ᐃᓯᑭᐊᓕᐅᑉ ᐊᒡᓚᖏᑦ 7
7
ᐃᓴᕆᐊᓕᒥᐅᑦ ᐃᓱᓕᑦᔪᑦᔭᐅᓕᕐᖕᓂᖓ
1ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᖅᓗᓂ: 2“ᐃᕝᕕᑦ, ᐃᓅᑉ ᐃᕐᖕᓂᖓ, ᐊᑕᓂᖅ ᒎᑎ ᐃᒫᒃ ᐅᖃᖅᐳᖅ ᐃᓴᕆᐊᓕᒥᐅᓄᑦ: ᐃᓱᓕᑉᐳᖅ! ᓄᓇᓕᒫᖅ ᐃᓘᓐᓈᑦ ᐃᓱᓕᕝᕕᒃᓴᒥᓄᑦ ᑎᑭᑉᐳᖅ.
3“ᒫᓐᓇ ᐃᓱᐊᓄᑦ ᑎᑭᑉᐳᓯ, ᓂᓐᖓᐅᓯᓐᓄᑦ ᕿᓚᕈᑦᔮᕐᕕᒋᓕᖅᐸᑦᓯ, ᐱᓂᐊᕐᖕᓂᓯ ᒪᓕᒡᓗᒋᑦ ᐃᖅᑲᖅᑐᕐᖕᓂᐊᓕᖅᐸᑦᓯ; ᓱᒋᐊᕐᖕᓂᐊᖅᐸᑦᓯᓗ ᓇᕐᕈᓇᖅᑐᓕᓯᒪᓂᓯ ᒪᓕᒡᓗᒋᑦ. 4ᑕᑯᓐᖏᓮᓐᓇᕐᖕᓂᐊᓐᖏᓚᑦᓯ, ᓂᑲᒋᓂᐊᕋᓯᓗ; ᓱᒋᐊᕐᖕᓂᐊᖅᐸᑦᓯ ᐱᓂᐊᕐᖕᓂᓯ ᒪᓕᒡᓗᒋᑦ, ᓇᕐᕈᒋᔭᓐᓂᒃ ᐱᓂᐊᕐᖕᓂᖃᕋᑦᓯ ᓱᓕ. ᑕᕝᕙ ᖃᐅᔨᓂᐊᖅᐳᓯ ᐅᕙᖓ ᐊᑕᓂᐅᒐᒪ.
5“ᐊᑕᓂᖅ ᒎᑎ ᐃᒫᒃ ᐅᖃᖅᐳᖅ: ᑕᑯᒋᑦ, ᐊᓯᕈᖅᑕᐅᓇᖅᑐᑦ ᑭᖑᓕᕇᒃᑕᖅᓗᑎᒃ ᐃᓕᑦᓯᓐᓄᑦ ᑎᑭᓕᖅᐳᑦ! 6ᓇᒡᒐᑖᓄᑦ ᑎᑭᐅᑎᕗᓯ, ᓇᒡᒐᑖ ᑎᑭᑉᐳᖅ; ᐃᓱᐊᓃᓕᖅᐳᓯ. ᑕᑯᒋᑦ, ᑎᑭᑉᐳᖅ. 7ᐃᓕᑦᓯᓐᓄᑦ ᓱᒋᐊᖅᑕᐅᕕᒃᓴᖅ ᓇᓪᓕᐅᑎᕗᖅ, ᐃᓕᑦᓯ ᓄᓇᒥ ᓄᓇᖃᖅᑐᓯ; ᓇᓪᓕᐅᓐᓂᖅ ᑎᑭᐅᑎᕗᖅ, ᐅᓪᓗᖅ ᖃᒡᓕᕗᖅ, ᐅᓪᓗᖅ ᐅᐃᒻᒪᒃᓯᒪᕕᒃ, ᖁᕕᐊᓱᒡᕙᓗᒃᑐᑦ ᓂᓪᓕᐊᓂᐊᕈᓐᓃᖅᐳᑦ ᖃᖅᑲᓂ.
