ᒨᓯᓯ ᐂᑉᐸᖏᑦ 12
12
ᖄᖏᕐᑕᐅᕕᒃ
1 #
ᒨᓯᓯ ᐱᖓᔪᖏᑦ 23:5; ᒨᓯᓯ ᓯᑕᒪᖏᑦ 9:1-5; 28:16; ᒨᓯᓯ ᑕᓪᓕᒪᖏᑦ 16:1,2. ᐊᑕᓂᖅ ᐅᖃᕐᐳᖅ ᒨᓯᓯᒧᑦ ᐂᕉᓂᒧᓪᓗ ᐄᑦᔨᑉᑎᒥ ᓄᓇᒦᑎᓪᓗᒋᒃ, 2“ᑕᒪᓐᓇ ᑕᖅᑭᖅ ᐊᑐᕐᑕᕗᑦ ᐃᓕᖕᓄᑦ ᓯᕗᓪᓕᕐᐸᐅᓗᓂ ᑕᖅᑭᕆᔭᐅᓂᐊᕐᐳᖅ; ᐅᑭᐅᕆᔭᕐᓄᓪᓗ ᓯᕗᓪᓕᕐᐸᐅᓗᓂ ᑕᖅᑭᐅᓂᐊᓕᕐᓗᓂ. 3ᐃᓴᕆᐊᓕᒥᐅᓕᒫᑦ ᐅᖃᐅᑎᓚᐅᒃᑭᑦ ᑕᕝᕙᓂ ᑕᖅᑭᒥ ᐅᓪᓗᑦ 10ᒋᓕᕐᐸᒍ ᐊᖑᑎᑦ ᐃᒡᓗᖃᕐᑐᓕᒫᑦ ᐊᑐᓂᑦ ᓄᕐᕋᐅᔭᕐᒥᒃ ᐊᑕᐅᓯᕐᒥᒃ ᑎᒍᓯᔪᒃᓴᐅᕗᑦ, ᐃᒡᓗᒥᐅᖃᑎᒌᓄᑦ ᐊᑕᐅᓯᕐᓄᑦ ᓄᕐᕋᐅᔭᖅ ᐊᑕᐅᓯᖅ ᑐᕌᖓᖁᓪᓗᒍ; 4ᐃᒡᓗᒥᐅᖃᑎᒌᓪᓕ ᐃᓄᖏᑦ ᐅᓄᓐᖏᓗᐊᕐᐸᑕ ᓄᕐᕋᐅᔭᕐᒧᑦ ᐊᑕᐅᓯᕐᒧᑦ, ᑕᕝᕙ ᓯᓚᓕᑎᒃ ᐃᒡᓗᒥᐅᖃᑎᒌᑦ ᕾᖁᔭᒃᓴᕆᕔᑦ ᐃᓄᖏᑕ ᐅᓄᕐᓂᖏᑦ ᒪᓕᒡᓗᒋᑦ; ᐃᓄᐃᑦ ᐊᑐᓂᑦ ᓂᕆᔪᓐᓇᕐᓂᖏᑦ ᒪᓕᒡᓗᒋᑦ ᓄᕐᕋᐅᔭᖅ ᓄᖑᑕᐅᔪᓐᓇᖁᓪᓗᒍ. 5ᓄᕐᕋᐅᔭᖅ ᓂᕆᓂᐊᕐᑕᓯ ᖃᓄᐃᑦᔪᑎᖃᖏᑦᓯᐊᕆᐊᖃᕐᐳᖅ, ᐊᖑᑕᐅᓗᓂ ᐊᕐᕌᒍᖃᕐᓗᓂ ᐊᑕᐅᓯᕐᒥᒃ; ᓇᓪᓕᐊᓐᓂᑐᐃᓐᓇᖅ ᐱᔪᓐᓇᕐᐳᓯ ᓰᐱᒥᒡᓘᓐᓃᑦ ᒎᑦᓯᒥᒡᓘᓐᓃᑦ; 6ᑭᓯᐊᓂᓕ ᓇᔪᕐᑎᒋᔭᒃᓴᕆᕙᓯ ᑕᖅᑭᐅᑉ ᑕᒪᑐᒪ ᐅᓪᓗᖓᑕ 14ᖓᑦ ᑎᑭᓪᓗᒍ, ᐊᑕᐅᑦᓯᒃᑯᒃ ᐃᓴᕆᐊᓕᒥᐅᑦ ᑲᑎᒪᔪᑦ ᓄᕐᕋᐅᔭᖁᑎᒥᖕᓂᒃ ᑐᖁᑦᓯᔪᒃᓴᐅᕗᑦ ᐅᓐᓄᒃᑯᑦ. 7ᐊᐅᖓᑕᓗ ᐃᓚᖓᓂᒃ ᐱᓗᑎᒃ, ᐃᑎᕐᑕᕐᕕᐅᑉ ᓴᓂᕋᖏᒃᑕ ᐊᕙᓗᖏᒃ ᐊᑐᓂᑦ ᐊᐅᖕᒧᑦ ᒥᖑᐊᕐᓯᕕᐅᔪᒃᓴᐅᕗᑦ, ᐃᑎᕐᑕᕐᕕᐅᓪᓗ ᖁᓛᑕ ᓴᓐᓂᖓᔪᐊ ᐱᖃᓯᐅᑎᓗᒍ ᑕᕝᕙᓐᖓᑦ ᓂᕆᓂᐊᕐᑕᖓᑦᑕ ᐊᐅᖓᓂᑦ. 