Makətūbə̄ yā Ojee 4

Sarya ń Nə́ɓā rāā kə gír deē yān gēé ní

1Kɔ́ɔ̄ɓē a rāā i sarya kə de kə́ kem ɓēé gēé.

Sḭḭ̄ *Israel gə̄, ōōī najə̄ ń ni-ɔr̄ ní:

Laā ní deē ra dɔ ndūn tə́ to̰ aĺ ō,

deē rāā majə to̰ aĺ ō.

De kə́ kem ɓēé ń toō tə́ gə̄ gerə̄mə̄n̄ kə́ Nə́ɓā tə́ to̰ alé.

2Nin̄ ndɔ̄lə́n̄ loo kə̄ loo gə̄ tə́ ō, sorə̄n̄ ō,

tɔ̄lə̄n̄ de gə̄ ō, əhɔn̄ de gə̄ dɔ gúú tə́ aw̄n̄ sedə́ kɔ̄ɔ́ ō.

Nin̄ rāān̄ rāȳ ō, rāān̄ yá̰a̰ i kə tɔ́gə́də́ ō, kəla rāādə́ i tɔ̄l̄ de gə̄ ō.

3I tām̄ najə̄ ń toō tə́ n loo laa a rāā dɔ nang

kə́ kem ɓēé kadə̄ tutə káḿ káḿ ní.

De kə́ kem ɓēé gə̄ malang ō, dā̰ kə́ bembeé gə̄ ō,

yel̄ kə́ dɔɔ́ gə̄ ō ní, tɔ́gə́də́ a gətóo i ndɔ̄ naā tə́ gidə kógə̄ḿ.

Kānjə̄ gə̄ kə́ kum bā bo tə́ gə̄gē a gətóon̄ kɔ̄ɔ́.

Ngé tun̄ yá̰a̰ gə̄ télən̄ gō Nə́ɓā tə́ kɔ̄ɔ́

4Kɔ́ɔ̄ɓē əda na: Á̰a̰ī majə tá!

Deē a əndā najə̄ dɔ deē tə́ kə̄ noó aĺ ō,

deē a kɔ̄l̄ i kə de gēé malang aĺ ō.

M-ā m̄-rāā sarya i sesí sḭḭ̄ *ngé tun̄ yá̰a̰ gēé.

5Ā ī-bḭ́ḭ̄ dɔ róbə́ tə́ dan kadə ndaá ō,

ndɔ̄ɔ́ anī, *ngé koō ta gə̄ a bḭ́ḭ̄n̄ dɔ róbə́ tə́ tītə̄ yāsí ō.

M-ā m̄-rāā kadə̄ kó̰ó̰sí *Israel a ndi kə tan kə́ mbóó ō.

6Gír deē yāḿ gə̄ a oyn̄ i tām̄ nin̄ ger̄mə̄n̄ alé.

Sḭḭ̄ ī-mbātíī gerə̄m̄. I tām̄ najə̄ ń toō tə́ n m̄ gḛy najə̄ yāsí to̰ aĺ ní.

Sḭḭ̄ i *ngé tun̄ yá̰a̰ yāḿ gə̄ to̰ alé.

Dɔsí ndígə̄nal yá̰á̰ ń Nə́ɓā yāsí ndóōsí ní kɔ̄ɔ́ ɓá ní,

dɔḿ mā a ndígə̄nal ngáńsí gə̄ ō.

7Ngé tun̄ yá̰a̰ gə̄ malang kanjə̄ kɔr̄ deē

kógə̄ḿ kə̄ gogə́ ní, mānə̄n̄ dɔ ndūḿ.

I beé ɓá ní, m̄ ī-tūr̄ gíŕ yá̰a̰ kɔjə rɔ̄ yādə́ kadə̄ téĺ yá̰a̰ rɔ̄sɔl̄.

8Nin̄ əsan̄ dā̰ yá̰á̰ kə́ tun̄ gə̄ ń gír deē yāḿ gə̄

ndējə̄n̄ dan ń nin̄ mānə̄n̄ dɔ ndūḿ ní.

Yá̰á̰ ń nin̄ gḛyn̄ ní i kógə̄ḿ beē ngóy:

I kadə̄ gír deē yāḿ gə̄ rāān̄ yá̰á̰ kə́ gōtə́ aĺ.

9Banī m-ā m̄-rāā *ngé tun̄ yá̰a̰ gə̄ yá̰á̰ ń

m̄-rāā kə gír deē yāḿ gēé ní:

Yá̰á̰ ń m-ā m̄-rāā sedə́ ní, sɔɔ̄ń i háĺdə́ ō,

yá̰á̰ ń nin̄ rāān̄ ní, m-ā m̄-téləń yā kadə̄də́ gogə́ ō.

10Nin̄ a əsan̄ yá̰a̰, banī ɓō a rāādə́ ngándáńg.

