᑦᑐᑦ ᓇᓂᕔᑦ; ᑖᒃᑯᐊᓕ ᐊᑖᑕᖓᓪᓗ ᑮᓇᐅᔭᓂᒃ ᐴᕐᓯᒪᔪᓂᒃ ᑕᑯᒐᒥᒃ, ᑲᑉᐱᐊᓱᓕᕐᐳᑦ. 36ᑕᕝᕙ ᐊᑖᑕᖓᑦᑕ ᔧᑰᑉ ᐅᖃᐅᑎᕔᑦ, “ᐃᓕᑦᓯ ᐃᓚᓐᖓᕐᑎᓯᒪᕙᑦᓯᓐᖓ ᕿᑐᕐᖓᓐᓄᑦ: ᔫᓯᐱ ᐱᑕᖃᕈᓐᓃᕐᐳᖅ, ᓯᒥᐅᓂᓗ ᐱᑕᖃᕈᓐᓃᕆᕗᖅ, ᑕᕝᕙ ᐱᓐᔭᒥᓂ ᓇᒃᓴᕈᒪᓕᕆᕙᓯ; ᑕᒪᒃᑯᐊ ᑕᒪᕐᒥᒃ ᐅᕙᓐᓄᑦ ᕿᒃᓵᖕᓇᕐᑐᕐᔪᐊᖑᕗᑦ.”
37ᑕᕝᕙ ᕉᐱᓂ ᐅᖃᕐᐳᖅ ᐊᑖᑕᒥᓄᑦ, “ᐃᕐᓃᒃᑲᒃ ᒪᕐᕉᒃ ᑐᖁᓐᓂᐊᕐᐹᒃᑭᒃ ᑖᓐᓇ ᐃᓕᖕᓄᑦ ᐅᑎᕐᑎᖏᒃᑯᒃᑯ; ᐅᕙᓐᓄᑦ ᐱᓯᒪᔭᐅᑎᓚᐅᕈᒃ ᓵᑕᒃᓴᐅᑦᔪᑎᒋᓂᐊᕐᐸᕋ, ᐃᓕᖕᓄᑦ ᐅᑎᕐᑎᓛᕐᐸᕋ.”
38ᑖᓐᓇᓕ ᐅᖃᕐᐳᖅ, “ᐃᕐᓂᕋ ᐃᓕᑦᓯᓐᓄᑦ ᐊᐅᓪᓚᖃᑕᐅᓂᐊᓐᖏᓚᖅ, ᑖᑦᓱᒪ ᐊᖓᔪᐊ ᑐᖁᖓᓕᕐᒪᑦ, ᑖᓐᓇᓗ ᐊᒥᐊᒃᑯᑑᓕᕐᐳᖅ. ᐊᖅᑯᑎᑦᓯᓐᓂ ᑖᓐᓇ ᖃᓄᐃᓐᓇᕐᑐᒧᑦ ᑎᑭᑕᐅᒐᔭᕐᐸᑦ, ᑕᕝᕙ ᓄᔭᒃᑲ ᖃᑯᕐᑍᑦ ᕿᒃᓵᒃᑎᑕᐅᓗᐊᕐᓂᕐᒧᑦ ᐅᒋᐊᕐᑕᐅᓗᖓ ᐃᓕᔭᐅᔪᒫᕐᐳᖓ ᐃᓗᕕᖃᕐᕕᖕᒧᑦ.”
Currently Selected:
ᒨᓯᓯ ᓯᕗᓪᓖᑦ 42: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
