ᒨᓯᓯ ᓯᕗᓪᓖᑦ 41

ᔫᓯᐱᐅᑉ ᑐᑭᓯᑎᑦᓯᓂᖓ ᐊᖓᔪᖅᑳᕐᔪᐊᑉ ᓯᓐᓇᒃᑐᖓᑕ ᑐᑭᖓᓂᒃ

1ᐊᕐᕌᒎᒃ ᒪᕐᕉᒃ ᐊᓂᒍᕐᑎᓪᓗᒋᒃ, ᐰᕉ ᓯᓐᓇᒃᑑᒪᓚᐅᕐᐳᖅ; ᑰᒑᓘᑉ ᓁᓕᐅᑉ ᓴᓂᐊᓂ ᓇᖏᕐᓗᓂ, 2ᑕᑯᕗᕐᓗ, ᑰᒑᓗᖕᒥᑦ ᓁᓕᒥᑦ ᖃᑭᔪᓂᒃ ᐃᒻᒧᒃᓯᐅᒐᕐᓂᒃ 7ᓂᒃ, ᑕᑯᒥᓇᕐᑐᓂᒃ ᖁᐃᓂᑦᓯᐊᕐᑐᓂᒡᓗ; ᑖᒃᑯᐊᓗ ᓂᕆᓕᕐᐳᑦ ᐃᕕᒃᓱᒐᖃᑦᓯᐊᕐᑐᒥ. 3ᑕᑯᒋᓪᓗ, ᐃᒻᒧᒃᓯᐅᒊᑦ ᐊᓯᖏᑦ 7, ᑕᑯᒥᓁᑦᑐᑦ ᓴᓪᓗᐊᓗᐃᑦ ᑰᒑᓗᖕᒥᑦ ᖃᑭᒋᕗᑦ, ᐃᒻᒧᒃᓯᐅᒊᓪᓗ ᐂᑉᐸᖏᑕ ᓴᓂᐊᓂ ᓂᑯᕕᖓᓕᕐᐳᑦ ᑰᒑᓘᑉ ᓁᓕᐅᑉ ᓯᓈᓂ. 4ᑖᒃᑯᐊᓗ ᑕᑯᒥᓁᑦᑐᑦ ᓴᓪᓗᐊᓗᐃᑦ ᓂᕆᓕᕐᐳᑦ 7ᓂᒃ ᐃᒻᒧᒃᓯᐅᒐᕐᓂᒃ ᑕᑯᒥᓇᕐᑐᓂᒃ ᖁᐃᓂᔪᓂᒃ. ᑕᕝᕙ ᐰᕉ ᐃᖅᑯᒻᒪᕐᐳᖅ. 5ᓯᓂᓕᕐᒥᒐᒥᓗ ᓯᓐᓇᒃᑑᒪᓕᕆᕗᖅ ᐂᑉᐸᖓᓂᒃ; ᑕᑯᕗᕐᓗ, 7ᓂᒃ ᓂᐊᖂᔭᒃᓮᑦ ᓄᕗᖏᓐᓂᒃ, ᐳᕙᓚᑦᓯᐊᕐᑐᓂᒃ ᐱᐅᔪᓂᒃ, ᓂᐊᖂᔭᒃᓴᒥᑦ ᐊᑕᐅᓯᕐᒥᑦ ᐱᕈᕐᑐᓂᒃ. 6ᑕᑯᒋᓪᓗ, ᑭᖑᓂᖓᒍᑦ ᑕᑯᓕᕆᕗᖅ 7ᓂᒃ ᓂᐊᖂᔭᒃᓮᑦ ᓄᕗᖏᓐᓂᒃ, ᐊᒥᑦᑐᓂᒃ ᑐᖁᓕᖓᔪᓂᒃ ᐊᓄᕆᒧᑦ ᓯᕿᓂᐅᑉ ᓄᕕᐊᑕ ᓇᓛᓂᓐᖔᕐᑐᒧᑦ ᓂᐅᓐᖓᒃᑎᑕᐅᓯᒪᔪᓂᒃ. 7ᑖᒃᑯᐊᓗ ᐊᒥᑦᑐᑦ ᑐᖁᓕᖓᔪᑦ ᓂᐊᖂᔭᒃᓮᑦ ᓄᕗᖏᑦ ᐄᓯᕗᑦ ᓂᐊᖂᔭᒃᓮᑦ ᓄᕗᖏᓐᓂᒃ ᐳᕙᓚᑦᓯᐊᕐᑐᓂᒃ ᐱᐅᔪᓂᒃ 7ᓂᒃ. ᑕᕝᕙ ᐰᕉ ᐃᖅᑯᒻᒪᕐᐳᖅ, ᑐᑭᓯᓕᕐᓗᓂᓗ ᓯᓐᓇᒃᑑᒪᓂᐅᖕᒪᑦ. 8#ᑖᓂᐊᓕ 2:2.ᐅᓪᓛᖑᓕᕐᑎᓪᓗᒍᓕ ᐃᓱᒪᔮᓕᕐᐳᖅ; ᑎᓕᓯᓪᓗᓂᓗ ᕾᖁᔨᕗᖅ ᐄᑦᔨᑉᑎᒥ ᐊᖓᒃᑯᓕᒫᓂᒃ ᐃᓕᓯᒪᔪᓕᒫᓂᒡᓗ; ᐰᕉᓪᓗ ᓯᓐᓇᒃᑐᒥᓂᒃ ᐅᓂᒃᑲᐅᑎᓕᕐᐰᑦ, ᓇᓪᓕᐊᓐᓂᒡᓘᓐᓃᓪᓕ ᑐᑭᓕᐅᕆᔪᖃᕈᓐᓇᓚᐅᓐᖏᓚᖅ ᐰᕉᒧᑦ.

