Makətūbə̄ yā Mise 6
6
Kɔ́ɔ̄ɓē əndā najə̄ dɔ gír deē yān gə̄ tə́
1Ōōī najə̄ ń Kɔ́ɔ̄ɓē ədam̄ ní,
ni ədam̄ na kə m-āw̄ kə
m̄-rɔ̄ɔ̄ dɔn tə́ loo sarya tə́!
Na kə m-ɔ́jə́ gīr̄ yān
kə̄ no mbal̄ bo gə̄ tə́ ō,
kə̄ no ngán mbal̄ gə̄ tə́ ō.
2Mbal̄ gə̄ ō, sḭḭ̄ gír gisə dɔ nang
kə́ ra ngan̄g gə̄ ō,
ōōī najə̄ ń Kɔ́ɔ̄ɓē
a rāań sarya kə gír deē yān gēé ní.
A̰á̰ā̰, Kɔ́ɔ̄ɓē a rāā i sarya
kə gír deē yān gēé,
ni-dəje *Israel gíŕ yá̰a̰ rāān gə̄.
3Ni ədan na: Sḭḭ̄ gír deē yāḿ gə̄,
m̄-rāā i rí sesí?
Yá̰á̰ ń m̄-rāā sesí á kɔr rāańsí ní i rí?
Ī-tūr̄mī najə̄ tə́!
4m̄-rāā adə̄ ī-teēī kɔ̄ɔ́
kem ɓē kə́ Ejiptə tə́.
M-ɔ̄r̄sí ɓəloó kɔ̄ɔ́.
Ngār gə̄ ń m-ādə̄sí ní,
i Moijə ō, *Aaro̰ ō, Miriam ń
i ngōkó̰ó̰də́ kə́ dəyá̰ ní ō.
I yá̰á̰ ń noō n ā ī-gɔŕyɔ̄m̄ najə̄n tə́ ní a?
5Sḭḭ̄ gír deē yāḿ gə̄,
ādə̄ əga kemsí dɔ tə́!
Balak ń i mban̄g kə́ Moab ní,
sāā rāāsí yá̰á̰ kə́ majaĺ.
Ādə̄ əga kemsí dɔ yá̰á̰ ń
Balam kə́ ngōn̄ Beor tél ədan ní tə́.
Gō tə́ anī, sḭḭ̄ ḭ́ḭḭ̄ Sitim
āwī bátə́ ūgī Gilgal.
Sḭḭ̄ á̰a̰ī yá̰á̰ kə́ to tayā gə̄ ń
mā Kɔ́ɔ̄ɓē m̄-rāā tām̄ yāsí tə́ ní.
Yá̰á̰ ń Kɔ́ɔ̄ɓē ra kə de gēé ta rāā ní
6Dan ń m-ɔ́sə kejəḿ nang tə́
no Kɔ́ɔ̄ɓē ń i Nə́ɓā
kə́ dɔɔ́ sa̰y tə́ ní,
yá̰á̰ ń kadə̄ m̄-ndējə̄ ní i rí?
Kə m̄-ndējə̄n i duĺ man̄g
kə́ bəra gə̄ ō, kə m̄-róōdə́ horoó
kə taá malang *yá̰a̰ tun̄ tə́ ō a?
7Kɔ́ɔ̄ɓē ndigə i bal batə̄
kə́ dūbūú ngá̰ý gə̄ a?
Ni ndigə i yibə̄ kə́ a̰ā̰ ngá̰ý
tītə̄ man̄ dɔ mbal̄ kə́ nūgə́ beé a?
Yā kadə̄ ni mā̰yń rɔ̄n dɔ
yá̰a̰ rāāḿ gə̄ kə́ gōtə́ aĺ tə́ ō,
dɔ ra dɔ ndū tə́ aĺ yāḿ gə̄ tə́ ō ní,
kə m-ún i ngōn̄ hágə́ḿ n
kə m̄-ndējə̄ ní a?
8Kɔ́ɔ̄ɓē rāā adə̄
ī-ger̄ yá̰á̰ kə́ majə.
Yá̰á̰ ń ni-dəje deē ndul gə̄
malang kadə̄ rāān̄ ní n toó:
I rāā yá̰á̰ kə́ gōtə́ ō,
i kadə̄ nel̄ deē
rāā kem majə ō,
i kadə̄ deē ndi kə Nə́ɓā
yānneé kanjə̄ kɔjə rɔ̄n ō.