8ᑕᒪᑐᒪᓂᓗ ᐅᓐᓄᒥ ᓂᕿᖓ ᓂᕆᔭᐅᔪᒃᓴᐅᕗᖅ, ᐃᑯᒪᒧᑦ ᐆᑕᐅᓯᒪᑎᓪᓗᒍ; ᓂᐊᖂᔭᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᐃᓚᖃᕐᑎᓪᓗᒍ ᐱᕈᕐᑐᕕᓂᕐᓂᒡᓗ ᖃᓯᓕᓇᕐᑐᓂᒃ ᓂᕿᒧᑦ ᐃᓚᒋᔭᐅᓲᓂᒃ ᐃᓚᖃᕐᑎᓪᓗᒍ. 9ᒥᑭᒐᐅᑎᓪᓗᒍᓕ ᐃᒥᕐᒧᓪᓗ ᐆᔪᓕᐅᕐᓯᒪᑎᓪᓗᒍ ᓂᕆᔭᒃᓴᕆᓐᖏᓚᓯ, ᑭᓯᐊᓂᓕ ᐃᑯᒪᒧᑦ ᐆᓯᒪᑎᓪᓗᒍ ᓂᕆᔭᒃᓴᕆᕙᓯ ᐊᑕᖏᕐᓗᒍ, ᓂᐊᖁᖓᓗ ᓂᐅᖏᓪᓗ ᐃᕐᕋᕕᖏᓪᓗ ᐱᖃᓯᐅᑎᓗᒋᑦ. 10ᐊᒥᐊᒃᑯᖃᕐᑐᒃᓴᐅᓐᖏᓚᓯᓗ ᑕᕝᕙᓐᖓᑦ ᐅᓪᓛᓐᖑᖅᑳᕐᑎᓐᓇᒍ, ᐊᒥᐊᒃᑯᖃᕐᓂᕈᑦᓯᓕ ᑕᕝᕙ ᐅᓪᓛᓐᖑᕐᑎᓪᓗᒍ ᐃᑯᐊᓪᓚᒡᓗᒍ ᓄᖑᑕᐅᔪᒃᓴᐅᕗᖅ. 11ᐃᒫᒃ ᑕᕝᕙ ᓂᕆᔭᒃᓴᕆᕙᓯ, ᕿᑎᑦᓯᒍᑦ ᑕᑦᓯᕈᓯᕐᓯᒪᔪᒃᓴᐅᕗᓯ ᐃᑎᒐᒍᓯᕐᓯᒪᓗᓯᓗ, ᐊᔭᐅᑉᐱᐊᓯᓗ ᑎᒍᒥᐊᕐᓗᒋᑦ; ᑐᐊᕕᕐᓗᓯ ᓂᕆᔪᒃᓴᐅᕗᓯ. ᑕᒪᓐᓇ ᐊᑕᓂᐅᑉ ᖄᖏᕐᑕᐅᕕᒃᓯᐅᑎᒋᖕᒪᒍ.
12“ᑕᕝᕙᓂ ᐅᓐᓄᒥ ᐄᑦᔨᑉᑎᐅᑉ ᓄᓇᖓᒍᑦ ᐃᖏᕐᕋᓂᐊᕋᒪ, ᐄᑦᔨᑉᑎᒥᓗ ᐃᕐᓂᐊᖑᖅᑳᕐᓯᒪᔪᓕᒫᑦ ᑐᖁᓐᓂᐊᕐᐸᒃᑲ, ᐃᓄᖕᓂᓗ ᐆᒪᔪᓂᓗ; ᐄᑦᔨᑉᑎᒥᐅᓪᓗ ᒎᑎᓐᖑᐊᓕᒫᖏᑦ ᓱᒋᐊᕐᓂᐊᕐᐸᒃᑲ ᑐᑭᓯᖁᓪᓗᒋᑦ, ᐅᕙᖓ ᐊᑕᓂᐅᒐᒪ. 13ᐊᖏᕐᕋᕆᔭᑦᓯᓗ ᐃᑎᕐᑕᕐᕕᖓᑕ ᐊᕙᓗᐊᒍᑦ ᐊᐅᒥᑎᕐᓯᒪᓂᖏᑦ, ᐃᓕᑦᓯᓐᓄᑦ ᓇᓗᓁᒃᑯᑕᐅᓂᐊᕐᐳᑦ ᓇᓃᓐᓂᑦᓯᓐᓂᒃ; ᐊᐅᖕᒥᒡᓗ ᑕᑯᑐᐊᕈᒪ, ᑕᕝᕙ ᖄᖏᕐᓂᐊᕐᐸᑦᓯ, ᑕᒪᑐᒧᖓᓗ ᑲᑉᐱᐊᓇᕐᑐᕐᔪᐊᒧᑦ ᑎᑭᑕᐅᓂᐊᓐᖏᓚᓯ ᐄᑦᔨᑉᑎᒥᐅᑦ ᓱᒋᐊᓕᕈᒃᑭᑦ. 14#ᒨᓯᓯ ᐂᑉᐸᖏᑦ 23:15; 34:18; ᒨᓯᓯ ᐱᖓᔪᖏᑦ 23:6-8; ᒨᓯᓯ ᓯᑕᒪᖏᑦ 28:17-25; ᒨᓯᓯ ᑕᓪᓕᒪᖏᑦ 16:3-8.ᑕᒪᓐᓇᓗ ᐅᒃᐱᕐᓂᒃᑯᑦ ᓇᓪᓕᐅᓐᓂᕐᓯᐅᕈᑎᒋᖃᑦᑕᕆᐊᖃᕈᒫᕐᐸᓯ ᐃᖅᑲᐅᒪᒃᓯᕈᑕᐅᖁᓪᓗᒍ ᖃᓄᖅ ᐅᕙᖓ ᐊᑕᓂᐅᔪᖓ ᐱᓇᓱᐊᓚᐅᕐᓯᒪᓂᓐᓂᒃ, ᓇᓪᓕᐅᓐᓂᕐᓯᐅᕐᐸᒍᒫᕐᐸᓯ ᑍᒪᓐᖓᑦ ᓯᕗᓂᕐᒥ ᐱᔪᒫᕐᑐᒥ.”
ᓂᐊᖂᔭᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᓇᓪᓕᐅᓐᓂᕐᓯᐅᕐᓂᖓᑦ
15ᐊᑕᓂᖅ ᐅᖃᕐᐳᖅ, “ᐅᓪᓗᓂᒃ 7ᓂᒃ ᓂᐊᑰᔭᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᓂᕆᔪᒃᓴᐅᕗᓯ; ᐅᓪᓗᑦ ᓯᕗᓪᓕᕐᐹᖓᓐᓂ ᐳᕙᓪᓚᕐᓴᐅᑎᑦ ᐃᒡᓗᑦᓯᓐᓃᑦᑐᑦ ᐊᓂᑕᐅᔪᒃᓴᐅᕗᑦ, ᓇᓪᓕᐊᑦ ᐳᕙᓪᓚᕐᓴᐅᑎᖃᕐᑐᒥᒃ ᓂᕆᔪᖅ, ᑖᒃᑯᐊ ᐅᓪᓗᑦ 7 ᓈᓚᐅᕐᑎᓐᓇᒋᑦ, ᑖᓐᓇ ᐃᓴᕆᐊᓕᒥᐅᓄᑦ ᐃᓄᖁᑎᓐᓄᑦ ᐃᓚᒋᔭᐅᔪᓐᓃᕐᑐᒃᓴᐅᕗᖅ. 16ᐅᓪᓗᑦ 7 ᓯᕗᓪᓕᕐᐹᖓᓐᓂ ᑲᑎᒪᔪᒃᓴᐅᕗᓯ ᐃᑦᔪᕐᓁᑦᑐᒥᒃ ᑲᑎᒪᓂᕐᒥᒃ, ᐊᒻᒪ ᐅᓪᓗᑦ ᑭᖑᓪᓕᕐᐹᖓᓐᓂ 7ᖓᓐᓂ ᑲᑎᒪᒃᑲᓐᓂᕐᓗᓯ ᐃᑦᔪᕐᓁᑦᑐᒥᒃ; ᑖᒃᑯᓇᓂᓗ ᐅᓪᓗᓂ ᓇᓪᓕᐊᓐᓂᒡᓘᓐᓃᑦ ᓴᓇᔪᖃᕐᑐᒃᓴᐅᓐᖏᓚᖅ, ᑕᒪᕐᒥᒡᓕ ᓂᕆᔪᒃᓴᐅᕗᑦ ᐊᑐᐃᓐᓇᕈᕐᑕᐅᓯᒪᔪᓂᒃ. 17ᑕᒪᓐᓇ ᓇᓪᓕᐅᓐᓂᖅ ᐳᕙᓪᓚᕐᓴᐅᑎᖃᖏᑦᑐᒥᒃ ᓂᐊᖂᔭᕐᑐᕐᕕᒃ ᓇᓪᓕᐅᓐᓂᕐᓯᐅᕐᐸᖑᒫᕐᐸᓯ, ᑖᑦᓱᒪᓂ ᐅᓪᓗᒥ ᐃᓅᖃᑎᓯ ᐊᓂᑎᓚᐅᕋᒃᑭᑦ ᐄᑦᔨᑉᑎᐅᑉ ᓄᓇᖓᓂᑦ; ᑍᒤᒻᒪᑦ ᑖᓐᓇ ᐅᓪᓗᖅ ᐃᒃᐱᒋᑦᓯᐊᕋᒃᓴᕆᕙᓯ, ᑭᖑᕚᕆᔪᒫᕐᑕᓯᓗ, ᓇᓪᓕᐅᓂᕐᓯᐅᖃᑦᑕᕈᒫᕐᐸᓯ ᐅᓪᓗᓂ ᕾᔪᒫᕐᑐᓂ. 