Najə̄ kə́ Majə yā Jeju ń Matiye ndang ní 26

Ngār gə̄ oōn̄ naā dɔ Jeju tə́ yā tɔ̄lən

(Á̰a̰ī Mark 14.1-2; Luk 22.1-2; Ja̰a̰ 11.45-53)

1Dan ń Jeju tɔ̄l̄ ta najə̄ gə̄ ń toō malang anī, əda ngé ndóō yá̰a̰ yān gə̄ na:

Ī-gerī kadə̄ na̰y i ndɔ̄ jōó ngóy kadə̄ nāā *Pákə ugə̄. 2Ba a əlan̄ Ngōn̄ deē jī de gə̄ tə́ kadə̄ a əndanən̄ kə máyá̰ tū kāgə̄ kə́ dēsə́ tə́.

3Anī ngol gə̄ kə́ dɔ *ngé tun̄ yá̰a̰ gə̄ tə́ ō, *kum kɔɔ̄ gə̄ yā ngán *Israel gə̄ ō, kánə̄n̄ naā kem kújə yā ngol *ngé tun̄ yá̰a̰ gə̄ ń rīn na i Kaipə ní tə́. 4Nin̄-oōn̄ naā kadə̄ kə n-rāān̄ ngam kógə̄ḿ kə n-əhɔn̄neé Jeju kə n-tɔ̄l̄nən̄. 5Ba ədan̄ na kadə̄ kə i ndɔ̄ nāā tə́ alé, na sōgə́ najə̄ na a ḭḭ dan de gə̄ tə́.

Dəyá̰ kógə̄ḿ rāā ítər dɔ Jeju tə́

(Á̰a̰ī Mark 14.3-9; Ja̰a̰ 12.1-8)

6Jeju ndi kem kújə yā Simo̰ nge bānjə̄ tə́, kem ɓē kə́ Betani tə́. 7Anī dəyá̰ kógə̄ḿ reē rɔ̄n tə́ kə kū mbal̄ albatər#26.7 Albatər i mbal̄ kə́ unjə̄ yáŕ yáŕ kə́ a rāān̄neé kū ítər. kə́ ítər kə́ gātə̄n i ngá̰ý i kemeé. Dan ń Jeju ndi ta yá̰a̰ kəsa tə́ anī, dəyá̰ ní kəjā ítər ní dɔn tə́. 8Ngé ndóō yá̰a̰ yā Jeju gə̄ a̰a̰n̄ yá̰á̰ ní, anī wōn̄g rāādə́ ngá̰ý adə̄ ədan̄ na:

Ni nujə kə ítər ń toō i tām̄ rí tə́? 9Nə́ngētə́ deē a igəń kə gātə̄ kə́ ngá̰ý yā kadə̄ ngé ndoō gə̄ narən!

10Banī Jeju ger̄ najə̄ yādə́ ní adə̄ ədadə́ na:

Ī-rāāī dəyá̰ ń toō adə̄ wurən tōrə̄n i tām̄ rí tə́? Yá̰á̰ ń ni-rāā tām̄ yāḿ tə́ ní, i yá̰á̰ kə́ majə. 11Tɔdɔ̄ ngé ndoō gə̄ a ndin̄ sesí i kə ndɔ̄ gə̄, ba mā m-ā m̄-ndi sesí kə ndɔ̄ gə̄ alé. 12Ni kəjā ítər ń toō rɔ̄ḿ tə́ i yā dubə̄məń. 13Ādə̄ m-ə́dásí najə̄ kə́ bo ngá̰ý: Loo malang ń a ənīn̄ mbēr̄ Najə̄ kə́ Majə ń toō tū tə́ dɔ nang tə́ laā ní, a ənīn̄ gotə yá̰á̰ ń dəyá̰ ń toō rāā ní ō, kadə̄ əgań kem de gə̄ dɔn tə́.

Judas ndigə kəla Jeju jī Ngol ngé tun̄ yá̰a̰ gə̄ tə́

(Á̰a̰ī Mark 14.10-11; Luk 22.3-6)

14Tā anī Judas Iskariot ń i nge kə́ kógə̄ḿ kə́ dan ngé kə́ kutə gidə i jōó gə̄ tə́ ní, aw̄ ənge ngol gə̄ kə́ dɔ *ngé tun̄ yá̰a̰ gə̄ tə́, 15ba ədadə́ na ré n-əla Jeju kem jīdə́ tə́ anī, ké na a adə̄nən̄ i rí wa.