8“ᒫᓐᓇ ᐊᑯᓂᐅᖏᑦᑐᖅ ᓂᓐᖓᐅᓯᓐᓄᑦ ᑎᑭᑕᐅᑎᓐᓂᐊᓕᖅᐸᑦᓯ, ᓂᓐᖓᐅᓯᓐᓄᑦ ᐱᓇᓱᐊᕐᕕᒋᓂᐊᓕᖅᐸᑦᓯ, ᐃᖅᑲᖅᑐᖅᓗᓯᓗ ᐱᓂᐊᕐᖕᓂᓯ ᒪᓕᒡᓗᒋᑦ; ᐊᑭᓂᐊᕐᕕᒋᔪᒫᖅᐸᑦᓯᓗ ᓇᕐᕈᒋᔭᓐᓂᒃ ᐱᓇᓱᐊᕐᖕᓂᕆᓯᒪᔭᓕᒫᓯ ᒪᓕᒡᓗᒋᑦ. 9ᑕᑯᓐᖏᓮᓐᓇᕐᖕᓂᐊᓐᖏᓚᑦᓯ, ᓂᑲᒋᓂᐊᕋᓯᓗ; ᓱᒋᐊᕐᖕᓂᐊᖅᐸᑦᓯ ᐱᓂᐊᕐᖕᓂᓯ ᒪᓕᒡᓗᒋᑦ, ᓇᕐᕈᒋᔭᓐᓂᒃ ᐱᓂᐊᕐᖕᓂᖃᕋᑦᓯ ᓱᓕ. ᑕᕝᕙ ᖃᐅᔨᓂᐊᖅᐳᓯ ᐅᕙᖓ ᐊᑕᓂᐅᒐᒪ, ᓱᒋᐊᖅᓯᔨ.
10“ᑕᑯᒋᑦ, ᑕᕝᕙ ᐅᓪᓗᖅ! ᑕᑯᒋᑦ, ᑎᑭᑉᐳᖅ! ᐊᓯᕈᖅᑕᐅᓂᒃᓴᓯ ᑎᑭᑉᐳᖅ, ᐊᑦᔨᒌᓐᖏᑎᑦᓯᓂᖅ ᐱᕈᕇᖅᓯᒪᓕᕐᖕᒪᑦ, ᐱᐅᔪᕆᓂᐅᑉ ᐱᕈᕐᖕᓂᒃᓴᖓ ᐆᒻᒪᕈᖅᐳᖅ. 11ᐱᓂᖅᓗᖕᓃᑦ ᐱᕈᖅᐸᓪᓕᐊᕗᑦ ᐱᐅᖏᑦᑐᓕᓂᖅ ᐊᖏᒡᓕᕙᓪᓕᐊᓪᓗᓂ; ᓇᓪᓕᖏᓪᓘᓐᓃᑦ ᑍᒤᓕᖎᓐᓇᕐᖕᓂᐊᓐᖏᓚᑦ, ᐅᓄᖅᓯᕙᓪᓕᐊᑦᔮᓐᖏᓚᑦ, ᐊᒃᓱᐃᑦᑐᓐᖑᕐᖕᓂᐊᕋᑎᒡᓗ; ᓇᓪᓕᐊᓪᓘᓐᓃᑦ ᐱᓪᓚᕆᓐᖑᖅᑐᖃᕐᖕᓂᐊᓐᖏᓚᑦ.
