Makətūbə̄ yā Jeremi 46
46
1Gō tə́ anī, Kɔ́ɔ̄ɓē ɔr̄ najə̄ kə́ dɔ nápar de gə̄ kə Jeremi.
Rɔ̄ɔ̄ rāā de kə́ Ejiptə gə̄ kem ɓē kə́ Karkemis tə́
2Najə̄ kə́ dɔ ɓē kə́ Ejiptə tə́ ō, dɔ ngé rɔ̄ɔ̄ gə̄ yā *Parao̰ Neko mban̄g kə́ Ejiptə tə́ ō. Neko ndi i Karkemis, kadə bā Opəratə tə́ n Nabukodonosor, mban̄g kə́ *Babilon tetənneé rɔ̄ɔ̄ ní tə́. I kem ɓāl̄ kə́ nge ko̰ sɔ́ ń Joakim kə́ ngōn̄ Josias ndiń mban̄g Juda tə́ ní.
3Ī-tə́ndāī de kə́ dūú gə̄ ō,
kə́ bo gə̄ ō, kə ta naá.
Ī-njə̄rāī kə̄ kété kə̄ ta rɔ̄ɔ̄ tə́!
4Ī-do̰ō̰ī púsə́ gír sə́nda gə̄ tə́.
Sḭḭ̄ ngé kal̄ sə́nda gə̄, ālī dɔ sə́nda gə̄ tə́!
Ī-raī kə ta naá kə jākā gində̄ yāsí gēé.
Úsiī kum nənga yāsí gə̄ ādə̄ ndə́lēn̄ pipir.
Ə́laī kūbə̄ gində̄ gə̄ rɔ̄sí tə́.
5I tām̄ rí tə́ á m-á̰á̰də́ ra a ndewn̄ ní?
Nin̄-télən̄ kə gōdə́.
Ɓōĺ əsō kə̄ loo gə̄ tə́ malang.
Najə̄ ń Kɔ́ɔ̄ɓē əda ní n noó.
6De kə́ ɔl ngá̰ý, asə teē kum tə́ aĺ ō,
de kə́ əhɔ rɔ̄n tɔgə ngá̰ý, asə kajə rɔ̄n aĺ ō.
Nin̄ bḭ́ḭ̄n̄ ō, tə́sōn̄ ō, dɔ gɔ́sə bā Opəratə tə́,
dām̄ mbɔ́r ɓē kə́ ko̰ó̰ tə́.
7I náā n to tītə̄ bā Nil kə́ ḭḭ ō,
tītə̄ bā bo gə̄ kə́ nēgə́n̄ wut wut ō ní?
8I Ejiptə n to tītə̄ bā Nil kə́ ḭḭ ō,
tītə̄ bā bo gə̄ kə́ nēgə́n̄ wut wut ō ní.
Ni-əda na: M-ā m-ḭ́ḭ kúkúkú yā taā dɔ dɔ nang.
M-ā m̄-nujə ɓē gə̄ ō, de kə́ kemeé gə̄ ō.
9Ngé sə́nda gə̄, ə̄nīī rɔ̄ɔ̄.
Ngé púsə́ sə́nda gə̄, ā̰yī ngɔ̄də̄ ngá̰ý.
Ādə̄ ngé kəhɔ rɔ̄də́ tɔgə ngá̰ý gə̄
əndan̄ loo teēn̄, adə̄ i *Kus gə̄ ō,
Put gə̄ ō, ń gerə̄n̄ kəhɔ der majə ní ō,
Lud gə̄ ń gerə̄n̄ kur gərā majə ní ō.
10Banī ndɔ̄ ní i ndɔ̄ kə́ kadə̄ Nə́ɓā,
Kɔ́ɔ̄ɓē kə́ bo kə́ tɔ́gən i ngá̰ý daləń ba̰ā̰ dɔ madə̄ ba̰ā̰n gə̄ tə́.
Kaskar ń nujə loo ní, əsa yá̰a̰ ndān̄ ō,
mósə de gə̄ rāān kə́ kasə tə́ ō.
I yá̰a̰ kəsa kə́ bo ngá̰ý kə́ ndējə̄ Nə́ɓā,
Kɔ́ɔ̄ɓē kə́ bo kə́ tɔ́gən i ngá̰ý,
kem ɓē kə́ mbɔ́r ɓē kə́ ko̰ó̰ tə́, kadə bā Opəratə tə́.
11Ngōmandə kə́ Ejiptə, āw̄ Galaad
ī-sāā bəto kāgə̄ kə́ yā rāā ta do tə́.
Ī-rɔ̄ɔ̄ dɔ rɔ̄í tə́ kə kḭ̄ḭ̄ gə̄ kə́ gíŕdə́ i ngá̰ý ɓá tā, ba i ndańg karī,
yá̰á̰ kógə̄ḿ kə́ asə kadī rɔ̄ ngān̄g gətóo.
12Nápar de gə̄ oōn̄ najə̄ rɔ̄sɔl̄ yāí, tɔdɔ̄ kɔŕ yāí taā dɔ nang.
Nja go̰ rɔ̄ɔ̄ kógə̄ḿ tə́gā yā madə̄n
adə̄ teē tə́sōn̄ jōó mbak.
Taān̄ ɓē kə́ Ejiptə
13Kɔ́ɔ̄ɓē ɔr̄ najə̄ kə Jeremi *nge koō ta əda na: Nabukodonosor, mban̄g kə́ *Babilon a reē yā kənda ɓē kə́ Ejiptə.
14Yá̰á̰ ń a rāā yā rāā yá̰á̰ ní Ə̄nīī mbēr̄də́ Ejiptə tə́,
ə́daī ādə̄ de gə̄ oōn̄ Migədol ō, Mempis ō, Tapanes ō.
Ədaī na: Ɔ̄r̄ dɔí dɔɔ́! Ī-ndi dɔ rɔ̄í tə́!
Á̰a̰ā̰, kaskar nujə loo kə gō gidií.
15I rí kə́ beē, Apis a̰ȳ kɔ̄ɔ́, bəra man̄g yāí ra gotoó alé.
Kɔ́ɔ̄ɓē mbəren kə̄ gogə́,
16adə̄ bibə́rī to ɓōĺ ngá̰ý.
De kə́ dəngam gə̄ teē tə́sōn̄ dɔ naā tə́.
Nin̄ ədan̄ na: J-ḭḭ̄ dɔɔ́, jə-tél j-awī gogə́ dan gír deē yājí gə̄ tə́ ō,
kem ɓē kojəjí tə́ ō, sa̰y kɔ̄ɔ́ ta kaskar kə́ kumən o̰o̰n aĺ tə́.
17De gə̄ a ɓārə́n̄ *Parao̰, mban̄g kə́ Ejiptə tə́ na i
kōō yá̰á̰ kə́ ɓār̄ ngá̰ý kanjə̄ kumən.
18Mban̄g ń rīn na i Kɔ́ɔ̄ɓē kə́ bo kə́ tɔ́gən i ngá̰ý ní əda na:
Tītə̄ ń m̄-ndiń kə kumḿ noō, ni a reē, a to i tītə̄ mbal̄ Tabor kə́ ra dan mbal̄ madə̄n gə̄ tə́ beē ō,
i tītə̄ mbal̄ Karmel kə́ ra dan bā bo tə́ beē ō!
19Ejiptə gə̄, ī-kánī yá̰a̰ mbā yāsí gə̄ na
a əhɔn̄sí yā kaw̄ sesí dɔ nang kə́ rang tə́.
Mempis a téĺ ndágə loo kə́ to kum ko̰ ō,
ɓē kə́ hor nujəń ō, kə́ deē gətóo tū tə́ ō.
20Ejiptə i mandə man̄g kə́ majə ngá̰ý,
banī kón̄g mba gə̄ ḭḭn̄ dām̄ mbɔ́r ɓē kə́ ko̰ó̰ tə́ reē əhɔn̄ loo dɔn tə́.
21Áskar kə́ ngé rɔ̄ɔ̄ gír naraá ɓēé looneé gə̄
ton̄ tītə̄ ngán man̄g kə́ yembə majə gə̄ beé.