Kɔ́ɔ̄ɓē rāā deē yá̰á̰ kə́ tōr̄ najə̄ ɓogə tə́ ō, rāā yá̰a̰ kə dɔ́nɔ́ tə́ ō
9Kɔ́ɔ̄ɓē ɔr̄ najə̄ kə de gə̄ ń
ndin̄ kem ɓē kə́ bo tə́ ní.
Ngé gə̄ ń ɓōlə́n̄ ndílən ní,
ni a ajədə́.
Sḭḭ̄ de gə̄ kə́ gír ɓē yā *Juda tə́ ō,
sḭḭ̄ malang ń ī-kánī naā
kem ɓē kə́ bo tə́ ní ō, ōōī!
10Yá̰a̰ kənge kə́
kə ta róbə́ kə́ gōtə́ aĺ ní,
deē a əngedə́ i kem kújə
yā de kə́ majaĺ gə̄ tə́ ngándáńg ō,
nin̄ a unən̄ i kār̄ tɔ̄jə̄
yá̰á̰ kə́ gōtə́ aĺ n
a mbɔ̄jə́nəń yá̰a̰ ō.
I yá̰á̰ kə́ majə ka̰ā̰ aĺ ngá̰ý.
M-ásə́ tə́gā taḿ
dɔ yá̰á̰ kə́ beé tə́ a?
11Ngé kə́rēý gə̄ a unən̄
i yá̰a̰ mbɔ̄jə́ kɔȳ yá̰á̰ kə́ gōtə́ aĺ gə̄ n
a mbɔ̄jə́nəń kɔȳ yá̰a̰ gə̄ ō.
I mbal̄ ger̄ kɔȳ yá̰á̰ kə́ gōtə́ aĺ gə̄ n
nin̄ a ɓōkə́n̄ kem ngong yādə́ tə́ ō ní.
M-ā m̄-gān̄g sarya m-ə́da na
najə̄ na gətóo dɔdə́ tə́ a?
12Ngé kənge yá̰á̰ kə́
kem ɓē bo ń toō tə́ gə̄
a əsan̄ i tətō ngé ndoō gə̄.
De gə̄ ń ndin̄ kemeé ní,
nin̄ i ngé sor̄ gə̄. Nin̄ teēn̄
tadə́ a ngól̄nəń i loo.
13I tām̄ najə̄ ń toō tə́ n
m-ə́lá gír kəndasí ní,
m-ə́lá gír nujəsí kɔ̄ɔ́
najə̄ mān̄ dɔ ndū
Nə́ɓā yāsí gə̄ tə́ ní.
14Ā ə́saī yá̰a̰, banī
ɓō a rāāsí ɓáý.
Ā ī-gerī yá̰á̰ ń
i ɓō kə́ əsō ní.
Ā ī-ngɔ̄mī yá̰a̰ kəsa tām̄ yāsí tə́,
banī a to ta kaw̄ jóo alé.
Ba ré ī-ngɔ̄mī yá̰á̰ kə́rēý anī,
m-ā m̄-nujəń kɔ̄ɔ́ kə rɔ̄ɔ́.
15Ā ī-dubī yá̰a̰,
banī ā ásiī kəja alé.
Ā ī-kásī kan̄ *kāgə̄ olibə,
banī ā úniī yibə̄n
yā rāań yá̰a̰ alé.
Ā ī-mbə́rēī kan̄ *kāgə̄ nduú,
banī ā ā̰ȳ kasən alé.
16Sḭḭ̄ ī-ndájī jī bēl̄ loo rāā yá̰a̰ gə̄
yā mban̄g Omri ō,
yā ngōnə̄n Akab ō,
yā kojə yān ō.
Sḭḭ̄ ī-ndájī jī bēl̄
loo rāā yá̰a̰ yādə́.
Adə̄ m-ā m̄-nujə
ɓē bo yāsí kɔ̄ɔ́.
I beé n de kə́ rang gə̄ a əgōn̄neésí
sḭḭ̄ de gə̄ ń ī-ndiī kemeé ní.
Rɔ̄sɔl̄ ń rāā gír deē
yāḿ gə̄ ní, a rāāsí.
Currently Selected:
Makətūbə̄ yā Mise 6: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