Anī nin̄-tə́dan̄ sə́lē gində̄ arjā̰a̰ kutə mətá adə̄nən̄. 16Əla gír kə̄ kum mbang nəkɔ́ ń noō tə́ ní, Judas a sāā i ta róbə́ kə́ majə kə́ yā kadə̄ n-əlań Jeju kem jīdə́ tə́.

Jeju əsa yá̰á̰ Pákə naā tə́ kə ngé ndóō yá̰a̰ yān gēé

(Á̰a̰ī Mark 14.12-21; Luk 22.7-14,21-23; Ja̰a̰ 13.21-30)

17Ngé ndóō yá̰a̰ yā Jeju gə̄ reē dəjenən̄ kə ndɔ̄ kə́ ta kəga dɔ yā mápa kə́ rāā kanjə̄ kənī *kaa mápa kum tə́ na kadə̄ əsan̄ yá̰á̰ *Pákə ní wa, ké gḛy kadə̄ n-rāān̄ i loo kə́ rá tə́ n kə n-adə̄nən̄.

18Anī Jeju ədadə́ na kə aw̄n̄ kem ɓēé rɔ̄ de kə́ beē tə́, ba kə ədan̄ kɔ́ɔ̄ na ngoldə́ na əda na mbang yān na asə kɔ̄ɔ́, adə̄ n-a n-rāā Pákə#26.18 Pákə kumən na i kə́ kəya̰n. Á̰a̰ī Teē 12.11. kə ngé ndóō yá̰a̰ yān gēé na i ɓēé looneé.

19Ngé ndóō yá̰a̰ gə̄ rāān̄ tītə̄ ń Jeju ədańdə́ ní, adə̄ nin̄-rāān̄ loo kəsa yá̰á̰ *Pákə.

20Ta loo tíbə́ tə́ anī, Jeju reē ndi ta yá̰a̰ kəsa tə́ kə ngé ndóō yá̰a̰ yān kə́ kutə gidə i jōó gēé. 21Ba dan ń ndin̄ a əsan̄ yá̰a̰ anī Jeju əda na: Ādə̄ m-ə́dásí najə̄ kə́ bo ngá̰ý, deē kógə̄ḿ dansí tə́ a əlam̄ jī de gə̄ tə́.

22Najə̄ ní tōr̄də́ ngá̰ý, adə̄ nin̄ kógə̄ḿ kógə̄ḿ dəjenən̄ na Kɔ́ɔ̄ɓē, i mā a?

23Ni-tél ədadə́ na: I nge ń əla jīn gōḿ tə́ kārāá ní n a əlam̄ jī de gə̄ tə́ ní. 24Ngōn̄ Deē a oy yā kaw̄ tītə̄ ń ndangən̄neé dɔn tə́ kem makətūbə̄ tə́ ní. Banī deē ń a əlan jī de gə̄ tə́ ní, yá̰á̰ kə́ majaĺ ngá̰ý a teē dɔn tə́! Kojə deē ń noō aĺ i só tə́.

25Judas ń, i nge kəlan jī de gə̄ tə́ ní un najə̄ ɔr̄, əda na:

Ngoləḿ i mā a?

Anī Jeju tūr̄ ədan na: I ḭ̄ n ə́dá ní.

Yá̰a̰ kəsa kə́ táĺ

(Á̰a̰ī Mark 14.22-26; Luk 22.15-20; 1 Kor 11.23-25)

26Dan ń a əsan̄ yá̰á̰ ní, Jeju un mápa, ndadə̄ Nə́ɓā dɔ tə́ oy anī, gān̄g naā tə́ adə̄ ngé ndóō yá̰a̰ yān gə̄, ba ədadə́ na:

Ī-taāī yá̰á̰ ń toō ə́saī, na i rɔ̄ḿ.

