ULUKASI 8

Abafazi abakhamba noJesu

1Ngemva kwalokho uJesu wakhamba wadabula hlangana nedorobho nomuzi atjhumayela iindaba ezimnandi ngombuso kaZimu. Abalitjhumi nambili gade bakhamba naye, 2kanye nabafazi abathileko ebebapholisiwe emimoyeni emimbi nezifeni: uMariya Magdalina, okwakhutjhwa kuye amadimoni alikhomba; 3uJwana umkaKhuza, umphathi womkhaya kaHerode, uSusana kanye nabanye abanengi. Abafazaba ngibo ebegade basiza ngokusekela uJesu nabafundi bakhe ngeendleko zabo.

Umfanekiso ngomtjali

(Mt 13:1-9; Mk 4:1-9)

4Kwathi nakusabuthene isiqubuthu esikhulu nabantu basiza kuJesu bavela emizini ehlukeneko, wacoca naku umfanekiso: 5“Umlimi waphuma wayokutjala imbewakhe. Kwathi nasarhatjha imbewu esimini, enye yawela endleleni, yagadangwa ngeenyawo neenyoni zomkayi zayidobha zayidla. 6Enye yawela ekhetheni, kwathi nayimilako yabuna ngombana bekomile. 7Enye yawela hlangana nameva, akhula nayo ayiminyezela yafa. 8Enye yawela ehlabathini evundileko. Yamila beyathela isivuno, kwaba ngokubuyelelwe kalikhulu kunangaphezu kwalokho ebekutjaliwe.”

Wathi naqeda ukutjho lokho warhuwelela wathi: “Loyo oneendlebe akezwe!”

Isizathu semifanekiso

(Mt 13:10-17; Mk 4:10-12)

9Abafundi bakhe bambuza bona umfanekiso lo utjho ukuthini na. 10Wabaphendula wathi: “Nina niphiwe ilwazi lokulemuka ifihlo yombuso kaZimu, kodwana kabanengi ngikhuluma ngemifanekiso ukuze kuthi,

“ ‘nanyana babona, kodwana bangabonisisi,

nanyana basizwa kodwana bangalemuki.’ ”

UJesu uhlathulula umfanekiso ngomtjali

(Mt 13:18-23; Mk 4:13-20)

11“Nakhu okutjhiwo mfanekiso: Imbewu lilizwi lakaZimu. 12Abasendleleni ngilabo abezwako, bese uSathana uyeza afese ahlwithe ilizwi eenhliziyweni zabo ukuze bangakholwa bese basindiswe. 13Abasekhetheni ngilabo abathi nabezwa ilizwi balamukele ngethabo, kodwana banganayo imirabhu. Bayakholwa kwesikhatjhana, kodwana nakufika isikhathi sokulingwa bawe. 14Abasemeveni ngilabo abezwako kodwana nabalokhu bakhamba endleleni baminyaniswe matshwenyekwabo, umnotho kanye nobumnandi bepilo, bese bangatheli iinthelo ezivuthiweko. 15Yeke labo abasequlwanini evundileko ngilabo abathi nabezwa ilizwi balibulunge ngeenhliziyo ezithembekileko nezihle, bese bathela isithelo ngokubekezela.”

Isibani ngaphasi kwesitja

(Mk 4:21-25)

16“Akakho okhanyisa isibani asifihle ngesitjeni namkha asibeke ngaphasi kombhede. Esikhundleni salokho usibeka elithini laso ukuze labo abangenako bakwazi ukubona umkhanyo.

17“Ngambala akunanto efihliweko engeze yavezwa emtarini, godu akunanto esitheziweko engeze yaziwa namkha yembulwa.

18“Yeke yelelani bona nizwa njani ngombana loyo onelitho uzakungezelelelwa, kodwana loyo onganalitho uzakwemukwa ngitjho nokuncancani anakho.”

Unina nabafowabo kaJesu

(Mt 12:46-50; Mk 3:31-35)

19Unina nabafowabo kaJesu beza bazombona, kodwana babhalelwa kufika kuye ngebanga lesiqubuthu. 20Omunye wamtjela wathi: “Unyoko nabafowenu bajame ngaphandle bafuna ukukubona.”

21UJesu wabaphendula wathi: “Umma nabafowethu ngilabo abezwa ilizwi lakaZimu bebalenze.”

UJesu uthulisa isiwuruwuru

(Mt 8:23-27; Mk 4:35-41)

22Ngelinye ilanga uJesu wakhwela ngemkhunjini nabafundi bakhe, wathi kibo: “Nambani seyamele ngaphetjheya kwelwandle.” Yeke bakhamba-ke. 23Kuthe basathaya njalo, uJesu walala. Khonokho kwavuka isiwuruwuru esikhulu ngelwandle kangangobana umkhumbi wazala amanzi, boke baba sengozini ekulu. 24Abafundi baya kuye bamvusa bathi kuye: “Kosi, Kosi! Safa!”

UJesu wavuka, wakhalimela isiwuruwuru kanye namaza agubhuzelako, khonapho isiwuruwurweso sathula, kwathi du. 25Yeke wathi ebafundini bakhe: “Kuphi ukukholwa kwenu na?”

Besaba, barareka bebabuzana bodwa bathi: “Kanti ngubani umuntu lo okghona ukukhalimela imimoya namaza kumlalele na?”

UJesu upholisa indoda enemimoya emimbi

(Mt 8:28-34; Mk 5:1-20)

26Bayamela esifundeni samaGerasene esingaphetjheya kwelwandle ukusuka eGalile. 27Kuthe bona uJesu ehlele eligwini, wahlangatjezwa yindoda enamadimoni ivela ngedorobheni. Besele kusikhathi eside indoda le isoloko ikhamba bulanzi begodu ingahlali ekhaya, kodwana ihlala emathuneni. 28Kwathi nayibona uJesu yarhuwelela beyaziphosela eenyaweni zakhe, yamemeza yathi: “Utjhiswa yini ngami wena Jesu, Ndodana kaZimu ongoPhezulu na? Ngiyakurabhela ungangihlukumezi!” 29UJesu begade ayale ummoya omumbi kobana uphume endodeni leyo. Esikhathini esinengi idimoneli beliyibamba, kuthi nanyana ibotjhwe ngeenketani izandla neenyawo begodu iqaphelwe, iqhusule iinketanezo, idimoni liyithumele erhalawumbeni.

30UJesu wayibuza wathi: “Ungubani ibizo lakho na?” Yathi: “NginguLegiyoni.” Yatjho njalo ngombana bekungene amadimoni amanengi kiyo. 31Amadimoni arabhela uJesu kanenginengi bona angawayali kobana aye ngemgodini otjhingako.

32Bekukhona umhlambi omkhulu wezavukazana utlabe entatjaneni. Yeke imimoya emimbi yarabhela uJesu bona ayithumele ngezavukazaneni, wayinikela-ke imvumo. 33Amadimoni lawo aphuma endodeni, angena ngezavukazaneni, umhlambi wagijimela emthewukeleni weligu wadlhumukela ngelwandle, wacwila.

34Kwathi lokha abelusi bezavukazana nababona okwenzekileko, bagijimela ngedorobheni nemaphandleni bayokubika. 35Abantu baphuma bayokuqala bona kwenzekeni. Kwathi bona bafike kuJesu, bafumana indoda ekukhutjhwe kiyo amadimoni ihlezi eenyaweni zakaJesu, yembethe begodu ihlokwayo ithatha kuhle; boke bangenwa kukwesaba. 36Labo ababonako batjela abantu bona ipholiswe njani indoda ebeyinemimoya emimbi leyo. 37Yeke boke abantu besifunda samaGerasene bakhombela uJesu bona abagadunge ngombana bebangenwe kukwesaba. Yeke uJesu wangena ngemkhunjini wakhamba. 38Indoda ekwakhutjhwa kiyo amadimoni yarabhela yathi ifuna ukukhamba noJesu.

Kodwana uJesu wathi kiyo: 39“Buyela ekhaya uyobatjela bona kungangani uZimu akwenzele khona.” Yeke indoda leyo yakhamba-ke yangena loke idorobho ikhuluma bona kungangani ekwenzelwe nguJesu.

Indodakazi kaJayirosi nomfazi owakghwatha isambatho sakaJesu

(Mt 9:18-26; Mk 5:21-43)

40Kwathi bona uJesu abuye, isiqubuthu sabantu samhlangabeza ngombana besimlindele. 41Khonapho kwafika kuye indoda ebekuthiwa nguJayirosi, imphathi wesinagogi, yafese yazilahlela eenyaweni zakhe. Yamrabhela bona eze emzinayo 42ngombana indodakazayo ekukuphela kwayo, umntazanyana weminyaka elitjhumi nambili, beyigulela ukufa.

Kwathi asakhamba, isiqubuthu samuminyanisa. 43Hlangana nesiqubuthweso bekunomfazi ogade aphopha iingazi iminyaka elitjhumi nambili. Begade arhutjhulele koke anakho eenyangeni, kodwana ayikho neyodwa eyakghona ukumelapha. 44Weza ngemva kwakaJesu wafese wakghwatha umphetho wesambatho sakhe, ukuphopha kwakhe kwaphela khonokho. 45UJesu wabuza wathi: “Ngubani ongikghwathileko na?”

Boke balandula, uPitrosi wamphendula wathi: “Agu, Kosi! Qala bonyana abantu bakuminyezele kangangani.”

46Kodwana uJesu wathi: “Kukhona ongikghwathileko ngombana ngizwile lokha amandla naphumako kimi.”

47Kwathi lokha umfazi lo nabona bonyana angeze akwazi ukuzifihla, weza athuthumela wafese waguqa phambi kwakaJesu. Phambi kwabo boke abantu, wazihlambulula bonyana kubayini amkghwathile nokobana uphole njani khonokho. 48UJesu wathi kuye: “Ndodakazi, ukukholwa kwakho kukusindisile. Khamba ngokuthula.”

49Kwathi uJesu asakhuluma njalo, kwafika othileko avela emzini kaJayirosi, umphathi wesinagogi wathi: “Indodakazakho ihlongakele. Ungasatshwenya umfundisi.”

50Kodwana uJesu wakuzwa lokho wathi kuJayirosi: “Ungesabi, kholwa nje kwaphela, izakuphila.”

51Kwathi bona afike emzini kaJayirosi, akhange avumele namunye bona angene naye ngaphandle kwakaPitrosi, uJwanisi noJakopo kanye noyise lomntwana nonina. 52Ngesikhatheso boke ebebalapho begade barhahlawula bamlilela. UJesu wathi kibo: “Lisani ukurhahlawula! Akakahlongakali kodwana ulele.”

53Bamhleka ngombana gade basazi bona uhlongakele. 54Kodwana uJesu wambamba ngesandla wathi kuye: “Mntwanami, vuka!” 55Ummoyakhe wabuyela kuye, khonapho wasikima. Yeke uJesu wabatjela bona bamuphe okugonywako. 56Ababelethi bakhe barareka khulu, kodwana uJesu wabayala bona bangatjeli namunye ngokwenzekileko.

Currently Selected:

ULUKASI 8: SND12

Highlight

Copy