ᑯᕆᓐᑎᐊᒥᐅᓄᑦ ᓯᕗᓪᓖᑦ 6
6
᙭ᔅᑑᓯᒥᐅᑕᐅᖃᑎᒥᓂᒃ ᐃᖅᑲᕐᑐᕐᑕᐅᑎᑦᓯᓂᖅ
1ᓇᓕᕐᓯ ᙭ᔅᑑᓯᒥᐅᑕᐅᖃᑎᒥᓄᑦ ᐊᑲᐅᒃᓴᕈᓐᓃᕋᖓᒥᒃ, ᓱᖕᒪᑦ ᐅᒃᐱᖏᑦᑐᓄᑦ ᐃᖅᑲᕐᑐᕐᑕᐅᑎᑦᓯᖔᖃᑦᑕᕐᐱᓰ, ᒎᑎᐅᑉ ᐃᓄᖁᑎᖏᓐᓄᑦ ᐋᖅᑭᒃᓱᕐᑕᐅᑎᖔᕐᓇᒍ? 2ᖃᐅᔨᒪᓐᖏᓚᓰ ᒎᑎᐅᑉ ᐃᓄᖁᑎᖏᑕ ᓯᓚᕐᔪᐊᕐᒥᐅᑦ ᐃᖅᑲᕐᑐᕈᒫᕐᒪᒋᑦ? ᓯᓚᕐᔪᐊᕐᒥᐅᓂᒡᓕ ᐃᖅᑲᕐᑐᐃᔪᒫᕈᑦᓯ, ᐱᔭᕆᐊᑭᓐᓂᕐᓴᓂᒃ ᐃᖅᑲᕐᑐᐃᔪᓐᓇᓐᖏᓚᓰ? 3ᖃᐅᔨᒪᕕᓰ ᐂᖏᓖᑦ ᐃᖅᑲᕐᑐᕈᒫᕋᑦᑎᒍ? ᑕᕝᕙᓕ ᓄᓇᒦᑦᑐᓂᒃ ᐃᖅᑲᕐᑐᐃᔭᕆᐊᖃᕐᓂᕐᓴᐅᓐᖏᓚᒍᑦ? 4ᐃᖅᑲᕐᑐᕐᑕᐅᔭᕆᐊᖃᕐᑐᒥᒃᓕ ᐱᑕᖃᓕᕐᐸᑦ, ᐅᒃᐱᕐᑐᓂ ᐃᓚᒋᔭᐅᖏᑦᑐᓄᑦ ᐋᖅᑭᒃᑕᐅᑎᓐᓇᓱᖃᑦᑕᕐᓂᐊᕐᐱᓯᐅᒃ? 5ᑍᒫᒃ ᐅᖃᕐᐳᖓ ᑲᓐᖑᓱᖁᓪᓗᓯ, ᓇᓗᓇᖏᒻᒪᑦ ᐃᓚᒋᔭᑦᓯᓐᓂᒃ ᓯᓚᑐᔪᕐᑕᖃᕐᒥᔪᖅ ᐃᖅᑲᕐᑐᐃᔪᓐᓇᕐᑐᒥᒃ ᐅᒃᐱᕐᑑᖃᑎᒌᑦ ᐊᑲᐅᓐᖏᓕᐅᕈᑎᖏᓐᓂᒃ ᐋᖅᑭᒃᓯᔪᓐᓇᕐᑐᒥᒃ. 6ᐅᒃᐱᕐᑑᖃᑎᒌᖑᔪᓯᓕ ᐅᒃᐱᖏᑦᑐᓄᑦ ᐃᖅᑲᕐᑐᐃᔨᓄᑦ ᐃᖅᑲᕐᑐᕐᑕᐅᑎᑦᓯᖔᖃᑦᑕᕐᐳᓯ ᐅᒃᐱᕐᑑᖃᑎᑦᓯᓐᓂᒃ?
