Makətūbə̄ yā Ojee 12
12
Gír de gə̄ kə́ ta kəla gíŕdə́ tə́ nú nin̄ a ɔrən̄ i kum deē tá dejə
1Kɔ́ɔ̄ɓē əda na:
Gír deē yā *Epəraim gə̄ sorə̄n̄ gīr̄nəń gidəḿ.
A̰á̰ā̰, *Israel gə̄ ɓír̄mə̄n̄ kə gól̄ looó.
Deē yā *Juda gə̄ i seḿ ɓáý,
banī nin̄ na̰yn̄ kə̄ loo kəhɔ gō nə́ɓā kə́ rang gə̄ tə́.
2*Epəraim adə̄ de gə̄ kə́ Ejiptə tə́ yibə̄ ō,
əndā jīn gír makətūbə̄ koō naā
yādə́ kə de kə́ Asiri gēé tə́ ō.
I tītə̄ ń noō n ni ulə̄ń rɔ̄n kə nélé ō,
a̰ȳń ngɔ̄də̄ gō néĺ kə́ dūn̄ ɓē tə́
dəloí bátə́ loo tíbə dɔn tə́ ō ní.
Ni seĺ sor̄ kə̄ loo gə̄ tə́ ō,
nujə loo ɔyń yá̰a̰ yā de gə̄ dɔ gúú tə́ ō.
3Kɔ́ɔ̄ɓē a rāā i sarya kə de gə̄ yā Juda gēé.
Ni a rāā yá̰á̰ kógə̄ḿ kə gír deē yā Jakob gēé
najə̄ háĺdə́ kə́ majaĺ tə́,
a rāā yá̰á̰ kógə̄ḿ kə gír de gə̄ ń noō
sɔɔ̄ ń kəla rāādə́ gə̄.
4Dan ń Jakob i kem kó̰o̰n tə́ ɓáý ní,
ni-taā loo yā ngōkó̰o̰n.
Dan ń ni tɔgə deē anī, ni rɔ̄ɔ̄ Nə́ɓā.
5Ni rɔ̄ɔ̄ *de kə́ dɔ rā̰ tə́ kógə̄ḿ ō,
ni tetə deē ní rɔ̄ɔ̄ ō.
Jakob mbutə kə̄ nōō tə́ nōō ō,
ni-rāā de kə́ dɔ rā̰ tə́ ní ɓɔ́ ō.
Jakob ndɔ̄də̄ Nə́ɓā Betel ō,
əla gír ndɔ̄ ń noō tə́ ní,
Nə́ɓā a ɔr̄ najə̄ sejí i loo noō tə́ ō.
6I loo ń noō tə́ n Nə́ɓā
nge rāā dɔ rā̰ ō dɔ nang ō,
ni ń rīn na i Kɔ́ɔ̄ɓē ní, ədań najə̄ ń toō ní:
7Majə kadə̄ ī-tél ī-reē gogə́
rɔ̄ḿ mā Nə́ɓā yāí tə́.
Ɔ́jə kə̄ ndágá kadə̄ ḭ̄ i de kə́ nge kem majə ō,
ī-ɓōĺ gidə yá̰á̰ kə́ súmūú ō,
Ə̄ndā kemií dɔḿ mā
Nə́ɓā yāí tə́ ngándáńg ō.
8Kɔ́ɔ̄ɓē əda na:
*Epəraim, ḭ̄ āw̄ kə yá̰a̰ mbɔ̄jə́
kɔȳ yá̰á̰ kə́ gōtə́ aĺ jīí tə́.
Nelī gól̄ de gə̄ ngá̰ý.
9Ḭ̄ ə́da na: A̰á̰ā̰, m̄-tél
de kə́ nge kənge yá̰a̰,
m-ə́ngé yá̰á̰ kógə̄ḿ.
Banī m̄-mān̄ dɔ ndū Nə́ɓā alé,
m̄-rāā yá̰á̰ kógə̄ḿ kə́ gōtə́ aĺ alé,
dan ń m-ə́ngeń nar ngeé ń toō tə́ ní!
10Əla gír i ndɔ̄ ń ḭ̄ ī-teēń kɔ̄ɔ́
kem ɓē kə́ Ejiptə tə́ ní n
mā n ń i Kɔ́ɔ̄ɓē Nə́ɓā yāí ní.
M-ā m̄-rāāī kadə̄ ā ī-tél yā ndi
gíŕ kújə tandā gə̄ tə́, tītə̄ kə́ kété,
dan ń m-ə́ngeńsí ní.
11Dan ngeé ń noō tə́ ní,
m-ɔ̄r̄ najə̄ kə *ngé koō ta gēé.
Adə̄ yá̰á̰ kə́ yā ká̰ā̰ gə̄ ní,
m-ə́lań i ngá̰ý m-ādə̄də́ adə̄ a̰a̰n̄.
Tá kə ta kūl̄ *ngé koō ta gə̄ ní,
m-ə́da najə̄ yá̰a̰ gə̄ ń
m̄-núm̄ rāā ní ɓáý to̰.
12De kə́ Galaad rāān̄ yá̰á̰ kə́ majaĺ ō,
gotə yá̰a̰ yādə́ kə́ na̰y gətóo ō.
Nin̄ ndējə̄n̄ man̄g kə́ bəra kə́ tun̄ gə̄
loo kə́ yā ɓōĺ gidə kə́ Gilgal tə́ tə́.
Ba ngɔlaā ɓáa *loo tun̄ yá̰a̰ yādə́ gə̄ ní télən̄
i kūbə̄rū mbal̄ gə̄ kə́ kánə̄n̄də́ dɔ naā tə́ bing gə̄
kə̄ kem ndɔr̄ gə̄ tə́.
13Jakob a̰ȳ aw̄ dɔ nang kə́
Mesopotami#12.13 Mesopotami: Á̰a̰ī Tkg 24.10 kə́ kḭḭ kə̄ dɔɔ́ tə́.
Ni udə kəla yā deē kógə̄ḿ
kə́ rang tə́ yā kəngeń dəyá̰.
A̰á̰ā̰, ni ngɔ̄m̄ ɓūtə̄ yá̰a̰ kul̄ gə̄ gír dəyá̰á̰.
14Banī Kɔ́ɔ̄ɓē teē kə
ngán *Israel gēé
kɔ̄ɔ́ kem ɓē kə́ Ejiptə tə́
i kə ta kūl̄ *nge koō ta.
I *nge koō ta n ngɔ̄m̄də́ ní.
15*Epəraim gə̄ rāān̄ Nə́ɓā yá̰á̰ kə́ tōr̄
adə̄ wurən ɔlən.
Yá̰a̰ gə̄ ń yá̰a̰ rāādə́ kə́ majaĺ ngá̰ý gə̄ ō,
ndū yādə́ gə̄ ō ojən̄ ní,
Kɔ́ɔ̄ɓē yādə́ a rāā kadə̄
yá̰a̰ gə̄ ní tél a əsōn̄ i dɔdə́ nin̄ kɔ́ gə̄ tə́.
Currently Selected:
Makətūbə̄ yā Ojee 12: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
