ᑎᓴᓗᓁᑲᒥᐅᓄᑦ ᐂᑉᐸᖏᑦ 3
3
ᑐᒃᓯᐅᑎᑎᒍᑦ
1ᑭᖑᓪᓕᕐᐹᒥᒡᓕ ᙭ᔅᑑᓯᒥᐅᑕᐅᖃᑎᒃᑲ, ᑐᒃᓯᐅᑎᑎᒍᑦ, ᐊᑕᓂᐅᑉ ᐅᖃᐅᓯᖏᑦ ᓱᒃᑲᔪᒥᒃ ᓯᐊᒻᒪᕐᑎᑕᐅᕙᓪᓕᐊᖁᓪᓗᒋᑦ ᓂᑐᕐᓇᕐᑎᑕᐅᓗᑎᒃᓗ ᓇᓂᑐᐃᓐᓇᖅ ᐅᐱᒋᔭᐅᑦᓯᐊᕐᓗᑎᒃ, ᐃᓕᑦᓯᑐᑦ, 2ᓴᐳᑎᔭᐅᖁᓪᓗᑕᓗ ᐃᓄᖕᓂᑦ ᐱᐅᖏᑦᑐᓂᑦ ᐊᔪᕐᑐᓕᔪᓂᓪᓗ; ᑕᒪᕐᒥᒃ ᐅᒃᐱᕐᑐᐃᓐᓇᐅᖏᒻᒪᑕ.
3ᐊᑕᓂᕐᓕ ᓱᖁᓯᔪᐃᑦᑑᖕᒪᑦ; ᑖᑦᓱᒪ ᓴᓐᖏᔫᑎᓐᓂᐊᕐᐹᓯ ᓴᐳᑎᓗᓯᓗ ᓵᑖᓇᓯᒥᑦ. 4ᖁᓚᓐᖏᓚᒍᓪᓕ ᑍᒤᑦᑐᓐᓇᕋᑦᓯ ᐊᑕᓂᕐᒥ, ᐱᓇᓱᐊᕐᓂᑦᓯᓐᓂᒃ ᐃᓕᑦᓯᓐᓄᓪᓗ ᐱᓇᓱᐊᒐᒃᓴᓕᐊᕆᔭᑦᑎᓐᓂᒃ ᐱᓇᓱᐊᕐᓂᐊᕋᑦᓯ.
5ᐊᑕᓂᐅᑉ ᐆᒻᒪᑎᓯ ᑕᓯᐅᕐᓕᒋᑦ ᒎᑎᐅᑉ ᓇᒡᓕᖕᓂᖓᓄᑦ ᙭ᔅᑑᓯᐅᓪᓗ ᓱᖁᓯᔪᐃᑦᑑᓂᖓᓄᑦ.
ᐱᓇᓱᐊᕈᒪᖏᑦᑐᓂᒃ ᐃᓂᕐᑎᕆᓂᖅ
6᙭ᔅᑑᓯᒥᐅᑕᐅᖃᑎᒃᑲ ᓇᓪᓕᒋᔭᒃᑲ, ᒫᓐᓇ ᐱᖁᓪᓚᕆᒃᐸᑦᓯ, ᐊᑕᓂᑦᑕ ᔩᓱᓯᐅᑉ ᙭ᔅᑑᓯᐅᑉ ᐊᑎᖓᓂ, ᐃᓚᖃᖁᓇᓯ ᐅᒃᐱᕐᑑᖃᑎᓂᒃ ᐃᓅᓯᖃᕐᑐᓂᒃ ᓱᓇᓕᕆᔪᒪᖏᑦᑐᒥᒃ ᐱᐅᓯᐅᓲᒥᒃ ᒪᓕᒐᓱᐊᖏᑦᑐᒥᒃ ᐊᔪᕆᕐᑑᑎᒋᓚᐅᕐᑕᑦᑎᓐᓂᒃ. 7ᐃᓕᑦᓯ ᖃᐅᔨᒪᒐᑦᓯ ᐅᕙᑦᑎᓐᓂᒃ ᐃᑦᔪᐊᕐᓯᔭᕆᐊᖃᕋᑦᓯ; ᐃᓕᑦᓯᓐᓃᑎᓪᓗᑕ ᓱᓇᓕᕆᔪᒪᖏᑦᑑᓚᐅᖏᓐᓇᑦᑕ, 8ᐊᑭᖃᖏᑦᑐᒥᒡᓗ ᓂᕿᒃᓴᑦᑎᓐᓂᒃ ᑎᒍᓯᓚᐅᓐᖏᓚᒍᑦ ᑭᓇᒥᓪᓘᓐᓃᑦ, ᐊᒃᓱᕈᕐᓗᑕᓕ ᐱᓇᓱᐊᓚᐅᕐᐳᒍᑦ ᐅᓪᓘᑎᓪᓗᒍ ᐅᓐᓄᐊᒥᓗ, ᐃᓕᑦᓯᓐᓂᒃ ᓇᓕᑦᓯᓐᓂᒃ ᐅᖁᒤᑦᑐᒦᖁᔨᓇᑕ. 9ᑍᒤᓕᐅᓚᐅᕐᐳᒍᑦ ᐃᑲᔪᕐᑕᐅᔭᕆᐊᖃᖏᓐᓂᕐᒨᖏᑦᑐᖅ, ᐃᓕᑦᓯᓐᓄᓪᓕ ᒪᓕᒐᒃᓴᐅᔪᓐᓇᕐᑐᒥᒃ ᐃᓅᓯᖃᓚᐅᕐᐳᒍᑦ. 10ᐃᓕᑦᓯᓐᓃᓪᓗᑕ ᓱᓕ, ᐃᓕᑦᓯᓐᓄᑦ ᒪᓕᒃᑕᐅᔪᓴᒥᒃ ᐋᕿᒃᓯᓚᐅᕐᐳᒍᑦ, “ᓇᓪᓕᐊᑦ ᐱᓇᓱᐊᕈᒪᖏᑦᑐᖅ, ᑖᓐᓇ ᓂᕆᔪᒃᓴᐅᓐᖏᓚᖅ.”
