ᑯᕆᓐᑎᐊᒥᐅᓄᑦ ᓯᕗᓪᓖᑦ 2
2
ᐊᔪᕆᕐᑐᐃᑦᔪᑕᐅᔪᖅ ᙭ᔅᑑᓯ ᑭᑭᐊᒃᑐᕐᑕᐅᓚᐅᕐᑐᖅ
1ᐃᓅᖃᑎᒃᑲ, ᐃᓕᑦᓯᓐᓄᑦ ᑎᑭᓐᓇᒪ, ᐊᔪᕆᕐᑐᐃᑎᓪᓗᖓ ᒎᑎᐅᑉ ᓱᓕᑦᓯᐊᕐᓂᖓᑕ ᓇᓗᓇᕐᓂᖓᓂᒃ; ᐅᖃᐅᓰᑦ ᐋᖅᑭᒃᓱᑦᓯᐊᕐᓯᒪᔪᑦ ᓯᓚᑐᔪᓪᓘᓐᓃᑦ ᐊᑐᕐᓗᒋᑦ ᐅᖃᓪᓚᓚᐅᓐᖏᓚᖓ. 2ᐃᓕᑦᓯᓐᓃᑎᓪᓗᖓ ᖃᐅᔨᒪᓇᓱᒋᓗᖓ ᐱᓚᐅᓐᖏᓚᖓ ᔩᓱᓯ ᙭ᔅᑑᓯᐅᑉ ᑭᑭᐊᒃᑐᕐᑕᐅᓯᒪᓂᖓ ᐅᖃᐅᓯᕆᔭᑐᐊᕆᓚᐅᕐᐸᕋ. 3#ᐋᐴᓯᑕᓖᑦ 18:9.ᐃᓕᑦᓯᓐᓄᓪᓗ ᑎᑭᓚᐅᕐᐳᖓ ᓴᓐᖐᑦᑑᓪᓗᖓ ᓯᕘᕋᓪᓗᖓᓗ ᓴᔪᒡᓗᖓᓗ. 4ᐅᖃᐅᓯᒃᑲ ᐊᔪᕆᕐᑐᐃᓂᒃᑲᓗ ᐃᓄᐃᑦ ᓯᓚᑐᓂᖏᑦ ᐊᑐᕐᓗᒋᑦ ᐅᖃᓪᓚᓚᐅᓐᖏᓚᖓ, ᓴᖅᑭᑎᑦᓯᓚᐅᕐᐳᖓᓕ ᒎᑎᐅᑉ ᐊᓂᕐᓂᖓᑕ ᐱᔪᓐᓇᕐᓂᖓᓂᒃ. 5ᐅᒃᐱᕐᓂᓯ ᐃᓅᑉ ᓯᓚᑐᓂᖓᓂᒃ ᑐᓐᖓᕕᖃᖁᓇᒍ ᒎᑎᐅᓪᓕ ᐱᔪᓐᓇᕐᓂᖓᓂᒃ ᑐᓐᖓᕕᖃᖔᖁᓪᓗᒍ.
ᒎᑎᐅᑉ ᓯᓚᑐᓂᖓ
6ᓯᓚᑐᔪᓂᒡᓕᑦᑕᐅᖅ ᐅᖃᐅᓯᖃᕋᓗᐊᕆᕗᖓ ᐅᒃᐱᕐᓂᕐᒥ ᐱᕈᕇᕐᓯᒪᔪᓄᑦ, ᓯᓚᑐᓂᖅ ᓯᓚᕐᔪᐊᕐᒥᑦ ᐱᔪᖅ ᐊᑐᕐᓇᒍ ᓯᓚᕐᔪᐊᕐᒥᐅᓪᓗ ᐊᐅᓚᑦᓯᔨᖏᓐᓂᑦ ᐱᔪᖅ ᐊᑐᕐᒥᓇᒍ, ᑕᒪᒃᑯᐊ ᓱᓇᐅᔪᓐᓃᕐᓂᐊᕐᒪᑕ. 7ᒎᑎᐅᓪᓕ ᓯᓚᑐᓂᖓ ᓇᓗᓇᕐᑐᖅ ᐃᔨᕐᓯᒪᔪᖅ ᐅᖃᐅᑎᒋᕙᕋ, ᒎᑎᐅᑉ ᐋᖅᑭᒃᓯᒪᓚᐅᕐᐹ ᓂᕐᑐᕐᓇᐅᑎᒃᓴᑦᑎᓐᓄᑦ ᐊᒡᓛᑦ ᓯᓚᕐᔪᐊᖅ ᓴᓇᔭᐅᓚᐅᖅᑳᕐᑎᓐᓇᒍ. 8ᓇᓪᓕᐊᓪᓘᓐᓃᑦ ᐊᐅᓚᑦᓯᔩᑦ ᓯᓚᕐᔪᐊᕐᒥ ᑕᒪᑐᒥᖓ ᑐᑭᓯᓯᒪᓐᖏᓚᑦ; ᑐᑭᓯᓚᐅᕈᓂᑦᔪᒃ, ᐊᑕᓂᖅ ᓂᕐᑐᕐᓇᕐᑐᕐᔪᐊᖅ ᑭᑭᐊᒃᑐᕋᔭᓚᐅᓐᖏᓛᑦ. 9#ᐂᓮᐊᓯ 64:4.ᐊᒡᓚᖕᓂ ᑎᑎᕋᕐᓯᒪᖕᒪᑦ:
“ᓇᓪᓕᐊᓐᓄᑦ ᑕᑯᔭᐅᓚᐅᖏᑦᑐᖅ ᑐᓴᕐᑕᐅᓚᐅᖏᑦᑐᕐᓘᓐᓃᑦ,
ᓇᓪᓕᐊᓐᓄᓪᓘᓐᓃᑦ ᐃᓱᒪᒋᔭᐅᓚᐅᖏᑦᑐᖅ ᐱᒐᔭᕐᒪᖔᑦ,
ᑕᒪᓐᓇ ᒎᑎᐅᑉ ᐅᐸᓗᖕᒊᕈᑎᒋᓯᒪᓚᐅᕐᐹ ᐱᓐᓇᕆᔨᒥᓄᑦ.”
10ᒎᑎᐅᓪᓕ ᓇᓗᓇᕐᑐᖅ ᑕᒪᓐᓇ ᓇᓗᓁᓚᐅᕐᐹ ᐅᕙᑦᑎᓐᓄᑦ ᐊᓂᕐᓂᕐᒥᒍᑦ. ᐊᓂᕐᓂᐅᑉ ᑐᑭᓯᓇᓱᐊᕐᒪᒋᑦ ᓱᓇᓕᒫᑦ, ᒎᑎᐅᑉ ᐃᑎᓂᕐᔪᐊᖓ ᐊᒡᓛᑦ. 11ᓇᓪᓕᐊᑦ ᐃᓅᑉ ᐃᓱᒪᖓᓂᒃ ᖃᐅᔨᒪᕚ? ᐃᓅᑉ ᐊᓂᕐᓂᖓ ᑭᓯᒥ ᓇᖕᒥᓂᕐᒥᓂᒃ ᖃᐅᔨᒪᕗᖅ; ᑍᒫᒃᑕᐅᖅ ᒎᑎᐅᑉ ᐃᓱᒪᖓᓂᒃ ᖃᐅᔨᒪᔪᖃᖏᓐᓂᕗᖅ ᒎᑎᐅᑉ ᐊᓂᕐᓂᖓ ᑭᓯᒥ ᖃᐅᔨᒪᕗᖅ. 12ᐊᓂᕐᓂᕐᒥᒃ ᓯᓚᕐᔪᐊᕐᒥᑦ ᐱᔪᒥᒃ ᑐᓂᓯᕕᐅᓯᒪᓐᖏᓚᒍᑦ, ᒎᑎᒥᓪᓕ ᐱᔪᒥᒃ ᐊᓂᕐᓂᕐᒥᒃ ᑐᓂᓯᕕᐅᕗᒍᑦ, ᖃᐅᔨᔪᓐᓇᖁᓪᓗᑕ ᒎᑎᒥᑦ ᑐᓂᕐᕈᓯᐊᑦᑎᓐᓂᒃ.
13ᐃᒫᒡᓕ ᐅᖃᐅᓯᖃᕐᐳᒍᑦ, ᐅᖃᐅᓰᑦ ᐃᓄᐃᑦ ᓯᓚᑐᓂᖏᑕ ᐃᓕᓴᐅᑎᖏᑦ ᐊᑐᕐᓇᒋᑦ ᒎᑎᐅᓪᓕ ᐊᓂᕐᓂᖓᑕ ᐃᓕᓐᓂᐊᕐᑎᑦᓯᔪᑎᒋᔭᖏᑦ ᐊᑐᕐᓗᒋᑦ, ᑐᑭᓯᓇᕐᓯᑎᑉᐸᕗᑦ ᐊᓂᕐᓂᐅᑉ ᓱᓕᓂᖏᑦ ᒎᑎᐅᑉ ᐊᓂᕐᓂᖓᓂᒃ ᐱᓯᒪᔪᓄᑦ. 14ᓇᓪᓕᐊᑦ ᒎᑎᐅᑉ ᐊᓂᕐᓂᖓᓂᒃ ᐱᖃᖏᑦᑐᖅ ᒎᑎᐅᑉ ᐊᓂᕐᓂᖓᑕ ᑐᓂᕐᕈᑎᖏᓐᓂᒃ ᐱᔪᓐᓇᓐᖏᓚᖅ, ᑍᒤᑦᑐᓄᑦ ᑕᒪᒃᑯᐊ ᑐᑭᖃᓐᖏᓚᑦ, ᑐᑭᓯᔪᓐᓇᕐᓇᒋᓪᓗ ᐊᓂᕐᓂᒃᑯᑦ ᑭᓯᐊᓂ ᑐᑭᓯᓇᕐᓯᑎᑕᐅᔪᓐᓇᕐᒪᑕ. 15ᒎᑎᐅᓪᓕ ᐊᓂᕐᓂᖓᓂᒃ ᐱᖃᕐᑑᑉ ᓱᓇᓕᒫᑦ ᖃᐅᔨᓇᓱᐊᕐᐰᑦ ᓇᖕᒥᓂᖅ, ᐊᓯᒥᓂᑦ ᖃᐅᔨᒪᔭᐅᓇᓱᐊᕋᓂ. 16#ᐂᓮᐊᓯ 40:13.ᐊᒡᓔᑦ ᐅᖃᕐᒪᑕ,
“ᑭᐊ ᐊᑕᓂᐅᑉ ᐃᓱᒪᖓ ᖃᐅᔨᒪᕙᐅᒃ? ᑭᐊᓗ ᐃᓱᒪᓕᐅᕈᓐᓇᕐᐸᐅᒃ?”
ᐅᕙᒍᓪᓕ ᙭ᔅᑑᓯᐅᑉ ᐃᓱᒪᖓᓂᒃ ᐃᓱᒪᖃᕐᐳᒍᑦ.
Currently Selected:
ᑯᕆᓐᑎᐊᒥᐅᓄᑦ ᓯᕗᓪᓖᑦ 2: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
