ᓴᒧᐃᓕ ᓯᕗᓪᓖᑦ 4
4
ᐊᖏᕈᑎᐅᑉ ᐃᒃᓯᕐᕕᖁᑎᖓᑕ ᑎᒍᔭᐅᓂᖓ
1ᓴᒧᐃᓕᓗ ᐅᖃᓕᖅᐳᖅ ᐃᓴᕆᐊᓕᒥᐅᓕᒫᓄᑦ. ᐃᓴᕆᐊᓕᒥᐅᑉ ᐅᓇᑕᕆᐊᓕᓚᐅᕐᖕᒪᑕ ᐱᓕᔅᑍᓂᒥᐅᓂᒃ; ᑕᖕᒫᖅᓯᒪᓚᐅᖅᐳᓪᓗ ᐃᐱᓂᓯᕆᒥ, ᐱᓕᔅᑏᓂᒥᐅᑦ ᑕᖕᒫᖅᓯᒪᑎᓪᓗᒋᑦ ᐊᐱᒃᒥ. 2ᑕᕝᕙ ᐱᓕᔅᑍᓂᒥᐅᑦ ᑲᑎᑉᐳᑦ ᐅᓇᑕᕆᐊᖅᓗᑎᒃ ᐃᓴᕆᐊᓕᒥᐅᓂᒃ, ᐅᓇᑕᕕᒃᔪᐊᓕᕋᒥᒡᓗ ᓵᓚᖃᖅᐳᑦ ᐃᓴᕆᐊᓕᒥᐅᓂᒃ, ᑐᖁᑦᓯᓚᐅᖅᐳᓪᓗ ᐊᖑᑎᓂᒃ 4,000ᓂᒃ ᐅᓇᑕᕐᕕᒋᔭᒥᖕᓂ. 3ᐅᓇᑕᖅᑏᓪᓗ ᐅᑎᕐᖕᒪᑕ ᑕᖕᒫᕐᕕᒋᓯᒪᔭᒥᖕᓄᑦ, ᐃᓴᕆᐊᓕᒥᐅᑦ ᐊᖓᔪᖅᑳᖏᑦ ᐅᖃᖅᐳᑦ, “ᓱᖕᒪᑦ ᐊᑕᓂᐅᑉ ᐅᓪᓗᒥ ᐱᓕᔅᑍᓂᒥᐅᑦ ᓵᓚᖃᖅᑎᑉᐰᑦ ᐅᕙᑦᑎᓐᓂᒃ? ᐊᑕᓂᐅᑉ ᐊᖏᖃᑎᒌᒍᑎᖓᑕ ᐃᒃᓯᕐᕕᖓ ᐂᓚᐅᖅᓚᕗᑦ ᓮᓗᐊᒥᑦ, ᐃᓚᒋᓂᐊᕐᖕᒪᑎᒍᑦ ᐱᐅᓕᓗᑕᓗ ᐊᑭᕋᑦᑕ ᐱᔪᓐᓇᕐᖕᓂᖏᓐᓂᑦ.” 4#ᒨᓯᓯ ᐂᑉᐸᖏᑦ 25:22.ᑕᕝᕙ ᑎᓕᓯᕗᑦ ᐅᖃᕆᐊᖅᑐᖅᑐᓂᒃ ᓮᓗᐊᒧᑦ, ᐊᑕᓂᐅᓪᓗ ᐊᔪᒐᖃᖏᑦᑑᑉ ᐊᖏᖃᑎᒌᒍᑎᖓᑕ ᐃᒃᓯᕐᕕᖓ ᓇᒃᓴᖅᐹᑦ, ᐃᒃᓯᕙᐅᑕᕐᔪᐊᖃᖅᑑᑉ ᓯᕌᐲᑦ ᐃᓴᕈᓖᒃ ᖁᓛᓂ; ᐃᓔᓪᓗ ᐃᕐᖕᓂᖏᒃ ᕼᐅᐱᓂᓗ ᐱᓂᕼᐋᔅᓗ, ᐃᓚᐅᕗᒃ ᐊᖏᖃᑎᒌᖕᓂᐅᑉ ᐃᒃᓯᕐᕕᖓ ᑕᕝᕗᓐᖓᖅᑕᐅᑎᓪᓗᒍ.
5ᐊᑕᓂᐅᑉ ᐊᖏᖃᑎᒌᖕᓂᕐᖕᒧᑦ ᐃᒃᓯᕐᕕᖓ ᑎᑭᐅᑦᔭᐅᖕᒪᑦ ᑕᖕᒫᖅᓯᒪᕕᖓᓐᓄᑦ, ᐃᓴᕆᐊᓕᒥᐅᓕᒫᑦ ᖁᕕᐊᓱᖕᓂᕐᖕᒧᑦ ᕾᒐᓛᕐᖕᒪᑕ, ᓄᓇ ᓴᔪᒃᐳᖅ. 6ᐱᓕᔅᑍᓂᒥᐅᑦ ᑐᓴᕋᒥᒃ ᕾᒐᓛᖅᑐᓂᒃ ᐅᖃᖅᐳᑦ, “ᕾᒐᓛᖅᑐᓂᒃᑯᐊ ᐄᑉᕈᐃᑦ ᑕᖕᒫᖅᓯᒪᕕᖓᓐᓂᑦ! ᖃᓄᐃᓕᐅᓕᖅᑐᑦ?” ᑐᓴᕋᒥᒡᓗ ᐊᑕᓂᐅᑉ ᐊᖏᖃᑎᒌᖕᓂᕐᖕᒧᑦ ᐃᒃᓯᕐᕕᖓᑕ ᑎᑭᐅᑦᔭᐅᓂᖓᓂᒃ ᐄᑉᕈᐃᑦ ᑕᖕᒫᖅᓯᒪᕕᒋᔭᖓᓄᑦ, 7ᐱᓕᔅᑍᓂᒥᐅᑦ ᑲᑉᐱᐊᓱᓕᖅᐳᑦ; ᐅᖃᖅᓗᑎᒡᓗ, “ᒎᑎ ᑕᖕᒫᖅᓯᒪᕕᖓᓐᓄᐊᖅᑕᐅᕗᖅ! ᓵᓚᐅᓂᐊᓕᖅᐳᒍᑦ! ᑍᒫᒃ ᑕᒪᑐᒪ ᓯᕗᓂᖓᒍᑦ ᐱᓂᐊᕐᕕᐅᓚᐅᖅᓯᒪᓐᖏᓚᒍᑦ! 8ᓵᓚᐅᓂᐊᓕᖅᐳᒍᑦ! ᑭᓇᒨᓪᓕ ᐱᐅᓕᔭᐅᔪᓐᓇᖅᐱᑕ ᒎᑎᓂᑦ ᐱᔪᓐᓇᖅᑐᕐᔪᐊᓃᑦ? ᑍᒃᑯᐊᖑᖕᒪᑕ ᒎᑏᑦ ᐊᓯᕈᐃᓚᐅᖅᑐᑦ ᐄᑦᔨᑉᑎᒥᐅᓂᒃ ᖃᓄᐃᑦᑐᑐᐃᓐᓇᓄᑦ ᐃᓄᖃᖏᑦᑐᒥ! 9ᓯᕘᕋᑦᑍᓕᒋᑦᓯ ᐱᓕᔅᑍᓂᒥᐅᑦ! ᐅᓇᑕᕆᑦᓯ ᐊᖑᑎᑎᑐᑦ, ᑍᒤᓐᖏᑐᐊᕈᑦᑕ ᓯᐊᓛᖑᓕᕐᖕᓂᐊᖅᐳᒍᑦ ᐄᑉᕈᐃᓄᑦ, ᓲᕐᓗ ᑍᒫᒃ ᓯᐊᓛᕆᓚᐅᕋᑦᑎᒍᑦ; ᑍᒤᒻᒪᑦ ᐅᓇᑕᕆᑦᓯ ᐊᖑᑎᑎᑐᑦ!”
10ᑕᕝᕙ ᐱᓕᔅᑍᓂᒥᐅᑦ ᐅᓇᑕᓚᐅᖅᐳᑦ ᐊᒃᓱᕈᖅᓗᑎᒃ, ᐃᓴᕆᐊᓕᒥᐅᓪᓗ ᓵᓚᒋᓚᐅᖅᐰᑦ, ᑖᒃᑯᐊᓗ ᕿᒫᕗᑦ, ᐅᓪᓚᒡᓗᑎᒃ ᐊᖏᕐᕋᒥᖕᓄᑦ; ᑐᖁᕋᖅᑕᐅᓂᕐᔪᐊᖅᑕᖃᓚᐅᖅᐳᕐᓗ: ᐃᓴᕆᐊᓕᒥᐅᑦ 30,000 ᐅᓇᑕᖅᑏᑦ ᑕᕝᕙᓂ ᑐᖁᑕᐅᓚᐅᖅᐳᑦ. 11ᒎᑎᐅᓪᓗ ᐊᖏᖃᑎᒌᖕᓂᖓᑕ ᐃᒃᓯᕐᕕᖓ ᑎᒍᔭᐅᓚᐅᖅᐳᖅ; ᐃᓔᓪᓗ ᐃᕐᖕᓂᖏᒃ, ᕼᐅᐱᓂᓗ ᐱᓂᕼᐋᔅᓗ ᑕᕝᕙᓂ ᑐᖁᑕᐅᓚᐅᖅᐴᒃ.
ᐃᓔᑉ ᑐᖁᓂᖓ
12ᐊᖑᑦ ᐱᓐᔭᒥᓂᐅᑉ ᑭᖑᕚᖏᓐᓂᑦ ᐱᔪᖅ ᐅᓪᓔᓐᓇᖅᓗᓂᖅ ᐅᓇᑕᕐᕕᐅᔪᒥᑦ ᓮᓗᐊᒧᑦ ᑎᑭᑉᐳᖅ, ᐊᓐᓄᕌᖏᑦ ᐊᓕᒃᑐᖅᓯᒪᓪᓗᑎᒃ ᓂᐊᖁᖓᓗ ᐳᔪᕋᒥᑎᖅᓯᒪᓪᓗᓂ. 13ᑕᕝᕗᖓᓗ ᑎᑭᒻᒪᑦ, ᐃᓔ ᐃᒃᓯᕙᓚᐅᖅᐳᖅ ᐊᖅᑯᑎᐅᑉ ᓴᓂᐊᓂ ᖃᐅᔨᓴᖅᓗᓂ, ᐆᒻᒪᑎᒥᒍᑦ ᐃᓱᒪᔮᕈᑎᖃᖅᓗᓂ ᒎᑎᐅᑉ ᐊᖏᖃᑎᒌᖕᓂᖓᑕ ᐃᒃᓯᕐᕕᖓᓂᒃ. ᐊᖑᑦ ᑖᓐᓇ ᑕᕝᕗᖓ ᑎᑭᓐᓇᒥ ᑐᓴᖅᑎᑦᓯᓚᐅᖅᐳᖅ ᐃᒡᓗᒐᓴᖕᓃᑦᑐᓂᒃ, ᐃᒡᓗᒐᓴᖕᓃᑦᑐᓕᒫᓪᓗ ᕿᐊᓕᖅᐳᑦ. 14ᐃᓔᓕ ᑐᓴᕋᒥ ᓂᐱᓂᒃ ᕿᐊᕙᓗᖕᓂᒃ ᐊᐱᕆᕗᖅ, “ᓱᖕᒪᑦ ᓂᐹᔪᐊᓘᕕᓯ?” ᑍᓐᓇ ᐊᖑᑦ ᑐᐊᕕᖅᓗᓂ ᐃᓔᒧᐊᖅᐳᖅ ᐅᖃᐅᑎᓪᓗᒍᓗ ᐱᓂᐊᕐᖕᓂᐅᓯᒪᔪᓂᒃ. 15ᐃᓔᓕ ᐊᕐᕌᒍᖃᓕᓚᐅᖅᐳᖅ 98ᓂᒃ ᑕᐅᑐᒍᓐᓃᓕᖅᓗᓂᓗ. 16ᐊᖑᑎᐅᓪᓗ ᐃᓔ ᐅᖃᐅᑎᕚ, “ᕿᒪᒃᓯᓚᐅᖅᐳᖓ ᐅᓇᑕᕐᕕᐅᔪᒥᑦ; ᐅᓪᓔᓐᓇᖅᓗᖓᓗ ᑕᒪᐅᖓ.” ᐃᓔ ᐊᐱᕆᕗᖅ, “ᖃᓄᐃᑦᑐᖃᕐᖕᒪᑦ ᐃᕐᖕᓃᒃ?”
17ᐅᖃᕆᐊᖅᑐᖅᓯᒪᔪᖅ ᑭᐅᕗᖅ ᐅᖃᖅᓗᓂ, “ᐃᓴᕆᐊᓕᒥᐅᑦ ᕿᒫᓚᐅᖅᐳᑦ ᐱᓕᔅᑍᓂᒥᐅᓂᑦ; ᐅᓄᖅᑐᕐᔪᐊᓪᓗ ᑐᖁᑕᐅᓪᓗᑎᒃ; ᐃᕐᖕᓃᒃᑭᒡᓗ ᕼᐅᐱᓂᓗ ᐱᓂᕼᐋᔅᓗ ᑐᖁᑕᐅᕘᒃ, ᒎᑎᐅᓪᓗ ᐊᖏᕈᑎᖓᑕ ᐃᒃᓯᕐᕕᖓ ᑎᒍᔭᐅᓪᓗᓂ.”
18ᐊᖑᓪᓗ ᐅᖃᓚᐅᕐᖕᒪᑦ ᐊᖏᕈᑎᐅᑉ ᐃᒃᓯᕐᕕᖓᓂᑦ, ᐃᓔ ᓂᕕᖅᐳᖅ ᐃᒃᓯᕙᕕᖕᒥᓂᑦ ᐃᑎᖅᑕᕐᕕᐅᑉ ᓴᓂᐊᓂ; ᐅᕐᕈᒐᒥ ᖁᖓᓯᐊ ᓇᐱᕗᖅ ᑐᖁᓪᓗᓂᓗ, ᐃᓄᑐᖃᐅᓕᓚᐅᕐᖕᒪᑦ, ᐅᖁᒤᑦᑑᓪᓗᓂᓗ. ᐃᓴᕆᐊᓕᒥᐅᓄᑦ ᐃᖅᑲᖅᑐᐃᔨᐅᓚᐅᖅᐳᖅ ᐊᕐᕌᒍᓂᒃ 40ᓂᒃ.
ᕕᓂᕼᐊᔅ ᓄᓕᐊᕕᓂᖓᑕ ᐃᕐᖕᓂᖅᑖᕐᖕᓂᖓ
19ᐃᓔᓪᓕ ᐅᑯᐊᖓ, ᐱᓂᕼᐋᓯᐅᑉ ᓄᓕᐊᖓ, ᓯᖎᓚᐅᖅᐳᖅ ᐃᕐᖕᓂᕕᒃᓴᖓᓗ ᓇᓪᓕᐅᑎᓯᒪᓕᖅᓗᓂ. ᑐᓴᕋᒥᓗ ᒎᑎᐅᑉ ᐊᖏᕈᑎᖓᑕ ᐃᒃᓯᕐᕕᖓᑕ ᑎᒍᔭᐅᓂᖓᓂᒃ, ᓴᑭᖓᓗ ᐅᐃᖓᓗ ᑐᖁᓂᖏᓐᓂᒃ, ᐃᕐᖕᓂᓱᐊᓚᕿᓚᐅᖅᐳᖅ; ᐃᕐᖕᓂᒐᒥᓗ ᐋᓐᓂᐊᒻᒪᕆᓚᐅᖅᐳᖅ. 20ᑐᖁᓕᖅᑎᓪᓗᒍᓗ ᐊᕐᖕᓁᑦ ᐃᑲᔪᓚᐅᖅᑐᑦ ᐅᖃᖅᐳᑦ ᑖᑦᓱᒧᖓ, “ᓯᕘᕋᑦᑍᓕᒋᑦ, ᐃᕐᖕᓂᖅᑖᖅᐳᑎᑦ!” ᑭᓯᐊᓂᓕ ᑭᐅᓚᐅᓐᖏᓚᖅ ᐃᒃᐱᒍᓱᒐᓂᓘᓐᓃᑦ. 21ᑕᕝᕙ ᐃᕐᖕᓂᖅᑖᓂ ᐊᑦᓯᖅᐹ ᐃᑲᐸᑦᒥᒃ, ᐅᖃᖅᓗᓂᓗ, “ᐊᑕᓂᐅᑉ ᐱᓐᓇᕐᖕᓇᕐᖕᓂᖓᑕ ᐃᓴᕆᐊᓕᒥᐅᑦ ᕿᒪᖕᒪᒋᑦ!” ᐱᑦᔪᑎᖃᖅᓗᓂ ᐊᖏᕈᑎᐅᑉ ᐃᒃᓯᕐᕕᖓᑕ ᑎᒍᔭᐅᓂᖓᓂᒃ ᓴᑭᖓᑕᓗ ᐅᐃᖓᑕᓗ ᑐᖁᓂᖏᓐᓂᒃ. 22ᐅᖃᖅᐳᕐᓗ, “ᐊᑕᓂᐅᑉ ᐱᓐᓇᕐᖕᓇᕐᖕᓂᖓᑕ ᐃᓴᕆᐊᓕᒥᐅᑦ ᕿᒪᒃᐰᑦ, ᒎᑎᐅᑉ ᐊᖏᕈᑎᖓᑕ ᐃᒃᓯᕐᕕᖓ ᑎᒍᔭᐅᖕᒪᑦ.”
Currently Selected:
ᓴᒧᐃᓕ ᓯᕗᓪᓖᑦ 4: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
