Makətūbə̄ yā Ojee 11
11
Əlan̄ rɔ̄sɔl̄ dɔ tár yā Nə́ɓā tə́, ba tár yān tetə rɔ̄ɔ̄
1Kɔ́ɔ̄ɓē əda na:
Dan ń *Israel i ngōn̄ ɓáý ní,
m̄-tárən ō, m̄-ɓārə́n ni ngōnə̄ḿ
kadə̄ teē kɔ̄ɔ́ kem ɓē kə́ Ejiptə tə́ ō.
2Ba gō tə́, dan ń m̄-ɓārə́n ngá̰ý anī,
ni əya̰m̄ ba aw̄ sa̰y ngá̰ý ō.
Gír deē yāḿ gə̄ ndējə̄n̄
ɓesə̄ *Baal gə̄ yá̰á̰ kə́ tun̄ gə̄.
Nin̄ róōn̄ ndujə̄ yá̰á̰ kə́ kotə majə gə̄
no nə́ɓā kə́ rɔ̄kum aĺ gə̄ tə́.
3Tá mā m-ə́hɔ jī *Epəraim
m̄-ndóōnəń loo njə̄rā.
Banī ni ger̄ kadə̄ m-á̰a̰ gōn alé.
4M-ɔ́rən ta róbə
kə kemḿ kə́ sɔl̄ léléḿ ō,
tár do̰ō̰jí naā tə́ seneé ō.
Kété ní m̄-to i tītə̄ de kə́ un ngōnən
əndā kadə mbɔ́rən tə́ beē tām̄ yān tə́.
m̄-rodə́ i mbée n m-ā m-ādə̄nəń yá̰a̰ kəsa ní.
5Ngán *Israel gə̄ a tə́lən̄ yā kaw̄ gogə́
dɔ nang kə́ Ejiptə tə́ alé,
banī i dɔ nang kə́ Asiri n a téĺ kɔ́ɔ̄də́ ní.
Tɔdɔ̄ nin̄ mbātə́n̄ tél reē gogə́ rɔ̄ḿ tə́.
6I tām̄ najə̄ ń noō tə́ n rɔ̄ɔ̄ a əsō
kə̄ kem ɓē yādə́ gə̄ tə́ ní,
rɔ̄ɔ̄ ní nujə yá̰á̰ ń a ngɔ̄m̄də́ ní kɔ̄ɔ́,
nujə yá̰a̰ malang kɔ̄ɔ́,
tɔdɔ̄ *Israel gə̄ númə̄n̄ rāā yá̰á̰ kə́ majaĺ gə̄.
7Gír deē yāḿ gə̄ mbātə́mə̄n̄ kɔ̄ɔ́ ō,
nel̄də́ ra dɔ ndūdə́ tə́ aĺ ngá̰ý ō.
Ɓārə́n̄də́ kadə̄ ḭḭ ran̄ kə njadə́ dɔɔ́,
banī nge ń noō a rāā yá̰á̰ kógə̄ḿ alé.
8*Epəraim, loo kadə̄ m-ə́ya̰ī kɔ̄ɔ́ i noó a?
*Israel, loo kadə̄ m̄-tél gōí tə́ kɔ̄ɔ́ i noó a?
Yá̰á̰ ń m̄-rāā kə ɓē kə́ Adəma ní,
m-ásə rāāī a?
M-ásə rāāī kadə̄ ī-to tītə̄ Seboim a?
Kem nujə kɔ̄ɔ́ ō,
m̄-ndew kə̄ rɔ̄ḿ gə̄ tə́ malang ō.
9M-ā m̄-bə̄gā wōn̄g yāḿ kə́ ngá̰ý alé,
m-ā m̄-tél yā reē nujə
ɓē kə́ Epəraim kɔ̄ɔ́ alé.
Tɔdɔ̄ mā i Nə́ɓā, ba i deē ndul alé.
Epəraim, ɓēé looí ní, mā i Nə́ɓā kə́ *táĺ ō,
m-ā m̄-reē kə wōngōó aĺ ō.
10De gə̄ ń ɔyn̄də́ aw̄n̄ sedə́
dɔ ɓē kə́ rang tə́ dɔ gúú tə́ ní,
njə̄rān̄ kumdə́ kə̄ kété,
nin̄ unən̄ gō Kɔ́ɔ̄ɓē,
kə́ nge nōō tītə̄ ɓɔl beé.
Dan ń ngánən kə́ no ɓē tə́ gə̄ oōn̄ nōōn anī,
reēn̄ kə rɔ̄ ndebeé.
11Nin̄ ḭḭn̄ Ejiptə reēn̄ kə rɔ̄ ndebeé
tītə̄ ngán yel̄ kə́ dūú gə̄ beé ō,
ḭḭn̄ Asiri reēn̄ tītə̄
dér dum gə̄ kə́ ḭḭn̄ bɔ̄gə̄ beé ō.
M-ā m̄-rāā kadə̄ nin̄ a ndin̄
kə̄ kem ɓē yādə́ gə̄ tə́.
Najə̄ ń Kɔ́ɔ̄ɓē əda ní n noó.
Currently Selected:
Makətūbə̄ yā Ojee 11: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