Nin̄ gə̄gē a tūrə̄n̄ gándə́də́ yā ka̰ȳ naā tə́ malang.
A ran̄ gotoó alé.
Tɔdɔ̄ kə́ rɔ̄kum gə̄ tə́ ní, ndɔ̄ ń kadə̄ nujəneé sák sák kɔ̄ɔ́ tə́ ní ugə̄.
I ndɔ̄ ń m-ā m-ādə̄ a ɔjəmən̄neé kəla rāādə́ gə̄ ní.
22Dan ń ni oō kōō de kə́ a njə̄rā kə tɔ́gəneé anī,
a̰ȳ kanjə̄ kadə̄ kōōn ɓār̄ tītə̄ yā lī beé.
De gə̄ a reēn̄ kə̄ rɔ̄n tə́ kə kə̄ngāá tītə̄ ngé tə́gā kāgə̄ gə̄ beé.
23Ká ré ku kāgə̄ yān nderə̄ń tītə̄ rí gə̄gē anī,
ī-tə́gāī kāgə̄ gə̄ kə́ tū tə́ kɔ̄ɔ́. Najə̄ ń Kɔ́ɔ̄ɓē əda ní n noó.
Kutədə́ i ngá̰ý tɔȳ yim̄ gə̄, adə̄ deē asə tə́dádə́ alé.
24Əlan̄ ɓē kə́ Ejiptə jī gír de kə́ dām̄ mbɔ́r ɓē kə́ ko̰ó̰ gə̄ tə́,
əlan̄ rɔ̄sɔl̄ dɔn tə́.
25Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā *Israel əda na: M-ā m̄-rāā yá̰á̰ kə́ tōr̄ kə Amon kə́ Tebə tə́ ō, *Parao̰ ō, ɓē kə́ Ejiptə ō, nə́ɓā kə́ kemeé gə̄ ō, mban̄g gə̄ ō. M-ā m-ə́nda *Parao̰ ō, de gə̄ malang ń ənīn̄ kemdə́ adə̄nən̄ ní ō. 26M-ā m-ə́ládə́ kem jī ngé ndə̄ngādə́ yo gə̄ tə́, adə̄ i kem jī Nabukodonosor mban̄g kə́ *Babilon tə́ ō, kem jī ngé kəla yān gə̄ tə́ ō.
Gō tə́ anī, de gə̄ a télən̄ yā ndi Ejiptə tə́ tītə̄ kə́ kété. Najə̄ ń Kɔ́ɔ̄ɓē əda ní n noó.
A gāngə̄n̄ dɔ Israel
(Á̰a̰ī Jer 30.10-11)
27Ḭ̄ nge kəla yāḿ Jakob, ī-lōō ɓōĺ. Israel, ī-lōō ndebə.
M-ā m̄-gān̄g dɔí jī ɓē kə́ sa̰y ngá̰ý gə̄ tə́ ō,
m-ā m̄-gān̄g dɔ ngán kaaí gə̄ dɔ nang ń
əhɔ aw̄n̄ sedə́ tū tə́ tə́ ní ō.
Jakob tél a reē, ni ɓōĺ yá̰á̰ kógə̄ḿ aĺ bátə́.
Ni-ndi jəke kanjə̄ sōl̄ yá̰á̰ kógə̄ḿ, de kə́ njə́ɓan̄ to̰ gətóo.
28Ḭ̄ nge kəla yāḿ Jakob, ī-lōō ɓōĺ, mā i naā tə́ seí.
Nápar de gə̄ malang ń
m̄-tə̄ndā m̄-tḭ̄ḭ̄sí dɔ dandə́ tə́ ní, m-ā m̄-rāādə́ kadə̄ gətóon̄ kɔ̄ɔ́.
Ba ḭ̄ tá, m-ā m̄-rāā kadə̄ ā ī-gətóo kɔ̄ɔ́ kə taá malang alé.
M-ā m-ə́ndaī najə̄ yá̰a̰ rāāí gə̄ tə́ kanjə̄ kəndā njaḿ dɔ nge kə́rēý tə́.
Currently Selected:
Makətūbə̄ yā Jeremi 46: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
