Makətūbə̄ yā Jakari 11
11
Ɓē gə̄ ń tɔ́gə́də́ i ngá̰ý ní, nujən̄ sedə́ sák sák kɔ̄ɔ́
1Sḭḭ̄ mbal̄ bo gə̄ kə́ Liban,
ī-teēī ta róbə yāsí gə̄ ō,
ādə̄ hor o̰o̰ kāgə̄ sedər yāsí gə̄ ō!
2Sḭḭ̄ kāgə̄ sipəres gə̄, ī-nōōī ādə̄ oōn̄ ndūsí,
tɔdɔ̄ kāgə̄ sedər gə̄ tə́sōn̄ kɔ̄ɔ́.
Nujən̄ kāgə̄ kə́ majə ngá̰ý gə̄ ń noō kɔ̄ɔ́.
Sḭḭ̄ kāgə̄ sén gə̄ kə́ Basan, ī-nōōī ādə̄ oōn̄ ndūsí,
tɔdɔ̄ nujən̄ ku kāgə̄ yāsí kə́ nder̄ nginding kɔ̄ɔ́.
3Ōōī ndū ngé kul̄
gír de gə̄ loo nōō tə́,
tɔdɔ̄ tɔ́gə́də́ gətóo kɔ̄ɔ́.
Ōōī ndū balsáa
ɓɔl gə̄ loo nōō tə́,
tɔdɔ̄ túpə́ kámbə yādə́
kə́ majə ngá̰ý gə̄ ń
ran̄ kə gō kadə ba Jurdḛ ní,
nujənə̄ń kɔ̄ɔ́.
Ngé kul̄ yá̰a̰ gə̄ kə́ nin̄ i deē jōó
4Kɔ́ɔ̄ɓē Nə́ɓā yāḿ ədam̄ na batə̄ gə̄ ń i gáŕ kadə̄ a tɔ̄lə̄n̄də́ ní, kə m̄-tél nge kul̄də́. 5Ngé mangdə́ gə̄ tɔ̄lə̄n̄də́, ba ɔjənə̄ń na n rāān̄ yá̰á̰ kógə̄ḿ kə́ majaĺ aĺ ō, ngé gātə̄ sedə́ gə̄ ədan̄ na ādə̄ jə-rāāī Nə́ɓā kə́ra, tām̄ jə-téliī ngé kənge yá̰a̰ gə̄ kɔ̄ɔ́ ō! Ngé kul̄də́ gə̄gē a kumdə́ o̰o̰də́ tām̄ yādə́ tə́ aĺ ō. 6Mā Kɔ́ɔ̄ɓē m-ə́dá wáńg na: Kumḿ a o̰o̰m̄ kə de kə́ dɔ nang tə́ gēé to̰ alé. M-ā m-ə́la deē ndul gə̄ kógə̄ḿ kógə̄ḿ kem jī madə̄ ɓēdə́ gə̄ tə́ ō, kem jī mban̄g yādə́ tə́ ō. Mban̄g gə̄ a nujən̄ dɔ nang kɔ̄ɔ́ malang ō, m-ā m̄-taā deē kógə̄ḿ jīdə́ tə́ yā kəya̰n dɔɔ́ aĺ ō.
7Adə̄ m̄-tél nge kul̄ batə̄ gə̄ kə́ ngé kigə yá̰a̰ gə̄ kə́ nin̄ i de kə́ rɔ̄kum aĺ gə̄ gírə̄n̄ tɔ̄l̄. M-ɔ́y kāgə̄ yā nge kul̄ yá̰a̰ jōó. m̄-ɓāŕ nge kə́ ta kəga dɔ na i madə̄ naā ō, kə́ nge ko̰ jōó na i ɓoo naā ō, ba m-á̰a̰ gō batə̄ gə̄. 8Kem nāā kógə̄ḿ ní, m-ɔ̄r̄ ngé kul̄də́ gə̄ mətá kem kəlaá kɔ̄ɔ́. Gō tə́ anī, m̄-tə́gā taḿ sétə́ dɔ batə̄ gə̄ tə́ ō, nin̄ batə̄ gə̄ asən̄ tə́gā tadə́ dɔḿ mā tə́ to̰ aĺ ō. 9Tā anī, m-ə́dádə́ na: M-ā m-á̰a̰ gōsí to̰ alé. Ngé gə̄ ń kadə̄ oyn̄ ní, ādə̄ oyn̄! Ngé gə̄ ń kadə̄ gətóon̄ ní, ādə̄ gətóon̄! Ba ngé gə̄ ń gō tə́ anī nin̄ a ndin̄ kə kumdə́ ɓáý ní, ādə̄ əsan̄ naā!