18ᑕᖅᑭᐅᑉ ᓯᕗᓪᓕᕐᐹᖓᑕ ᐅᓪᓗᖓᑕ 14ᖓᓐᓂᑦ ᐅᓐᓄᒥᑦ ᐱᒋᐊᕐᓗᓯ, ᓂᐊᑰᔭᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᓂᕆᖃᑦᑕᕐᑐᒃᓴᐅᕗᓯ, ᐅᓪᓗᑦ 21ᖓᑦᑕ ᐅᓐᓄᖓᓄᑦ ᑎᑭᓪᓗᒍ. 19ᐅᓪᓗᓂ ᑖᒃᑯᓇᓂ 7ᓂ ᐃᒡᓗᑦᓯᓐᓂ ᐳᕙᓪᓚᕐᓴᐅᒻᒥᒃ ᓇᓂᓯᔪᖃᕐᑐᒃᓴᐅᓐᖏᓚᖅ; ᓇᓪᓕᐊᓐᓂᒃ ᐳᕙᓪᓚᕐᓴᐅᑎᖃᕐᑐᒥᒃ ᓂᕆᔪᖃᕐᐸᑦ, ᑖᓐᓇ ᐃᓴᕆᐊᓕᒥᐅᓄᑦ ᐃᓚᒋᔭᐅᔪᓐᓃᕐᑐᒃᓴᐅᕗᖅ, ᐃᓅᖃᑎᑐᖃᕆᖏᒃᑲᓗᐊᕈᑦᓯᐅᒃ ᐃᓅᖃᑎᒋᒍᑦᓯᐅᒡᓘᓐᓃᑦ. 20ᐳᕙᓪᓚᕐᓴᐅᑎᖃᕐᑐᒥᒃ ᓂᕆᔪᒃᓴᐅᓐᖏᓚᓯ; ᐊᑕᖏᕐᓗᓯ ᐃᓚᒌᓯᒍᑦ ᐳᕙᓪᓚᕐᓴᐅᑎᖃᖏᑦᑐᒥᒃ ᑭᓯᐊᓂ ᓂᕆᔪᒃᓴᐅᕗᓯ.”
ᖄᖏᕐᑕᐅᕕᒃ ᓯᕗᓪᓕᕐᐹᖅ
21ᐃᓴᕆᐊᓕᒥᐅᑦ ᐊᖓᔪᖅᑳᕆᔭᓕᒫᖏᑦ ᒨᓯᓯᐅᑉ ᑲᑎᖃᑎᒋᔪᒪᕔᑦ, ᐅᖃᐅᑎᓪᓗᒋᓪᓗ, “ᐃᓕᑦᓯ ᐊᑐᓂᑦ ᓄᕐᕋᐅᔭᒥᒃ ᒎᑦᓯᐅᓪᓘᓐᓃᑦ ᓄᕐᕋᖓᓂᒃ ᐱᓗᓯ ᑐᖁᑦᓯᔭᕆᐊᖃᕐᐳᓯ, ᐃᒡᓗᒥᐅᖃᑎᒌᖑᔪᓯᒍᑦ ᑐᖁᓐᓇᕐᑐᒧᑦ ᖄᖏᕐᑕᐅᑦᔪᑎᒋᔭᑦᓯᓐᓂᒃ ᓂᕆᕕᒃᔪᐊᕈᑎᖃᕐᓂᐊᕋᑦᓯ. 22ᐃᑦᓴᒍᓐᓇᕐᑐᒥᒃ ᕼᐊᓯᑉᒥᒃ ᐱᓗᓯ ᐆᒪᔫᑉ ᐊᐅᖓᓂᒃ ᐃᑦᓴᒃᑎᕐᓗᒍ ᐴᒍᑕᐅᑉ ᐃᓗᐊᓃᑦᑐᒥᑦ, ᐅᒃᑯᐊᓯᓗ ᐊᕙᓗᖏᑦ ᐃᒡᓗᒃᑐᑦ ᖁᓛᒍᓪᓗ ᑖᑦᓱᒧᖓ ᐊᐅᒥᑎᕐᓂᐊᕐᐸᓯ, ᓇᓕᑦᓯᓐᓂᒃ ᐃᒡᓗᑦᓯᓐᓂ ᐊᓂᔪᖃᕆᐊᖃᑦᔮᓐᖏᓚᖅ ᐅᓪᓛᓐᖑᓚᐅᖅᑳᖏᓐᓂᖓᓂ. 23#ᐄᑉᕈᐃᓄᑦ 11:28.ᐊᑕᓂᖅ ᐄᑦᔨᑉᑎᒃᑯᑦ ᐃᖏᕐᕋᓕᕈᓂ ᐄᑦᔨᑉᑎᒥᐅᓂᒃ ᑐᖁᕅᔭᕐᑐᕐᓗᓂ ᐊᐅᒥᑎᕐᓯᒪᔪᒥᒃ ᐅᒃᑯᐊᒥᒃ ᑕᑯᔭᕌᖓᒥ ᐂᖏᓕ ᑐᖁᕅᔨ ᐃᒡᓗᑦᓯᓐᓄᑦ ᐃᑎᕐᓂᐊᓐᖏᓚᖅ ᑐᖁᑦᓯᔭᕐᑐᕐᓗᓂ. 24ᐃᓕᑦᓯ ᕿᑐᕐᖓᓕᒫᓯᓗ ᑕᒪᒃᑯᐊ ᒪᓕᒐᒃᓮᑦ ᓈᓚᒃᑕᕐᓴᕆᕙᓯ. 25ᓄᓇᒃᓴᑦᓯᓐᓄᑦ ᑎᑭᒍᑦᓯ ᐊᑕᓂᐅᑉ ᐊᖏᕈᑎᒋᓯᒪᔭᖓᓄᑦ ᑕᒪᒃᑯᐊ ᓇᓪᓕᐅᓐᓂᕐᓯᐅᕐᐸᒍᒫᕐᐸᓯ. 26ᕿᑐᕐᖓᑦᓯᓐᓄᓪᓗ ᐊᐱᕆᔭᐅᔭᕌᖓᑦᓯ, ‘ᖃᓄᖅ ᑕᒪᓐᓇ ᑐᒃᓯᐊᕐᓂᖅ ᓇᓪᓕᐅᓐᓂᕐᓯᐅᕐᓂᕐᒧᑦ ᑐᑭᖃᕐᒪᖔᑦ?’ 27ᑭᐅᕙᖕᓂᐊᕐᐳᓯ, ‘ᑐᓂᕐᕈᓯᕐᓂᖅ ᖄᖏᕐᑕᐅᓂᕆᓯᒪᔭᕗᑦ ᐱᓪᓗᒍ, ᐊᑕᓂᕐᒥᒃ ᐅᐱᒍᓱᖕᓂᑦᑎᓐᓂᒃ ᓇᓗᓁᒃᑯᑕᐅᕗᖅ. ᐊᑕᓂᐅᑉ ᐃᓴᕆᐊᓕᒥᐅᑦ ᐃᒡᓗᖏᑦ ᖄᖏᓚᐅᕐᒪᒋᑦ ᐄᑦᔨᑉᑎᒦᑎᓪᓗᑕ, ᐄᑦᔨᑉᑎᒥᐅᓪᓗ ᕿᑐᕐᖓᖏᓐᓂᑦ ᐊᖓᔪᒃᓯᕐᐹᖑᔪᑦ ᑐᖁᑎᓚᐅᕐᒪᒋᑦ, ᐅᕙᒍᓪᓕ ᐆᒪᑎᓚᐅᕐᐹᑎᒍᑦ.’”
ᐃᓴᕆᐊᓕᒥᐅᓪᓗ ᓰᖅᑯᕐᓗᑎᒃ ᑐᒃᓯᐊᕐᐳᑦ. 28ᐃᓴᕆᐊᓕᒥᐅᓪᓗ ᐂᕗᑦ ᐊᑕᓂᐅᑉ ᐱᓂᐊᕐᑕᐅᖁᔭᖓ ᒨᓯᓯᒧᑦ ᐂᕉᓂᒧᓪᓗ ᒪᓕᒡᓗᒋᑦ ᐱᓂᐊᕐᐳᑦ.
ᐊᖓᔪᒃᓯᕐᐹᖁᑎᒋᔭᐅᔪᑦ ᑐᖁᓂᖏᑦ
29 #
ᒨᓯᓯ ᐂᑉᐸᖏᑦ 4:22,23. ᐅᓐᓄᐊᓪᓗᐊᖑᓕᕐᑎᓪᓗᒍ ᐊᑕᓂᐅᑉ ᑐᖁᑎᑉᐰᑦ ᐃᕐᓂᕐᑖᕆᐅᕈᑕᐅᓯᒪᔪᓕᒫᑦ ᐄᑦᔨᑉᑎᒥᐅᓄᑦ. ᐊᖓᔪᖅᑳᕐᔪᐊᑉ ᐃᕐᓂᖓᓂᑦ ᐱᒋᐊᕐᓗᓂ, ᑖᓐᓇ ᐊᖓᔪᖅᑳᕐᔪᐊᑉ ᑭᖑᕝᕕᕐᑎᒃᓴᕆᒐᔭᕐᑕᖓ, ᑎᒍᔭᐅᓯᒪᕕᖕᒦᑦᑐᑦ ᐃᕐᓂᑖᕆᐅᕈᑎᕕᓂᖓᑦ ᑎᑭᓪᓗᒍ. ᐆᒪᔪᓪᓗᑦᑕᐅᖅ ᕿᑐᕐᖓᕐᑖᕆᐅᕈᑎᕕᓂᖏᑦ ᑐᖁᑕᐅᒋᕗᑦ. 30ᐅᓐᓄᐊᒥᓗ ᑕᒪᑐᒪᓂ, ᐊᖓᔪᖅᑳᕐᔪᐊᖅ ᐊᖓᔪᖅᑳᖁᑎᖏᓪᓗ ᐄᑦᔨᑉᑎᒥᐅᖑᖃᑎᓕᒫᖏᓪᓗ ᐃᖅᑯᒻᒪᕐᑎᑕᐅᕗᑦ ᓂᐱᖅᑯᕐᑐᓪᓗᑎᒃ ᕿᐊᔪᑦ ᑐᓴᕐᑕᐅᔪᓐᓇᓚᐅᕐᐳᑦ ᐄᑦᔨᑉᑎᓕᒫᒥ. ᐃᒡᓗᑕᖃᓚᐅᓐᖏᓚᖅ ᐊᑕᐅᓯᕐᒥᒡᓘᓐᓃᑦ ᐃᕐᓂᒥᓂᒃ ᑐᖁᔨᐊᖃᕐᓯᒪᖏᑦᑐᒥᒃ. 31ᓱᓕ ᑕᒪᑐᒪ ᐅᓐᓄᐊᖓᓂ ᐊᖓᔪᖅᑳᕐᔪᐊᖅ ᐂᔭᐅᒃᑬᕗᖅ ᒨᓯᓯᒥᒃ ᐂᕉᓂᒥᒡᓗ ᐅᖃᐅᑎᓪᓗᒋᒡᓗ, “ᐊᐅᓪᓚᕆᑦᓯ ᐃᓴᕆᐊᓕᒥᐅᖑᖃᑎᓯᓗ, ᓄᓇᖁᑎᒐ ᕿᒪᓕᕐᓯᐅᒃ, ᐊᑕᓂᖅ ᑐᒃᓯᐊᕐᕕᒋᔭᕐᑐᓕᕐᓯᐅᒃ ᑍᒫᒃ ᐱᔪᒪᓂᕆᓚᐅᕐᑕᑦᓯᑐᑦ. 32ᓰᐱᖁᑎᓯ ᐃᒻᒧᒃᓯᐅᒐᖁᑎᓯᓗ ᓇᒃᓴᓗᒋᑦ ᐊᐅᓪᓚᓕᕆᑦᓯ ᑐᒃᓯᐅᑎᓂᐊᕐᐸᑦᓯᓐᖓ ᐱᑦᓯᐊᕐᕕᒋᔭᐅᖁᓗᖓ.”
33ᐄᑦᔨᑉᑎᒥᐅᓪᓗ ᑎᓕᐅᕆᓕᕐᐳᑦ ᑐᐊᕕᕐᓗᑎᒃ ᐃᓴᕆᐊᓕᒥᐅᑦ ᓄᓇᒥᖕᓂᑦ ᐊᐅᓪᓚᖁᓪᓗᒋᑦ ᐅᖃᕐᓗᑎᒃ, “ᐊᐅᓪᓚᖏᒃᑲᓗᐊᕈᑦᓯ ᑐᖁᔪᐃᓐᓇᐅᓂᐊᓕᕐᐳᒍᑦ.” 34ᐊᓱᐃᓛᒃ ᐃᓴᕆᐊᓕᒥᐅᑦ ᓂᐊᖂᔭᓕᐅᕈᑎᑎᒃ ᐳᕙᓪᓚᕐᓴᐅᑎᖃᖏᑦᑐᓂᒃ ᐆᓯᒪᔪᓂᒃ ᐃᓗᓪᓕᕐᓗᒋᑦ ᖃᓪᓗᓈᕐᑕᒥᒃ ᐃᒻᒧᓯᕐᓗᒋᑦ ᐃᕐᓱᓕᕐᐰᑦ. 35#ᒨᓯᓯ ᐂᑉᐸᖏᑦ 3:21,22.ᐃᓴᕆᐊᓕᒥᐅᓪᓗ ᒨᓯᓯᒧᑦ ᐱᖁᔭᐅᓚᐅᕐᓂᑎᒃ ᒪᓕᒡᓗᒍ ᐱᓂᐊᕐᐳᑦ, ᐅᖃᐅᑎᔭᐅᓯᒪᒐᒥᒃ ᐄᑦᔨᑉᑎᒥᐅᓂᑦ ᑐᒃᓯᕋᖁᔭᐅᓪᓗᑎᒃ, ᒎᓗᓂᒃ ᓯᐅᓪᕕᕆᓂᒡᓗ ᐱᖁᑎᖏᓐᓂᒡᓗ ᐊᓐᓄᕌᖏᓐᓂᒡᓗ. 36ᐊᑕᓂᐅᓪᓗ ᐄᑦᔨᑉᑎᒥᐅᑦ ᖁᕕᐊᓲᑎᖃᓕᕐᑎᑉᐰᑦ ᐃᓴᕆᐊᓕᒥᐅᓂᒃ, ᐃᓴᕆᐊᓕᒥᐅᓪᓗ ᐱᔪᒪᔭᖏᓐᓂᒃ ᑐᓂᓯᕕᒋᓪᓗᓂᑦᔪᒃ, ᑍᒫᒃ ᐱᖕᒪᑕ ᐃᓴᕆᐊᓕᒥᐅᑦ ᐄᑦᔨᑉᑎᒥᐅᑦ ᐊᔪᕐᓴᖏᑦᔪᑎᖏᓐᓂᒃ ᐊᐅᓪᓚᕈᑦᔨᓚᐅᕐᐳᑦ.