11ᑕᒪᑐᒥᖓᓕ ᐅᖃᕐᐳᒍᑦ ᑐᓴᓚᐅᕋᑦᑕ ᐃᓅᖃᑎᓯᒎᖅ ᐃᓚᖏᑦ ᓱᓇᓕᕆᔪᒪᖏᒻᒪᑕ, ᐃᓅᖃᑎᒥᖕᓂᒃ ᐅᖃᐅᑎᒃᓴᕈᒪᑐᐃᓐᓇᕐᑐᑦ, ᓱᓇᒥᒡᓘᓐᓃᑦ ᐱᓇᓱᐊᕈᒪᓇᑎᒃ. 12ᑍᒤᑦᑐᑦ ᐱᖁᓪᓚᕆᒃᓗᒋᑦ ᐃᓇᑉᐸᕗᑦ ᐊᑕᓂᑦᑎᒍᑦ ᔩᓱᓯ ᙭ᔅᑑᓯᒃᑯᑦ ᐋᖅᑮᒋᐊᖁᓪᓗᒋᑦ ᐃᓅᓯᕐᒥᖕᓂᒃ ᐱᓇᓱᐊᓕᖁᓪᓗᒋᓪᓗ ᓇᖕᒥᓂᖅ ᑮᓇᐅᔭᓕᐊᒥᖕᓄᑦ ᐆᒪᑦᔪᑎᒃᓴᕐᓯᐅᖁᓪᓗᒋᑦ.
13ᐃᓕᑦᓯᓕ ᙭ᔅᑑᓯᒥᐅᑕᐅᖃᑎᒃᑲ, ᐱᐅᔪᒥᒃ ᐱᓇᓱᐊᕐᓂᖅ ᐃᕿᐊᓐᖒᑎᑦᑍᓕᓯᐅᒃ. 14ᓇᓪᓕᐊᑦ ᑎᑎᕋᕐᑕᑦᑎᓐᓂ ᑖᒃᑯᓇᖓᑦ ᐅᖃᐅᓯᕆᔭᑦᑎᓐᓂᒡᓗ ᓈᓚᒍᒪᖏᑦᑐᖅ, ᑖᓐᓇ ᓇᓪᓕᐊᖑᖕᒪᖔᑦ ᓇᓗᓁᕐᓯᐅᒃ, ᐱᓇᓱᐊᖃᑎᒋᔪᓐᓃᓗᒍᓗ, ᑲᓐᖑᓱᒃᑎᑕᐅᖁᓪᓗᒍ. 15ᐊᑭᕋᕐᑐᕐᑎᑎᑐᑦ ᐱᓂᐊᕐᕕᒋᖏᓪᓗᒍ, ᙭ᔅᑑᓯᒥᐅᑕᐅᖃᑎᑐᓪᓕ ᐃᓂᕐᑎᕐᓯᐅᒃ.
ᐅᖃᐅᓰᑦ ᓮᒪᕐᑎᑦᓯᓃᑦ
16ᐊᑕᓂᐅᓪᓕ ᓇᖕᒥᓂᖅ ᓮᓕᓂᕐᒥᓄᑦ ᓮᒪᓇᕐᑐᒥᒃ ᑐᓂᓯᕕᒋᓕᓯ ᑍᒪᓐᖓᓕᒫᖅ ᓱᓇᑐᐃᓐᓇᕐᑎᒍᑦ. ᐊᑕᓂᐅᑉ ᐃᓚᒋᓕᓯ ᑕᒪᑦᓯ.
17ᐅᓇ ᑕᕝᕙ ᓇᖕᒥᓂᖅ ᐊᒡᒐᓐᓄᑦ ᑎᑎᕋᕐᑕᕋ. ᑕᕝᕙᐅᕗᓯ ᐸᐅᓗᓯᒥᑦ. ᑍᒫᒃ ᑕᕝᕙ ᑎᑎᕋᓕᕌᖓᒪ ᐊᑎᓕᐅᕈᑎᒋᕙᒃᑕᕋ; ᑍᒫᒡᓗ ᑕᕝᕙ ᑎᑎᕋᕐᐸᒃᐳᖓ.
18ᐊᑕᓂᑦᑕ ᔩᓱᓯᐅᑉ ᙭ᔅᑑᓯᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᐃᓚᒋᓕᓯ ᑕᒪᑦᓯ.
Currently Selected:
ᑎᓴᓗᓁᑲᒥᐅᓄᑦ ᐂᑉᐸᖏᑦ 3: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