27Gō tə́ anī un kópə kasə *nduú, ndadə̄ Nə́ɓā dɔ tə́ oy anī adə̄də́ to̰ ba əda na:

Sḭḭ̄ malang ā̰yī, 28tɔdɔ̄ yá̰á̰ ń toō i mósə́ḿ, i mósə *madə̄ naā ń Nə́ɓā əhɔ sesí ní. I mósə́ kə́ ɓōkə́ nang tə́ tām̄ yā kósə de kə́ ngá̰ý gə̄ tə́ ō, tām̄ kadə̄ Nə́ɓā māyń rɔ̄n dɔ majaĺ yādə́ gə̄ tə́ ō. 29Ādə̄ m-ə́dásí najə̄ kə́ bo ngá̰ý, ngɔlaā ní m-ā m-ā̰ȳ kasə *nduú ń toō to̰ alé, bátə́ ndɔ̄ ń m-ā m-ā̰yń kə́ kijə naā tə́ sesí kem Ɓē ko̰o̰ yā Bɔbə́ḿ tə́ ní.

30Gō tə́ anī nin̄-ənīn̄ pā gə̄ kə́ yā tɔ̄yń Nə́ɓā, ba teē aw̄n̄ dɔ mbal̄ *kāgə̄ olibə gə̄ tə́.

Jeju tāā Piyer na a nējə̄ najə̄

(Á̰a̰ī Mark 14.27-31; Luk 23.31-34; Ja̰a̰ 13.36-38)

31Anī Jeju əda ngé ndóō yá̰a̰ yān gə̄ na:

Ndɔ̄ɔ́ ɓōólaā nəkɔ́ ń toō ní sḭḭ̄ malang a ə́ya̰mī kɔ̄ɔ́. Tɔdɔ̄ i kə́ ndang kem makətūbūú na:

M-ā m-ə́nda nge kul̄ batə̄ gə̄,

anī ɓūtə̄ batə̄ gə̄ a tḭ̄ḭ̄n̄ naā kə̄ loo gə̄ tə́.

32Ba ré m̄-tél m̄-ndól̄ anī, m-ā m-aw̄ Galile kété nosí tə́. 33Piyer un najə̄ ɔr̄, əda Jeju na:

Ká ré gotə madə́ḿ gə̄ malang əya̰īn̄ kɔ̄ɔ́ gə̄gē anī, mā m-a m-ə́ya̰ī kɔ̄ɔ́ aĺ bátə́.

34Jeju tél ədan na:

Ādə̄ m-ə́daī najə̄ kə́ bo ngá̰ý, ndɔ̄ɔ́ ɓōólaā nəkɔ́ ń toō ní ā ī-nējə̄ najə̄ a ə́da nja mətá na ī-gerə̄m̄ alé, pá tá kadə̄ kə́ra kə̄njá nōō ɓáý.

35Piyer ədan na:

Ká ré i yā kadə̄ m-óyń seí gə̄gē anī, m-ā m̄-nējə̄ m-ə́da na m-gerī aĺ aĺ bátə́! Ba gotə ngé ndóō yá̰a̰ yā Jeju gə̄ malang ədan̄ tītə̄ ń noō ō.

Jeju ndɔ̄ȳ Nə́ɓā kem ndɔr̄ kə́ Jetəsemani tə́

(Á̰a̰ī Mark 14.32-42; Luk 22.39-46)

36Dan ń Jeju aw̄n̄ nin̄ kə ngé ndóō yá̰a̰ yān gēé ugə̄n̄ loo ń a ɓārə́n̄ na i Jetəsemani ní tə́ anī, əda ngé ndóō yá̰a̰ yān gə̄ na kə ndin̄ loo ń toō tə́ laā, ba ni na n-a n-aw̄ ndɔ̄yɔ̄ɔ́ loo ń nú tə́ noō.

37Ni un Piyer ō, ngán Jebede kə́ jōó gə̄ ō seneé. Loo ń noō tə́ rɔ̄n əla gír nelə̄n aĺ ō, kemən əla gír sōl̄ ō. 38Anī ni-ədadə́ na rɔ̄n na nelə̄n kə rɔ̄neé aĺ tītə̄ kə́ yā kadə̄ n-oy kɔ̄ɔ́ beē. Kə ndin̄ loo ń toō tə́ laā, kə lōōn̄ ɓīī ba kə́ ndin̄ kə kumdə́ seneé.

39Ni-aw̄ dan sa̰y sḛ́ý anī ɔsə non nang tə́, ba ndɔ̄ȳ Nə́ɓā əda na:

Bɔbə́ḿ, ré loo rāā kadə̄ kópə wur kɔl ń toō mān̄ sa̰y rɔ̄ḿ tə́ to noó anī, ī-rāā ādə̄ mān̄ sa̰y rɔ̄ḿ tə́. Banī ādə̄ i kə gō kem ndigə yāḿ alé, ba i kə gō kem ndigə yāí īkɔ́ tá.