9ᑕᕝᕙ ᐃᒥᕐᓂᐊᕐᑕᖏᓐᓂᒃ ᑲᒪᔨᖓ ᐰᕉᒧᑦ ᐅᖃᕐᐳᖅ, “ᐅᓪᓗᒥ ᐃᖅᑬᕗᖓ ᓈᒻᒪᖏᑦᑐᓕᓂᕆᓯᒪᔭᓐᓂᒃ. 10ᑍᑦᓱᒪᓂ ᐰᕉ ᐱᔨᒥᓄᑦ ᓂᓐᖓᐅᒪᓕᕐᒪᑦ, ᓂᐊᖂᔭᓕᐅᕐᑏᓪᓗ ᑲᒪᔨᖓᑦ ᑎᒍᔭᐅᓚᐅᕐᐳᒍᒃ ᑲᒪᒋᔭᐅᓕᕐᓗᓄᒡᓗ ᖃᐅᔨᓴᕐᑏᑦ ᐊᖓᔪᖅᑳᖓᑦᑕ ᑎᒍᔭᐅᓯᒪᕕᖁᑎᐊᓂ, 11ᐅᓐᓄᐊᒥ ᐊᑕᐅᓯᕐᒥ ᑕᒪᓐᓄᒃ ᐊᑐᓂᑦ ᓯᓐᓇᒃᑑᒪᓂᖃᓚᐅᕐᐳᒍᒃ, ᐊᑐᓂᑦ ᓯᓐᓇᒃᑑᒪᓂᕗᒃ ᐊᑐᓂᑦ ᑐᑭᖃᕐᓗᑎᒃ ᐃᒻᒥᒍᑦ. 12ᑍᑲᓃᖃᑎᖃᓚᐅᕐᐳᒍᑦ ᐃᓅᓱᒃᑐᒥᒃ ᐄᑉᕉᒥᒃ, ᖃᐅᔨᓴᕐᑏᑦ ᐊᖓᔪᖅᑳᖓᑦᑕ ᐱᔨᒋᔭᖓ; ᐅᓂᒃᑳᕐᕕᒋᒐᑦᑎᒃᑯᒃ, ᑐᑭᓯᓇᕐᓯᑎᓚᐅᕐᐰᑦ ᐅᕙᑦᑎᓐᓄᑦ, ᓯᓐᓇᒃᑑᒪᒋᔭᕗᒃ ᑐᑭᓕᐅᓚᐅᕐᐰᑦ ᐊᑐᓂᑦ ᓯᓐᓇᒃᑐᕐᓯᒪᓂᕗᑦ ᒪᓕᒡᓗᒋᑦ. 13ᐅᕙᑦᑎᓐᓄᑦ ᑐᑭᓯᓇᕐᓯᑎᑦᓯᓂᖓ ᒪᓕᒡᓗᒍ, ᐊᑐᑦᓯᐊᓚᐅᕐᐳᑦ; ᐱᓇᓱᐊᕐᕕᓐᓄᑦ ᐅᑎᕐᑎᑕᐅᓚᐅᕐᐳᖓ, ᓂᐊᖂᔭᓕᐅᕐᑏᑦ ᑲᒪᔨᖓᑦ ᕿᒥᑕᐅᓪᓗᓂ.”

14ᑕᕝᕙ ᐰᕉ ᑎᓕᓯᓪᓗᓂ ᔫᓯᐱ ᕾᖁᔭᐅᖁᕚ, ᑐᐊᕕᕐᓗᑎᒡᓗ ᐊᓂᑎᑉᐹᑦ ᑎᒍᔭᐅᓯᒪᕕᖕᒥᑦ; ᑖᓐᓇᓗ ᐅᓐᖏᔭᕇᕐᒪᑦ ᐊᓐᓄᕌᓂᒡᓗ ᐊᓯᖏᓐᓂᒃ ᐊᑎᓪᓗᓂ, ᐃᑎᕐᐳᖅ ᐰᕉᒧᐊᕐᓗᓂ. 15ᑕᕝᕙ ᐰᕉ ᔫᓯᐱᒧᑦ ᐅᖃᕐᐳᖅ, “ᓯᓐᓇᒃᑑᒪᓚᐅᕋᒪ, ᑭᓯᐊᓂᓕ ᓇᓪᓕᐊᓐᓄᓪᓘᓐᓃᑦ ᑐᑭᓯᓇᕐᓯᑎᑕᐅᔪᓐᓇᓐᖏᓚᑦ; ᑐᓴᐅᒪᕙᒋᓪᓕ ᐅᖃᐅᑎᒋᔭᐅᓯᒪᒐᕕᑦ ᐅᕙᓐᓄᑦ ᓯᓐᓇᒃᑑᒪᒥᒎᖅ ᑐᓴᕈᕕᑦ ᑐᑭᓯᓇᕐᓯᑎᑦᓯᔪᓐᓇᕋᕕᑦ.”

