Makətūbə̄ yā Ojee 5
5
Ngé ndóō Israel gə̄ yá̰á̰ kə́ gōtə́ aĺ gə̄
1Kɔ́ɔ̄ɓē əda na: Sḭḭ̄ *ngé tun̄ yá̰a̰ gə̄, ōōī majə,
sḭḭ̄ ngār gə̄ yā *Israel gə̄, ī-nēlī mbīsí,
ba sḭḭ̄ de kə́ ndogó mbangāá gə̄, ī-teēī mbīsí!
Majə kadə̄ ī-gāngī sarya kə́ gōtə́.
Ɓá tā banī sḭḭ̄ ə́hɔī de gə̄ kə gūmbūú Misəpa.
Sḭḭ̄ ī-selíī réńg nodə́ tə́ dɔ mbal̄ Tabor tə́.
2Nin̄ ndērə̄n̄ bəlo kə́ bo ngá̰ý Sitim.
I beé ɓá ní, mā m-ā m-ə́ndádə́ malang.
3Mā m̄-ger̄ de gə̄ kə́ gír ɓē yā *Epəraim tə́ majə ō,
yá̰á̰ kə́ *Israel aw̄ń kə́
to loo mundə̄ tə́ tām̄ yāḿ tə́ gətóo ō.
sḭḭ̄ ī-sə̄lāī *Epəraim adə̄ rāā ájə́ba,
ba ngɔlaā ɓáa Israel gə̄ malang i de gə̄ kə́ rāān̄də́
adə̄ télən̄ de kə́ yḛr gə̄ kɔ̄ɔ́.
4Yá̰á̰ ń Israel gə̄ rāān̄ ní, adə̄də́ ta róbə́
tél reē gogə́ rɔ̄ Nə́ɓā yādə́ tə́ alé.
A̰á̰ā̰, néĺ ájə́ba kógə̄ḿ əla dandə́ tə́ ō,
nin̄ gerə̄n̄ Kɔ́ɔ̄ɓē aĺ ō.
5Kɔjə rɔ̄ yā *Israel əda najə̄ dɔn tə́.
Israel nin̄ kə *Epəraim əsōn̄
i najə̄ yá̰a̰ rāādə́ kə́ gōtə́ aĺ tə́.
*Juda əsō naā tə́ sedə́ tītə̄ yādə́ ō.
6Nin̄ sāān̄ Kɔ́ɔ̄ɓē i kə batə̄ yādə́ gə̄ ō,
man̄g yādə́ gə̄ ō ń aw̄n̄ yā tɔ̄l̄ ba ndējə̄ ní.
Banī nin̄ a əngenən̄ alé, tɔdɔ̄ ni əya̰də́ ba aw̄ sa̰y kɔ̄ɔ́.
7Nin̄ ran̄ dɔ ndūdə́ tə́ kə Kɔ́ɔ̄ɓēé alé,
ojən̄ ngáń kə́ loo kaya tə́ gə̄.
Ngɔlaā ní, asə nāā kógə̄ḿ anī, a nujən̄ ɓē yādə́ kɔ̄ɔ́.
Epəraim nin̄ kə Juda rɔ̄ɔ̄n̄ naā
8Kɔ́ɔ̄ɓē əda na: Ī-kɔ̄ríī tōw̄ gajə batə̄ kem ɓē kə́ Gibea tə́,
ī-kɔ̄ríī bərúnjə kem ɓē kə́ Rama tə́!
Ī-tāāī de kə́ Bet Aben gə̄.
Sḭḭ̄ de kə́ gír ɓē yā Benjamḛ tə́ gə̄,
madə̄ ba̰ā̰ a rə̄ngō rɔ̄n i gidəsí tə́ n a ənīńsí rɔ̄ɔ̄ ní.
9Ndɔ̄ ń m-ā m-ə́ndań de gə̄ kə́ gír ɓē yā *Epəraim tə́ ní,
loo yādə́ a tél dəla loo.
Yá̰á̰ kə́ ɔjə dɔ gír ɓē gə̄ yā *Israel ń
m-ə́da najə̄n kété no tə́ beé ní,
i yá̰á̰ kə́ a rāā yá̰a̰ rɔ̄kum.
10Ngār kə́ *Juda tə́ gə̄ a rāān̄ i hál
de kə́ ngé ndɔ́tə̄ kə dɔ nin̄ ndɔr̄ yādə́ gēé.
Banī m-ā m̄-ɔ̄r̄ man̄ wōn̄g yāḿ dɔdə́ tə́.
11Yá̰a̰ rāā kə́ gōtə́ aĺ rējə̄ *Epəraim kɔ̄ɔ́.
De gə̄ ɓōlə́n̄ gidə yá̰a̰ yān gə̄ alé,
i tām̄ ni gḛy ngɔ̄də̄ gō nél.
12I beé ɓá ní, mā m-ā m̄-to i tītə̄ do
kə́ kumən rúu beé tām̄ yā Epəraim tə́,
tītə̄ do kə́ edə̄ aĺ beē tām̄ yā Juda gə̄ tə́.
13Epəraim ger̄ kadə̄ ni i mo̰y ō,
*Juda ger̄ kadə̄ ni-ənge do ō.
Loo ń noō tə́ Epəraim tūr̄ rɔ̄n kə̄ rɔ̄ Asiri tə́,
ni-əla de gə̄ rɔ̄ mban̄g kə́ bo kə́ ɓē ngeé ń noō tə́.
Banī mban̄g ní asə rāā kadə̄ rɔ̄sí ngáā aĺ ō,
asə rāā kadə̄ do yāsí edə̄ aĺ ō.
14Tɔdɔ̄ i mā Kɔ́ɔ̄ɓē n m-ə̄nī Epəraim rɔ̄ɔ̄ tītə̄ ɓɔl beé ní ō,
m̄-rɔ̄ɔ̄ Juda tītə̄ balsáa ɓɔl beé ní ō.
I mā n m-ā m̄-rə́yā̰sí naā tə́ ní.
Gō tə́ anī, m-ā m-úńsí yā kaw̄ sesí tītə̄ batə̄ beé ō,
de kə́ yā taāsí jīḿ tə́ a gətóo ō.
Epəraim nin̄ kə Juda tél reēn̄ rɔ̄ Nə́ɓā tə́
15Mā Kɔ́ɔ̄ɓē m-ɔ́tə m-āw̄,
m-ā m̄-tél yā kaw̄ gogə́ ɓēé,
bátə́ kadə̄ nin̄ gerə̄n̄ yá̰a̰ rāādə́ kə́ gōtə́ aĺ
ba tūrə̄n̄ rɔ̄də́ kə̄ rɔ̄ḿ tə́.
Dan ń nin̄ a ndin̄ dan wur kɔl tə́ anī, a sāāmə̄n̄.
Currently Selected:
Makətūbə̄ yā Ojee 5: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
