Makətūbə̄ yā Jakari 14
14
Rɔ̄ɔ̄ kə́ ta tɔ̄l̄ ta tə́ ō, reē Kɔ́ɔ̄ɓē ō
1Sḭḭ̄ de kə́ Jerusalem gə̄,
dɔ ndɔ̄ yā Kɔ́ɔ̄ɓē i ngɔr.
Gír de kə́ rang gə̄
a kə̄ngə̄n̄ naā yá̰a̰ kənge
yāsí gə̄ ta kumsí tə́.
2Kɔ́ɔ̄ɓē a ɔsə dɔ nápar de gə̄ malang kə̄ naā tə́,
yā kənīń ɓē yāsí rɔ̄ɔ̄.
Nin̄ a taān̄ ɓē kə́ Jerusalem ō,
a ɔyn̄ yá̰a̰ gə̄ kə́ kem kújə gə̄ tə́ ō,
a sāān̄ dəyá̰ gə̄ dɔ gúú tə́ ō.
A ɔyn̄ núsə de kə́ kem ɓēé gə̄
yā kaw̄ sedə́ dɔ ɓē
kə́ rang tə́ dɔ gúú tə́,
banī gotə de gə̄ a teēn̄
kɔ̄ɔ́ kem ɓēé alé.
3Loo ń noō tə́ Kɔ́ɔ̄ɓē
a rɔ̄ɔ̄ gír de kə́ rang gə̄.
Ni a rɔ̄ɔ̄ tītə̄ ń a rɔ̄ɔń
dan yā rɔ̄ɔ̄ gə̄ tə́ ngándáńg ní.
4Ndɔ̄ ngeé ń noō tə́ ní,
ni a ra dɔ ngōn̄ mbal̄ *kāgə̄ olibə gə̄ tə́,
kadə ɓē kə́ Jerusalem tə́ ngɔr,
dām̄ kə́ gír ɓē tə́.
Ngōn̄ mbal̄ kāgə̄ olibə gə̄ ní
a njar danaá bang ō,
wól loo kə́ bo a to ō,
a ḭḭ dām̄ kə́ gír ɓē tə́
bátə́ dām̄ kə́ no ɓē tə́.
Ngōn̄ mbal̄ ní núsən kógə̄ḿ a aw̄
kum kə̄ dām̄ mbɔ́r ɓē kə́ ko̰ó̰ tə́,
ba núsən kə́rēý a aw̄ kum kə̄
dām̄ mbɔ́r ɓē kə́ geleé tə́.
5Wól loo kə́ dan mbal̄ gə̄ tə́ ngeé ń toō,
ā ī-teēī i tū tə́ n ā ā̰yīnń naā ní.
Tɔdɔ̄ wól loo ní a to bátə́
ta kaw̄ kə̄ Asal.
Ā ā̰yī naā i tītə̄ ń kaasí gə̄ a̰ȳnəń naā
ɓāl̄ yā Ojias mban̄g kə́ *Juda tə́,
ndɔ̄ ń dɔ nang ndewń tə́ ní.
Loo ń noō tə́ Kɔ́ɔ̄ɓē Nə́ɓā yāḿ a reē, naā tə́
kə *de kə́ dɔ rā̰ tə́ gə̄ malang ń
a rāān̄ kəla yān ní.
6Ndɔ̄ ngeé ń noō tə́ ní,
deē a sāā nja loo kə́ unjə̄ kow to̰ alé.
Kūl̄ a o̰o̰ to̰ aĺ ō,
kūl̄ a rāā man̄ kadə̄ a tél kɔ̄sə̄ to̰ aĺ ō.
7Ngáńdáńg ní, loo a unjə̄ yáŕ yáŕ,
ba i kum mbang kógə̄ḿ kə́ i
Kɔ́ɔ̄ɓē ngóy n ger̄ tə́.
Loo kə́ kadaá a gətóo ō,
loo kə́ ndɔ̄ɔ́ a gətóo ō.
Loo tíbí gə̄gē ní, loo a unjə̄ i kow.
8Ndɔ̄ ngeé ń noō tə́ ní,
man̄ kógə̄ḿ a əɓa nang tə́
kem ɓē kə́ Jerusalem tə́.
Núsən kógə̄ḿ a nūgə́
kum kə̄ bā katə̄ tə́ ō,
núsən kə́rēý a aw̄ bā bo kə́ no ɓē tə́ ō.
Man̄ ní a nūgə́ kə́ njɔ́ḿ gə̄ tə́ ɓāl̄ kógə̄ḿ,
a nūgə́ ɓālāá ō, ɓaraá ō.
9Kɔ́ɔ̄ɓē a ndi mban̄g
dɔ dɔ nang malang tə́ kə taá.
Ndɔ̄ ń noō tə́ ní, i Kɔ́ɔ̄ɓē ngóy n
de gə̄ a rɔȳnən̄ tītə̄ Nə́ɓā beé ō,
de gə̄ a ndɔ̄ȳn̄ i kə rīn nií ngóy ō.
10Dɔ nang malang ń to kə gō gidə
ɓē kə́ Jerusalem ní, a rāān̄ kadə̄ a
téĺ ndágə mbō. A əlan̄ gír i Geba ń
deē ra kem ɓēé anī i kə̄ dām̄
mbɔ́r ɓē kə́ ko̰ó̰ tə́ ní,
bátə́ Rimon ń deē ra kem ɓēé anī
i kə̄ dām̄ mbɔ́r ɓē kə́ geleé tə́ ní.
Ɓē kə́ Jerusalem a ndi i
loo kə́ kḭḭ kə̄ dɔɔ́ tə́,
ba ɓē a ḭḭ i ta róbə yā Benjamḛ tə́,
bátə́ ta róbə́ ń rīn na i kíl loo ní tə́,
loo ń ta róbə́ kə́ jóo i tū tə́ ní tə́.
A ḭḭ kújə́ kə́ ngāl̄ ɓururu
kum kə̄ dɔɔ́ yā Hananel tə́,
bátə́ loo mbə́rē kan̄ *kāgə̄
nduú yā mban̄g tə́.
11De gə̄ a ndin̄ kem ɓēé ō,
deē a nujə ɓē to̰ aĺ ō,
de gə̄ a ndin̄ kemeé kanjə̄ sōl̄ yá̰á̰ kógə̄ḿ ō.
12Yá̰á̰ kə́ tōr̄ gə̄ ń
Kɔ́ɔ̄ɓē a reēń dɔ gír de gə̄ ń rɔ̄ɔ̄n̄
ɓē kə́ Jerusalem ní n toó:
Dā̰də́ a ndum dan ń
nin̄ a ndin̄ kə kumdə́ ɓáý ní ō,
kumdə́ a ndum kem kārə̄n tə́ ō,
ndo̰də́ a ndum kem tadə́ tə́ ō.
13Ndɔ̄ ngeé ń noō tə́ ní,
Kɔ́ɔ̄ɓē a rāā kadə̄
ɓōĺ kə́ to ɓōĺ ngá̰ý a rāādə́.
Nin̄ a rɔ̄ɔ̄n̄ naā ō, nin̄ kógə̄ḿ kógə̄ḿ ń
i madə̄ ɓē naā gə̄ ní, a ənīn̄ naā rɔ̄ɔ̄ ō.
14De kə́ dəngam gə̄ kə́ *Juda a rɔ̄ɔ̄n̄
kem ɓē kə́ Jerusalem tə́.
Nin̄ a ɔyn̄ yá̰a̰ kənge gə̄ kə́
kem ɓē gə̄ kə́ kadədə́ gə̄ tə́ malang.
Adə̄ i lɔ́r ō, i gində̄ arjā̰a̰ ō,
i kūbə̄ gə̄ kə́ ngá̰ý ō.
Nin̄ a kánə̄n̄ yá̰a̰ gə̄ ń noō
kə̄ dɔ naā tə́ gidə ɓēé.