16ᔫᓯᐱᐅᑉ ᐰᕉ ᑭᐅᕚ ᐅᖃᕐᓗᓂ, “ᐅᕙᖓᐅᖏᑦᑐᖅ; ᒎᑎᐅᓪᓕ ᐰᕉ ᑐᑭᓯᑎᓐᓂᐊᕐᐹ ᑐᑭᓯᔪᒪᔭᖓᓂᒃ.”

17ᐰᕉᑉ ᑕᕝᕙ ᔫᓯᐱ ᐅᖃᐅᑎᕚ, “ᑕᑯᒋᑦ, ᓯᓐᓇᒃᑑᒪᑎᓪᓗᖓ ᑰᒑᓘᑉ ᓁᓕᐅᑉ ᓯᓈᓂ ᓂᑯᕕᖓᓚᐅᕐᐳᖓ; 18ᑕᑯᕗᖓ ᑰᒑᓗᖕᒥᑦ ᓁᓕᒥᑦ ᖃᑭᔪᓂᒃ ᐃᒻᒧᒃᓯᐅᒐᕐᓂᒃ 7ᓂᒃ, ᑕᑯᒥᓇᕐᑐᓂᒃ ᖁᐃᓂᑦᓯᐊᕐᑐᓂᒡᓗ; ᑖᒃᑯᐊᓗ ᓂᕆᓕᕐᐳᑦ ᐃᕕᒃᓱᒐᕐᓂᒃ; 19ᑕᑯᒋᓪᓗ, ᐃᒻᒧᒃᓯᐅᒊᑦ ᐊᓯᖏᑦ 7 ᑖᒃᑯᐊ ᑭᖑᓂᖓᒍᑦ ᖃᑭᒋᕗᑦ, ᑕᑯᒥᓁᑦᑐᑦ ᓴᓪᓗᐊᓗᐃᑦ, ᑍᒤᑦᑐᓂᒃ ᑕᑯᓚᐅᕐᓯᒪᓐᖏᓚᖓ ᐄᑦᔨᑉᑎᐅᑉ ᓄᓇᓕᒫᖓᓂ. 20ᑖᒃᑯᐊᓗ ᑕᑯᒥᓁᑦᑐᑦ ᓴᓪᓗᐊᓗᐃᑦ ᓂᕆᓕᕐᐳᑦ 7ᓂᒃ ᐃᒻᒧᒃᓯᐅᒐᕐᓂᒃ ᓯᕗᓪᓕᐅᓪᓗᑎᒃ ᓴᖅᑭᖅᑲᐅᔪᓂᒃ ᑕᑯᒥᓇᕐᑐᓂᒃ ᖁᐃᓂᔪᓂᒃ, 21ᑖᒃᑯᓂᖓᓕ ᓂᕆᒐᓗᐊᕐᒪᑕ ᓇᓪᓕᐊᓐᓄᓪᓘᓐᓃᑦ ᒪᓗᒋᔭᐅᒐᔭᓚᐅᓐᖏᓚᑦ ᓂᕆᓯᒪᓂᖏᓐᓂᒃ, ᑕᑯᒥᓁᑦᑑᓂᖏᑦ ᓱᕐᕋᓚᐅᖏᒻᒪᑕ ᐱᒋᐊᕐᓂᖓᓂ ᐱᐅᓯᕆᓚᐅᕐᑕᒥᓂᑦ. ᑕᕝᕙ ᐃᖅᑯᒻᒪᓚᐅᕐᐳᖓ. 22ᑕᑯᓕᕆᕗᖓ ᓯᓐᓇᒃᑑᒪᓂᓐᓂ 7ᓂᒃ ᓂᐊᖂᔭᒃᓮᑦ ᓂᐊᖁᖏᓐᓂᒃ ᓂᐊᖂᔭᒃᓴᒥᑦ ᐊᑕᐅᓯᕐᒥᑦ ᐱᕈᕐᑐᓂᒃ, ᐳᕙᓚᑦᓯᐊᕐᑐᓂᒃ ᐱᐅᔪᓂᒃ; 23ᑭᖑᓂᖓᒍᑦ ᑕᑯᓕᕆᕗᖓ, ᓂᐊᖂᔭᒃᓮᑦ ᓂᐊᖁᖏᓐᓂᒃ 7ᓂᒃ ᐊᒥᑦᑐᓂᒃ ᑐᖁᓕᖓᔪᓂᒃ, ᐊᓄᕆᒧᑦ ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᐱᔪᒧᑦ ᓂᐅᓐᖓᒃᑎᑕᐅᓯᒪᔪᓂᒃ ᐱᕈᑦᓯᐊᕐᑐᑦ ᓇᓛᓄᑦ. 24ᑕᕝᕙ ᓂᐊᖂᔭᒃᓮᑦ ᐊᒥᑦᑐᑦ ᓂᐊᖁᖏᑦ ᑖᒃᑯᓂᖓ ᐱᕈᑦᓯᐊᕐᑐᑦ ᓂᐊᖁᖏᓐᓂᒃ ᐄᓯᕗᑦ. ᑖᒃᑯᐊ ᐅᖃᐅᓯᕆᓚᐅᕐᐸᒃᑲ ᐊᖓᒃᑯᓄᑦ, ᑭᓯᐊᓂᓕ ᓇᓪᓕᐊᓐᓂᓪᓘᓐᓃᑦ ᑐᑭᓯᑎᑕᐅᔪᓐᓇᓐᖏᓚᖓ.”

25ᑕᕝᕙ ᔫᓯᐱ ᐅᖃᕐᐳᖅ ᐰᕉᒧᑦ, “ᐰᕉᑉ ᓯᓐᓇᒃᑐᕐᓯᒪᔭᖏᑦ ᑖᒃᑯᐊᑦᓮᓐᓇᐅᕗᑦ ᐊᑕᐅᓯᐅᓪᓗᑎᒃ; ᒎᑎ ᓇᓗᓁᕐᓯᕗᖅ ᐰᕉᒧᑦ ᖃᓄᐃᓕᐅᕐᓂᐊᓕᕐᓂᕐᒥᓂᒃ. 26ᑖᒃᑯᐊ 7ᐃᑦ ᐃᒻᒧᒃᓯᐅᒊᑦ ᐱᐅᔪᑦ ᑐᑭᖃᕐᐳᑦ ᐊᕐᕌᒍᓂᒃ 7ᓂᒃ, ᑖᒃᑯᐊᓗ ᓂᐊᖂᔭᒃᓮᑦ ᓂᐊᖁᖏᑦ ᐱᕈᑦᓯᐊᕐᑐᑦ 7ᐃᑦ ᑐᑭᖃᕐᐳᑦ ᐊᕐᕌᒍᓂᒃ 7ᓂᒃ; ᓯᓐᓇᒃᑑᒪᓃᒃ ᑖᒃᑯᐊᑦᓮᓐᓇᐅᕘᒃ. 27ᑖᒃᑯᐊᓗ ᓴᓗᒃᑐᐃᑦ ᑕᑯᒥᓁᑦᑐᑦ ᐃᒻᒧᒃᓯᐅᒊᑦ 7ᐃᑦ ᑭᖑᓪᓕᐅᓪᓗᑎᒃ ᖃᑭᔪᑦ ᑐᑭᖃᕐᐳᑦ ᐊᕐᕌᒍᓂᒃ 7ᓂᒃ, ᓂᐊᖂᔭᒃᓮᓪᓗ ᓂᐊᖁᖏᑦ ᐊᒥᑦᑐᑦ 7ᐃᑦ ᓂᐅᓐᖓᒃᑎᑕᐅᓯᒪᔪᑦ ᐊᓄᕆᒧᑦ ᓯᕿᓂᐅᑉ ᓄᐃᕕᐊᑕ ᓇᓛᓂᓐᖔᕐᑐᒧᑦ ᑐᑭᖃᕐᐳᑦ ᐊᕐᕌᒍᓂᒃ 7ᓂᒃ ᑳᖕᓇᕐᑐᕐᔪᐊᓂᒃ. 28ᑕᒪᒃᑯᐊ ᐅᖃᐅᑎᒋᔭᒃᑲ ᐰᕉᒧᑦ, ᒎᑎᐅᑉ ᖃᐅᔨᑎᑦᓯᑦᔪᑎᒋᕔᑦ ᐰᕉᒧᑦ ᖃᓄᐃᓕᐅᕐᓂᐊᓕᕐᓂᕐᒥᓂᒃ. 29ᑕᑯᒋᑦ ᐊᕐᕌᒍᓂᒃ 7ᓂᒃ ᓇᓪᓕᐅᑎᔪᖃᓛᕐᐳᖅ ᐊᔪᕐᓴᕐᓇᖏᑦᑐᓂᒃ ᐱᕈᕐᕕᐅᑦᓯᐊᕐᓇᕐᑐᓂᒡᓗ ᐄᑦᔨᑉᑎᐅᑉ ᓄᓇᓕᒫᖓᓂ, 30ᑭᖑᓂᖓᒍᓪᓕ ᐊᕐᕌᒍᓂᒃ 7ᓂᒃ ᑳᖕᓇᕐᑐᕐᔪᐊᕐᑕᖃᕈᒫᕆᕗᖅ, ᑕᒪᓐᓇᓗ ᐊᔪᕐᓴᕐᓇᖏᑦᑑᓚᐅᕐᑐᖅ ᐱᕈᕐᕕᐅᑦᓯᐊᕐᓇᓚᐅᕐᑐᕐᓗ ᐳᐃᒍᕐᑕᐅᑦᓯᐊᕈᒫᕐᐳᖅ ᐄᑦᔨᑉᑎᐅᑉ ᓄᓇᖓᓂ; ᑳᖕᓇᕐᑐᕐᔪᐊᕐᒧᑦ ᐄᑦᔨᑉᑎᐅᑉ ᓄᓇᓕᒫᖓ ᓄᖑᕈᑦᔭᐅᔪᒫᕐᒪᑦ. 31ᐊᔪᕐᓴᕐᓇᖏᑦᑑᓚᐅᕐᑐᖅ ᐱᕈᕐᕕᐅᑦᓯᐊᕐᓇᕐᑑᓚᐅᕐᑐᕐᓗ ᐳᐃᒍᕐᑕᐅᑦᓯᐊᕈᒫᕐᐳᖅ ᑕᒫᓂ ᓄᓇᒥ ᑕᒪᑐᒪ ᑭᖑᓕᕆᔭᖓ ᑳᖕᓇᕐᑐᕐᔪᐊᖅ ᑭᖑᓪᓕᐅᔪᒫᕐᒪᑦ, ᕿᒃᓵᖕᓇᕐᑐᕐᔪᐊᖑᓗᓂᓗ. 32ᐰᕉᑉ ᓯᓐᓇᒃᑐᕐᓂᕆᔭᖓᑕ ᒪᕐᕉᓕᖅᑲᖓᓂᖓ ᑐᑭᖃᕐᐳᖅ ᑕᒪᓐᓇ ᒎᑎᐅᑉ ᐋᖅᑭᒃᓯᒪᖕᒪᒍ, ᐊᑯᓂᐅᖏᑦᑐᕐᓗ ᑲᔪᓯᑎᓐᓂᐊᕐᓗᓂᐅᒃ.