10Gō tə́ anī, m-ún kāgə̄ yāḿ ń rīn na i madə̄ naā ní m̄-tētə̄. Adə̄ m̄-gān̄g madə̄ naā ń Kɔ́ɔ̄ɓē əhɔ kə gír de gēé malang ní i tītə̄ ń noō. 11Adə̄ kum mbang ngeé ń noō tə́ ní, madə̄ naā i kə́ ngān̄g kɔ̄ɔ́. Ngé kigə yá̰a̰ gə̄ ń nin̄ i de kə́ rɔ̄kum aĺ gə̄ á ra a̰a̰mə̄n̄ ní, gerə̄n̄ kadə̄ i Kɔ́ɔ̄ɓē n ɔr̄ najə̄ kə ta kūl̄ yá̰á̰ gə̄ ń m̄-rāā ní. 12Loo ń noō tə́ m-ə́dádə́ na: Ré á̰a̰ī kadə̄ i yá̰á̰ kə́ majanī, ādə̄mī nar kəla yāḿ. Ré ādə̄mī aĺ gə̄gē anī, nge ń noō i yá̰á̰ kə́ karī! Anī nin̄ tə́dan̄ nar kəla yāḿ ní, i sə́lē gində̄ arjā̰a̰ kutə mətá. 13Kɔ́ɔ̄ɓē ədam̄ na:
Gātə̄mə́ń nin̄ gāngə̄n̄ ní n noó! Āw̄ kə nar kə́ majə ngá̰ý ń noō ɓē kɔdə̄ kə́ nge nō̰ō̰ yá̰á̰! Adə̄ m-ɔ́ý sə́lē gində̄ arjā̰a̰ kə́ kutə mətá ní, m-āwń ɓē kɔdə́ nge nō̰ō̰ yá̰á̰, kem kújə́ kə́ bo yā Kɔ́ɔ̄ɓē tə́. 14Gō tə́ anī, m̄-tétə̄ kāgə̄ yāḿ kə́ nge ko̰ jōó ń rīn na i ɓoo naā ní kɔ̄ɔ́. Yá̰á̰ ń ɓoo *Juda naā tə́ kə *Israel adə̄ to tītə̄ kə́ nin̄ i ngákó̰o̰ naā gə̄ beé ní, m̄-tētə̄ yá̰á̰ ní kɔ̄ɔ́ i tītə̄ ń noō.
15Kɔ́ɔ̄ɓē ədam̄ na kə m̄-rāā yá̰á̰ ń toō ɓáý to̰: Ń toō ɓáa ī-rāā tītə̄ kə́ ḭ̄ i nge kul̄ yá̰á̰ kə́ ī-ger̄ yá̰a̰ aĺ ngá̰ý beē. 16Tɔdɔ̄ m-ā m-ə́la kə nge kul̄ yá̰á̰ kə́ kijə kadə̄ reē kem ɓēé: Batə̄ gə̄ ń gətóon̄ kɔ̄ɔ́ ní, ni a əndā kumən gōdə́ tə́ aĺ ō, ngé gə̄ ń tadə́ tḭ̄ḭ̄ kɔ̄ɔ́ ní, ni a aw̄ ndəledə́ tə́ aĺ ō, ngé gə̄ ń əngen̄ do ní, ni a ndem̄ ta dodə́ aĺ ō, ngé gə̄ ń rɔ̄də́ ngan̄g ní, ni a adə̄də́ yá̰a̰ kəsa aĺ ō. Banī ni a əsa dā̰ ngé kə́ bo gə̄ ō, a ró̰ȳ hēl̄ njadə́ kɔ̄ɔ́ ō.
17I yá̰á̰ kə́ to kum kaȳ aĺ kə́ ba̰ý beē
tām̄ yā nge kul̄ yá̰á̰ kə́
ger̄ yá̰a̰ aĺ ngá̰ý, kə́
əya̰ yá̰a̰ kul̄ gə̄ kɔ̄ɔ́ tə́!
Ādə̄ ta rɔ̄ɔ̄ tə́ ɓáa
jīn kə́ ko̰ó̰ gān̄g kɔ̄ɔ́ ō,
kumən kə́ dām̄ kə́ ko̰ó̰ tə́ ɔr̄ kɔ̄ɔ́ ō!
Ādə̄ jīn i kə́ tutə njururu malang ō,
ādə̄ kumən kə́ dām̄
kə́ ko̰ó̰ tə́ a̰a̰ loo to̰ aĺ ō!
Currently Selected:
Makətūbə̄ yā Jakari 11: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad