ᒨᓯᓯ ᓯᕗᓪᓖᑦ 40
40
ᔫᓯᐱᐅᑉ ᑐᑭᓯᑎᑦᓯᓂᖓ ᑎᒍᔭᐅᓯᒪᔪᑦ ᓯᓐᓇᒃᑐᖏᑕ ᑐᑭᖏᓐᓂᒃ
1ᑕᒪᑐᒪᓕ ᑭᖑᓂᖓᒍᑦ, ᐄᑦᔨᑉᑎᐅᑉ ᐊᖓᔪᖅᑳᕐᔪᐊᖓᑕ ᐃᒥᕐᓂᐊᕐᑕᖓᓂᒃ ᐊᑐᐃᓐᓇᕈᐃᔨᐅᑉ ᓂᐊᖂᔭᓕᐅᕐᑎᖁᑎᖓᑕᓗ ᐊᖓᔪᖅᑳᑎᒃ ᓂᓐᖓᒃᑎᓚᐅᕐᐹᑦ ᐄᑦᔨᑉᑎᐅᑉ ᐊᖓᔪᖅᑳᕐᔪᐊᖓ. 2ᐰᕉᓗ ᓂᓐᖓᐅᑦᔨᓚᐅᕐᐳᖅ ᐊᖓᔪᖅᑳᖁᑎᒥᓂᒃ ᒪᕐᕉᖕᓂᒃ, ᐃᒥᕐᓂᐊᕐᑕᖏᓐᓄᑦ ᑲᒪᔨᐅᑉ ᐊᖓᔪᖅᑳᖓᓐᓂᒃ ᓂᐊᖂᔭᓕᐅᕐᑏᓪᓗ ᐊᖓᔪᖅᑳᖓᓐᓂᒃ, 3ᑲᒪᒋᔭᐅᑎᓕᓚᐅᕐᐰᓪᓗ ᐅᓇᑕᕐᑐᒃᓮᑦ ᐊᖓᔪᖅᑳᖏᓐᓄᑦ, ᑎᒍᔭᐅᓯᒪᕕᖕᒧᑦ ᔫᓯᐱᐅᑉ ᓇᔪᕐᑕᖓᓃᑦᑐᒧᑦ. 4ᐅᓇᑕᕐᑐᒃᓮᓪᓕ ᐊᖓᔪᖅᑳᖓᑦᑕ ᔫᓯᐱ ᑲᒪᔨᓐᖑᕐᑎᓚᐅᕐᐹ ᑖᒃᑯᓂᖓ, ᐱᔨᑦᓯᖃᑦᑕᓚᐅᕐᐳᖅ; ᐊᑯᓂᒐᓚᒡᓗ ᑲᒪᔨᐅᖃᑕᐅᓕᓚᐅᕐᐳᖅ ᑖᒃᑯᓂᖓ.
5ᐅᓐᓄᐊᓪᓕ ᐃᓚᖓᓐᓂ ᑖᒃᑯᐊᒃ ᐊᑐᓂᑦ ᓯᓐᓇᒃᑐᓚᐅᕐᐴᒃ ᐃᒥᕐᑕᐅᓂᐊᕐᑐᓂᒃ ᑲᒪᔨᐅᔪᖅ ᓂᐊᖂᔭᓕᐅᕐᑎᓪᓗ ᑲᒪᔨᖓᑦ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓂᒥᐅᑕᐅᔫᒃ, ᑎᒍᔭᐅᑎᑕᐅᓯᒪᔫᒃ ᑕᕝᕙᓂ ᐊᑐᓂᑦ ᓯᓐᓇᒃᑐᕐᐴᒃ, ᐊᑐᓂᓪᓗ ᓯᓐᓇᒃᑐᖏᑦ ᐃᒻᒥᒍᑦ ᑐᑭᖃᕐᓗᑎᒃ. 6ᔫᓯᐱᐅᓪᓕ ᐅᓪᓛᒃᑯᑦ ᐅᐸᒃᑲᒥᒋᒃ ᑕᑯᒐᒥᒋᒡᓗ, ᖁᕕᐊᓱᖏᒻᒪᑎᒃ. 7ᑕᕝᕙ ᐰᕉᑉ ᐊᖓᔪᖅᑳᖁᑎᖏᒃ ᑖᒃᑯᐊᒃ ᐃᓚᒋᕙᓚᐅᕐᑖᖕᓂ ᐊᖓᔪᖅᑳᖓᑕ ᐃᒡᓗᖓᓂ, ᐊᐱᕆᕚᒃ, “ᓱᖕᒪᑦ ᐅᓪᓗᒥ ᖁᕕᐊᓱᖏᑦᑐᐊᓘᕕᓯᒃ?”
8ᑖᒃᑯᐊᒃ ᑭᐅᕘᒃ, “ᐊᑐᓂᑦ ᓯᓐᓇᒃᑑᒪᖅᑲᐅᕗᒍᒃ, ᓇᓪᓕᐊᓐᓂᒡᓘᓐᓃᓪᓕ ᑐᑭᓯᑎᑕᐅᔪᓐᓇᓐᖏᓚᒍᒃ.”
ᔫᓯᐱᐅᓪᓗ ᐅᖃᐅᑎᕚᒃ, “ᒎᑎ ᑭᓯᒥ ᑐᑭᓯᑎᑦᓯᔪᓐᓇᕐᑐᑑᕗᖅ, ᐅᖃᐅᑎᓚᐅᕐᓯᓐᖓ ᑖᒃᑯᓂᖓ.”
9ᑕᕝᕙ ᐃᒥᕐᑕᐅᓂᐊᕐᑐᓂᒃ ᑲᒪᔨ ᓯᓐᓇᒃᑐᕐᒥᓂᒃ ᐅᖃᓕᕐᐳᖅ ᔫᓯᐱᒧᑦ, ᐅᖃᕐᓗᓂ, “ᓯᓐᓇᒃᑐᕐᑎᓪᓗᖓ ᓇᐹᕐᑐᒥᒃ ᕔᓂᓕᒃᓴᒥᒃ ᓵᓐᓃᑦᑐᖃᕐᐳᖅ, 10ᑕᕝᕙᓂᓗ ᕔᓂᓕᒃᓴᒥ ᐱᖓᓱᓂᒃ ᐊᕙᓚᖓᔪᖃᕐᐳᖅ; ᐅᖃᐅᔭᕐᑖᑐᐊᕋᒥ ᓄᕗᖏᑎᒍᑦ ᐱᕈᕐᕕᐅᓯᑲᐅᑎᒋᕗᖅ, ᐸᐅᕐᖎᓪᓗ ᕔᓂᒃᓮᑦ ᐱᕈᕇᕐᓗᑎᒃ. 11ᐰᕉᓪᓗ ᐃᒥᐅᑎᖓᓂᒃ ᑎᒍᒥᐊᕋᒪ; ᑕᕝᕙᓐᖓᑦ ᐸᐅᕐᖓᓂᒃ ᑎᒍᓯᒐᒪ ᐃᑦᑏᔭᓕᕐᐸᒃᑲ ᐰᕉᑉ ᐃᒥᐅᑎᖓᓄᑦ, ᐃᒥᐅᑎᓗ ᐰᕉᒧᑦ ᑐᓂᓪᓗᒍ.”
12ᑕᕝᕙ ᔫᓯᐱ ᑖᑦᓱᒧᖓ ᐅᖃᓕᕐᐳᖅ, “ᐅᓇ ᑕᕝᕙ ᑕᒪᑐᒪ ᑐᑭᖓ: ᐅᑯᐊ ᐱᖓᓱᑦ ᐊᕙᓚᖓᔪᐃᑦ ᑐᑭᖃᕐᐳᑦ ᐅᓪᓗᓂᒃ ᐱᖓᓱᓂᒃ; 13ᐅᓪᓗᐃᑦ ᐱᖓᓱᑦ ᐊᓂᒍᕐᐸᑕ ᐰᕉᑉ ᑐᑭᑖᕐᕕᒋᔪᒫᕐᐹᑎᑦ ᐅᑎᕐᑎᓪᓗᑎᓪᓗ ᐱᓇᓱᐊᕐᕕᒋᓚᐅᕐᑕᕐᓄᑦ; ᐰᕉᓪᓗ ᐃᒥᐅᑎᖓ ᑖᑦᓱᒧᖓ ᑐᓂᖃᑦᑕᓕᓛᕆᕙᑦ ᓯᕗᓂᖓᓂᑎᑐᑦ, ᑖᑦᓱᒪ ᐃᒥᕐᓂᐊᕐᑕᖏᓐᓂᒃ ᑲᒪᔨᐅᓂᕆᓚᐅᕐᑕᕐᑐᖅ. 14ᐃᖅᑲᐅᒪᓛᕐᐸᕐᒪ ᖃᓄᐃᖏᑦᓯᐊᓕᕈᕕᑦ, ᕿᓄᕗᖓ ᓈᒃᑭᒋᔪᒫᕐᐸᕐᒪ ᐅᖃᐅᓯᕆᓗᖓᓗ ᐰᕉᒧᑦ, ᐅᕙᓐᖓᑦ ᐊᓂᑎᑕᐅᖁᓪᓗᖓ ᐃᓂᒋᔭᓐᓂᑦ. 15ᐄᑉᕈᐃᑦ ᓄᓇᖓᓂᑦ ᑎᒡᓕᒐᕆᔭᐅᓪᓗᖓ ᐊᐅᓪᓚᕈᑦᔭᐅᓚᐅᕋᒪ; ᐊᒻᒪᑦᑕᐅᖅ ᑎᒍᔭᐅᑦᔪᑎᒃᓴᒥᒃ ᐱᓚᐅᕐᑎᓐᓇᖓ ᐅᕗᖓ ᑎᒍᔭᐅᓯᒪᕕᖕᒧᐊᕐᑕᐅᓯᒪᓪᓗᖓ.”
16ᓂᐊᖂᔭᓕᐅᕐᑏᓪᓕ ᐊᖓᔪᖅᑳᖓᑦ ᑕᑯᒐᒥ ᑐᑭᓯᓇᕐᓯᑎᑕᐅᔪᑦ ᖁᕕᐊᓇᕐᑑᓂᖏᓐᓂᒃ, ᔫᓯᐱᒧᑦ ᐅᖃᕐᐳᖅ, “ᐅᕙᖓᑦᑕᐅᖅ ᓯᓐᓇᒃᑐᓚᐅᕐᐳᖓ: ᓂᐊᖁᓐᓂ ᐱᖓᓱᓂᒃ ᐃᕕᐅᔭᕐᓂᒃ ᖃᑯᕐᑕᓂᒃ ᐊᒡᔭᕐᓯᓚᐅᕐᐳᖓ, 17ᐊᒡᔭᕐᑕᒪ ᖄᖓᓃᓐᓂᕐᐹᖅ ᐃᓗᓕᖃᓚᐅᕐᐳᖅ ᐰᕉᑉ ᓂᕆᔭᒃᓴᖏᓐᓂᒃ ᐆᓯᒪᔪᓂᒃ ᐊᑦᔨᒌᖏᑦᑐᓂᒃ, ᑎᖕᒥᐊᓪᓕ ᑕᕝᕙᓐᖓᑦ ᐃᕕᐅᔭᕐᒥᑦ ᓂᕆᓚᐅᕐᐳᑦ ᓂᐊᑯᕐᒪ ᖄᖓᓃᑦᑐᒥᑦ.”
18ᔫᓯᐱᐅᓪᓗ ᑭᐅᕚ ᐅᖃᐅᑎᓪᓗᒍᓗ, “ᐅᓇ ᑕᕝᕙ ᑕᒪᑐᒪ ᑐᑭᖓ: ᐅᑯᐊ ᐃᕕᐅᔧᑦ ᐱᖓᓱᑦ ᐅᓪᓗᑦ ᐱᖓᓲᕗᑦ; 19ᐅᓪᓗᐃᑦ ᐱᖓᓱᑦ ᐊᓂᒍᕐᐸᑕ ᐰᕉᑉ ᑐᑭᑖᕐᕕᒋᔪᒫᕐᐹᑎᑦ ᕿᒥᑕᐅᖁᓪᓗᑎᑦ ᓇᐹᕐᑐᒥ! ᑎᖕᒥᐊᓂᓪᓗ ᑎᒦᑦ ᓂᕆᔭᐅᔪᒫᕐᐳᖅ.”
20ᐅᓪᓗᐃᑦ ᐱᖓᓱᑦ ᐊᓂᒍᕐᒪᑕ, ᐰᕉ ᐃᓅᓕᕐᕕᒃᓯᐅᓕᕐᐳᖅ, ᓂᕆᕕᒃᔪᐊᕐᑎᑦᓯᕗᓪᓗ ᐱᔨᒥᓄᑦ ᑕᒤᓐᓄᑦ, ᑐᑭᑖᕈᑎᖃᕐᐳᕐᓗ ᐃᒥᕐᑎᑦᓯᔩᑦ ᑲᒪᔨᖓᓐᓂᒃ ᓂᐊᖂᔭᓕᐅᕐᑏᓪᓗ ᑲᒪᔨᖓᓐᓂᒃ ᐱᔨᖏᑕ ᐊᑯᕐᖓᓐᓂ. 21ᐃᒥᕐᑎᑦᓯᔩᓪᓗ ᑲᒪᔨᖓᑦ ᐅᑎᕐᑎᑉᐹ ᐃᒥᕐᑎᑦᓯᔨᓄᑦ ᑲᒪᔨᐅᓂᕐᒧᑦ, ᐰᕉᑉ ᐃᒥᕐᓂᐊᕐᑕᖓᓂᒃ ᑐᓂᓯᖃᑦᑕᖁᓪᓗᒍ ᑖᑦᓱᒧᖓ; 22ᓂᐊᖂᔭᓕᐅᕐᑏᓪᓕ ᑲᒪᔨᖓ ᕿᒥᑕᐅᑎᑉᐹ, ᓲᕐᓗ ᔫᓯᐱᐅᑉ ᑐᑭᓯᓇᕐᑎᑦᓯᓂᕆᓚᐅᕐᑕᖓᑐᑦ ᑖᒃᑯᓄᖓ. 23ᐃᒥᕐᑎᑦᓯᔩᓪᓕ ᑲᒪᔨᖓᑕ ᔫᓯᐱ ᐃᖅᑲᐅᒪᓚᐅᓐᖏᓛ, ᐳᐃᒍᑦᓯᐊᕐᓗᒍᓗ.
Currently Selected:
ᒨᓯᓯ ᓯᕗᓪᓖᑦ 40: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