12“ᓇᓪᓕᐅᑦᑐᒃᓴᖅ ᓇᓪᓕᐅᑎᕗᖅ, ᐅᓪᓗᖅ ᑎᑭᓕᖅᐳᖅ. ᓂᐅᕕᖅᐸᒃᑐᖅ ᖁᕕᐊᓱᖕᓂᐊᕋᓂ, ᓂᐅᕐᕈᑎᖃᖅᐸᒃᑐᕐᓗ ᕿᒃᓵᖕᓂᐊᕋᓂ, ᓂᓐᖓᐅᓯᐅᑉ ᐃᓄᒐᓴᒡᔪᐊᓕᒫᑦ ᑎᑭᑦᓱᒫᕐᖕᒪᒋᑦ. 13ᓂᐅᕐᕈᓯᖅᑏᑦ ᐅᑎᖅᑎᑦᓯᔪᓐᓇᕈᒫᓐᖏᓚᑦ ᓂᐅᕐᕈᑎᕕᓂᕐᖕᒥᓂᒃ, ᐃᓅᓂᕐᖕᒥᖕᓂ. ᓂᓐᖓᐅᓯᐅᑉ ᐃᓄᒐᓴᒡᔪᐊᓕᒫᑦ ᑎᑭᑦᓱᒫᕐᖕᒪᒋᑦ; ᐅᑎᕆᐊᕈᓐᓇᕋᓂᓗ; ᐱᐅᖏᑦᑐᓕᓂᖏᑦ ᐱᑦᔪᑎᒋᓪᓗᒋᑦ, ᐃᓅᓯᕐᖕᒥᓂᒃ ᐊᐅᓚᑦᓯᔪᖃᕈᓐᓇᖏᒻᒪᑦ. 14ᑎᑦᑐᓚᐅᑦ ᓂᓪᓕᖅᑎᑉᐹᑦ ᐊᑐᐃᓐᓇᕈᖅᑐᐃᓐᓇᐅᓗᑎᒃ; ᐅᓇᑕᕆᐊᕈᓐᓇᖅᓯᓐᖏᓚᓪᓕ, ᓂᓐᖓᐅᓯᕐᖕᒪ ᐃᓄᓕᒫᑦ ᑎᑭᒻᒪᒋᑦ.”
ᐃᓴᕆᐊᓕᒥᐅᑦ ᓱᒋᐊᖅᑕᐅᓂᖏᑦ ᐊᔪᖅᑐᓕᓂᖏᓐᓄᑦ
15“ᓴᕕᒡᔪᐊᓕᔭᖅᑐᑦ ᓯᓚᑖᓃᑉᐳᑦ, ᖃᓂᒪᓇᖅᑐᖅ ᑳᖕᓇᖅᑐᕐᓗ ᐃᓗᐊᓃᑎᓪᓗᒋᑦ; ᐱᕈᖅᓰᕕᖕᒦᑦᑐᑦ ᓴᕕᒡᔪᐊᓄᑦ ᑐᖁᑕᐅᕗᑦ; ᐃᒡᓗᒐᓴᒡᔪᐊᓃᑦᑐᓪᓗ ᑐᑯᕋᖅᐳᑦ ᐱᖅᓕᕋᕐᖕᓂᕐᖕᒧᑦ ᐋᓐᓂᐊᓇᖅᑐᓄᓪᓗ. 16ᕿᒫᓗᑎᒡᓕ ᐊᓐᓇᑦᑐᑦ, ᖃᖅᑲᓃᓕᕈᒫᖅᐳᑦ, ᑑᕕᑎᑐᑦ ᓇᖅᓴᐅᑉ ᐃᓗᐊᓂᑦ ᕿᒫᔪᑎᑐᑦ, ᐃᓘᓐᓇᑎᒡᓗ ᐅᒡᒍᐊᕈᑎᖃᖅᓗᑎᒃ ᐊᔪᖅᑐᓕᓯᒪᓂᕐᖕᒥᖕᓂᒃ. 