15Dā̰ gə̄ malang kə́ kem gérger gə̄
yā madə̄ ba̰ā̰ gə̄ tə́, adə̄ i
sə́nda gə̄ ō, kərō rapáy gə̄ ō,
jámbal gə̄ ō, kərō gə̄ ō ní,
yá̰á̰ kə́ tōr̄ gə̄ ń
rāā deē ndul gə̄ ní,
a rāādə́ nin̄ ō.
16Əla gír ndɔ̄ ń noō tə́ ní,
Gír de gə̄ ń rɔ̄ɔ̄n̄ ɓē kə́ Jerusalem ní,
de kə́ dandə́ gə̄ tə́ ń a teēn̄ ta yo tə́ ní,
a aw̄n̄ kem ɓē ngeé ń toō tə́ kə dɔ ɓāl̄ gə̄.
Kɔ́ɔ̄ɓē kə́ bo kə́ tɔ́gən i ngá̰ý ní,
nin̄ a rɔȳnən̄ loo ń noō tə́ ō,
nin̄ a rāān̄ nāā kújə́ kámbə gə̄ ō.
17Gír kojə gə̄ kə́ dɔ nang tə́ ní,
ré gír de gə̄ kógə̄ḿ kə́ dandə́ tə́
aw̄ Jerusalem rɔȳ mban̄g ń
i Kɔ́ɔ̄ɓē kə́ bo kə́ tɔ́gən i ngá̰ý ní tə́ aĺ anī,
man̄ a edə dɔ nang yān tə́ alé.
18Ré gír kojə gə̄ kə́ Ejiptə gə̄ aw̄n̄ Jerusalem
rāā nāā kújə́ kámbə gə̄ tə́ aĺ anī,
yá̰á̰ kə́ tōr̄ kógə̄ḿ
a əsō dɔdə́ tə́, tītə̄ ń əsōń dɔ
nápar de gə̄ ń a aw̄n̄ rāā
nāā ngeé ń noō tə́ aĺ ní.
19Nge ń noō i ndéý kə́ a əndān̄ ɓē kə́ Ejiptə
tām̄ yá̰a̰ rāān kə́ gōtə́ aĺ tə́ ō,
a əndan̄ nápar de gə̄ malang ń
a aw̄n̄ rāā nāā ngeé ń noō tə́ aĺ ní ō.
20Ndɔ̄ ngeé ń noō tə́ ní,
ɓɔ kə́ dūú gə̄ yā sə́nda gə̄ gə̄gē,
a ndangən̄ tū tə́ na:
I kə́ kɔr̄ kam̄ tām̄ yā Kɔ́ɔ̄ɓē tə́.
Jóo ndīr̄ yá̰a̰ gə̄ kə́ kem
*kújə yā Kɔ́ɔ̄ɓē tə́ ní,
a ɓōlə́n̄ gidədə́ tītə̄ ń a ɓōlə́n̄nəń
gidə kópə gə̄ ń mósə dā̰ gə̄
i kemeé ta *loo tun̄ yá̰á̰ tə́ ní ō.
21Jóo ndīr̄ yá̰a̰ gə̄ malang
kə́ kem ɓē kə́ Jerusalem tə́ ō,
dɔ nang kə́ *Juda tə́ ō ní,
a ɔrə̄n̄ kam̄də́ tām̄ yā Kɔ́ɔ̄ɓē kə́ bo kə́ tɔ́gən i ngá̰ý tə́.
De gə̄ ń a reēn̄ ndējə̄ yá̰á̰ kə́ tun̄ gə̄ tə́ ní,
a ɔyn̄ jóo gə̄ ní yā ndīrəń dā̰.
Loo ń ré ndɔ̄ ní a ugə̄ anī,
ngé kigə yá̰a̰ gə̄ a gətóon̄
kem *kújə yā Kɔ́ɔ̄ɓē kə́ bo kə́ tɔ́gən i ngá̰ý tə́.
Currently Selected:
Makətūbə̄ yā Jakari 14: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad