Makətūbə̄ yā Habakuk 2
2
1Mā m̄-ndigə ra loo
ngɔ̄m̄ loo ń əndāmə̄n̄
tū tə́ ní tə́.
M-ā m̄-ra kə njaḿ dɔɔ́
dɔ ndogə̄ mbal̄ kə́ yā
rɔ̄ɔ̄ń dɔ ɓē tə́ tə́.
M-ā m̄-ngóō yā ger̄ yá̰á̰ ń
Nə́ɓā a ədam̄ ní ō,
yā ger̄ loo dal ń ni a dal
nōō rɔ̄ yāḿ gə̄ ní ō.
Nə́ɓā dal najə̄: Nge rāā yá̰á̰ kə́ gōtə́ ō, nge rāā kum deē ndoō tə́ ō
2Anī Kɔ́ɔ̄ɓē tūr̄ ədam̄ na:
Yá̰á̰ ń m-ɔ́jiī adə̄
ī-ger̄ ní, ī-ndang.
Ī-ndang dɔ bar ndang
yá̰a̰ gə̄ tə́ adə̄ kumən unjə̄,
tām̄ kadə̄ tə́dan tōr̄ rɔ̄ deē alé.
3Yá̰a̰ gə̄ ń m-ɔ́jiī adə̄
á̰a̰ā̰ ní a reēn̄
banī a reēn̄ i kum
mbang ń ɔjən̄ tə́ ní ngóy.
Sḛ́ý laā anī a rāān̄ yá̰a̰,
i sor̄ alé.
Ká ré to tītə̄ kə́ ɔr bā̰ā̰ gə̄gē anī,
ə̄nī kemií mámák ī-ngóoń.
A̰á̰ā̰, i rɔ̄kum,
a reēn̄ gō gogə́ alé.
4Ī-ndang najə̄ ń toō:
Deē ń gír̄ kə́ kemən tə́
i kə́ majaĺ ní,
tɔ́gən gətóo.
Banī deē ń ra dɔ ndūn tə́
kə Nə́ɓāá ní, i nge
rāā yá̰á̰ kə́ gōtə́.
I tītə̄ ń noō n
ni ndiń kə kumneé ní#2.4 K 2b: Kem makətūbə̄ yā Nə́ɓā kə́ ta Gərek (yā kum kɔ̄ɔ́ kə́ kutə gə̄ (70)) tə́ ɓáa ədan̄ na i: Deē ń i de kə́ gōtə́ ta kum Nə́ɓā tə́ kə ta kūl̄ taā kem yān ní, a ndi kə kumneé i kə ta kūl̄ taā kem. Á̰a̰ī Rom 1.17 ō Heb 10.38 ō Gal 3.11
5A̰á̰ā̰, yá̰a̰ kənge
a rāā deē majaĺ:
Ngé kɔjə rɔ̄də́ gə̄
ndin̄ gotə kógə̄ḿ alé.
Nin̄ teēn̄ tadə́ adə̄
laa ngá̰ý tītə̄ loo kə́ ɓádá beē.
Yá̰a̰ asədə́ tadə́ aĺ
tītə̄ ń yá̰a̰ asəń ta yo aĺ ní beē.
Nin̄ ɔsən̄ nja ɓē gə̄ malang
kə̄ naā tə́ adə̄ gīr̄ gidədə́ ō,
nápar de gə̄ malang ndin̄
i gíŕ tɔ́gə yādə́ tə́ ō.
6Banī de gə̄ malang ń nin̄ tetən̄də́ rɔ̄ɔ̄ ní,
a tāmə̄n̄ sedə́ ō, a lurən̄də́ ō,
najə̄ kə́ tadə́ tə́ a adə̄də́ do ō.
Ndɔ̄ĺ kə́ mí gə̄
Najə̄ ń nin̄ a ədan̄ ní n toó:
I yá̰á̰ kə́ to kum kaȳ aĺ
kə́ ba̰ý beē n rāāsí ní.
Yá̰a̰ kənge gə̄ ń
i yāsí aĺ ní,
sḭḭ̄ ā ɔ́siī dɔ kə̄ naā tə́
i bátə́ ndɔ̄ kə́ rá tə́?