ᐃᓴᕆᐊᓕᒥᐅᑦ ᐄᑦᔨᑉᑎᒥᑦ ᐊᐅᓪᓚᕐᓂᖓᑦ
37ᐃᓴᕆᐊᓕᒥᐅᑦ ᐊᐅᓪᓚᕐᐳᑦ ᐱᓱᒃᓗᑎᒃ ᓄᓇᒥᑦ ᕌᒥᓯᓯᒥᑦ ᓱᑰᑎᒧᑦ ᑎᑭᓪᓗᑎᒃ, ᐊᖑᑎᓪᓗ ᐅᓄᕐᓂᖃᓚᐅᕐᐳᑦ 600,000ᓂᒃ ᐊᕐᓁᑦ ᓄᑕᖅᑲᓪᓗ ᐱᖃᓯᐅᑎᓇᒋᑦ. 38ᐅᓄᕐᑐᓂᒡᓗ ᐃᓅᖃᑎᖃᒃᑲᓐᓂᕆᓪᓗᑎᒃ. ᓰᐱᓂᒡᓗ, ᒎᑦᓯᓂᒡᓗ, ᐃᒻᒧᒃᓯᐅᒐᕐᓂᒡᓗ ᐅᓄᕐᑐᓂᒃ ᓇᒃᓴᓚᐅᕆᕗᑦ. 39ᐳᕙᓪᓚᕐᓴᐅᑎᖃᖏᑦᑐᓂᒡᓗ ᓂᐊᖂᔭᓕᐅᖃᑦᑕᕐᐳᑦ ᐄᑦᔨᑉᑎᒦᓪᓗᑎᒃ ᓴᓇᔭᕕᓂᕐᒥᖕᓂᒃ. ᐄᑦᔨᑉᑎᒥᑦ ᑐᐊᕕᕐᓗᑎᒃ ᐊᐅᓪᓚᕐᑎᑕᐅᓚᐅᕋᒥᒃ ᑕᖁᐊᒃᓴᒥᖕᓂᒡᓘᓐᓃᑦ ᐱᔪᓐᓇᕐᓯᓇᑎᒃ ᐳᕙᓪᓚᕐᓴᐅᑎᓕᖕᒥᒡᓗ ᓂᐊᖂᔭᓕᐅᕈᓐᓇᕐᓯᓇᑎᒃ.
40 #
ᒨᓯᓯ ᓯᕗᓪᓖᑦ 15:13; ᒐᓔᑎ 3:17. ᐃᓴᕆᐊᓕᒥᐅᓪᓗ ᐄᑦᔨᑉᑎᒦᓚᐅᕐᐳᑦ ᐊᕐᕌᒍᓂᒃ 430ᓂᒃ. 41ᑖᒃᑯᐊ ᐊᕐᕌᒍᑦ 430 ᓈᑎᓪᓗᒋᑦ ᐃᓅᖃᑎᒌᑦ ᐊᑕᓂᐅᑉ ᐃᓄᖁᑎᒋᔭᖏᑦ ᐄᑦᔨᑉᑎᒥᑦ ᐊᐅᓪᓚᕐᓯᒪᔪᐃᓐᓇᐅᓕᓚᐅᕐᐳᑦ. 42ᐅᓐᓄᐊᒥ ᑍᑦᓱᒪᓂ ᐊᑕᓂᐅᑉ ᖃᐅᔨᓮᓐᓇᓚᐅᕐᐰᑦ ᐊᐅᓪᓚᕐᑎᑉᐸᓪᓕᐊᓕᕐᓗᓂᒋᑦ ᐄᑦᔨᑉᑎᒥᑦ. ᑍᓐᓇ ᐅᓐᓄᐊᖅ ᑍᒤᓕᐅᕐᕕᐅᓚᐅᕐᑐᖅ ᐊᑕᓂᕐᒧᑦ ᑐᕌᖓᑎᑕᐅᕗᖅ ᑍᒪᓐᖓᓕᒫᖅ ᓇᓪᓕᐅᑎᔭᕌᖓᑦ ᐃᓴᕆᐊᓕᒥᐅᑦ ᖃᐅᔨᓴᕐᐸᒃᑐᒃᓴᐅᖁᓪᓗᒋᑦ.