33“ᑍᒤᒻᒪᑦ ᐰᕉ ᐊᖑᒻᒥᒃ ᓂᕈᐊᕐᑐᒃᓴᐅᕗᖅ ᖃᐅᔨᒪᑦᓯᐊᕐᑐᒥᒃ ᓯᓚᑐᔪᒥᒡᓗ, ᑖᓐᓇ ᐊᐅᓚᑦᓯᔨᐅᖁᓪᓗᒍ ᐄᑦᔨᑉᑎᐅᑉ ᓄᓇᖓᓄᑦ ᑕᒤᓐᓄᑦ. 34ᐰᕉ ᐱᓇᓱᐊᑦᓴᐅᑎᒋᔪᒃᓴᐅᕗᖅ ᑎᓕᓯᓗᓂ ᑲᒪᔨᒃᓴᐅᓂᐊᕐᑐᓂᒃ ᓄᓇᒥ, ᐱᕈᕐᑐᐃᑦ ᓂᕿᒃᓮᑦ ᐊᕕᒡᓗᒋᑦ ᑕᓪᓕᒪᖏᑦ ᓴᓂᕐᕙᒃᑕᐅᕙᓪᓕᐊᖁᓪᓗᒋᑦ ᐄᑦᔨᑉᑎᐅᑉ ᓄᓇᓕᒫᖓᓂ ᑖᒃᑯᓇᓂ ᐊᕐᕌᒍᓂ 7ᓂ ᐱᕈᕐᑐᖃᑦᓯᐊᕐᓇᕐᑐᑦ ᓇᓪᓕᐅᑎᓯᒪᓂᖏᓐᓂ. 35ᐊᕐᕌᒍᓂᓗ ᐱᕈᕐᑐᖃᑦᓯᐊᕐᓇᕐᑐᓂ ᓇᓪᓕᐅᑎᓯᒪᓂᐊᕐᑐᓂ ᑖᒃᑯᐊ ᑲᑎᑦᓯᔪᓐᓇᖁᓪᓗᒋᑦ, ᓂᐊᖂᔭᒃᓴᓂᒃ ᐰᕉᑉ ᐊᖓᔪᖅᑳᖑᓂᖓᓄᑦ ᐊᐅᓚᑕᐅᓗᓂ, ᐃᒡᓗᒐᓴᒡᔪᐊᓂ ᑲᑎᕐᓱᐃᓯᒪᑦᓯᐊᖁᓪᓗᒋᑦ ᓂᕿᒃᓴᓂᒃ. 36ᑖᒃᑯᐊ ᓂᕿᒃᓮᑦ ᓴᓂᕐᕙᒃᑕᐅᓯᒪᖁᓪᓗᒋᑦ ᐊᕐᕌᒍᑦ 7ᐃᑦ ᑳᖕᓇᕐᑐᕐᔪᐊᑦ ᐊᑐᓕᕐᑎᓪᓗᒋᑦ ᐄᑦᔨᑉᑎᐅᑉ ᓄᓇᖓᓄᑦ ᑎᑭᐅᑎᑦᔪᒫᕐᑐᓂ ᓂᕿᒋᔭᐅᔪᓐᓇᖁᓪᓗᒋᑦ, ᓄᓇᓕᒫᒥ ᑳᖕᓇᕐᑐᕐᔪᐊᒧᑦ ᐱᕐᓕᓕᖁᓇᒋᑦ.”

ᔫᓯᐱᐅᑉ ᐊᐅᓚᑦᓯᔨᓐᖑᕐᑎᑕᐅᓂᖓ ᐄᑦᔨᑉᑎᓕᒫᒧᑦ

37ᑕᒪᓐᓇᓕ ᐃᓱᒪᓕᐅᕈᑕᐅᔪᖅ ᐰᕉᑉ ᐱᔨᓕᒫᖏᑕᓗ ᓈᒻᒪᒋᕚᑦ. 38ᐰᕉᓗ ᐅᖃᕐᐳᖅ ᐱᔨᒥᓄᑦ, “ᐊᖑᒻᒥᒃ ᐆᑐᓇᖅ ᑍᒤᑦᑐᒥᒃ, ᒎᑎᐅᑉ ᐊᓂᕐᓂᖓᓄᑦ ᓇᔪᕐᑕᐅᔪᒥᒃ ᓇᓂᓯᔪᓐᓇᕐᐱᑖ?” 39ᑕᕝᕙ ᐰᕉ ᔫᓯᐱᒧᑦ ᐅᖃᕐᐳᖅ, “ᒎᑎᐅᑉ ᑕᒪᒃᑯᓂᖓ ᑕᒤᓐᓂᒃ ᖃᐅᔨᑎᓚᐅᕐᒪᑎᑦ, ᐃᓕᒃᑐᑦ ᖃᐅᔨᒪᑎᒋᔪᒥᒃ ᓯᓚᑐᑎᒋᔪᒥᒡᓗ ᐱᑕᖃᓐᖏᓚᖅ; 40#ᐋᐴᓯᑕᓖᑦ 7:10.ᓄᓇᖁᑎᓐᓄᑦ ᑕᒤᓐᓄᑦ ᐊᖓᔪᖅᑳᓐᖑᕐᑎᑦᓱᒪᕙᒋᑦ, ᐃᓄᖁᑎᓕᒫᒃᑲᓗ ᑕᒪᕐᒥᒃ ᖃᓄᑐᐃᓐᓇᖅ ᐱᖁᔨᓂᕐᓂᒃ ᓈᓚᖁᓂᐊᕐᐸᒃᑲ; ᑭᓯᐊᓂ ᐊᖓᔪᖅᑳᕐᔪᐊᑉ ᐃᒃᓯᕙᐅᑕᖓ ᐱᑦᔪᑎᒋᓪᓗᒍ ᐃᓕᖕᓂᑦ ᐊᖓᔪᖅᑳᖑᓂᕐᓴᐅᓂᐊᕐᐳᖓ.” 41ᐰᕉᓗ ᔫᓯᐱᒧᑦ ᐅᖃᕐᐳᖅ, “ᑕᑯᒋᑦ, ᐄᑦᔨᑉᑎᐅᑉ ᓄᓇᖓᓄᑦ ᑕᒤᓐᓄᑦ ᐊᐅᓚᑦᓯᔨᓐᖑᕐᑎᑉᐸᒋᑦ.” 42#ᑖᓂᐊᓕ 5:29.ᑕᕝᕙ ᐰᕉᑉ ᕿᑎᕐᓯᕐᒥᐅᑕᓂ#41:42 ᕿᑎᕐᓯᕐᒥᐅᑕᓂ ᐅᕝᕙᓗ ᓇᒡᒍᐊᕐᒥᓂ ᐊᑐᕐᑕᓂ ᐲᕐᓗᒍ ᔫᓯᐱ ᐊᑎᑎᑉᐹ, ᐅᓕᒡᔪᐊᒥᒡᓗ ᖃᓪᓗᓈᕐᑕᑦᓯᐊᕙᖕᒥᒃ ᐊᑎᑎᓪᓗᒍ, ᒎᓗᓂᒡᓗ ᖁᖓᓯᕐᒥᐅᑕᕐᓂᒃ ᐊᑎᑎᒃᑭᓪᓗᒍ; 43ᐊᒃᓴᓗᐊᓕᖁᑎᖓᑕᓗ ᑐᖓᓕᖓᑕ ᐃᑭᒪᕕᖓᓂ ᐃᑭᑎᓪᓗᒍ ᐃᖏᕐᕋᑎᑉᐹ; ᐅᐱᒍᓱᒃᑎᑕᐅᔪᓪᓗ ᓯᕗᓂᖓᓃᑦᑐᑦ ᕾᒐᓛᕐᐳᑦ, “ᑖᑦᓱᒧᖓ ᐅᑯᒋᑦᓯ!” ᑍᒤᓕᐅᕐᓗᓂ ᑕᕝᕙ ᐄᑦᔨᑉᑎᓕᒫᒧᑦ ᐊᐅᓚᑦᓯᔨᕈᕐᑎᓚᐅᕐᐹ. 44ᐰᕉᓕ ᓱᓕ ᐅᖃᒃᑲᓐᓂᕐᐳᖅ ᔫᓯᐱᒧᑦ, “ᐅᕙᖓ ᐰᕉ, ᐱᖁᔨᕗᖓ ᖃᓄᑐᐃᓐᓇᖅ ᐃᕝᕕᑦ ᐱᖁᔨᓐᖏᑐᐊᕈᕕᑦ ᓇᓪᓕᐊᓐᓂᒡᓘᓐᓃᑦ ᐱᓇᓱᐊᕐᑐᖃᕐᑐᒃᓴᐅᓐᖏᓚᖅ ᐊᐅᓚᑦᔭᒋᐊᕐᑐᖃᕐᑐᒃᓴᐅᓇᓂᓗ ᐄᑦᔨᑉᑎᐅᑉ ᓄᓇᓕᒫᖓᓂ ᑕᒤᓐᓂ.” 45ᐰᕉᓪᓗ ᔫᓯᐱ ᐊᑦᓯᕐᐹ ᐄᑦᔨᑉᑎᒥᐅᑎᑐᑦ ᔨᐱᓈᑦ-ᐸᓂᐊᒥᒃ; ᓄᓕᐊᓂᒃᑎᑉᐹᓗ ᐊᓯᓇᒥᒃ, ᐸᑎᐱᐊᕋᐅᑉ ᐸᓂᖓᓂᒃ ᑐᓂᕐᕈᓯᕐᑎᑦᓯᔨᐅᔫᑉ ᓄᓇᒥ ᐆᓂᒥ. ᑭᖑᓂᖓᒍᑦ ᔫᓯᐱ ᐄᑦᔨᑉᑎᐅᑉ ᓄᓇᖓᒍᑦ ᑕᒤᑎᒍᑦ ᐃᖏᕐᕋᓚᐅᕐᐳᖅ. 46ᔫᓯᐱ ᐊᕐᕌᒍᖃᓕᓚᐅᕐᐳᖅ 30ᓂᒃ ᐱᓇᓱᐊᕆᐊᓯᑎᓪᓗᒍ ᐰᕉᑉ ᐊᖓᔪᖅᑳᕐᔪᐊᑉ ᐄᑦᔨᑉᑎᒥ ᐊᖓᔪᖅᑳᒃᑯᕕᖓᓂ. ᔫᓯᐱ ᑕᕝᕙᓐᖓᑦ ᐰᕉᑉ ᓇᔪᕐᑕᖓᓂᑦ ᐊᓂᒐᒥ ᐄᑦᔨᑉᑎᐅᑉ ᓄᓇᓕᒫᖓᓄᑦ ᐃᖏᕐᕋᓕᓚᐅᕐᐳᖅ.

47ᐊᕐᕌᒍᓂ 7ᓂ ᐱᕈᕐᑐᖃᑦᓯᐊᕐᓇᕐᑐᓂ ᓄᓇ ᐱᕈᕐᑎᑦᓯᓚᐅᕐᐳᖅ ᐊᒥᒐᖏᑦᑐᕐᔪᐊᓂᒃ, 48ᐊᕐᕌᒍᓂ ᑖᒃᑯᓇᓂ 7ᓂ ᐱᕈᕐᑐᖃᑦᓯᐊᕐᓇᕐᑐᓂ ᑲᑎᑦᓯᓚᐅᕐᐳᖅ ᓂᕿᒃᓴᓂᒃ ᐄᑦᔨᑉᑎᐅᑉ ᓄᓇᓕᒫᖓᓂ, ᑲᑎᕐᓱᕐᓗᒋᓪᓗ ᐃᒡᓗᒐᓴᒡᔪᐊᓄᑦ; ᑲᑎᕐᓱᐃᓚᐅᕐᐳᖅ ᑕᒤᓐᓂ ᐃᒡᓗᒐᓴᒡᔪᐊᓕᖕᓂ ᓂᕿᒃᓴᓂᒃ ᐱᕈᕐᓰᕕᖕᒥ ᐊᕙᑖᓃᑦᑐᓂᑦ ᐱᕈᕐᑎᑕᐅᓯᒪᔪᓂᒃ. 49ᔫᓯᐱᓗ ᑲᑎᕐᓱᐃᓚᐅᕐᐳᖅ ᓂᐊᖂᔭᒃᓴᓂᒃ ᐊᒥᒐᖏᑦᑐᕐᔪᐊᓂᒃ, ᐃᒪᐅᑉ ᑭᒡᓕᖓᓂ ᓯᐅᕋᕐᑎᑐᑦ ᐅᓄᕐᑎᒋᔪᓂᒃ, ᐆᒃᑐᕋᕐᑕᐅᔪᓐᓁᓪᓕᓚᐅᕐᐳᓪᓗ ᐆᒃᑑᑎᓄᑦ, ᐆᒃᑐᕋᒐᒃᓴᐅᔪᓐᓃᓚᐅᕐᒪᑕ.

50ᐊᕐᕌᒍᑦ ᑳᖕᓇᕐᑐᕐᔪᐊᑦ ᑎᑭᓚᐅᕐᑎᓐᓇᒋᑦ, ᔫᓯᐱ ᒪᕐᕉᖕᓂᒃ ᐃᕐᓂᕐᑖᓚᐅᕐᐳᖅ, ᐊᓯᓇᒃᑯᑦ, ᐸᑎᐱᐊᕋᐅᑉ ᑐᓂᕐᕈᓯᕐᑎᑦᓯᔨᐅᑉ ᓄᓇᒥ ᐆᓂᒥ ᐸᓂᖓᒍᑦ. 51ᔫᓯᐱᐅᓪᓗ ᐊᑦᓯᕐᐹ ᐊᖓᔪᒃᓯᖅ ᒫᓇᓯᒥᒃ, ᐅᖃᕐᓗᓂ, “ᒎᑎᐅᑉ ᐳᐃᒍᕐᑎᓚᐅᕐᒪᖓ ᐅᖁᒤᓐᓇᕐᑐᒃᑰᕐᓂᕆᓚᐅᕐᑕᓐᓂᒃ ᐊᑖᑕᒪᓗ ᐃᓚᖏᓐᓂᒃ ᑕᒤᓐᓂᒃ.” 52ᐂᑉᐸᖓᓕ ᐊᑦᓯᕐᐹ ᐃᕗᕅᒥᒃ, ᐅᖃᕐᓗᓂ, “ᒎᑎᐅᑉ ᐅᓄᕐᓯᑎᒻᒪᖓ ᕿᑐᕐᖏᐅᕐᑎᑦᓱᓂᖓᓗ ᐃᓱᐊᖏᑦᑐᕐᓯᐅᕐᕕᓐᓂ.”

53ᑕᕝᕙ ᐊᕐᕌᒍᑦ 7 ᐊᔪᕐᓴᕐᓇᖏᑦᑐᑦ ᐱᕈᕐᕕᐅᑦᓯᐊᕐᓇᕐᑐᓪᓗ ᓄᓇᒥ ᐄᑦᔨᑉᑎᒥ ᐃᓱᓕᓚᐅᕐᐳᑦ. 54#ᐋᐴᓯᑕᓖᑦ 7:11.ᐊᕐᕌᒍᓪᓗ 7 ᑳᖕᓇᕐᑐᕐᔪᐊᑦ ᐱᒋᐊᓯᓪᓗᑎᒃ, ᔫᓯᐱᐅᑉ ᑍᒫᒃ ᐅᖃᐅᓯᕆᓚᐅᕐᒪᒍ. ᑕᕝᕙ ᓄᓇᒥ ᓇᓂᓕᒫᖅ ᑳᖕᓇᕐᑐᕐᔪᐊᖃᓕᕐᐳᖅ; ᐄᑦᔨᑉᑎᓕᒫᕐᓕ ᓂᕿᒃᓴᖃᓚᐅᕐᐳᖅ. 55#ᔪᐊᓇᓯ 2:5.ᐄᑦᔨᑉᑎᐅᓪᓕ ᓄᓇᖓᓂ ᑕᒤᓐᓂ ᑳᖕᓇᕐᑐᕐᔪᐊᖅ ᐱᕙᓪᓕᐊᓕᕐᒪᑦ, ᐃᓄᐃᑦ ᐰᕉᒧᑦ ᑐᒃᓯᕋᖃᑦᑕᓕᕐᐳᑦ ᓂᕿᒃᓴᑖᕈᒪᓪᓗᑎᒃ; ᐰᕉᓪᓗ ᑕᒪᕐᒥᒃ ᐄᑦᔨᑉᑎᒥᐅᑦ ᐅᖃᐅᑎᕔᑦ, “ᔫᓯᐱᒧᑦ ᑕᑯᓂᐊᓕᕆᑦᓯ; ᖃᓄᑐᐃᓐᓇᖅ ᐱᖁᑐᐊᕐᐸᓯ ᓈᓚᑦᓯᐊᕐᓗᒍ ᐱᓂᐊᕐᑐᒃᓴᐅᕗᓯ.” 56ᓄᓇᓂᓕ ᓇᓂᓕᒫᖅ ᑳᖕᓇᕐᑐᕐᔪᐊᖅ ᓯᐊᒻᒪᕐᐸᓪᓕᐊᓕᕐᒪᑦ, ᔫᓯᐱᐅᑉ ᓂᕿᒃᓴᒃᑯᕕᐅᔪᑦ ᑕᒪᕐᒥᒃ ᒪᑐᐃᕐᓚᐅᕐᐰᑦ, ᓂᐅᕐᕈᑎᒋᖃᑦᑕᓕᕐᓗᒋᓪᓗ ᐄᑦᔨᑉᑎᒥᐅᓄᑦ, ᓄᓇᒥ ᐄᑦᔨᑉᑎᓕᒫᒥ ᑳᖕᓇᕐᑐᕐᔪᐊᖅ ᓇᓪᓕᐅᑎᓯᒪᓕᓚᐅᕐᒪᑦ. 57ᓱᓕᑦᑕᐅᖅ, ᓄᓇᕐᔪᐊᕐᒥᐅᓕᒫᑦ ᐄᑦᔨᑉᑎᒧᐊᖃᑦᑕᓕᓚᐅᕐᐳᑦ ᔫᓯᐱᒧᐊᕐᓗᑎᒃ ᓂᐊᖂᔭᒃᓴᒥᒃ ᓂᐅᕕᕆᐊᕐᓗᑎᒃ, ᓄᓇᕐᔪᐊᓕᒫᒥ ᑳᖕᓇᕐᑐᕐᔪᐊᖃᓕᓚᐅᕐᒪᑦ ᓇᓂᑐᐃᓐᓇᓕᒫᖅ.

Currently Selected:

ᒨᓯᓯ ᓯᕗᓪᓖᑦ 41: EAIB

Highlight

Copy