ᑎᒧᑎᒧᑦ ᓯᕗᓪᓖᑦ 4
4
ᐊᔪᕆᕐᑐᐃᓂᕐᓗᒃᑐᑦ
1ᐊᓂᕐᓂᖅ ᑐᑭᓯᓇᑦᓯᐊᕐᑐᒥᒃ ᓇᓗᓁᕐᓯᕗᖅ ᐅᓪᓗᐃᑦ ᑭᖑᓪᓕᖏᓐᓂ ᐃᓚᖏᑦ ᐅᒃᐱᕐᓂᕐᒥᒃ ᕿᒤᔪᒫᕐᒪᑕ, ᐊᓂᕐᓂᕐᓂᒃ ᓱᓕᖏᑦᑐᓂᒃ ᒪᓕᒍᒪᓂᕐᓴᐅᔪᓂᒃ ᐊᓂᕐᓂᕐᓗᐃᓪᓗ ᐊᔪᕆᕐᑑᑎᒋᓐᓂᒃ, 2ᑍᒤᑦᑐᑦ ᐊᔪᕆᕐᑐᐃᓃᑦ ᓯᐊᒻᒪᒃᑎᑕᐅᓯᒪᕗᑦ ᓱᓕᓐᖏᑦᑐᑎᒍᑦ ᐅᐃᕕᕆᒃᓯᓪᓗᑎᒃ ᐃᓱᒪᖏᑦ ᐃᒃᐱᖕᓂᐊᓂᖃᕈᓐᓃᕐᐳᑦ ᓴᕕᕋᔭᖕᒧᑦ ᐆᓇᕐᓯᑎᑕᐅᓯᒪᔪᒧᑦ ᐆᑕᕐᑕᐅᓯᒪᔪᑎᑐᑦ. 3ᑖᒃᑯᐊ ᐊᔪᕆᕐᑐᐃᕗᑦ ᓄᓕᐊᓂᖃᑦᑕᖁᔨᓇᑎᒃ ᓂᕆᔭᕆᐊᖃᓐᖏᓂᕅᓪᓗᑎᒃᓗ ᓂᕿᑦ ᐃᓚᖏᓐᓂᒃ ᒎᑎᐅᓪᓕ ᓂᑭᑦ ᐱᓐᖑᕐᑎᓯᒪᕔᑦ ᓂᕿᒋᔭᐅᖁᓪᓗᒋᑦ ᑐᒃᓯᐊᕐᓂᒃᑯᑦ ᖁᔭᓕᑦᔪᑕᐅᓗᑎᒃ, ᐅᒃᐱᕐᑐᓄᑦ ᓱᓕᓂᕐᒥᒡᓗ ᖃᐅᔨᒪᔪᓄᑦ. 4ᒎᑎᐅᑉ ᐱᓐᖑᕐᑎᓯᒪᔭᓐᖏᑦ ᑕᒪᕐᒥᒃ ᐱᐅᖕᒪᑕ, ᓇᕐᕈᒋᔭᒃᓴᐅᓐᖏᓚᑦ ᑐᒃᓯᐊᕐᓂᒃᑯᑦ ᖁᔭᓕᑦᔪᑕᐅᓗᑎᒃ ᑎᒍᔭᐅᒃᐸᑕ; 5ᒎᑎᐅᑉ ᐅᖃᐅᓯᖓᓄᑦ ᑐᒃᓯᐅᑦᔭᐅᓂᕐᒧᓪᓗ ᐃᑦᔪᕐᓁᑎᑕᐅᖕᒪᑕ.
ᐱᔨᑦᓯᑦᓯᐊᕐᓂᖅ ᙭ᔅᑑᓯ ᔩᓱᓯᒥᒃ
6ᑕᒪᒃᑯᐊ ᐅᖃᐅᑦᔪᐃᑦᔪᑎᒋᒍᕕᒋᑦ ᐅᒃᐱᕐᑑᖃᑎᒌᓄᑦ, ᐱᔨᑦᓯᕐᑎᐅᑦᓯᐊᕐᓂᐊᕐᐳᑎᑦ ᙭ᔅᑑᓯ ᔩᓱᓯᒥᒃ, ᓇᖕᒥᓂᖅ ᐱᒋᐅᕐᓴᓗᑎᑦ ᐅᖃᐅᓯᕐᓄᑦ ᐅᒃᐱᕐᓂᒃᑯᑦ ᐊᔪᕆᕐᑑᓯᕐᓄᓪᓗ ᓱᓕᔪᓄᑦ ᒪᓕᒃᓯᒪᔭᕐᓄᑦ. 7ᐅᓂᒃᑳᕐᑐᐊᑦ ᒎᑎᒥᒃ ᐃᓱᒪᑎᑦᓯᖏᑦᑐᑦ ᑲᒪᒋᓂᐊᕐᓇᒋᑦ. ᐅᒃᐱᕐᓂᕐᒥᓕ ᐃᓅᓯᒃᓴᐅᔪᓐᓇᕐᑐᓂᒃ ᐃᓕᓐᓂᐊᖔᖃᑦᑕᕆᑦ. 8ᑎᒥᒃᑯᑦ ᐱᔭᕆᐅᕐᓴᕐᓂᖅ ᐊᑐᕐᓇᕐᓂᖃᕋᓗᐊᕐᐳᖅ, ᐅᒃᐱᕐᓂᒃᑯᓪᓕ ᐱᔭᕆᐅᕐᓴᕐᓂᖅ ᖃᓄᓕᒫᖅ ᐊᑐᕐᓇᕐᓂᖃᕐᐳᖅ, ᐊᖏᕈᑕᐅᓯᒪᖕᒪᑦ ᒫᓐᓇᒧᑦ ᐊᑐᕐᑐᒥᒃ ᓯᕗᓂᕐᒥᓗ ᐊᑐᕈᒫᕐᑐᒥᒃ. 9ᐅᖃᐅᓯᖅ ᐅᓇ ᐅᒃᐱᕆᔭᒃᓴᐅᕗᖅ ᑕᒪᒃᑭᕐᓗᓂ ᐃᓚᓕᐅᕐᑕᐅᔪᒃᓴᐅᓪᓗᓂ. 10ᒫᓐᓇᒧᑦ ᑎᑭᓪᓗᒍ ᐱᓇᓱᐊᕐᐸᒃᐳᒍᑦ ᐊᒃᓱᕈᕐᓗᑕ, ᓂᕆᐅᖕᓂᖃᕋᑦᑕ ᒎᑎᒥᒃ ᑐᖁᓱᐃᑦᑐᒥᒃ, ᐱᐅᓕᔨᐅᔪᒥᒃ ᐃᓄᖕᓂᒃ ᑕᒤᓐᓂᒃ, ᐱᓗᐊᕐᓗᓂᓕ ᐅᒃᐱᕈᓱᒃᑐᓄᑦ.
11ᑕᒪᒃᑯᓂᖓ ᐊᔪᕆᕐᓱᒃᑭᑦ ᒪᓕᖁᓗᒋᑦ. 12ᓇᕐᕈᒋᔭᐅᑦᑍᓕᒋᑦ ᐃᓅᒃᓱᒃᑑᓃᑦ ᐱᑦᔪᑎᒋᓗᒍ, ᐅᒃᐱᕐᑐᓄᓪᓕ ᒪᓕᒐᒃᓴᐅᓕᕆᑦ ᐅᖃᐅᓯᒃᑯᑦ ᐱᓂᐊᕐᓂᒃᑯᓪᓗ, ᓇᒡᓕᖕᓂᒃᑯᑦ, ᐅᒃᐱᕐᓂᒃᑯᓪᓗ, ᐃᓗᐊᕐᑐᓕᓂᒃᑯᓪᓗ. 13ᑎᑭᓚᐅᖏᓐᓂᓐᓂ, ᐱᔪᓐᓇᕐᓃᑦ ᐊᑐᕐᓗᒍ ᐊᒡᓔᑦ ᐃᓄᖕᓄᑦ ᐊᑐᐊᖃᑦᑕᒃᑭᑦ, ᐊᔪᕆᕐᑐᐃᖃᑦᑕᕐᓗᑎᑦ, ᐃᓕᓐᓂᐊᕐᑎᑦᓯᓗᑎᓪᓗ. 14ᑐᓂᕐᕈᓯᐊᕆᓯᒪᔧᑦ ᑲᒪᒋᔪᓐᓃᕐᑍᓕᒍᒃ, ᑐᓂᕐᕈᓯᐊᕆᓚᐅᕐᑍᑦ ᐊᓂᕐᓂᒃᑯᑦ ᐅᖃᓪᓚᒡᕕᐅᑎᓪᓗᑎᑦ ᐅᒃᐱᕐᑑᖃᑎᒌᑦ ᐊᖓᔪᖅᑳᖏᓐᓄᑦ ᐸᑎᒻᒥᔭᐅᓪᓗᑎᑦ. 15ᑕᒪᒃᑯᐊ ᐃᓱᒪᒃᓴᕐᓯᐅᕈᑎᒋᑦᓯᐊᑭᑦ, ᐃᓕᖕᓂᒃ ᑕᒪᑐᒧᖓ ᑐᓂᓯᒪᑦᓯᐊᕐᓗᑎᑦ, ᐱᕙᓪᓕᐊᓃᑦ ᑕᑯᔭᐅᖁᓪᓗᒍ ᑕᒤᓐᓄᑦ. 16ᐃᓕᖕᓂᒃ ᐊᔪᕆᕐᓱᖃᓯᐅᔨᓴᑦᓯᐊᕆᑦ ᐊᔪᕆᕐᑐᐃᓂᕐᓂᒡᓗ. ᑕᒪᒃᑯᐊ ᐊᓯᐊᓄᐊᕐᑍᓕᒋᑦ, ᑍᒤᒃᑯᕕᑦ ᐃᓕᖕᓂᒃ ᐱᐅᓕᓂᐊᕐᐳᑎᑦ ᐊᔪᕆᕐᑐᕐᑕᕐᓂᒡᓗ.
Currently Selected:
ᑎᒧᑎᒧᑦ ᓯᕗᓪᓖᑦ 4: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