17ᐊᒡᒐᓕᒫᖏᑦ ᓴᓐᖐᓕᔪᒫᖅᐳᑦ, ᓰᖅᑯᓕᒫᖏᓪᓗ ᓴᔪᓕᖅᓗᑎᒃ ᐃᒪᖅᑎᑐᑦ. 18ᐳᑐᖅᓛᓂᒃ ᐊᓐᓄᕌᕈᒫᖅᐳᑦ, ᑲᑉᐱᐊᓱᖕᓂᕐᖕᒧᑦ ᑕᑕᒥᓯᒪᓗᑎᒃ; ᑲᓐᖑᓱᖕᓂᖅ ᑮᓇᖏᓐᓂ ᑕᑯᒃᓴᐅᔪᒫᖅᐳᖅ, ᓂᐊᖁᑎᒡᓗ ᓴᓕᓗᒋᑦ ᓄᔧᕈᑎᔪᒫᖅᐰᑦ. 19ᓯᐅᓪᕕᕆᖁᑎᑎᒃ ᐊᖅᑯᒻᒧᑦ ᐃᒋᐅᖅᑲᕈᒫᖅᐰᑦ, ᒎᓗᖁᑎᑎᒡᓗ ᓴᓂᖅᑎᑐᑦ ᑍᒤᓕᕈᒫᖅᐰᑦ; ᓯᐅᓪᕕᕆᓄᑦ ᒎᓗᓄᓪᓗ ᓴᐳᑎᔭᐅᔪᓐᓇᕈᒫᓐᖏᓚᑦ ᐊᑕᓂᐅᑉ ᓂᓐᖓᐅᓯᖓᑕ ᐅᓪᓗᖓᓄᑦ ᑎᑭᑕᐅᒍᑎᒃ; ᑕᒪᒃᑯᓄᖓ ᑳᒍᓐᓃᖅᑎᑕᐅᔪᓐᓇᕈᒫᓐᖏᓚᑦ ᐊᕿᐊᑦᑐᖅᑎᑕᐅᔪᓐᓇᕋᑎᒡᓗ. ᑕᒪᒃᑯᓄᖓ ᐊᔪᖅᑐᓕᑎᑕᐅᕙᓚᐅᕐᖕᓂᖏᑦ ᐊᒡᕕᐊᕈᑕᐅᓕᕐᖕᒪᑕ. 20ᐱᐅᓴᐅᑎᒥᖕᓂᒃ ᐱᔪᕆᐅᑎᖃᖅᐸᓚᐅᖅᐳᑦ, ᓇᕐᕈᓇᖅᑐᒥᒡᓕ ᒎᑎᓐᖑᐊᓕᐊᕆᓚᐅᖅᐰᑦ ᐃᑦᔪᕐᖕᓇᖅᑐᓂᒡᓗ ᐱᓇᓱᐊᕈᑎᒋᓪᓗᒋᑦ; ᑍᒤᒻᒪᑦ ᓇᕐᕈᓇᖅᓯᑎᓐᓂᐊᓕᖅᐸᒃᑲ ᑖᒃᑯᓄᖓ.
21“ᓄᓇᖃᑎᑐᖃᕆᓐᖏᑕᖏᓐᓄᑦ ᐊᖅᓵᖅᑕᐅᑎᑦᓱᒫᖅᐸᒃᑲ, ᐱᐅᖏᑦᑐᓕᔪᓄᓪᓗ ᓄᓇᕐᔪᐊᕐᖕᒦᑦᑐᓄᑦ ᓇᒡᕚᖅᑖᖑᑎᓪᓗᒋᑦ; ᓇᕐᕈᓇᖅᓯᑎᑕᐅᓗᑎᒡᓗ. 22ᑖᒃᑯᐊ ᐊᓚᕈᒫᖅᐸᒃᑲ, ᐃᑦᔪᕐᖕᓁᑦᑐᕕᖁᑎᓐᓂᒃ ᓇᕐᕈᓇᖅᓯᑎᑦᓯᔪᓐᓇᖁᓪᓗᒋᑦ; ᑎᒡᓕᒃᑎᓄᑦ ᐃᑎᖅᑕᐅᓗᓂ ᓇᕐᕈᓇᖅᓯᑎᑕᐅᔪᒫᖅᐳᖅ.