A rāān̄ ájə́ba, banī a ojən̄ ngōn̄ alé.

A̰á̰ā̰, mā ń i Kɔ́ɔ̄ɓē ní, nin̄ əya̰mə̄n̄ kɔ̄ɔ́ ba rāānəń ájə́ba.

11Rāā ájə́ba ō, ka̰ȳ kasə *nduú ō,

rāādə́ adə̄ nin̄ télən̄ de gə̄ kə́ dɔdə́ ndi gōtə́ aĺ gə̄.

12Nin̄ aw̄n̄ sāā tə́ rɔ̄ kāgə̄ kə́ tɔ́sə̄ tə́ ō,

i gūrū kāgə̄ n i nge daldə́ najə̄ ō.

Néĺ ájə́ba kógə̄ḿ əla dɔdə́ tə́ ba rāādə́

adə̄ əya̰n̄ róbə́ kə́ majə kɔ̄ɔ́.

Loo ń noō tə́ nin̄ rāān̄ ájə́ba kə ta kūl̄

kəya̰m̄ mā Nə́ɓā yādə́ kɔ̄ɔ́ ba kaw̄ sa̰y.

13Nin̄ rāān̄ yá̰a̰ kəsa kə́ yā ɓōĺ gidə gə̄ dɔ mbal̄ gə̄ tə́ ō,

róōn̄ ndujə̄ yá̰á̰ kə́ kotə majə gə̄ dɔ ngán mbal̄ gə̄ tə́ ō,

gír kāgə̄ gə̄ kə́ ndíĺdə́ majə tə́ ō.

I tām̄ najə̄ ń noō tə́ n ngáńsí kə́ dəyá̰ gə̄ a rāān̄ ájə́ba ō,

umsí kə́ dəyá̰ gə̄ a gólə̄n̄ ngaadə́ gə̄ ō ní.

14M-ā m̄-rāā yá̰a̰ kə ngáńsí kə́ dəyá̰ gēé

tām̄ ájə́ba ń nin̄ a rāān̄ tə́ ní aĺ ō,

kə umsí kə́ dəyá̰ gēé tām̄ gól̄ ń

nin̄ a gólə̄n̄ ngaadə́ gə̄ ní aĺ ō.

M-ā m̄-rāā yá̰a̰ i sesí sḭḭ̄ *ngé tun̄ yá̰a̰ gēé,

tɔdɔ̄ āwī loo kə́ rang tə́ kə kéŕsí kə dəyá̰ ájə́ba gēé ō,

ə́saī yá̰á̰ kə́ yā ɓōĺ gidə gə̄ naā tə́ kə ájə́ba gə̄

kə́ gíŕ kújə ndɔ̄ȳ yāsí gə̄ tə́ ō.

Gír de gə̄ ń gerə̄n̄ kum yá̰á̰ kógə̄ḿ aĺ ní,

i gír de gə̄ kə́ tadə́ tḭ̄ḭ̄ kɔ̄ɔ́ gə̄, tītə̄ ń ngɔ̄ý tām̄ ədań ní.

15Ḭ̄ *Israel, ún rɔ̄í ī-rāā ń ájə́ba.

Ba majə kadə̄ *Juda rāā yá̰á̰ kə́ gōtə́ aĺ

kə́ kógə̄ḿ beē nəkɔ́ ń noō alé.

Ī-lōōī kaw̄ loo kə́ yā ɓōĺ gidə kə́ Gilgal tə́ ō,

ī-lōōī kaw̄ Bet Aben ō.

Ī-lōōī túbə kəda na:

Tītə̄ ń Kɔ́ɔ̄ɓē ndiń kə kumneé noō ō.

16*Israel rāā dɔ ngan̄g tītə̄ man̄g kə́ mbātə́ rāā kəla beé. Ní, ngɔlaā ní Kɔ́ɔ̄ɓē a rāā gír deē yān gə̄ i ngán batə̄ gə̄ ń deē a aw̄ sedə́ dɔ mu kə́ ngá̰ý tə́ ní a? 17*Epəraim gə̄ əhɔn̄ gō Nə́ɓā kə́ rɔ̄kum aĺ gə̄ ní, ə́ya̰īdə́! 18Dan ń nin̄ a̰ȳn̄ adə̄ mān̄ dɔ majən anī, rāān̄ ájə́ba. Nin̄ ndigən̄ i rɔ̄sɔl̄ tá banī i hɔ̄r̄mɔ̄ alé. 19Nél a ɔydə́ gidə bɔ̄gə̄n tə́ yā kaw̄ sedə́ kɔ̄ɔ́ ō, rɔ̄də́ a sɔl̄də́ tām̄ *yá̰a̰ tun̄ yādə́ gə̄ tə́ ō.

Currently Selected:

Makətūbə̄ yā Ojee 4: BS

Highlight

Copy