Makətūbə̄ yā Jakari 10
10
I Kɔ́ɔ̄ɓē tá deē dəjen yá̰a̰, ba i ɓesə̄ gə̄ alé
1Ī-dəjeī Kɔ́ɔ̄ɓē man̄,
dan ń ndɔr̄ gə̄ a gḛyn̄ man̄ ní.
I ni n i nge rāā kadə̄ man̄ edə
kə néĺ kə́ əla kə ngangá ngá̰ý ní.
Ni a rāā kadə̄ man̄ edə ngá̰ý ō,
ni a adə̄ de gə̄ kógə̄ḿ
kógə̄ḿ mu kə́ ndɔrɔ́ ō.
2Nə́ɓā kə́ rɔ̄kum aĺ gə̄,
a ədan̄ i najə̄ kə́ rɔ̄kum aĺ gə̄ ō,
kɔdə̄ sāā gə̄, a a̰a̰n̄ i
yá̰á̰ kə́ rɔ̄kum aĺ gə̄ ō.
Nī gə̄ ń nin̄ a ənīn̄ gotə ní,
i nī kə́ kanjə̄ kumən gə̄ ō,
nin̄ a sɔlə̄n̄ kem deē i kə nélé ō.
I tām̄ najə̄ ń noō tə́ n
ngán *Israel gə̄ aw̄n̄ tītə̄
ɓūtə̄ yá̰a̰ kul̄ gə̄ kə́
kumdə́ tō ndoō beé ní,
tɔdɔ̄ nge kul̄də́ gətóo.
Kɔ́ɔ̄ɓē ənī míndən yā gān̄g dɔ ngán Israel gə̄
3Wōn̄g rāām̄ kə ngé kul̄ kə́ majaĺ gēé ō,
m-ā m̄-rāā yá̰á̰ kógə̄ḿ kə bal bə̄yā̰ gēé ō.
A̰á̰ā̰, mā Kɔ́ɔ̄ɓē kə́ bo kə́ tɔ́gən i ngá̰ý,
ɓūtə̄ yá̰a̰ kul̄ yāḿ ń i de gə̄ kə́ *Juda ní,
m-ā m̄-rāā yá̰á̰ kə́ tōr̄ sedə́.
M-ā m̄-rāādə́ sə́nda rɔ̄ɔ̄
yāḿ kə́ majə tə́.
4Ngār kə́ tayā tayā gə̄
a ḭḭn̄ *Juda yā reē.
Nin̄ ngangə̄n̄ tītə̄ mbal̄ kə́
majə tām̄ yā kújə́ tə́ beē,
tītə̄ bēl̄ gə̄ kə́ yā kənda nang tə́
do̰ō̰ń kújə tandā beé,
tītə̄ ga̰ gərā kə́ yā rɔ̄ɔń beē.
5Nin̄ a ton̄ tītə̄ go̰ rɔ̄ɔ̄ gə̄ beé.
Nin̄ a rējə̄n̄ ngé rɔ̄ɔ̄də́ gə̄,
tītə̄ bɔr kə́ kum róbə kɔsɔɔ́ beē.
Nin̄ a rɔ̄ɔ̄n̄ tītə̄ ń noō i
tɔdɔ̄ mā ń i Kɔ́ɔ̄ɓē ní,
mā i sedə́ naā tə́.
Rɔ̄ ngé kal̄ sə́nda
yā madə̄ ba̰ā̰ gə̄ a sɔl̄də́.
6M-ā m-ə́la go̰
kem de gə̄ kə́ Juda tə́.
M-ā m-ájə́ ngán Israel gə̄.
M-ā m̄-tél sedə́ yā reē
sedə́ gogə́ ɓēé,
tām̄ kumḿ o̰o̰m̄ sedə́.
Nin̄ a ton̄ tītə̄ kə́ m̄-mbātə́də́
kété aĺ beē.
A̰á̰ā̰, mā i Kɔ́ɔ̄ɓē, Nə́ɓā yādə́ ō,
m-ā m̄-dal ndɔ̄ȳ yādə́ gə̄ ō.
7De kə́ dəngam gə̄ kə́ *Epəraim
a əhɔn̄ rɔ̄də́ tɔgə, tītə̄ go̰ rɔ̄ɔ̄ gə̄ beé.
Rɔ̄də́ a nel̄də́, tītə̄ kə́
a̰ȳn̄ i kasə *nduú beé.
Dan ń ngáńdə́ gə̄ a̰a̰n̄də́ anī,
a rāān̄ rɔ̄nel̄ ō,
a ndāmə̄n̄ ndām̄ rɔ̄nel̄
najə̄ yā Kɔ́ɔ̄ɓē tə́ ō.
8M-ā m̄-ɓāŕ de gə̄ kə́ dan gír
deē yāḿ gə̄ tə́, yā kɔsə dɔdə́ naā tə́.
A̰á̰ā̰, m-ā m-ɔ̄r̄də́ ɓəloó ō,
kutədə́ a reē ngá̰ý tītə̄ kə́ kété ō.
9Kété ní, m̄-tə̄ndā m̄-tḭ̄ḭ̄də́
kə̄ loo gə̄ tə́ dan nápar de gə̄ tə́,
tītə̄ loo dubə̄ kum yá̰a̰ beé.
Ba loo ń nin̄ i kem ɓē
kə́ sa̰y gə̄ tə́ anī,
a əga kemdə́ dɔḿ tə́.
Nin̄ a ndin̄ nú kə ngáńdə́ gēé,
ba gō tə́ anī, a télən̄ yā reē.
10M-ā m-ɔ́ýdə́ dɔ nang kə́ Ejiptə tə́
yā reē sedə́ gogə́ ō,
m-ā m-ɔ́ýdə́ dɔ nang kə́ Asiri tə́
yā kɔsə dɔdə́ naā tə́ ō.
M-ā m-ɔ́r nodə́ gō nang
kə́ Galaad tə́ ō,
dan mbal̄ bo gə̄ kə́ Liban tə́ ō.
Nge ń noō gə̄gē loo a asədə́ alé.
11Nin̄ a teēn̄ bā yá̰á̰ kə́
to kum kaȳ aĺ kə̄ gidə kə́rēý tə́.
Mā Kɔ́ɔ̄ɓē, m-ā m-ə́nda
bəngál man̄ gə̄ kə́ dɔ bā bo tə́.
Man̄ bā Nil gə̄gē
a iī kɔ̄ɔ́ kem kārə̄n tə́.
Ɓē kə́ Asiri ń ɔjə rɔ̄n ngá̰ý ní,
a mbərenən̄ yā kənīn ō,
ɓē kə́ Ejiptə a o̰o̰ ɓē to̰ aĺ ō.
12M-ā m-ādə̄ gír deē
yāḿ gə̄ tɔ́gə ō,
nin̄ a rāān̄ yá̰á̰ kə́ nelə̄m̄ ō.
I mā Kɔ́ɔ̄ɓē n
m-ə́da najə̄ ń noō ní.
Currently Selected:
Makətūbə̄ yā Jakari 10: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
