Najə̄ kə́ Majə yā Jeju ń Matiye ndang ní 24

Jeju əda na a nujən̄ kə kújə yā Kɔ́ɔ̄ɓēé

(Á̰a̰ī Mark 13.1-2; Luk 21.5-6)

1Jeju teē *kújə yā Kɔ́ɔ̄ɓē tə́ a aw̄ anī, ngé ndóō yá̰a̰ yān gə̄ reēn̄ rɔ̄n tə́ ba ɔjənən̄ majə *kújə yā Kɔ́ɔ̄ɓē ní. 2Anī ni-ədadə́ na ké a̰a̰n̄ yá̰a̰ gə̄ ń noō malang wa. Kadə̄ n-ədadə́ najə̄ kə́ bo ngá̰ý, mbal̄ kógə̄ḿ kə́ to dɔ mbal̄ madə̄ tə́ kə́ de gə̄ a mbə́rē tə́nīn̄ kɔ̄ɔ́ aĺ ní gətóo. Yá̰a̰ gə̄ ń noō malang a nujən̄ kɔ̄ɔ́.

Yá̰á̰ kə́ to rɔ̄ ndoō gə̄ ō, rāā naā ndoō tə́ ō

(Á̰a̰ī Mark 13.3-13; Luk 21.7-19)

3Jeju ndi dɔ mbal̄ *kāgə̄ olibə gə̄ tə́ anī, ngé ndóō yá̰á̰ yān gə̄ reēn̄ rɔ̄n tə́ kə kéŕdə́ ba dəjenən̄ kadə̄ ədadə́ ndɔ̄ ń yá̰á̰ ń noō a rāań yá̰á̰ tə́ ní ō, kadə̄ ədadə́ yá̰á̰ ń a ɔjə dɔ ndɔ̄ télən ō, a ɔjə dɔ ta ngóy ndɔ̄ gə̄ ō ní.

4Anī ni-tél ədadə́ na:

Ə̄ndāī kum kedə̄ dɔ rɔ̄sí tə́, ī-lōōī kadə̄ deē gól̄sí. 5Tɔdɔ̄ de gə̄ ngá̰ý a unən̄ rīḿ yā reēń ba a ədan̄ na nin̄ na i *Kərist gə̄, adə̄ nin̄ a gólə̄n̄ de gə̄ ngá̰ý. 6Ā ōōī najə̄ yā rɔ̄ɔ̄ gə̄ ō, ā ōōī kōō rɔ̄ɔ̄ gə̄ ō, ba ādī ɓōĺ rāāsí alé, tām̄ i gáŕ kadə̄ yá̰a̰ gə̄ ń noō a rāān̄ yá̰a̰, banī i ta ngóy ndɔ̄ gə̄ aĺ ɓáý. 7Nápar de kógə̄ḿ gə̄ a ḭḭn̄ yā rɔ̄ɔ̄ nápar de kə́rēý gə̄ ō, gír ɓē ko̰o̰ kógə̄ḿ a ḭḭ yā kənī gír ɓē ko̰o̰ kə́ rang rɔ̄ɔ̄ ō, ɓō a əsō kə̄ loo gə̄ tə́ ō, dɔ nang a ndebə kə̄ loo gə̄ tə́ ō. 8Yá̰a̰ gə̄ ń noō malang ń a rāān̄ yá̰á̰ ní, i tītə̄ ta kəla gír rɔ̄ tōr̄ yā dəyá̰ kə́ a rāā kem beé.

