Makətūbə̄ yā Jakari 13
13
1Kum mbang ngeé ń noō tə́ ní, man̄ kógə̄ḿ kə́ əɓa nang tə́, a nūgə́ yā tə́goń yá̰a̰ rāā kə́ gōtə́ aĺ gə̄ ō, yá̰á̰ kə́ yḛr gə̄ ō, yā de gə̄ kə́ kem kojə yā Dabid tə́ ō, yā de kə́ Jerusalem gə̄ ō.
Nə́ɓā a rāā kadə̄ ɓesə̄ gə̄ ō, ngé koō ta kə́ rɔ̄kum aĺ gə̄ ō, gətóon̄ kɔ̄ɔ́
2Kɔ́ɔ̄ɓē kə́ bo kə́ tɔ́gən i ngá̰ý, əda wáńg na: Kum mbang ngeé ń noō tə́ ní, ɓesə̄ gə̄ kə́ kem ɓēé ní, m-ā m̄-ró̰ȳdə́ kɔ̄ɔ́ ō, deē a əda rīdə́ to̰ aĺ ō. M-ā m̄-tə̄ɓā *ngé koō ta kə́ rɔ̄kum aĺ gə̄ kɔ̄ɔ́ kem ɓēé ō, m-ā m-ɔ̄r̄ ngur rɔȳ nə́ɓā kə́ rɔ̄kum aĺ gə̄ kɔ̄ɔ́ kemsí tə́ ō. 3Ré deē kógə̄ḿ na̰y kə̄ loo kɔr̄ najə̄ tə́, kə́ loo *nge koō ta tə́ ɓáý anī, bɔbə̄n ō kó̰o̰n ō, nin̄ kɔ́ gə̄ a ədanən̄ na: I gáŕ kadə̄ óy, tām̄ ḭ̄ ún rī Kɔ́ɔ̄ɓē ə́dań najə̄ kə́ sor̄ gə̄. Ba dan ń ni a na̰y kə̄ loo kɔr̄ najə̄ tə́, kə́ loo *nge koō ta tə́ anī, bɔbə̄n ō kó̰o̰n ō a rāānən̄ kadə̄ oy. 4Kum mbang ngeé ń noō tə́ ní, *ngé koō ta gə̄ a o̰o̰n̄ kūbə̄ kə́ rāā kə ngə̄rā dā̰á̰ yā kɔr̄ń najə̄ kə́ loo *ngé koō ta gə̄ tə́ aĺ ō, yā kənīń gotə yá̰a̰ gə̄ ń nin̄ a̰a̰n̄ ní yā ngóləń de gə̄ aĺ ō, tɔdɔ̄ rɔ̄də́ a sɔl̄də́. 5Banī nin̄ kógə̄ḿ kógə̄ḿ a ədan̄ na: Mā i *nge koō ta alé, ba i nge ndɔr̄. I dan ń mā i balsáá ɓáý ní n ndɔr̄ yāḿ gə̄ i nuú ní. 6Ba ré deē kógə̄ḿ dəjen najə̄ əda na: Do kə́ kadií tə́ gə̄ ń nuū i do rí gə̄? Anī ni a tél yā kəda na: M-ə́nge do i kem kújə yā madə̄ taḿ gə̄ tə́.
De gə̄ a gerə̄n̄ kadə̄ Kɔ́ɔ̄ɓē i Nə́ɓā
7Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda wáńg ní n toó:
Kaskar, ī-ndól̄ dɔ ɓīī tə́, ba ī-rɔ̄ɔ̄ nge kul̄ yá̰a̰ yāḿ,
ī-rɔ̄ɔ̄ madə̄ taḿ ń əhɔ rɔ̄n tɔgə ngá̰ý ní.
Ī-tɔ̄l̄ nge kul̄ yá̰a̰,
loo ń noō tə́ batə̄ gə̄ a aw̄n̄ kə̄ loo gə̄ tə́ ō,
yá̰a̰ kul̄ kə́ dūú gə̄ kə́ dan ɓūtə̄ yá̰a̰ kul̄ tə́ ní,
m-ā m-ə̄nīdə́ rɔ̄ɔ̄ ō.
8Kɔ́ɔ̄ɓē əda najə̄ kə́ rang dɔ tə́ ɓáý to̰ na: Ré de kə́ kem ɓēé gə̄ i mətá anī, kə́ jōó gə̄ a oyn̄ ō, kə́ kógə̄ḿ a teē ta yo tə́ ō. 9Ngé gə̄ ń a ndin̄ kə kumdə́ ɓáý ní, m-ā m̄-rāādə́ kadə̄ nin̄ a unjə̄n̄ njáý njáý, tītə̄ lɔ́r ō gində̄ arjā̰a̰ ń deē nōō kum hor tə́ adə̄ *unjə̄ njáý njáý noó beē. Loo ń noō tə́ nin̄ a ɓārə́mə̄n̄ ō, m-ā m̄-ndigədə́ ō. M-ā m-ə́da na: Sḭḭ̄ i gír deē yāḿ gə̄ ō, nin̄ a ədan̄ na: Kɔ́ɔ̄ɓē, ḭ̄ i Nə́ɓā yājí ō.
Currently Selected:
Makətūbə̄ yā Jakari 13: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
