ᓴᒧᐃᓕ ᓯᕗᓪᓖᑦ 5
5
ᐊᖏᕈᑎᐅᑉ ᐃᒃᓯᕐᕕᖁᑎᖓᑕ ᐱᓕᔅᑏᓂᒧᐊᖅᑕᐅᓂᖓ
1ᐱᓕᔅᑍᓂᒥᐅᑦ ᑎᒍᓯᒐᒥᒃ ᒎᑎᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓᓂᒃ, ᐊᒡᔭᖅᐹ ᐃᐱᓂᓯᕆᒥᑦ ᐃᒡᓗᒐᓴᖁᑎᒥᓄᑦ ᐋᔅᑖᑦᒧᑦ; 2ᑕᕝᕙ ᐱᓕᔅᑍᓂᒥᐅᑦ ᑐᒃᓯᐊᕐᕕᖕᒥᓅᕈᑎᓚᐅᖅᐹᑦ ᒎᑎᓐᖑᐊᒧᑦ ᑍᒐᓐᒧᑦ, ᓴᓇᓐᖑᐊᖅᓯᒪᔪᒧᑦ ᑖᑦᓱᒪᓗ ᓴᓂᐊᓄᐊᖅᐹᑦ. 3ᐅᓪᓛᒻᒪᕆᒃᑯᒃ ᖃᐅᑎᓪᓗᒍ ᐋᔅᑖᑦᒥᐅᑦ ᐃᓄᖏᑦ ᒪᑭᓐᓇᒥᒃ, ᑕᑯᕗᑦ ᒎᑎᓐᖑᐊᖓ ᑍᒐᓐ ᐅᕐᕈᖓᔪᖅ ᐹᒻᒪᖓᓪᓗᓂ ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓᑕ ᓯᕗᕌᓂ. ᑕᕝᕙ ᑎᒍᕚᑦ ᐅᑎᖅᑎᓪᓗᒍᓗ ᐃᓂᖓᓄᑦ. 4ᖃᐅᑎᓪᓗᒍ ᐅᓪᓛᒻᒪᕆᒃᑯᑦ ᒪᑭᒻᒥᒐᒥᒃ, ᑕᑯᒋᕗᑦ, ᑍᒐᓐ ᐅᕐᕈᖓᔪᖅ ᐹᒻᒪᖓᓪᓗᓂ ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓᑕ ᓯᕗᕌᓂ, ᓂᐊᖁᐊ ᑕᓕᖏᒡᓗ ᓇᑲᓯᒪᓪᓗᑎᒃ ᓇᑎᕐᖕᒦᑦᑑᒃ; ᑎᒥᖓ ᑭᓯᐊᓂ ᐊᒥᐊᒃᑰᓕᖅᑐᖅ. 5ᑍᒤᒻᒪᑦ ᑍᒐᓐ ᑐᓂᕐᕈᓯᖅᑎᑦᓯᔨᖏᑦ ᑐᒃᓯᐊᖅᑎᖏᓪᓗ ᐃᑎᖅᑐᓕᒫᑦ ᐋᔅᑖᑦᒥ ᑐᒃᓯᐊᕐᕕᖕᒧᐊᕌᖓᒥᒃ ᐃᓂᒋᓚᐅᖅᑕᖓᒍᑦ ᐱᓱᒍᓐᓇᓐᖏᓚᑦ ᐅᓪᓗᒥᒧᑦ ᑎᑭᓪᓗᒍ.
6ᐊᑕᓂᐅᑉ ᐱᔪᓐᓇᕐᖕᓂᖓᑕ ᐋᔅᑖᑦᒥᐅᑦ ᑲᑉᐱᐊᓱᒃᑎᓚᐅᖅᐰᑦ ᓱᒋᐊᖅᓗᒋᓪᓗ, ᐋᔅᑖᑦᒥᐅᑦ ᖃᓂᒋᔭᖓᓃᑦᑐᓪᓗ ᐋᓐᓂᐊᓇᖅᑐᓄᑦ ᐋᖅᑭᒃᑕᐅᔪᓐᓇᖏᑦᑐᓄᑦ. 7ᐋᔅᑖᑦᒥᐅᓪᓗ ᖃᐅᔨᒐᒥᒃ ᖃᓄᐃᓕᐅᕐᕕᐅᓂᕐᖕᒥᖕᓂᒃ ᐅᖃᖅᐳᑦ, “ᐃᓴᕆᐊᓕᒥᐅᑦ ᒎᑎᖓᑦᑕ ᐊᖏᕈᑎᖓᑕ ᐃᒃᓯᕐᕕᖁᑎᖓ ᐅᕙᑦᑎᓐᓃᖏᓐᓇᕆᐊᖃᓐᖏᓚᖅ, ᑖᑦᓱᒪ ᐱᔪᓐᓇᕐᖕᓂᖓᓄᑦ ᐊᐅᓚᑕᐅᒻᒪᕆᓕᕋᑦᑕ ᒎᑎᕗᓪᓗ ᑍᒐᓐ ᐱᖃᓯᐅᑎᓪᓗᒍ.” 8ᑍᒤᒻᒪᑦ ᐅᖃᕆᐊᖅᑐᖅᑎᑦᓯᕗᑦ ᑲᑎᖃᑎᖃᖅᓗᑎᒡᓗ ᐱᓕᔅᑍᓂᒥᐅᑦ ᐊᖓᔪᖅᑳᖏᓐᓂᒃ ᐊᐱᕆᓪᓗᒋᓪᓗ, “ᖃᓄᐃᓕᐅᖅᑐᒃᓴᐅᕕᑖ ᐃᓴᕆᐊᓕᒥᐅᑦ ᒎᑎᖓᑕ ᐊᖏᕈᑎᖓᑕ ᐃᒃᓯᕐᕕᖁᑎᖓᓅ?” ᑖᒃᑯᐊ ᑭᐅᕗᑦ, “ᐃᓴᕆᐊᓕᒥᐅᑦ ᒎᑎᖓᑕ ᐊᖏᕈᑎᖓᑕ ᐃᒃᓯᕐᕕᖁᑎᖓ ᒑᑎᒧᐊᕈᑎᓚᐅᖅᓯᐅᒃ,” ᑍᒤᒻᒪᑦ ᐃᓴᕆᐊᓕᒥᐅᑦ ᒎᑎᖓᑕ ᐊᖏᕈᑎᖓᑕ ᐃᒃᓯᕐᕕᖁᑎᖓ ᒑᑎᒧᐊᕈᑎᕚᑦ. 9ᑭᓯᐊᓂᓕ ᑕᕝᕗᓐᖓᖅᑕᐅᓯᒪᓕᕐᖕᒪᑦ, ᐊᑕᓂᐅᑉ ᐱᔪᓐᓇᕐᖕᓂᖓᑕ ᓱᒋᐊᕆᕔᑦ ᑕᕝᕙᓂ ᐃᒡᓗᒐᓴᖕᓃᑦᑐᑦ, ᐅᐃᒪᔮᖅᑎᓪᓗᒋᓪᓗ, ᐋᓐᓂᐊᓇᖅᑐᖅᑖᖅᐳᓪᓗ ᐃᒡᓗᒐᓴᖕᓃᑦᑐᓕᒫᑦ, ᐃᓅᓱᒃᑐᑦ ᐃᓄᑐᕾᓪᓗ ᐊᑦᔨᒌᓂᒃ, ᖃᓂᒪᓇᖅᑐᓄᑦ ᑎᑭᑕᐅᔪᐃᓐᓇᐅᓚᐅᖅᐳᑦ. 10ᑕᕝᕙ ᒎᑎᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓ ᐃᑯᕋᓂᒧᐊᕈᑎᕚᑦ. ᑍᑯᖓᓗ ᑎᑭᐅᑦᔭᐅᖕᒪᑦ, ᐃᑯᕋᓂᒥᐅᑦ ᐃᓄᖏᑦ ᐅᖃᓕᖅᐳᑦ, “ᐃᓴᕆᐊᓕᒥᐅᑦ ᒎᑎᖓᑕ ᐊᖏᕈᑎᖓᑕ ᐃᒃᓯᕐᕕᖁᑎᖓ ᑕᒪᐅᓐᖓᖅᑕᐅᕗᖅ ᐅᕙᑦᑎᓐᓂᒃ ᑐᖁᑦᓯᖁᔭᐅᓪᓗᓂ ᐃᓄᖁᑎᑦᑎᓐᓂᒡᓗ!” 11ᑍᒤᒻᒪᑦ ᐱᓕᔅᑍᓂᒥᐅᑦ ᐊᖓᔪᖅᑳᓕᒫᖏᓐᓂᒃ ᕾᖁᔨᓚᐅᖅᐳᑦ ᑲᑎᖕᒪᑕᓗ ᐅᖃᐅᑎᕔᑦ, “ᐃᓴᕆᐊᓕᒥᐅᑉ ᒎᑎᖓᑕ ᐊᖏᕈᑎᖓᑕ ᐃᒃᓯᕐᕕᖁᑎᖓ ᑕᒫᓐᖓᑦ ᐊᐅᓪᓚᖅᑎᑕᐅᓚᐅᕐᓕ ᐃᓂᖓᓄᓪᓗ ᐅᑎᖅᑎᑕᐅᓗᓂ, ᑐᖁᑕᐅᓂᐊᖏᓐᓇᑦᑕ ᐃᓚᕗᓪᓗ.” ᐃᒡᓗᒐᓴᓕᒫᓂᓗ ᑕᕝᕙᓂ ᐅᐃᒪᔮᕐᖕᓂᖃᖅᐳᖅ ᑐᖁᑕᐅᓂᐊᕋᓱᒋᓪᓗᑎᒃ. 12ᑍᒃᑯᐊᓗ ᑐᖁᖏᑦᑑᒐᓗᐊᑦ ᐋᓐᓂᐊᓇᖅᑐᖅᑖᓚᐅᖅᐳᑦ ᐋᖅᑭᒃᑕᐅᔪᓐᓇᖏᑦᑐᓂᒃ, ᐃᓄᐃᓪᓗ ᐃᒡᓗᒐᓴᓃᑦᑐᑦ ᐃᓗᖏᖅᓱᖅᓗᑎᒃ ᓂᓪᓕᐊᓂᖏᑦ ᕿᓚᖕᒧᑦ ᑎᑭᐅᒪᓕᓚᐅᖅᐳᑦ.
Currently Selected:
ᓴᒧᐃᓕ ᓯᕗᓪᓖᑦ 5: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