9Dan ngeé ń noō tə́ ní a əlan̄sí jī de gə̄ tə́ kadə̄ a rāān̄sí kadə̄ wursí a ɔlsí ō, a tɔ̄lə̄n̄sí ō. Gíŕ nápar de gə̄ malang a imə̄n̄sí najə̄ yāḿ mā tə́. 10Dan ngeé ń noō tə́ ní, de gə̄ ngá̰ý a əya̰n̄ taā kem kɔ̄ɔ́. Nin̄ a unən̄ dɔ naā yā gātəń ō, a imə̄n̄ naā ō. 11*Ngé koō ta kə́ rɔ̄kum aĺ gə̄ a ḭḭn̄ ngá̰ý ō, a gólə̄n̄ de gə̄ ngá̰ý ō. 12Táŕ yā de gə̄ ngá̰ý a sɔl̄ kɔ̄ɔ́ sɔɔ̄ń yá̰á̰ kə́ majaĺ kə́ i ngá̰ý. 13Banī deē n a əhɔ sásáp mbóńg ta tɔ̄l̄ ta tə́ ní, a ajə. 14Najə̄ kə́ Majə kə́ dɔ Ɓē ko̰o̰ ń toō tə́ ní, a ənīn̄ mbērən kə̄ loo gə̄ tə́ malang dɔ nang tə́, kadə̄ a tél i najə̄ kə́ kum tə́ kə̄ no nápar de gə̄ tə́ malang. Tā anī ta ngóy yá̰a̰ a reē tā.

Yá̰á̰ kə́ majaĺ ngá̰ý ń a reē ní

(Á̰a̰ī Mark 13.14-23; Luk 21.20-24)

15Dan ń ā á̰a̰ī yá̰á̰ kə́ majaĺ kə́ to yḛr kum ń Daniel *nge koō ta əda najə̄n ní ndi kem *loo kə́ táĺ tə́ anī, ādə̄ nge tə́da najə̄ ní ger̄ kum najə̄ ní majə, 16ādə̄ ngé gə̄ ń ndin̄ dɔ nang kə́ Jude tə́ ní, a̰ȳn̄ naā kə̄ dɔ mbal̄ gə̄ tə́ ō, 17ādə̄ nge ń ndi dɔ kújú dɔɔ́ ní, risə aw̄ kújú kun yá̰á̰ kə́rēý tə́ yā kaw̄ń aĺ ō, 18ādə̄ nge ń ndi ndɔrɔ́ ní tél aw̄ ɓēé kun kūbə̄ yān tə́ aĺ ō. 19Kem ndɔ̄ gə̄ ngeé ń noō tə́ ní rɔ̄ ndoō i yā kó kem gə̄ ō, i yā dəyá̰ gə̄ ń ngáń kə́ ta mba tə́ gə̄ i jīdə́ tə́ ní ō. 20Ī-ndɔ̄yī Nə́ɓā ādī ka̰ȳ naā yāsí ní, i nāā kūl̄ tə́ aĺ ō, i ndɔ̄ *sabat tə́ aĺ ō. 21Tɔdɔ̄ kem ndɔ̄ gə̄ ngeé ń noō tə́ ní, wur de gə̄ a ɔldə́ ngá̰ý. Wur kɔl kə́ tītə̄ ń noō gətóo ta kəla gír tə́ bátə́ ngɔlaā ń toō tə́ ō, a to gogə́ to̰ aĺ bátə́ ō. 22Ré gāngə̄n̄ ta ndɔ̄ gə̄ ní kɔ̄ɔ́ aĺ anī, de kə́ yā kajə a gətóo. Banī a gāngə̄n̄ ta kɔ̄ɔ́ sɔɔ̄ń ngé gə̄ ń Nə́ɓā gə̄rādə́ ní.

23Kem ndɔ̄ gə̄ ngeé ń noō tə́ ní, ré de kə́rēý ədasí na *Kərist na i laā, aláa ni na i nú anī, ī-lōōī taā kemən. 24Tām̄ Kərist kə́ rɔ̄kum aĺ gə̄ ō, *ngé koō ta kə́ rɔ̄kum aĺ gə̄ ō a ḭḭn̄, ba a rāān̄ yá̰á̰ kə́ yáā kə́ bo ngá̰ý gə̄ ō, yá̰á̰ kə́ to kɔr kum gə̄ ō yā góləń de gə̄. Adə̄ nə́ngētə́ asə i naā tə́ anī a gólə̄n̄ ngé gə̄ ń Nə́ɓā gə̄rādə́ ní gə̄gē. 25Á̰a̰ī, m̄-tāāsí kété kɔ̄ɔ́.

26Adə̄ ré ədan̄sí na ni i kem dəla loo tə́ anī, ī-lōōī kaw̄. Aláa ré ədan̄sí na i ni n ɓɔ̄ɔ̄ rɔ̄n kem kɔgə̄rɔ̄ looó toō anī, ī-lōōī taā kem. 27Tɔdɔ̄ i tītə̄ ń man̄ tel̄ dūn̄ ɓē tə́ anī, unjə̄ teē no ɓē tə́ ní, ta reē Ngōn̄ deē a to i tītə̄ noō ō. 28Loo ń nīń dā̰ i tū tə́ ní, māl̄ gə̄ a kánə̄n̄ naā tū tə́ ō.

Ta reē Ngōn̄ deē

(Á̰a̰ī Mark 13.24-27; Luk 21.25-28)

29Sḛ́ý gō wur kɔl gə̄ kə́ kem ndɔ̄ gə̄ ngeé ń noō tə́ anī, mbang a ndul ō, nāā a ndaa to̰ aĺ ō, tə́yō̰ kə́ dɔ rā̰ tə́ gə̄ a tə́sōn̄ dɔ nang tə́ ō, ngé tɔ́gə́ kə́ dɔ rā̰ tə́ gə̄ a ndewn̄ ō. 30Loo ń noō tə́ yá̰á̰ kə́ ɔjə dɔ Ngōn̄ Deē a teē dɔ rā̰ tə́. Dan ngeé ń noō tə́ ní, gír ɓē kə́ dɔ nang tə́ gə̄ malang a sɔ̄mə́n̄, nin̄ a əndan̄ kadədə́ ō, a a̰a̰n̄ Ngōn̄ Deē loo reē tə́ dɔ kil̄ man̄ gə̄ tə́ dɔ rā̰ tə́, kə tɔ́gə́ kə́ ngá̰ý ō, kə *kɔsə gɔn kə́ ngá̰ý ō. 31Loo ń kōō bərúnjə́ kə́ bo a ɓār̄ anī, ni a əla deē yān kə́ dɔ rā̰ tə́ gə̄ kadə̄ aw̄ ɔyn̄ ngé gə̄ ń ni-gə̄rādə́ ní kíl dɔ nang kə́ sɔ́ gə̄ tə́. A əlan̄ gír i ta ngóy dɔ nang kə́ dām̄ kə́rēý tə́, bátə́ ugə̄n̄ ta ngóyn kə́ dām̄ kə́ rang tə́.

Kum najə̄ yā kāgə̄ kótə̄

(Á̰a̰ī Mark 13.28-31; Luk 21.29-33 )

32Majə kadə̄ ī-gerī kum najə̄ yā kāgə̄ kótə̄: Ré ta jīn gə̄ ton̄ mbōl̄ ō, tél a sitən̄ gogə́ ō anī, sḭḭ̄ ī-gerī kadə̄ dɔ ɓar i ngɔr. 33Adə̄ ré á̰a̰ī yá̰a̰ gə̄ ń noō malang anī, majə kadə̄ ī-gerī kadə̄ Ngōn̄ Deē a reē ngɔr, ni i ta róbə́ tə́. 34Ādə̄ m-ə́dásí najə̄ kə́ bo ngá̰ý, de kə́ ngɔlaā gə̄ ń toō a oyn̄ malang alé n yá̰a̰ gə̄ ń noō malang a rāān̄neé yá̰á̰ ní. 35Dɔ rā̰ ō dɔ nang ō a mānə̄n̄, banī najə̄ yāḿ a mān̄ aĺ bátə́.

I Nə́ɓā ngóy n ger̄ kum mbang kə́ ta tɔ̄l̄ ta tə́

(Á̰a̰ī Mark 13.32-37; Luk 17.26-30,34-36)

36Banī najə̄ kə́ dɔ ndɔ̄ ní tə́ ō, kum mbang ní tə́ ō ní, de kə́ ger̄ gətóo. De kə́ dɔ rā̰ tə́ gə̄ gerə̄n̄ aĺ ō, Ngōn̄ ger̄ aĺ ō, ba i Bɔbə̄n tá ngóy. 37Yá̰a̰ gə̄ ń rāān̄ yá̰a̰ ɓāl̄ yā Noe tə́ ní, ta reē Ngōn̄ Deē tə́ anī, a rāān̄ yá̰a̰ ō. 38Tɔdɔ̄ kété tá kadə̄ man̄ kaw̄ taā loo ní, de gə̄ əsan̄ yá̰a̰ ō, a̰ȳn̄ yá̰a̰ ō, taān̄ naā ō, adə̄n̄ ngáńdə́ gə̄ aw̄n̄ ngawaá ō, bátə́ ugə̄ń ndɔ̄ ń Noe udəń kem to bo tə́ ní. 39De gə̄ ndin̄ dāȳ bátə́ man̄ kaw̄ reē taāńdə́ adə̄ udən̄ kɔ̄ɔ́ malang. Ní, ta reē Ngōn̄ Deē a to i tītə̄ ń noō ō. 40Ndɔ̄ ń noō tə́ ní, ré de gə̄ i jōó kem ndɔrɔ́ anī, a unən̄ kógə̄ḿ ba a əya̰n̄ madə̄n kɔ̄ɔ́. 41Ré dəyá̰ gə̄ jōó ra a usən̄ kōō kə mbal̄ kusə yá̰á̰ anī, a unən̄ kógə̄ḿ ba a əya̰n̄ madə̄n kɔ̄ɔ́. 42I beé ní, ī-ndiī dɔ rɔ̄sí tə́, tɔdɔ̄ ndɔ̄ ń Kɔ́ɔ̄ɓē yāsí a reēń ní, ī-gerī alé. 43Sḭḭ̄ ī-gerī yá̰á̰ ń toō majə: Ré de kə́ kɔ́ɔ̄ kújə ger̄ mbang ń nge ɓogə a reēń dan ndɔ̄ɔ́ ní anī, a ndi kə kumneé njáý njáý, ba a əya̰ nge ɓogə kadə̄ mbutə kum ndogə̄ mbal̄ alé. 44I tām̄ najə̄ ń noō tə́ n majə kadə̄ sḭḭ̄ ī-ndiī dɔ rɔ̄sí tə́ majə ní, tɔdɔ̄ Ngōn̄ Deē a reē i kum mbang ń sḭḭ̄ ī-gírī dɔ tə́ aĺ ní tə́.

Nge kəla kə́ nge rāā yá̰a̰ kə gō ndū kɔ́ɔ̄n ō, kə́ nge rāā yá̰a̰ kə gō ndū kɔ́ɔ̄n aĺ ō

(Á̰a̰ī Luk 12.41-48)

45Nge kəla kə́ nge ra dɔ ndūn tə́ ō, kə́ nge kum kedə̄ ō ń kɔ́ɔ̄n əndā kəla ka̰a̰ gō ngé kəla madə̄n gə̄ dɔn tə́, kadə̄ adə̄də́ yá̰a̰ kəsa yādə́ kə kum mbangneé ní i náā? 46Rɔ̄nel̄ i kə nge kəla ngeé ń toō loo ń kɔ́ɔ̄n tél anī, əngen ta kəla ní tə́ ní. 47Ādə̄ m-ə́dásí najə̄ kə́ bo ngá̰ý, kɔ́ɔ̄n ní a əndān dɔ yá̰a̰ kənge yān gə̄ tə́ malang. 48Ba ré nge kəla ní i de kə́ majə alé, adə̄ əda kə̄ kemən tə́ na kɔ́ɔ̄n na reē láẃ alé, 49ba udə kə̄ rɔ̄ ngé kəla madə̄n gə̄ tə́ a tə̄ndādə́ ō, a əsa yá̰a̰ ō, a a̰ȳ yá̰a̰ ō, naā tə́ kə ngé rāā ɓəlo kasə gēé anī, 50kɔ́ɔ̄ nge kəla ngeé ń toō a reē i ndɔ̄ ń ni-ngóōn tū tə́ aĺ tə́ ní ō, kum mbang ń ní ger̄ aĺ tə́ ní ō. 51Kɔ́ɔ̄n a əndan kənda kə́ majaĺ ngá̰ý ō, a ənīn loo yā ngé gól̄ loo gə̄ tə́ kadə̄ a nōō ō a máyā̰ ngāngə̄n ō.

Currently Selected:

Najə̄ kə́ Majə yā Jeju ń Matiye ndang ní 24: BS

Highlight

Copy