40Ni-tél reē rɔ̄ ngé ndóō yá̰a̰ yān kə́ mətá gə̄ tə́ anī, əngedə́ ton̄ a ɓīīn̄. Ni-əda Piyer na:

Adə̄ ásiī ndi kə kumsí seḿ mbang kógə̄ḿ aĺ ḿ! 41Ī-lōōī ɓīī, ī-ndiī kə kumsí ba ī-ndɔ̄yī tá kadə̄ ə̄sōī kum yá̰a̰ gə̄ ń a nāān̄ de gə̄ tə́ ní alé. Tɔdɔ̄ ndíl deē ndigə rāā yá̰á̰ kə́ majə, ba dā̰ rɔ̄ deē ngan̄g alé.

42Ni-tél aw̄ adə̄ dan gə̄lā sa̰y nja kə́ nge ko̰ jōó, ba ndɔ̄ȳ Nə́ɓā əda na:

Bɔbə́ḿ, ré loo kun kópə ń toō kɔ̄ɔ́ kanjə̄ kadə̄ m-ā̰ȳ yá̰á̰ kə́ kemeé gətóo anī, ādə̄ yá̰á̰ ń ī-ndigə ní rāā yá̰a̰!

43Ni-tél reē rɔ̄də́ tə́ anī əngedə́ dɔ ɓīī tə́ ɓáý, tɔdɔ̄ asən̄ ndi kə kumdə́ alé. 44Jeju əya̰də́ ba ɔtə aw̄ dan sa̰y ɓáý. Ni ndɔ̄ȳ nja kə́ nge ko̰ mətá, ba əda i rɔ̄ najə̄ gə̄ nəkɔ́ ń kété ní ɓáý. 45Gō tə́ anī, ni-tél reē rɔ̄ ngé ndóō yá̰a̰ yān gə̄ tə́, ba ədadə́ na:

Ā ī-ɓīī i mbée ō, a ī-taāī i koō ō a! Á̰a̰ī, kum mbang asə kɔ̄ɔ́, adə̄ a əlan̄ Ngōn̄ Deē jī ngé rāā yá̰a̰ majaĺ gə̄ tə́. 46Ḭ́ḭī dɔɔ́ ādə̄ j-awī. Á̰a̰ī nge kəlaḿ jī de gə̄ tə́ ugə̄ kɔ̄ɔ́.

Əhɔn̄ Jeju

(Á̰a̰ī Mark 14.43-50; Luk 22.47-53; Ja̰a̰ 18.3-12)

47Ba dan ń a ɔr̄ najə̄ kə̄ tan tə́ ɓáý anī, Judas ń i nge kə́ kógə̄ḿ kə́ dan ngé kə́ kutə gidə i jōó gə̄ tə́ ní, reē ugə̄ kə kósə de kə́ ngá̰ý gə̄ kə́ ngol gə̄ kə́ dɔ *ngé tun̄ yá̰a̰ gə̄ tə́ ō, *kum kɔɔ̄ yā ngán *Israel gə̄ ō, əlan̄də́. Nin̄-reēn̄ i kə kaskar gə̄ ō, kə sálang kāgə̄ gə̄ ō. 48Nge ń a rāā yā kəla Jeju jīdə́ tə́ ní, ɔjədə́ yá̰á̰ kógə̄ḿ kə́ kadə̄ gerə̄n̄neé Jeju, ədadə́ na: Deē ń m-ā m̄-ɓírən kə̄ rɔ̄ḿ tə́ dagə ní, i deē ní bang, adə̄ ə́hɔniī. 49Judas reē rɔ̄ Jeju tə́ kə̄ ta jī tə́ beé, ba ədan na:

Lápə́ya Ngoljí!

Ba ɓirə̄n kə̄ rɔ̄n tə́ dagə rāānneé lápə́ya. 50Jeju tūr̄ ədan na:

Madāá, yá̰á̰ ń ī-reē rāāá ní ī-rāā!