Kə̄rā gə̄ kə́ dɔsí tə́
i ngá̰ý kum kə̄ kété kété!
7De gə̄ ń adə̄n̄sí
nar loo tə̄nā tə́ ní,
a əhɔn̄sí dɔ jīsí tə́ gidə kógə̄ḿ.
Nin̄ a ndólə̄n̄ dɔ ɓīī tə́,
adə̄ nin̄ a rāān̄sí
kadə̄ ā ī-ndewiī.
Ta i dɔdə́ nin̄ tə́ kadə̄
ɓogən̄sí tā.
8Sḭḭ̄ ɔ́yiī yá̰a̰ yā nápar de gə̄ ngá̰ý dɔ gúú tə́.
Adə̄ gotə gír de gə̄ ń na̰ȳn̄ ní,
a ɔyn̄ yá̰a̰ yāsí gə̄ dɔ gúú tə́ tītə̄ ń noō ō.
Tɔdɔ̄ sḭḭ̄ ī-ɓōkíī mósə de gə̄ nang tə́ ō,
ī-rāāī yá̰a̰ kə dɔ́nɔ́ ō.
Ī-rāāī yá̰á̰ ń noō i kə gō dɔ nang gēé ō
kə ɓē gēé ō, kə de kə́ kemeé gēé ō!
9I yá̰á̰ kə́ to kum kaȳ aĺ
kə́ ba̰ý beē n rāāsí ní!
Sḭḭ̄ ī-ngɔ̄mī yá̰a̰ kənge gə̄ kə́ ə́ngeīdə́
kə ta róbə́ kə́ gōtə́ aĺ
tām̄ yā ngéésí gə̄ tə́.
I nge ń noō n ndḛḛ̄ kadə̄
sḭḭ̄ ī-ndiīń majə,
tá kadə̄ yá̰á̰ kə́ to kum kaȳ aĺ ɔdəń rɔ̄sí aĺ ní.
10Yá̰a̰ gə̄ ń sḭḭ̄ ī-númī rāā ní
a əla rɔ̄sɔl̄ dɔ ngéésí gə̄ tə́.
Dan ń sḭḭ̄ ī-nujiī gír
de kə́ ngá̰ý gə̄ kɔ̄ɔ́ ní,
ī-nujiī i kə rɔ̄sí sḭḭ̄ kɔ́ gɔ̄ɔ́.
11Mbal̄ gə̄ kə́ tū ndogə̄ mbal̄ gə̄ tə́ gə̄gē,
a əgan̄ kɔŕ yā kəndāń najə dɔsí tə́ ō,
kāgə̄ gə̄ ń a əhɔn̄ kújə dɔɔ́ ní,
a tūrə̄n̄ najə̄ yā kədadə́ ō.
12I yá̰á̰ kə́ to kum kaȳ aĺ
kə́ ba̰ý beē n rāāsí ní!
Sḭḭ̄ ī-rāāī ɓē yāsí gə̄ ō,
ī-rāāī adə̄ yá̰a̰ kənge kə́ kemeé i ngá̰ý ō,
i kə ta kūl̄ tɔ̄l̄ de gēé ō,
rāā yá̰á̰ kə́ gōtə́ aĺ ō.
13I tām̄ najə̄ ń noō tə́ n
kɔr rāā nápar de gə̄ tām̄ yā hor tə́ ō,
de kə́ kem ɓēé gə̄ a̰a̰n̄ tápə̄ kanjə̄ kumən ō ní.
Yá̰a̰ gə̄ ń noō malang ḭḭn̄
i rɔ̄ Kɔ́ɔ̄ɓē kə́ bo kə́ tɔ́gən i ngá̰ý tə́ aĺ a?
14A̰á̰ā̰, de gə̄ malang a gerə̄n̄
*kɔsə gɔn yā Kɔ́ɔ̄ɓē.
Kɔsə gɔn ní a taā loo malang dɔ nang tə́,
tītə̄ ń man̄ rosəń kem kār̄ bā bo gə̄ tə́ ní.
15I yá̰á̰ kə́ to kum kaȳ aĺ
kə́ ba̰ý beē n rāāsí ní!
Sḭḭ̄ ādī de kə́ rang gə̄ yá̰a̰ ka̰ȳ,
i yá̰a̰ ka̰ȳ kə́ majaĺ ngá̰ý
tītə̄ yá̰a̰ yḛl deē beé.
Ī-sāāī kadə̄ yá̰a̰ ka̰ȳ ní rāādə́,
kadə̄ á̰a̰īń rɔ̄də́ kə́ karī.
16Ba sḭḭ̄, a rāān̄sí kadə̄ rɔ̄sí a sɔl̄sí
banī a rɔȳn̄sí i mbée alé!
Ta i dɔsí tə́ kadə̄ sḭḭ̄ ā̰yī yá̰á̰ ní
ba ɔ́jiīń de gə̄ rɔ̄sí kə́ karī!
Kɔ́ɔ̄ɓē a ra sesí ta ka̰ȳ
yá̰á̰ kə́ kem kópə wōn̄g yān tə́.
Kadə̄ rɔȳ ń rɔȳn̄sí ní,
tél i rɔ̄sɔl̄ kə́ əlan̄ dɔsí tə́.
17A̰á̰ā̰, yá̰a̰ rāā kə dɔ́nɔ́ ń
rāān̄ kə ɓē kə́ Liban ní
a taā loo ɓēé loosí ō.
Sḭḭ̄ ī-tɔ̄lī dā̰ gə̄.
Adə̄ dā̰ gə̄ a rāān̄sí kə
ɓōló kadə̄ ā ī-ndewiī.
Yá̰a̰ gə̄ ń noō malang a reēn̄
tɔdɔ̄ sḭḭ̄ ī-ɓōkíī mósə deē nang tə́,
tɔdɔ̄ sḭḭ̄ ī-rāāī yá̰a̰ kə dɔ́nɔ́,
ī-rāāī yá̰á̰ ń noō
i kə gō dɔ nang gēé ō
kə ɓē gēé ō,
kə de kə́ kemeé gēé ō!
18Rāā nə́ɓā kə́ rɔ̄kum aĺ gə̄ ní, i yā rāań rí?
Nin̄ i gində̄ kə́ nō horoó rāā yá̰á̰ tə́ ngóy.
Nin̄ rāān̄ adə̄ deē taā kem yá̰á̰ kə́ rɔ̄kum aĺ gə̄.
I kɔdə̄ kógə̄ḿ n rāādə́ ní ō, nin̄ ɔrə̄n̄ najə̄ aĺ ō.
Ní, i tām̄ rí tə́ á kɔdə̄ ngeé ń toō
ənī kemən mámák adə̄də́ ní?
19I yá̰á̰ kə́ to kum kaȳ aĺ
kə́ ba̰ý beē n rāāsí ní!
Sḭḭ̄ ə́daī dugə̄jū kāgə̄ na: Ī-ndól̄ dɔ ɓīī tə́!
Mbal̄ kə́ tɔ́sə̄ rāā yá̰á̰ tə́ ń ɔr̄ najə̄ aĺ ní,
sḭḭ̄ ə́dain̄ na: Ī-lōō ɓīī!
Tá nin̄ asən̄ ndóōsí yá̰á̰ kógə̄ḿ alé.
Rāān̄ lɔ́r ō, gində̄ arjā̰a̰ ō,
gidə yá̰á̰ kə́ tɔ́sə̄ gə̄ ní tə́ rɔ̄kum.
Banī koō kə́ yā rāādə́ kadə̄
ndin̄ kə kumdə́ gətóo kemdə́ tə́!
20Kɔ́ɔ̄ɓē ni-ndi i kem
*kújə́ yān kə́ táĺ tə́.
Ādə̄ de gə̄ malang kə́ dɔ nang tə́
ndin̄ kə tadə́ kə́ mbóó non tə́!
Currently Selected:
Makətūbə̄ yā Habakuk 2: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad