ᒨᓯᓯ ᓯᕗᓪᓖᑦ 27
27
ᐂᓴᑭᐅᑉ ᓮᒻᒪᕐᑎᑦᓯᓂᖓ ᔧᑯᒥᒃ
1ᐂᓴᑭᓗ ᐃᑦᑐᐊᓘᓕᕐᑎᓪᓗᒍ ᑕᒃᐲᓕᓚᐅᕐᐳᖅ ᑕᐅᑐᒍᓐᓃᓕᕐᓗᓂᓗ, ᐃᕐᓂᓂᓗ ᐊᖓᔪᒃᓕᖅ ᐄᓴ ᕾᖁᔭᐅᒃᑲᕐᓗᓂᐅᒃ ᐅᖃᐅᑎᕚ, “ᐃᕐᓃᒃ!”
ᐃᕐᓂᖓᓗ ᑭᐅᕗᖅ, “ᑕᒫᓃᑉᐳᖓ.”
2ᐂᓴᑭᓗ ᐅᖃᕐᐳᖅ, “ᑕᑯᒋᑦ ᐃᑦᑐᐊᓘᓕᕋᒪ; ᑐᖁᕕᒃᓴᕋᓗ ᖃᐅᔨᒪᓇᒍ, 3ᒫᓐᓇᓕ ᐊᖑᓇᓲᑎᑎᑦ ᑎᒍᓗᒋᑦ, ᐱᑎᒃᓰᑦ ᖃᕐᔪᑎᓪᓗ, ᐊᐅᓪᓚᓚᐅᕆᑦ ᐆᒪᔪᕐᓯᐅᕈᑎᓗᖓ. 4ᓂᕿᓕᐅᕈᑎᓗᖓᓗ ᒪᒪᕆᔭᓐᓂᒃ, ᕾᒃᑯᕕᒋᑦ, ᓂᕆᓂᐊᕋᒃᑭᑦ; ᓂᕆᔭᕇᕈᒪ ᓮᒻᒪᕐᑎᑦᓱᒪᒐᒃᑭᑦ ᑐᖁᓚᐅᖏᓐᓂᓐᓂ.”
5ᕇᐱᑲᓗ ᑐᓵᕗᖅ ᐂᓴᑭ ᐃᕐᓂᕐᒥᓄᑦ ᐄᓴᒧᑦ ᐅᖃᓪᓚᒃᑎᓪᓗᒍ, ᐄᓴ ᐆᒪᔪᕐᓯᐅᕆᐊᕐᓗᓂ ᐊᐅᓪᓚᕐᒪᑦ, 6ᕇᐱᑲ ᐃᕐᓂᕐᒥᓄᑦ ᔧᑯᒧᑦ ᐅᖃᕐᐳᖅ, “ᑐᓵᒐᒪ ᐊᑖᑍᑦ ᐅᖃᓪᓚᒃᑎᓪᓗᒍ ᐊᖓᔪᖕᓄᑦ ᐄᓴᒧᑦ, ᐃᒫᒃ, 7‘ᐆᒪᔪᕐᓯᐅᕆᐊᓚᐅᕆᑦ ᓂᕿᓕᐅᕈᑎᓗᖓ ᒪᒪᕆᔭᓐᓂᒃ ᓂᕆᓂᐊᕋᒪ, ᓂᕆᔭᕇᕈᒪ ᓮᒻᒪᕐᑎᓐᓂᐊᕋᒃᑭᑦ ᐊᑕᓂᐅᑉ ᓵᖓᓂ ᑐᖁᓚᐅᖏᓐᓂᓐᓂ.’ 8ᑍᒤᒻᒪᑦ, ᐃᕐᓃᒃ ᐅᖃᐅᓯᒃᑲ ᒪᓕᑦᓯᐊᒃᑭᑦ, 9ᓰᐱᓄᐊᕐᓗᑎᑦ, ᒎᑦᓯᑦ ᓄᕐᕋᖏᖕᓂᒃ ᒪᑦᕉᖕᓂᒃ ᐂᒃᓯᕆᑦ, ᓂᕿᓕᐅᕐᓂᕋᒪ ᒪᒪᕐᑐᒥᒃ ᐊᑖᑕᕕᑦ ᒪᒪᕆᔭᖓᓂᒃ; 10ᑐᓂᓯᕕᒋᓂᐊᕋᕕᐅᒃ ᐊᑖᑍᑦ ᓂᕆᖁᓗᒍ, ᓮᒻᒪᕐᑎᓐᓂᐊᕐᒪᑎᑦ ᑐᖁᓚᐅᖏᓂᕐᒥᓂ.”