7ᑍᒤᓕᐅᖃᑦᑕᕐᓂᑦᓯᓐᓄᑦ ᓇᓗᓁᕐᐳᖅ ᑕᒻᒪᕐᓯᒪᓂᑦᓯᓐᓂᒃ. ᓈᒻᒪᖏᑦᑐᓕᕕᐅᑐᐃᓐᓇᕈᑦᓯ ᐊᑲᐅᓂᕐᓴᐅᓐᖏᓛᖅ? ᑎᒡᓕᒡᒐᕐᕕᐅᑐᐃᓐᓇᕈᑦᓯᓘᓐᓃᑦ ᖃᓄᐃᖏᓐᓂᕐᓴᐅᕚ? 8ᐃᓕᑦᓯᖔᕐᓕ ᓈᒻᒪᖏᑦᑐᓕᐅᓕᕐᐳᓯ ᓴᒡᓗᕿᑦᓯᖃᑦᑕᕐᓗᓯᓗ, ᐅᒃᐱᕐᑑᖃᑎᑦᓯᓐᓄᑦ ᐊᒡᓛᑦ ᑍᒤᓕᐅᕐᕕᖃᕐᐳᓯ. 9ᖃᐅᔨᒪᓐᖏᓚᓰ ᐊᑲᐅᖏᑦᑐᓕᔪᑦ ᒎᑎᐅᑉ ᐊᑕᓂᐅᕕᖓᓂᒃ ᑭᖑᕐᖑᑦᔨᓂᐊᖏᒻᒪᑕ? ᓯᓔᕐᕆᔭᐅᑦᑍᓕᒋᑦᓯ; ᐊᖑᓐᓂᐊᕐᐸᒃᑐᑦ ᐊᕐᓇᕐᓂᐊᕐᐸᒃᑐᓪᓗ ᒎᑎᐅᖏᑦᑐᓂᒡᓗ ᒎᑎᖃᕐᑐᑦ, ᐂᑉᐸᓖᓪᓗ ᐊᓯᓐᓂᐊᕐᐸᒃᑐᑦ, ᐊᖑᑏᑦ ᐊᕐᓁᓪᓗ ᑍᒤᑦᑑᖃᑎᒥᖕᓅᕐᐸᒃᑐᑦ, 10ᑎᒡᓕᒃᐸᒃᑐᑦ, ᐱᔪᒪᕕᒡᔪᐊᕐᑏᑦ, ᐋᖓᔮᕐᑏᑦ, ᐊᓯᒥᖕᓂᒡᓗ ᐅᖃᕐᓂᕐᓗᑎᖃᕐᐸᒃᑐᑦ, ᑎᒡᓕᒐᕐᑏᑦ, ᑕᒪᒃᑯᐊᓕᒫᑦ ᒎᑎᐅᑉ ᐊᑕᓂᐅᕕᖓᓂᒃ ᑭᖑᕐᖑᑦᔨᓂᐊᖏᒻᒪᑕ. 11ᐃᓚᓯ ᐃᓚᖏᑦ ᑍᒤᑦᑑᓚᐅᕆᕗᑦ. ᐊᔪᕐᓂᕐᒥᓪᓕ ᓴᓗᒻᒪᕐᑕᐅᓯᒪᓕᕐᐳᓯ, ᐃᑦᔪᕐᓁᑎᑕᐅᓪᓗᓯ, ᐸᓯᔭᒃᓴᐅᔪᓐᓃᕐᑎᑕᐅᕗᓯ ᐊᑕᓂᑦᑎᓐᓄᑦ ᔩᓱᓯ ᙭ᔅᑑᓯᒧᑦ ᒎᑎᑦᑕᓗ ᐊᓂᕐᓂᖓᓄᑦ.
ᑎᒥᓯ ᐊᑐᕐᓯᒋᒃ ᒎᑎᐅᑉ ᓂᕐᑐᕐᑕᐅᓂᒃᓴᖓᓄᑦ
12 #
1 ᑯᕆᓐᑎ 10:23. “ᑕᒤᓐᓂᒃ ᐱᔪᓐᓇᕐᑎᑕᐅᕗᖓ,” ᑕᒪᕐᒥᒡᓕ ᐱᔪᓐᓇᕐᑕᑎᑦ ᐃᑲᔪᕐᑐᐃᓐᓇᐅᓐᖏᓚᑦ. ᑕᒤᓐᓂᒃ ᐱᔪᓐᓇᕐᑎᑕᐅᓂᕋᕐᓗᖓ ᐅᖃᕈᓐᓇᕆᕗᖓ, ᐅᕙᓐᓂᒃᓕ ᐊᐅᓚᑦᓯᓕᕐᓂᐊᕐᑐᒧᑦ ᕿᓚᒃᓱᕐᑕᐅᔪᒪᓐᖏᓚᖓ. 13ᓂᕿ ᐊᕿᐊᕈᕐᒧᑦ ᑐᕌᖓᖕᒪᑦ, ᐊᕿᐊᕈᕐᓗ ᓂᕿᒧᑦ ᑐᕌᖓᒋᓪᓗᓂ, ᒎᑎᐅᓪᓗ ᑕᒪᒃᑯᐊ ᑕᒪᕐᒥᒃ ᐊᑐᕈᓐᓃᕐᑎᑦᓱᒫᕐᐰᑦ. ᑎᒥ ᐊᕐᓇᕐᓂᐊᕐᓂᕐᒧᑦ ᐊᖑᓐᓂᐊᕐᓂᕐᒧᓪᓗ ᑐᕌᖓᖏᒻᒪᑦ, ᐊᑕᓂᕐᒧᓪᓕ ᐱᔨᑦᓯᕐᑐᒃᓴᓕᐊᕆᓯᒪᕗᖅ, ᐊᑕᓂᕐᓗ ᑎᒥᒧᑦ. 14ᒎᑎᐅᓪᓗ ᐊᑕᓂᖅ ᒪᑭᑎᓚᐅᕐᒪᒍ, ᑍᒫᒃᑕᐅᖅ ᒪᑭᑎᑦᓱᒫᕆᕚᑎᒍᑦ ᐱᔪᓐᓇᕐᓂᕐᒥᓄᑦ.
15ᖃᐅᔨᒪᓐᖏᓚᓰ ᑎᒥᓯ ᙭ᔅᑑᓯᐅᑉ ᑎᒥᖓᑕ ᐃᓚᒋᖕᒪᒋᑦ? ᑍᒤᒻᒪᑦ ᙭ᔅᑑᓯᐅᑉ ᑎᒥᖓᑕ ᐃᓚᖓ ᐊᖑᓐᓂᐊᕐᑎᒧᑦ ᐊᕐᓇᕐᓂᐊᕐᑎᒧᓪᓘᓐᓃᑦ ᐃᓚᓕᐅᑎᔪᓐᓇᕐᐸᕌ? ᑍᒤᑦᑐᓐᓇᓐᖏᓚᖅ! 16#ᒨᓯᓯ ᓯᕗᓪᓖᑦ 2:24.ᖃᐅᔨᒪᓐᖏᓚᓯ? ᐃᓄᒃ ᐊᖑᓐᓂᐊᕐᑎᒥᒃ ᐊᕐᓇᕐᓂᐊᕐᑎᒥᒡᓘᓐᓃᑦ ᐱᖃᑎᖃᕐᑐᖅ ᑎᒥᒥᒍᑦ ᐊᑕᐅᓯᐅᖃᑎᒋᓕᕐᒪᒍ, ᐊᒡᓚᖕᓂ ᑎᑎᕋᕐᓯᒪᖕᒪᑦ, “ᑖᒃᑯᐊᒃ ᒪᕐᕉᒃ ᑎᒥᒃᑯᑦ ᐊᑕᐅᓯᐅᓕᕐᓂᐊᕐᐳᒃ.” 17ᐊᑕᓂᕐᒥᒡᓕ ᐱᖃᑎᑖᕐᑑᑉ ᐊᓂᕐᓂᒃᑯᑦ ᐊᑕᐅᓯᐅᖃᑎᑖᕆᕚ.
18ᐊᖑᓐᓂᐊᕐᓂᖅ ᐊᕐᓇᕐᓂᐊᕐᓂᕐᓗ ᐅᓗᕆᐊᒋᓯᐅᒃ. ᐊᔪᕐᑐᓕᓃᑦ ᐊᓯᓕᒫᖏᑦ ᑎᒥᐅᑉ ᓯᓚᑖᓂᑦ ᐱᖕᒪᑕ; ᐊᖑᓐᓂᐊᕐᑐᕐᓕ ᐊᕐᓇᕐᓂᐊᕐᑐᕐᓗ ᓇᖕᒥᓂᖅ ᑎᒥᒥᓄᑦ ᐊᔪᕐᑐᓕᕗᑦ. 19#1 ᑯᕆᓐᑎ 3:16; 2 ᑯᕆᓐᑎ 6:16.ᖃᐅᔨᒪᓐᖏᓚᓰ? ᑎᒥᓯ ᐊᓂᕐᓂᐅᑉ ᐃᑦᔪᕐᓁᑦᑑᑉ ᑐᒃᓯᐊᕐᕕᒡᔪᐊᖁᑎᒋᖕᒪᒋᑦ, ᑖᓐᓇ ᐃᓗᑦᓯᓐᓃᑉᐳᖅ ᒎᑎᒥᑦ ᑐᓂᕐᕈᓯᐊᕆᔭᓯ, ᐃᓕᑦᓯᓐᓂᒡᓗ ᓇᖕᒥᓂᕆᓐᖏᓚᓯ; 20ᐊᑭᑐᔪᒥᒃ ᓂᐅᕕᐊᕆᔭᐅᓯᒪᒐᑦᓯ. ᑍᒤᒻᒪᑦ ᑎᒥᑦᓯᒍᑦ ᒎᑎ ᓂᕐᑐᕐᓇᕐᓯᑎᓯᐅᒃ.
Currently Selected:
ᑯᕆᓐᑎᐊᒥᐅᓄᑦ ᓯᕗᓪᓖᑦ 6: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
