Najə̄ kə́ Majə yā Jeju ń Matiye ndang ní 25

Kūjə́ najə̄ yā ngámandə kə́ kutə kógə̄ḿ gə̄

1Loo ń noō tə́ ní, *Ɓē ko̰o̰ kə́ dɔ rā̰ tə́ a to i tītə̄ kūjə́ najə̄ yā ngámandə kə́ kutə kógə̄ḿ gə̄ ń ɔyn̄ lámba yādə́ gə̄ ba aw̄n̄ tə́nī ta ngaa dəyá̰ tə́ ní. 2Ngámandə gə̄ ní kə́ mí gə̄ dandə́ tə́ i kə́ mbóo gə̄, ba kə́ mí gə̄ i kə́ kumdə́ edə̄. 3Ngé kə́ mbóo gə̄ ɔyn̄ lámba yādə́ gə̄, ba unən̄ yibə̄ hor dɔ tə́ alé. 4Ba ngé gə̄ ń i ngé kə́ kumdə́ edə̄ gə̄ ní, ɔyn̄ lámba yādə́ gə̄ ō, unən̄ yibə̄ hor kem kūú dɔ tə́ ō. 5Dan ń ngaa dəyá̰ reē láẃ aĺ ní, ɓīī əhɔ ta kumdə́ adə̄ to a ɓīīn̄.

6Dan loo tə́ anī mbēr̄ ɓār̄: Ngaa dəyá̰ n toó ī-teē ī-tə́nāī tan! 7Ngámandə gə̄ ní ndólə̄n̄ dɔ ɓīī tə́ malang ba rāān̄ gō lámba yādə́ gə̄. 8Ngé kə́ mbóo gə̄ ədan̄ ngé kə́ kum kedə̄ gə̄ na: Ādə̄jí yibə̄ hor yāsí tə́ sḛ́ý, na hor a oy i mbée kem lámba yājí gə̄ tə́. 9Ngé kə́ kum kedə̄ gə̄ tél ədan̄də́ na: Yibə̄ hor kə́ jījí tə́ a asə tām̄ yājí jḭḭ tə́ ō, tām̄ yāsí sḭḭ̄ tə́ ō alé. Ní, i só tə́ kadə̄ āwī rɔ̄ ngé gātə̄ gə̄ tə́, ī-mangiī tām̄ yāsí tə́. 10Dan ń a aw̄n̄ kə̄ mangaá ɓáý anī, ngaa dəyá̰ ní ugə̄ gotədə́ tə́. Adə̄ ngé gə̄ ń nin̄-ndin̄ dɔ rɔ̄də́ tə́ kɔ̄ɔ́ ní, udən̄ seneé kem loo yá̰a̰ kəsa kə́ rāā tām̄ yā rɔ̄nel̄ taā dəyá̰ tə́ ō, utə̄n̄ ta róbə gāngə̄n̄neé gíŕdə́ kɔ̄ɔ́ ō. 11Ta tɔ̄l̄ ta anī, ngé kə́ mbóo gə̄ ní reē ugə̄n̄, ədan̄ na: Kɔ́ɔ̄ɓē, Kɔ́ɔ̄ɓē, ī-teē ta róbə ādə̄jí tə́! 12Banī ni-tūr̄ ədadə́ na: Ādə̄ m-ə́dásí najə̄ kə́ bo ngá̰ý, m̄-ger̄sí alé.

13I beé ní ī-ndiī dɔ rɔ̄sí tə́, tɔdɔ̄ sḭḭ̄ ī-gerī ndɔ̄ ń aĺ ō, kum mbang ní aĺ ō.

Kūjə́ najə̄ yā ngé kəla kə́ mətá gə̄

(Á̰a̰ī Luk 19.11-27)

14*Ɓē ko̰o̰ kə́ dɔ rā̰ tə́ a to i tītə̄ deē ń a rāā yā kaw̄ kə̄ mbā tə́, anī ɓāŕ ngé kəla yān gə̄ ba ɓɔ̄ɔ̄də́ yá̰a̰ kənge yān gə̄ ní. 15Ni-adə̄ nge kəla yān kógə̄ḿ sə́lē kə́ kum madə̄ kə́ bo gə̄ dūbú kutə mí, adə̄ nge kə́ rang dūbú kutə jōó, adə̄ nge kə́ ko̰ mətá dūbú kutə kógə̄ḿ. Adə̄də́ kógə̄ḿ kógə̄ḿ kə gō məladə́ gēé, ba aw̄ mbā tə́. 16Nge kəla ń taā sə́lē dūbú kutə mí ní, aw̄ rāań gātə̄ kə̄ ta jī tə́ noō, anī ənge manə̄n dɔ tə́ dūbú kutə mí. 17Nge ń taā sə́lē dūbú kutə jōó ní, rāā tītə̄ yā madə̄n, anī ənge manə̄n dɔ tə́ dūbú kutə jōó. 18Ba nge ń taā sə́lē dūbú kutə kógə̄ḿ ní, aw̄ ndēr̄ bəlo ɓɔ̄ɔń sə́lē yā kɔ́ɔ̄n ní tū tə́.

19Rāā ndɔ̄ ngá̰ý gō tə́ anī, kɔ́ɔ̄ ngé kəla gə̄ ní tél mbā tə́, ba dəjedə́ najə̄ kə́ dɔ kəla yādə́ gə̄ tə́. 20Nge kəla ń taā sə́lē dūbú kutə mí ní, reē rɔ̄n tə́ ngɔr. Ni ɔjən sə́lē kə́ rang gə̄ dūbú kutə mí ba ədan na: Kɔ́ɔ̄ḿ, ī-ɓɔ̄ɔ̄m̄ sə́lē i dūbú kutə mí ba á̰a̰ā̰, m-ə́nge sə́lē kə́ rang gə̄ dūbú kutə mí dɔ madə̄ tə́ ɓáý to̰. 21Kɔ́ɔ̄n ədan na: Majə, ḭ̄ i nge kəla kə́ majə ō, kə́ nge ra dɔ ndūí tə́ ō. Ḭ̄ ɔ́jə kadə̄ ḭ̄ i de kə́ ra dɔ ndūí tə́ tū yá̰á̰ kə́ sḛ́ý beē tə́ ní, m-ā m-ə̄ndāī dɔ yá̰a̰ kə́ ngá̰ý gə̄ tə́. Ī-reē ī-rāā rɔ̄nel̄ kə kɔ́ɔ̄í. 22Nge ń taā sə́lē dūbú kutə jōó ní reē ngɔr rɔ̄n tə́ ō, ba ədan na:

Kɔ́ɔ̄ḿ, ī-ɓɔ̄ɔ̄m̄ sə́lē i dūbú kutə jōó, ba á̰a̰ā̰, m-ə́nge sə́lē kə́ rang dūbú kutə jōó dɔ madə̄ tə́ ɓáý to̰. 23Kɔ́ɔ̄n ədan na:

Majə, ḭ̄ i nge kəla kə́ majə ō, kə́ nge ra dɔ ndūí tə́ ō. Ḭ̄ ɔ́jə kadə̄ ḭ̄ i de kə́ ra dɔ ndūí tə́ tū yá̰á̰ kə́ sḛ́ý beē tə́ ní, m-ā m-ə̄ndāī dɔ yá̰á̰ kə́ ngá̰ý gə̄ tə́. Ī-reē ī-rāā rɔ̄nel̄ kə kɔ́ɔ̄í. 24Nge ń taā sə́lē dūbú kutə kógə̄ḿ ní reē yān ō, ba ədan na:

Kɔ́ɔ̄ḿ, m̄-ger̄ kadə̄ ḭ̄ i de kə́ hálí ngan̄g ngá̰ý. Ḭ̄ ə́ja kōō loo kə́ ī-dubə̄ kōō tū tə́ aĺ tə́ ō, ā ɔ́ý yá̰a̰ i loo kə́ ī-ɓōkə́ yá̰a̰ tū tə́ aĺ tə́ ō. 25m̄-ɓōĺ, adə̄ m-āw̄ m̄-ɓɔ̄ɔ̄ sə́lē yāí nang tə́. Ngarā̰ kum sə́lē yāí ní n toó: Ī-taā. 26Banī kɔ́ɔ̄n ní tél ədan na:

Ḭ̄ i nge kəla kə́ majaĺ ō, kə́ nge yay ō. Ḭ̄ ī-ger̄ kadə̄ mā i de kə́ nge kəja kōō loo kə́ m̄-dubə̄ kōō tū tə́ aĺ tə́ ō, nge kɔy yá̰a̰ loo kə́ m̄-ɓōkə́ yá̰a̰ tū tə́ aĺ tə́ ō. 27I beé ní, majə kadə̄ ə̄ndā sə́lē yāḿ ɓē ngé rāań kəla gə̄ tə́, kadə̄ ré m̄-tél anī, m-ə́ngé yá̰a̰ yāḿ ō, m-ə́ngeń manə̄n dɔ tə́ ō. 28I beé ɓáá ní, ī-taāī sə́lē kə́ dūbú kutə kógə̄ḿ kə́ jīn tə́ kɔ̄ɔ́, ādī nge kəla ń ənge sə́lē dūbú kutə mí nja jōó ní dɔ yān tə́. 29Tɔdɔ̄ deē ń ənge yá̰á̰ ní, a adə̄nən̄ madə̄ dɔ tə́ kadə̄ yá̰a̰ yān al̄ loo. Banī deē ń yá̰a̰ kəngen gətóo ní, ni kə́ sḛ́ý beē ń i jīn tə́ ní gə̄gē a taān̄ kɔ̄ɔ́. 30Ba ə̄nīī nge kəla kə́ yalyō ń toō kum til tə́ ndágá, loo ń deē a nōō ō, a máyā̰ ngāngə̄n ō tū tə́ ní tə́.

Sarya kə́ ta tɔ̄l̄ ta tə́

31Dan ń Ngōn̄ Deē a reē dan *kɔsə gɔn yān tə́ naā tə́ kə *de kə́ dɔ rā̰ tə́ gə̄ malang anī, ni a ndi dɔ kɔ̄r̄ kāgə̄ mbang yān tə́. 32Nápar de gə̄ malang a kánə̄n̄ naā yā ra non tə́. Ni a ɔr̄ kamdə́ naā tə́ tītə̄ ń nge kul̄ yá̰a̰ a ɔrə̄ń kam̄ ngán bə̄yā̰ gə̄ kə batə̄ gə̄ naā tə́ ní. 33A əndā batə̄ gə̄ dɔ jī ko̰n tə́ ō, bə̄yā̰ gə̄ dɔ jī gelən tə́ ō. 34Anī mban̄g a əda ngé gə̄ ń dɔ jī ko̰n tə́ ní na: Sḭḭ̄ ń Bɔbə́ḿ tɔ́r̄ tan dɔsí tə́ ní, ī-reēī, ī-taāī Ɓē ko̰o̰ ń rāān̄ tām̄ yāsí tə́ ta kəla gír kəndā dɔ rā̰ ō dɔ nang ō tə́ ní. 35Tɔdɔ̄ ɓō rāām̄ anī ādə̄mī yá̰a̰ kəsa ō, kəndā rāām̄ anī ādə̄mī man̄ ka̰ȳ ō. Mā i mbā a ə́hɔmī kə̄ rɔ̄sí tə́ ō. 36Rɔ̄ḿ i karī a ādə̄mī kūbə̄ ō, mo̰y rāām̄ a á̰a̰ī gōḿ ō, mā i dəngáyá a ī-reē ī-go̰ō̰mī ō. 37Anī de kə́ súmūú gə̄ ní a télən̄ yā kədan na: Kɔ́ɔ̄ɓē, i ndɔ̄ kə́ rá tə́ n j-a̰a̰ī kə ɓōó á j-adī yá̰a̰ kəsa ō, kəndā rāāī á j-adī man̄ ka̰ȳ ō ní? 38I ndɔ̄ kə́ rá tə́ n j-a̰a̰ī ḭ̄ i mbā á j-əhɔī kə̄ rɔ̄jí tə́ ō, rɔ̄í i karī á j-adī kūbə̄ ō ní? 39I ndɔ̄ kə́ rá tə́ n j-a̰a̰ī kə mo̰yo̰ó̰, aláa i kújə dəngáyá á j-aw̄ jə-go̰ō̰ī ní? 40Anī mban̄g a tél yā kədadə́ na: Ādə̄ m-ə́dásí najə̄ kə́ bo ngá̰ý, kə ndɔ̄ gə̄ malang ń ī-rāāī yá̰a̰ gə̄ ń noō kə deē kógə̄ḿ kə́ dan ngákó̰ó̰ḿ kə́ dūú ngá̰ý gə̄ ń toō tə́ ní, ī-rāāī i seḿ mā nəkɔ́.

41Gō tə́ anī, mban̄g a əda ngé gə̄ ń dɔ jī gelən tə́ ní na: Sḭḭ̄ ń Nə́ɓā ndɔ̄ĺsí ní, ɔ́tiī rɔ̄ḿ tə́ kɔ̄ɔ́, āwī kum hor kə́ a oy aĺ tə́ ń rāān̄ tām̄ yā *diabəl tə́ ō, deē yān gə̄ kə́ dɔ rā̰ tə́ ō ní tə́. 42Tɔdɔ̄ ɓō rāām̄ a ādə̄mī yá̰a̰ kəsa aĺ ō, kəndā rāām̄ a ādə̄mī man̄ ka̰ȳ aĺ ō. 43Mā i mbā a ə́hɔmī kə̄ rɔ̄sí tə́ aĺ ō, rɔ̄ḿ i karī a ādə̄mī kūbə̄ aĺ ō, mā i mo̰y ō mā i kújə dəngáyá ō a ī-reē ī-go̰ō̰mī aĺ ō. 44Ta anī nin̄ a télən̄ yā kədan ō na: Kɔ́ɔ̄ɓē, i ndɔ̄ kə́ rá tə́ n j-a̰a̰ī kə ɓōó, aláa kəndā man̄ rāāī, aláa ḭ̄ i mbā, aláa rɔ̄í i karī, aláa mo̰y rāāī, aláa ḭ̄ i dəngáyá tá j-adī yá̰a̰ aĺ ní? 45Anī mban̄g a tél yā kədadə́ na: Ādə̄ m-ə́dásí najə̄ kə́ bo ngá̰ý, kə ndɔ̄ gə̄ malang ń ī-rāāī yá̰a̰ gə̄ ń noō kə deē kógə̄ḿ kə́ dan ngákó̰ó̰ḿ kə́ dūú ngá̰ý gə̄ ń toō tə́ aĺ ní, ī-mbātíī i rāā seḿ mā nəkɔ́. 46Anī de gə̄ ní a aw̄n̄ yā kənge ndéý kə́ dan gān̄g aĺ tām̄ yā majaĺ yādə́ tə́ ō, de kə́ súmūú gə̄ a aw̄n̄ loo kə́ deē a ndi kə kumneé tū tə́ ngándáńg tə́ ō.

Currently Selected:

Najə̄ kə́ Majə yā Jeju ń Matiye ndang ní 25: BS

Highlight

Copy