Loo ń noō tə́ de gə̄ ń Judas reē sedə́ ní, njə̄rān̄ kə̄ rɔ̄ Jeju tə́, ba tetən̄ jīdə́ dɔn tə́ əhɔnən̄. 51Anī deē kógə̄ḿ kə́ dan ngé gə̄ ń nin̄ i kə Jejuú ní əla jīn ɔrə̄ń kaskar yān, əgań mbī pajā yā ngol *ngé tun̄ yá̰a̰ gə̄ əga gān̄g. 52Anī Jeju ədan na:

Ī-téĺ ə́la kaskar yāí gogə́ kem hɔ̄pə̄n tə́, tɔdɔ̄ de gə̄ malang ń unən̄ kaskar ní, a oyn̄ i yo kaskar. 53Ī-ger̄ kadə̄ m-ásə dəje Bɔbə́ḿ kadə̄ rāā seḿ aĺ a? Ré m̄-dəjen anī, kə̄ ta jī tə́ beē a əla kə *de kə́ dɔ rā̰ tə́ gə̄ kə́ dūbūúdə́ i ngá̰ý ō, ɓūtə̄də́ mān̄ kutə gidə i jōó ō, yā kadə̄m̄. 54Ba ré i beé ní, loo kadə̄ najə̄ gə̄ ń ndangən̄ kem makətūbūú ní a udən̄ gírí i ba̰ý? Ndangən̄ na i gáŕ kadə̄ yá̰a̰ na a rāā yá̰a̰ na i tītə̄ ń noō.

55Gō tə́ anī Jeju əda kósə de gə̄ na:

Ī-reēī kəhɔḿ tə́ kə kaskar gə̄, kə sálang kāgə̄ gə̄ tītə̄ loo reē kəhɔ nge kum̄ róbə́ tə́ beē a! Kə dɔ ndɔ̄ gə̄ m̄-ndi kem kújə yā Nə́ɓā tə́ m̄-ndóoń de gə̄ yá̰a̰, ba sḭḭ̄ ə́hɔmī alé. 56Banī yá̰a̰ gə̄ ń toō malang rāān̄ yá̰a̰ i yā kadə̄ najə̄ gə̄ ń *ngé koō ta gə̄ ndangən̄ ní reē udəń gírí. Loo ń noō tə́ ngé ndóō yá̰a̰ yān gə̄ əya̰nən̄ ba a̰ȳn̄ naā malang kɔ̄ɔ́.

Aw̄n̄ kə Jeju no ngé sarya kə́ bo gə̄ tə́

(Á̰a̰ī Mark 14.53-65; Luk 22.54-55,63-71; Ja̰a̰ 18.13-14,19-24)

57Ngé gə̄ ń əhɔn̄ Jeju ní aw̄n̄ seneé ɓē Kaipə ngol *ngé tun̄ yá̰a̰ gə̄ tə́, loo ń ngé ndóō de gə̄ ndū najə̄ gə̄ ō, *kum kɔɔ̄ gə̄ ō, kánə̄n̄ naā tū tə́ ní tə́. 58Piyer njə̄rā gō Jeju tə́, banī dandə́ gə̄lā sḛ́ý. Ni un gōn bátə́ ugə̄ ta ndágə́ kújə yā ngol *ngé tun̄ yá̰a̰ gə̄ tə́. Udə kem ndogó ba aw̄ ndi kə ngé kəla gēé yā ka̰a̰ń ta tɔ̄l̄ ta yá̰á̰ ní.

59Ngol gə̄ kə́ dɔ *ngé tun̄ yá̰a̰ gə̄ tə́ ō, ngé sarya kə́ bo gə̄ malang ō, sāān̄ najə̄ kə́ yā tetə dɔ Jeju tə́ yā gāngəń sarya yo dɔn tə́. 60Adə̄ de gə̄ ngá̰ý reē tétə̄n̄ najə̄ kə́ sor̄ gə̄ banī ngé sarya gə̄ əngen̄ kum najə̄ kógə̄ḿ kə́ asə kadə̄ deē gāngəń sarya yo dɔn tə́ alé. Banī de gə̄ jōó reēn̄ gō gogə́ 61ədan̄ na:

Deē ń toō əda na n-asə tɔ̄ɔ̄ kújə yā Nə́ɓā, ba tél kəndā gogə́ kem ndɔ̄ mətá beē.

62Anī ngol *ngé tun̄ yá̰a̰ gə̄ ḭḭ dɔɔ́ ba əda Jeju na:

Najə̄ ń de kə́ kum yá̰á̰ tə́ gə̄ ədan̄ dɔí tə́ toō ā ī-dal aĺ a?

63Banī Jeju ndi kə tan kə́ mbóó. Anī ngol *ngé tun̄ yá̰a̰ gə̄ ədan na:

m̄-dəjeī kə rī Nə́ɓā kə́ ndi kə kumneé, ré i ḭ̄ n i *Kərist, adə̄ ḭ̄ i Ngōn̄ Nə́ɓā, anī ə́dájí.

64Jeju tūr̄ ədan na:

Īkɔ́ ə́da. Banī m-ə́dásí najə̄ kə́ rang ɓáý to̰, əla gír ngɔr ń toō tə́ ní ā á̰a̰ī Ngōn̄ Deē a ndi dɔ jī ko̰ Nə́ɓā kə́ bo kə́ tɔ́gən i ngá̰ý tə́ ō, ā á̰a̰niī loo reē tə́ dɔ kil̄ man̄ kə́ no rā̰ tə́ tə́ ō.

65Loo ń noō tə́ ngol *ngé tun̄ yá̰a̰ gə̄ əhɔ ta kūbə̄ kə́ rɔ̄n tə́ *rə̄yā̰ ba əda na:

Ni-əda i najə̄ kə́ to ngonjə̄ dɔ Nə́ɓā tə́! Ní, kə jə-sāāī najə̄ yā de kə́ kum tə́ gə̄ ɓáý a? Najə̄ kə́ to ngonjə̄ ń ni-əda dɔ Nə́ɓā tə́ ní n ōōī ngɔr toó! 66Gír̄ yāsí kə́ dɔ tə́ na i rí? Nin̄-tūr̄ ədan̄ na:

Najə̄ i dɔn tə́ adə̄ majə kadə̄ oy.

67Loo ń noō tə́ tībə̄n̄ hōr̄ kumən tə́ ō, tə̄ndānən̄ ō. Ngé kə́rēý gə̄ əndan̄ mbɔ́rən, 68ba ədan̄ na:

Ḭ̄ i *Kərist aĺ a? Ī-rāā *nge koō ta ba ɔ́jə́jí dɔ deē ń əndaī ní.

Piyer nējə̄ əda na n-ger̄ Jeju alé

(Á̰a̰ī Mark 14.66-72; Luk 22.56-62; Ja̰a̰ 18.15-18,25-27)

69Piyer ndi ndágá kem ndogə̄ yā ngol *ngé tun̄ yá̰a̰ gə̄ tə́. Anī nge kəla kə́ dəyá̰ kógə̄ḿ reē rɔ̄n tə́ ba ədan na:

Ḭ̄ i kə Jeju kə́ Galile ō!

70Banī ni-nējə̄ ta kum de gə̄ tə́ malang əda na:

m̄-ger̄ kum najə̄ ń ə́da toó alé.

71Ba ɔtə a aw̄ kum kə̄ ta ndogə̄ tə́. Nge kəla kə́ dəyá̰ kə́ rang a̰a̰n anī əda de gə̄ ń ran̄ noó ní na:

Deē ń toō i kə Jeju kə́ *Najaret!

72Piyer nējə̄ nja kə́ nge ko̰ jōó ɓáý to̰ ō, túbə ō, ba əda na:

m̄-ger̄ deē ń noō aĺ bátə́!

73Ba gō tə́ sḛ́ý anī, de gə̄ ń ran̄ noó ní reēn̄ rɔ̄ Piyer tə́ ba ədanən̄ na:

Ḭ̄ i deē kógə̄ḿ kə́ dandə́ tə́ rɔ̄kum, tɔdɔ̄ ndūí rāā adə̄ jə-gerī.

74Anī Piyer əla gíŕ tə́da najə̄ kə́ ngan̄g ngan̄g gə̄ túbəń kə rɔ̄neé ba əda na:

m̄-ger̄ deē ń noō aĺ bátə́.

75Anī kə́ra kə̄njá nōō kə̄ ta jī tə́ noō. Loo ń noō tə́ əga kem Piyer dɔ najə̄ ń Jeju ədan kété tə́ ní, ədan na: Ḭ̄ ā ī-nējə̄ najə̄, ā ə́da na ī-gerə̄m̄ aĺ nja mətá pá tá kə́ra kə̄njá a nōō ɓáý. Loo ń noō tə́ Piyer teē ndágá, ba nōō wuk wuk kə wur katāá.

Currently Selected:

Najə̄ kə́ Majə yā Jeju ń Matiye ndang ní 26: BS

Highlight

Copy