ᖄᖏᕐᑕᐅᕕᐅᑉ ᒪᓕᒐᖏᑦ
43ᐊᑕᓂᖅ ᐅᖃᕐᐳᖅ ᒨᓯᓯᒧᑦ ᐂᕉᓂᒧᓪᓗ, “ᐅᑯᐊ ᑕᕝᕙ ᖄᖏᕐᑕᐅᕕᖕᒧᑦ ᒪᓕᒐᐅᔭᕆᐊᖃᕐᑐᑦ ᐃᒤᑦᑑᕗᑦ; ᐃᓅᖃᑎᑐᖃᕆᓐᖏᑕᓯ ᖄᖏᕐᑕᐅᕕᖕᒥᒃ ᓇᓪᓕᐅᓂᕐᓯᐅᕐᓂᕐᒧᑦ ᓂᕆᖃᑎᒌᖕᓂᕐᒥ ᓂᕆᖃᑕᐅᔪᒃᓴᐅᓐᖏᓚᖅ. 44ᓯᐊᓛᓕᒫᓪᓕ ᐃᓕᑦᓯᓐᓄᑦ ᓂᕆᖃᑕᐅᔪᓐᓇᕐᐳᑦ ᑭᓯᐊᓂ ᐱᖃᑕᐅᔪᓐᓇᖁᓪᓗᒋᑦ ᓯᕗᓪᓕᕐᒥᒃ ᑭᐱᔭᐅᖅᑳᕐᑐᒃᓴᐅᕗᑦ. 45ᐃᓚᒋᑬᓐᓇᑐᐃᓐᓇᕐᑕᓯᓕ ᐅᕝᕙᓗ ᐃᖅᑲᓁᔭᕐᑎᑕᐅᑐᐃᓐᓇᕐᑐᑦ ᓂᕆᖃᑕᐅᔪᒃᓴᐅᓐᖏᓚᑦ. 46#ᒨᓯᓯ ᓯᑕᒪᖏᑦ 9:12; ᔪᐊᓇᓯ 19:36.ᐃᒡᓗᒥ ᐊᑕᐅᓯᕐᒥ ᓂᕆᔭᐅᔪᒃᓴᐅᕗᖅ; ᓂᕿᖓᑕᓗ ᐃᓚᖓᓂᒃ ᐃᒡᓘᑉ ᐊᓯᐊᓄᒃ ᐊᓐᓂᑦᔨᔪᒃᓴᐅᓐᖏᓚᓯ; ᑖᑦᓱᒪᓗ ᓴᐅᓂᖏᑦ ᓇᒡᒍᕐᑕᐅᔪᒃᓴᐅᓐᖏᓚᑦ. 47ᐃᓴᕆᐊᓕᒥᐅᓕᒫᑦᓯᐊᓪᓗ ᑕᒪᑐᒥᖓ ᒪᓕᒃᑐᒃᓴᐅᕗᑦ. 48ᐃᓚᒋᓐᖏᑕᓯᓐᓂᒡᓕ ᐃᒡᓗᒥᐅᑕᖃᕈᑦᓯ ᖄᖏᕐᑕᐅᕕᒃᓯᐅᑎᒥᒡᓗ ᐊᑕᓂᕐᒧᑦ ᓂᕆᖃᑕᐅᔪᒪᒃᐸᑦ, ᑖᒃᑯᐊ ᐊᖑᑎᑦ ᑭᐱᔭᐅᖅᑳᕐᑐᒃᓴᐅᕗᑦ, ᑕᕝᕙ ᑭᖑᓂᖓᒍᑦ ᐱᖃᑕᐅᔪᓐᓇᕐᓯᒐᔭᕐᐳᖅ; ᐃᓚᒋᔭᐅᓪᓚᕆᒃᑐᑎᑐᓪᓗ ᑍᒤᓕᕋᔭᕐᐳᖅ. ᑭᓯᐊᓂᓕ ᑭᐱᔭᐅᓯᒪᖏᑦᑐᒥᒃ ᑕᕝᕙᓐᖓᑦ ᓂᕆᖃᑕᐅᔪᖃᕐᑐᒃᓴᐅᓐᖏᓚᖅ. 49ᐊᑕᐅᓯᕐᒥᒡᓕ ᐱᖁᔭᖃᕐᑐᒃᓴᐅᕗᑦ ᐃᓚᒋᔭᓯᓗ ᐃᓚᒋᓐᖏᑕᓯᓗ ᐃᒡᓗᒥᐅᑕᓕᒫᓯ.” 50ᐃᓴᕆᐊᓕᒥᐅᓕᒫᓪᓕ ᑕᒪᑐᒥᖓ ᒪᓕᓚᐅᕐᐳᑦ; ᑍᒫᒃ ᐊᑕᓂᐅᑉ ᐱᖁᓚᐅᕐᒪᒋᑦ ᒨᓯᓯᒃᑯᒃ ᐂᕉᓂᒃᑯᒃ ᐊᖅᑯᑎᒋᓪᓗᒋᒃ. 51ᑕᕝᕙᓂᓗ ᐅᓪᓗᒥ ᓇᓪᓕᐅᓐᓂᕐᓯᐅᕐᕕᖕᒥ ᐃᓴᕆᐊᓕᒥᐅᑦ ᐃᓄᖏᑦ ᐊᑕᓂᐅᑉ ᐄᑦᔨᑉᑎᒥᑦ ᐊᓂᑎᓚᐅᕐᐰᑦ ᑎᒍᔭᐅᓯᒪᕕᒋᔭᖏᓐᓂᑦ.
Currently Selected:
ᒨᓯᓯ ᐂᑉᐸᖏᑦ 12: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
