Makətūbə̄ yā Mise 5
5
Betlehem i ɓē yā mban̄g kə́ nge kajə deē
1Kɔ́ɔ̄ɓē əda na:
Ba ḭ̄ Betlehem Epərata,
dan ɓē gə̄ yā de gə̄ kə́ gír kojə yā *Juda tə́ ní,
ḭ̄ i ngōn̄ ɓē kə́ dūú ɓá tā, ba nge ń sɔɔ̄ kadə̄
a o̰o̰ ɓē *Israel tə́ ní,
m-ā m̄-rāā kadə̄ ni a teē i looí.
Ni i de kə́ kem kojə kə́ jóó ngá̰ý tə́.
2Kɔ́ɔ̄ɓē a əya̰ gír deē yān gə̄ kɔ̄ɔ́ dan kə́rēý tə́.
Gō tə́ anī, ndɔ̄ a reē noó
kadə̄ dəyá̰ ń sɔɔ̄
kadə̄ ojə ngōn̄ ní, ojə ngōn̄ kə́ dəngam.
Ngé gə̄ ń a ndin̄ kə kumdə́ ɓáý
gō kɔydə́ kaw̄ sedə́ dɔ ɓē kə́ rang tə́
dɔ gúú tə́ ní, a reēn̄
yā kənge gotə́ *Israel gə̄
kadə̄ a ɓoon̄ naā.
3Ba ni kə́ ngār ń ədan̄
najə̄ yān kété ní,
a ḭḭ yān ō, a tél nge kul̄də́ ō,
kə ta kūl̄ tɔ́gə yā Kɔ́ɔ̄ɓēé ō,
kə ta kūl̄ ndi kə́ to kɔsə gɔn
yā Kɔ́ɔ̄ɓē Nə́ɓā yān ō.
De gə̄ kə́ dan gír deē yān gə̄ tə́
a ndin̄ kanjə̄ sōl̄ yá̰á̰ kógə̄ḿ.
Tām̄ tɔ́gən a aw̄ bátə́ yā
kugə̄ ta ngóy dɔ nang tə́.
4I ni n i nge rāā kadə̄ lɔm to ní.
Ré de kə́ Asiri gə̄ reē
udən̄ dɔ nang yājí tə́ ō,
túdə̄n̄ kə̄ kem kújə́ kə́
ngáā ngáā yājí gə̄ tə́ ō anī,
j-a j-əlaī kə ngār gə̄ kə́
kutədə́ i ngá̰ý yā kadə̄ rɔ̄ɔ̄n̄də́.
5Nin̄ a taān̄ dɔ nang
kə́ Asiri ń i dɔ nang yā Nemrod ní,
kə ta kūl̄ yá̰a̰ rɔ̄ɔ̄ yādə́ gēé ō,
a ndin̄ dɔ tə́ ō.
Ngār ń ənīn̄ ndūdə́ najə̄ yān tə́ ní,
a taājí jī Asiri gə̄ tə́ yā kəya̰jí dɔɔ́,
loo ń nin̄ a mānə̄n̄
dɔ nin̄ dɔ nang yājí gə̄ ō,
a udən̄ dɔ nang yājí tə́ ō ní.
Israel gə̄ ń teēn̄ ta yo tə́ á ndin̄ dan nápar de gə̄ tə́ ní
6*Israel gə̄ ń na̰yn̄
kə kumdə́ dan gír de gə̄
kə́ ngá̰ý gə̄ tə́ ní,
a ton̄ i tītə̄ tal kə́
tə́sō ɗḛy ɗḛy gə̄,
kə́ Kɔ́ɔ̄ɓē əlań beē,
a ton̄ i tītə̄ man̄ ndī kə́
tə́sō dɔ mu tə́ beē.
Nin̄ əndān̄ kemdə́
dɔ deē ndul gə̄ tə́ aĺ ō,
ngóōn̄ ta yá̰á̰
kógə̄ḿ jīdə́ tə́ aĺ ō.
7*Israel gə̄ ń na̰yn̄
kə kumdə́ dan nápar de gə̄ tə́,
dan gír de gə̄ kə́ ngá̰ý gə̄ tə́ ní,
a ngangə̄n̄ tītə̄ ɓɔl beé
dan dā̰ gə̄ kə́ kem kuú tə́,
a ngangə̄n̄ tītə̄ balsáa ɓɔl beé
dan ɓūtə̄ batə̄ gə̄ tə́.
Loo malang ń ni mān̄ tū tə́ ní,
ni əhɔ dā̰ gə̄ ba rə́yā̰də́ naā tə́ ō,
de kə́ asə taādə́ jīn tə́ gətóo ō.
8Gír de gə̄ yā *Israel,
ə̄nī madə̄ ba̰ā̰í gə̄ rɔ̄ɔ̄.
Ī-rāā ādə̄ ngé rɔ̄ɔ̄í gə̄
malang gətóon̄!
Kɔ́ɔ̄ɓē a rāā kadə̄ yá̰a̰ malang kə́ rɔ̄kum aĺ ń deē əndā tɔ́gən dɔ tə́ ní gətóo
9Kɔ́ɔ̄ɓē əda na:
Yá̰á̰ ń a rāā yá̰a̰ ndɔ̄
ngeé ń noó tə́ ní n toó:
M-ā m̄-rāā kadə̄ sə́nda
yāsí gə̄ gətóon̄ ō,
kadə̄ púsə rɔ̄ɔ̄
yāsí gə̄ gətóon̄ ō.
10M-ā m̄-nujə ɓē bo gə̄
kə́ dɔ nang yāsí tə́ ō,
ndogə̄ mbal̄ yāsí kə́ ngan̄g ngá̰ý gə̄ malang ń
ā ī-rɔ̄ɔ̄iń dɔ rɔ̄sí tə́ ní,
m-ā m̄-ɓéngə̄lēdə́
nang tə́ kɔ̄ɔ́ ō.
11M-ā m̄-rāā kadə̄
mbōlí gə̄ ń ā ī-rāāī ní
gətóon̄ kɔ̄ɔ́.
De kə́ nge ka̰a̰ yá̰á̰ kə́
dɔ rā̰ tə́ to̰ a gətóo.
12Nə́ɓā yāsí kə́
rɔ̄kum aĺ gə̄ ō,
mbal̄ yāsí kə́ túdə̄ kə
nja dɔɔ́ gə̄ ō ní,
m-ā m̄-rāādə́ kadə̄
a gətóon̄ kɔ̄ɔ́.
Yá̰a̰ gə̄ ń sḭḭ̄ kɔ́ gə̄
ī-rāāīdə́ kə jīsí ní,
ā ī-rɔyīdə́ to̰ alé.
13M-ā m̄-ró̰ȳ yá̰á̰ kə́ tɔ́sə̄ ba rāādə́
kum gotə kāgə̄ ɓesə̄ kə́ yā ɓōĺ gidə
yāsí gə̄ ń ī-túdī ní kɔ̄ɔ́ ō,
m-ā m̄-nujə ɓē bo yāsí gə̄ kɔ̄ɔ́ ō.
14Gō tə́ anī, gotə nápar de gə̄ ń
oōn̄ taḿ aĺ ní,
m-ā m̄-dal ba̰ā̰
dɔdə́ tə́ kə wōn̄g kə́ ngá̰ý.
Currently Selected:
Makətūbə̄ yā Mise 5: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