11ᔧᑯᓕ ᐊᓈᓇᒥᓄᑦ ᕇᐱᑲᒧᑦ ᐅᖃᕐᐳᖅ, “ᑕᑯᒋᑦ, ᐊᖓᔪᒐ ᐄᓴ ᒥᖅᑯᖃᕐᐳᖅ, ᐅᕙᖓᓕ ᒥᖅᑯᖃᓐᖏᓚᖓ. 12ᐊᑖᑕᒪ ᐊᒃᑐᕈᓂᖓ ᖃᐅᔨᒐᔭᕐᐳᖅ, ᐅᐃᕕᕐᕆᒃᓯᓂᓐᓂᒃ ᑖᑦᓱᒥᖓ, ᑕᕝᕙ ᐅᖃᕐᓂᕐᓗᒡᕕᒋᓂᐊᐹᖓ ᓮᒻᒪᕐᑎᑦᓱᓐᓃᕐᓗᖓ.”
13ᐊᓈᓇᖓᑕᓗ ᐅᖃᐅᑎᕚ, “ᐃᕐᓃᒃ ᐅᕙᖓᖔᖅ ᐅᖃᕐᓂᕐᓗᒡᕕᐅᓂᕐᓄᑦ ᑐᕌᕐᑕᐅᓂᐊᕐᐳᖓ; ᐅᖃᐅᓯᕋ ᓈᓚᓕᕈᒃ, ᑍᒃᑯᖕᓂᖓᑦ ᐂᒃᓯᑐᐃᓐᓇᓕᕆᑦ ᐅᕙᓐᓄᐊᕈᑎᓗᒋᒃ.” 14ᑕᕝᕙ ᐂᒃᓯᕐᐳᖅ ᐊᓈᓇᒥᓄᓪᓗ ᑐᓂᓪᓗᒋᒃ; ᐊᓈᓇᖓᓗ ᓂᕿᓕᐅᕐᐳᖅ ᒪᒪᕐᑐᓂᒃ, ᐊᑖᑕᖓᑕ ᒪᒪᕆᕙᒃᑕᖓᓂᒃ. 15ᕇᐱᑲᐅᓪᓗ ᐄᓴᐅᑉ ᐊᓐᓄᕌᖏᑦ ᐱᐅᓂᕐᐹᑦ ᐃᒡᓗᒥᖕᓃᑦᑐᑦ ᑎᒍᓪᓗᒋᑦ, ᔧᑯᒧᑦ ᐃᕐᓂᒥᓄᑦ ᓄᑲᕐᓯᕐᒧᑦ ᐊᑎᔭᐅᑎᑉᐰᑦ. 16ᒎᑦᓰᓪᓗ ᓄᕐᕋᖏᑕ ᐊᒥᖏᓐᓂᒃ ᑕᓕᖏᒃ ᐃᓪᓕᕆᓪᓗᒋᒃ ᖁᖓᓯᖓᑕᓗ ᒥᖅᑯᖃᖏᓐᓂᖓᓄᑦ ᐃᓕᓯᒋᕗᖅ. 17ᓂᕿᓕᐊᕆᔭᓂᓗ ᒪᒪᕐᑐᑦ ᓂᐊᖂᔭᓪᓗ ᐃᒐᕋᑖᕐᑕᓂ ᑐᓂᕔᑦ ᐃᕐᓂᕐᒥᓄᑦ ᔧᑯᒧᑦ.
18ᔧᑯᓗ ᐊᑖᑕᒥᓄᑦ ᐃᑎᕋᒥ ᐅᖃᐅᑎᕚ, “ᐊᑖᑖᒃ.”
ᑖᑦᓱᒪ ᑭᐅᕙ, “ᒫᓃᑉᐳᖓ; ᓇᓪᓕᐊᖑᕖᑦ ᐃᕐᓃᒃ?” 19ᔧᑯᓗ ᐅᖃᕐᐳᖅ ᐊᑖᑕᒥᓄᑦ, “ᐄᓴᐅᕗᖓ, ᐃᕐᓃᑦ ᐊᖓᔪᒃᓕᖅ, ᐱᔭᕇᕋᒪ ᐅᖃᐅᑎᖅᑲᐅᒐᕕᖓ; ᐃᖏᓪᓗᑎᑦ ᓂᕆᓚᐅᕆᑦ, ᐆᒪᔪᕐᑕᓐᓂᒃ ᓮᒻᒪᕐᑎᓐᓂᐊᕋᕕᖓ.”
20ᐂᓴᑭᓗ ᐃᕐᓂᕐᒥᓄᑦ ᐅᖃᕐᐳᖅ, “ᐃᕐᓃᒃ ᖃᓄᕐᓕ ᐊᑯᓂᐅᖏᑦᑐᖅ ᓇᓂᓯᑲᐅᕐᑐᕐᐲᑦ?”
ᑖᑦᓱᒪ ᑭᐅᕚ, “ᐊᑕᓂᐅᑉ ᒎᑎᕕᑦ ᑐᓂᓯᕕᒋᓪᓗᖓ ᐱᔪᓐᓇᕐᑎᒻᒪᖓ.”
21ᐂᓴᑭᓗ ᔧᑯᒧᑦ ᐅᖃᕐᐳᖅ, “ᐃᕐᓃᒃ ᕾᓚᐅᕆᑦ ᒪᐅᖓ, ᑕᑦᓯᒃᑐᕐᓂᐊᕋᒃᑭᑦ, ᖃᐅᔨᓂᐊᕋᒪ ᐄᓴᐅᖕᒪᖔᕐᐱᑦ ᑖᓐᓇᐅᖏᒻᒪᖔᕐᐱᓪᓘᓐᓃᑦ?” 22ᔧᑯᓗ ᐊᑖᑕᒥᓄᑦ ᐂᓴᑭᒧᑦ ᖃᒡᓕᒃᑲᓐᓂᕐᒪᑦ, ᑖᑦᓱᒪ ᑕᑦᓯᒃᑐᕐᓗᒍ ᐅᖃᕐᐳᖅ, “ᔧᑰᑉ ᓂᐱᖓᓂᒃ ᓂᐱᖃᕋᕕᑦ, ᐊᒡᒐᑎᓪᓕ ᐄᓴᐅᑉ ᐊᒡᒐᒋᕔᑦ.” 23ᔧᑰᓂᖓᓂᒡᓕ ᐃᓕᑕᕆᓐᖏᓛ, ᐊᒡᒐᖏᑦ ᒥᖅᑯᖃᕐᒪᑎᒃ ᐊᖓᔪᒥᑐᑦ ᐄᓴᑐᑦ; ᑕᕝᕙ ᓮᒻᒪᕐᑎᑉᐹ, 24ᐊᐱᕆᕚᓗ, “ᐄᓴᓪᓚᕆᐅᒐᓗᐊᕐᐲᑦ?”
ᑖᑦᓱᒪ ᑭᐅᕚ, “ᑖᓐᓇᐅᕗᖓ.”
25ᑕᕝᕙ ᐅᖃᓕᕐᐳᖅ, “ᓂᕆᓂᐊᕐᑕᕋ ᕾᓚᐅᕈᒃ, ᐃᕐᓂᕐᒪ ᐆᒪᔪᕐᑕᕕᓂᖓᓂᒃ ᓂᕆᓂᐊᕋᒪ ᓮᒻᒪᕐᑎᓪᓗᑎᓪᓗ.” ᑕᕝᕙ ᓂᕆᓂᐊᕐᑕᖓᓂᒃ ᑐᓂᕚ, ᓂᕆᓪᓗᓂᓗ; ᕔᓂᒥᒡᓗ ᑐᓂᒋᕚ, ᐃᒥᕐᓗᓂᓗ. 26ᑕᕝᕙ ᐊᑖᑕᖓᑕ ᐂᓴᑭᐅᑉ ᐅᖃᐅᑎᕚ, “ᕾᓗᑎᑦ ᐃᕐᓃᒃ ᑯᓂᓚᐅᓐᖓ.” 27#ᐄᑉᕈᐃᓄᑦ 11:20.ᐅᐸᒃᓗᒍ ᐊᑖᑕᓂ ᑯᓂᒃᐹ; ᑕᕝᕙ ᐊᓐᓄᕌᖏᑕ ᑎᐱᖏᑦ ᓁᕔᑦ, ᓮᒻᒪᕐᑎᓪᓗᒍᓗ ᐅᖃᕐᐳᖅ, “ᐃᕐᓂᕐᒪ ᑎᐱᑦᓯᐊᕆᖕᓂᖓ ᓁᓪᓗᒍ ᓄᓇᐅᑉ ᓇᑎᕐᓇᐅᑉ; ᐊᑕᓂᐅᑉ ᓮᒻᒪᕐᑎᓯᒪᔭᖓᑐᑦ ᑍᒤᑉᐳᖅ. 28ᒎᑎᐅᑉ ᑐᓂᓯᕕᒋᓕᑎᑦ ᕿᓚᐅᑉ ᖃᐅᓯᕐᑎᑦᓯᓂᖓᓂᒃ, ᓄᓇᒥᒡᓗ ᐊᔪᕐᓴᕐᓇᖏᑦᑐᒥᒃ, ᐊᒥᒐᖏᑦᑐᓂᒡᓗ ᓂᐊᖂᔭᒃᓴᓂᒃ ᕔᓂᒃᓴᓂᒡᓗ, 29#ᒨᓯᓯ ᓯᕗᓪᓖᑦ 12:3.ᐃᓅᖃᑎᒌᒡᔪᐊᑦ ᐊᓯᑦᓯᓐᓃᑦᑐᑦ ᐱᔨᑦᓯᕐᓕᑎᑦ, ᐃᓅᖃᑎᒌᒡᔪᐊᓪᓗ ᓇᓂᑐᐃᓐᓇᖅ ᐹᒻᒪᒃᑎᕐᕕᒋᓕᑎᑦ; ᐊᖓᔪᖅᑳᖑᓕᕆᑦ ᖃᑕᓐᖑᑎᖕᓄᑦ, ᐊᓈᓇᕕᓪᓗ ᑭᖑᕚᖏᑕ ᐹᒻᒪᒃᑎᕐᕕᒋᔭᒃᓴᕆᕚᑎᑦ, ᓇᕐᕈᓇᕐᓯᓕᑦ ᐃᓕᖕᓂᒃ ᓇᕐᕈᔪᑦ, ᓮᒻᒪᕐᑎᑕᐅᓕᓪᓗ ᐃᓕᖕᓂᒃ ᓮᒻᒪᕐᑎᑦᓯᔪᑦ.”
ᐄᓴᐅᑉ ᐊᑖᑕᒥᓄᑦ ᓮᒻᒪᕐᑎᑕᐅᔪᒪᓂᖓ
30ᐂᓴᑭᐅᑉ ᔧᑯ ᓮᒻᒪᕐᑎᑦᓴᕇᑐᐊᕐᒪᒍ, ᔧᑯ ᐊᑯᓂᐅᖏᑦᑐᖅ ᐊᓂᓯᒪᓕᕐᑎᓪᓗᒍ ᐊᑖᑕᒥ ᓇᔪᕐᑕᖓᓂᑦ, ᐊᖓᔪᐊ ᐄᓴ ᑎᑭᑉᐳᖅ ᐆᒪᔪᕐᓯᐅᕐᑐᕕᓂᐅᓪᓗᓂ. 31ᓂᕿᓕᐅᕆᕗᕐᑕᐅᖅ ᒪᒪᕐᑐᒥᒃ, ᐊᑖᑕᒥᓄᓪᓗ ᐅᖃᕐᐳᖅ, “ᐊᑖᑕᒐ ᒪᑭᓚᐅᕆᑦ, ᐃᕐᓂᕐᐱᑦ ᐆᒪᔪᕐᑕᖓᓂᒃ ᓂᕆᓂᐊᕋᕕᑦ, ᓮᒻᒪᕐᑎᓐᓂᐊᕋᕕᖓ.”
32ᐊᑖᑕᖓᑕᓗ ᐂᓴᑭᐅᑉ ᐊᐱᕆᕚ, “ᑭᓇᐅᒐᕖᑦ?”
ᑖᑦᓱᒪ ᑭᐅᕚ, “ᐃᕐᓂᕆᕙᕐᒪ, ᐊᖓᔪᒃᓯᖁᑏᑦ ᐄᓴ.”
33ᐂᓴᑭᓗ ᓴᔪᓕᕐᐳᖅ ᖁᐊᕐᓵᖓᓂᕐᒧᑦ, ᐊᐱᕆᓪᓗᓂᓗ, “ᑭᓇᓖᓐᓇ ᐆᒪᔪᕐᓯᐅᓚᐅᕐᓗᓂ ᕾᑦᓯᖅᑲᐅᕚ, ᕾᑕᖓᓗ ᓂᕆᖅᑲᐅᕙᕋ ᓄᖑᓪᓗᒍ ᑎᑭᓚᐅᕐᑎᓐᓇᒃ, ᓮᒻᒪᕐᑎᖅᑲᐅᕙᕋ ᓮᒻᒪᕐᑎᑕᐅᓂᖓᓗ ᓱᖁᓯᕐᓂᐊᕈᓐᓃᕐᓗᓂ.”
34ᐄᓴᓗ ᐊᑖᑕᖓᑕ ᐅᖃᐅᓯᖏᓐᓂᒃ ᑐᓴᕋᒥ, ᐃᓗᐃᓪᓕᕐᓗᓂ ᕿᐊᔪᐊᓘᓕᕐᐳᖅ, ᐊᑖᑕᒥᓄᓪᓗ ᐅᖃᕐᓗᓂ, “ᓮᒻᒪᕐᑎᓚᐅᓐᖓᑦᑕᐅᖅ ᐊᑖᑖᒃ!”
35ᑭᐅᕙᓗ, “ᓄᑬᑦ ᕾᖅᑲᐅᖕᒪᑦ ᓯᓔᕐᕆᓪᓗᓂᖓ, ᓮᒻᒪᕐᑎᑕᐅᑦᔪᑎᒃᓴᕐᓂᒡᓗ ᐊᕐᓵᕐᐹᑎᑦ.”
36 #
ᒨᓯᓯ ᓯᕗᓪᓖᑦ 25:29-34. ᐄᓴᓗ ᐅᖃᕐᐳᖅ, “ᓱᓕᔪᒥᒃ ᔧᑯᒥᒃ#27:36 ᔧᑯ ᑖᓐᓇ ᐊᑎᖅ ᐄᑉᕉᑎᑐᑦ ᑐᑭᖃᕐᑑᔮᕐᒪᑦ ᓴᒡᓗᕿᑦᓯᔪᒥᒃ ᐊᑎᖃᕋᒥ, ᒪᕐᕈᕕᒃᓗᓂ ᓯᓔᕐᕆᓕᕐᐹᖓ, ᐊᖓᔪᒃᓕᐅᓂᓐᓂᒃ ᐊᕐᓵᓚᐅᕐᒪᖓ; ᐊᒻᒪ ᑕᕝᕙ ᓮᒻᒪᕐᑎᑕᐅᑦᔪᑎᒃᓴᕋᓗᐊᓐᓂᒃ ᐊᕐᓵᕆᕚᖓ.” ᐅᖃᒃᑲᓐᓂᕐᐳᕐᓗ, “ᓮᒻᒪᕐᑎᑕᐅᓂᒃᓴᒥᒃ ᐊᒥᐊᒃᑯᓯᒪᓐᖏᓚᕐᒪ?”
37ᐂᓴᑭᐅᓪᓗ ᐄᓴ ᑭᐅᕚ, “ᑕᑯᒋᑦ, ᐃᓕᖕᓄᑦ ᐊᖓᔪᖅᑳᓐᖑᕐᑎᑦᓴᕇᕋᒃᑯ, ᖃᑕᓐᖑᑎᖏᓪᓗ ᐱᔨᓐᖑᕐᑎᓪᓗᒋᑦ ᑖᑦᓱᒧᖓ, ᓂᐊᖂᔭᒃᓴᓂᒃ ᕔᓂᒥᒡᓗ ᐊᒥᒐᕐᓯᔪᒃᓴᐅᖏᓐᓂᖓᓂᒃ ᓮᒻᒪᕐᑎᑦᓴᕇᕐᐸᕋ. ᐃᕐᓃᒃ ᖃᓄᐃᓕᐅᒃᑲᓐᓂᕈᓐᓇᕐᐳᖓ ᐃᓕᖕᓄᑦ!”
38 #
ᐄᑉᕈᐃᓄᑦ 12:17. ᐄᓴᓗ ᐅᖃᕐᐳᖅ ᐊᑖᑕᒥᓄᑦ, “ᓮᒻᒪᕐᑎᑦᓯᔪᑎᒥᒃ ᐊᑕᐅᓯᑐᐊᒥᒃ ᐱᓯᒪᕖᑦ ᐊᑖᑖᒃ? ᓮᒻᒪᑎᒻᒥᓐᖓᑦᑕᐅᖅ, ᐊᑖᑖᒃ!” ᐄᓴᓗ ᓂᐱᖅᑯᕐᑐᓪᓗᓂ ᕿᐊᓕᕐᐳᖅ.
39 #
ᐄᑉᕈᐃᓄᑦ 11:20. ᑕᕝᕙ ᐊᑖᑕᖓᑕ ᐂᓴᑭᐅᑉ ᑭᐅᕚ,
“ᑕᑯᒋᑦ, ᓄᓇᐅᑉ ᐱᕈᑦᓯᐊᕐᓇᕐᓂᖓᑕ ᐅᖓᓯᒋᔮᓂ ᓄᓇᖃᕈᒫᕐᐳᑎᑦ,
ᕿᓚᖕᒥᓪᓗ ᖃᐅᓯᕐᑎᑕᐅᓂᐅᑉ ᐅᖓᓯᒋᔭᖓᓃᓪᓗᑎᑦ.
40 #
ᒨᓯᓯ ᓯᕗᓪᓖᑦ 36:8; ᐊᑕᓃᑦ ᐂᑉᐸᖏᑦ 8:20. ᓴᕕᒡᔪᐊᑦ ᐊᑐᕐᓗᒍ ᐃᓅᔪᒫᕐᐳᑎᑦ,
ᓄᑬᓪᓗ ᐱᔨᑦᓯᕈᒫᕐᐹᑦ; ᑖᑦᓱᒪᓐᖓᓪᓕ ᕿᓚᕈᑦᔮᕈᕕᑦ;
ᐊᒡᔭᕐᓯᑎᑕᐅᓃᑦ ᑖᑦᓱᒪᓐᖓᑦ ᓯᖁᒥᑦᓱᒫᕐᐳᖅ ᖁᖓᓯᕐᓂᑦ.”
41ᐄᓴᐅᓪᓗ ᔧᑯ ᐆᒥᒋᓕᕐᐹ ᓮᒻᒪᕐᑎᑕᐅᓯᒪᓂᖓᓄᑦ ᐊᑖᑕᖓᑕ ᓮᒻᒪᕐᑎᓚᐅᕐᒪᒍ, ᐄᓴᓗ ᓂᐱᖃᕐᓗᓂ ᐃᒻᒥᓄᑦ ᐅᖃᓕᕐᐳᖅ, “ᐊᑖᑕᒪ ᕿᒃᓵᒍᑕᐅᕕᒃᓴᖓ ᖃᒡᓕᖕᒪᑦ; ᑭᖑᕐᖓᒍᑦ ᓄᑲᕋ ᔧᑯ ᑐᖁᓛᓕᕐᐸᕋ.”
42ᐃᕐᓂᖓᑕᓕ ᐊᖓᔪᒃᓯᐅᒃ ᐄᓴᐅᑉ ᐅᖃᐅᓯᖏᑦ ᐅᖃᐅᓯᐅᖕᒪᑕ ᕇᐱᑲᒧᑦ; ᐃᕐᓂᓂ ᓄᑲᕐᓯᖅ ᔧᑯ ᕾᖁᕚ, ᐅᖃᐅᑎᓪᓗᒍᓗ, “ᑕᑯᒋᑦ, ᐊᖓᔪᐃᑦ ᐄᓴ ᐃᒻᒥᓂᒃ ᓮᒻᒪᐅᓯᕈᒪᕗᖅ ᑐᖁᓪᓗᓂᑎᑦ. 43ᑍᒤᒻᒪᑦ, ᐃᕐᓃᒃ ᐅᖃᐅᓯᒃᑲ ᒪᓕᒃᑭᑦ, ᕿᒫᓗᑎᑦ ᐊᓂᓐᓄᐊᓕᕆᑦ ᓔᐸᓂᒧᑦ ᕼᐊᕋᓐᒥ ᓄᓇᖃᕐᑐᒧᑦ. 44ᓇᔪᑬᓐᓇᕐᓂᐊᕐᐸᑦ; ᐊᖓᔪᐃᑦ ᓂᓐᖓᐅᒪᔪᓐᓃᕐᓯᐊᕆᓗᒍ, 45ᐊᖓᔪᐃᑦ ᓂᓐᖓᐅᒪᔪᓐᓃᕐᐸᑦ, ᐳᐃᒍᕐᐸᓪᓗ ᑖᑦᓱᒧᖓ ᖃᓄᐃᓕᐅᕐᓯᒪᓂᕐᓂᒃ; ᐂᔭᐅᑎᑦᓱᒫᕐᐸᒋᑦ ᑕᐅᕙᓐᖓᑦ, ᓱᖕᒪᑦ ᑕᒪᑦᓯᓐᓂᒃ ᕿᒃᓵᒍᑎᖃᕆᐊᖃᕐᐳᖓ ᐅᓪᓗᒥ ᑕᕝᕙᓂᑦᓮᓐᓇᖅ?”
ᐂᓴᑭᐅᑉ ᔧᑯᒥᒃ ᑎᓕᓯᓂᖓ ᓔᐸᓂᒧᑦ
46ᕇᐱᑲᓗ ᐂᓴᑭᒧᑦ ᐅᖃᓕᕐᐳᖅ, “ᐃᓱᒫᓗᒍᑎᖃᕋᒪ ᐃᓅᓯᓐᓂ ᐊᕐᓁᑦ ᕼᐃᑍᑎᒥᐅᑦ ᐱᓪᓗᒋᑦ, ᔧᑯᓕ ᓄᓕᐊᓂᖕᓂᐊᕐᒥᒃᐸᑦ ᕼᐃᑍᑎᒥᐅᑦ ᐊᕐᓇᖏᓐᓂᑦ ᑕᒫᓂ ᓄᓇᖃᕐᑐᓂᑦ, ᐃᓄᓯᕋ ᓱᓇᐅᔪᓐᓃᑦᓯᐊᕐᓂᐊᕐᐳᖅ.”
Currently Selected:
ᒨᓯᓯ ᓯᕗᓪᓖᑦ 27: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