23“ᓄᖑᕅᑦᔪᑎᒃᓴᓕᐅᕆᑦ; ᓇᓂᓕᒫᖅ ᓄᓇ ᐃᓄᐊᖅᑎᓂᒃ ᓈᓯᒪᖕᒪᑦ ᐃᒡᓗᒐᓴᒡᔪᐊᓪᓗ ᐱᕋᔭᒃᑎᓂᒃ ᑕᑕᓪᓗᑎᒃ. 24ᐃᓅᖃᑎᒌᒡᔪᐊᓂᑦ ᐱᐅᖏᓐᓂᖅᐹᓂᒃ ᑎᑭᑎᑦᓯᔪᒫᖅᐳᖓ ᐃᒡᓗᖏᑦ ᑖᒃᑯᓄᖓ ᐱᑖᕆᔭᐅᖁᓪᓗᒋᑦ; ᐱᐅᔪᕆᓂᕐᖕᒧᑦ ᐊᔪᖏᑦᔪᑎᖏᑦ ᓄᖅᑲᖅᑎᑦᓱᒫᖅᐸᒃᑲ, ᐃᑦᔪᕐᖕᓁᑦᑐᖁᑎᖏᓪᓗ ᓇᕐᕈᓇᖅᓯᑎᑕᐅᔪᒫᖅᐳᑦ. 25ᐃᓗᖏᖅᑐᕐᖕᓇᖅᑐᖅ ᑎᑭᑉᐸᑦ, ᓮᓪᓕᓇᖅᑐᒥᒃ ᕿᓂᕈᒫᖅᐳᑦ, ᐱᑕᖃᕈᒫᓐᖏᓚᓪᓕ. 26ᐊᓯᕈᖅᑕᐅᓇᖅᑐᑦ ᑭᖑᓕᕇᒃᑕᖅᓗᑎᒃ ᓇᓪᓕᐅᑎᖃᑦᑕᕈᒫᖅᐳᑦ, ᑐᓴᐅᒪᑐᐃᓐᓇᕐᖕᓂᒃᑯᑦ ᑐᓴᖅᑎᑦᓯᓃᑦ ᑭᖑᓕᕇᒃᑕᕈᒫᖅᐳᑦ; ᒎᑎᐅᓪᓗ ᐱᔪᒫᖅᑐᒃᓴᓂᒃ ᐅᖃᖅᑎᖏᑕ ᑕᑯᑎᑕᐅᓂᖏᓐᓂᒃ ᕿᓂᖃᑦᑕᕈᒫᖅᐳᑦ, ᑐᓂᕐᕈᓯᖅᑎᑦᓯᔩᓪᓗ ᐱᖁᔭᓂᒃ ᐊᓯᐅᔨᔪᒫᖅᐳᑦ, ᐃᓄᑐᖃᐅᔪᓪᓗ ᐅᖃᐅᑦᔨᒋᐊᕈᑎᒃᓴᖃᕈᓐᓁᖅᓗᑎᒃ. 27ᐊᖓᔪᖅᑳᕐᔪᐊᑦ ᕿᒃᓵᒃᑎᑕᐅᔪᒫᖅᐳᑦ, ᐃᕐᖕᓂᖏᓪᓗ ᓴᐱᓕᕈᒫᖅᐳᑦ, ᐃᓄᐃᓪᓗ ᓄᓇᒦᑦᑐᑦ ᐃᖅᓯᓂᕐᖕᒧᑦ ᓴᔪᒃᓱᓕᕈᒫᖅᐳᑦ. ᐱᓂᐊᕐᖕᓂᖏᑦ ᒪᓕᒡᓗᒋᑦ ᐱᓂᐊᕐᕕᒋᔪᒫᖅᐸᒃᑲ, ᐃᖅᑲᖅᑐᐃᓂᖏᑦ ᒪᓕᒡᓗᒋᑦ ᐃᖅᑲᖅᑐᕈᒫᖅᐸᒃᑲ; ᖃᐅᔨᖁᓪᓗᒋᑦ ᐅᕙᖓ ᐊᑕᓂᐅᒐᒪ.”
Currently Selected:
ᐃᓯᑭᐊᓕᐅᑉ ᐊᒡᓚᖏᑦ 7: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
