Makətūbə̄ yā Habakuk 1
1
1Najə̄ ń Nə́ɓā əda Habakuk nge koō ta dan ń ni a̰a̰ń yá̰á̰ tə́ ní n toó.
Nge koō ta ɓāŕ Nə́ɓā kadə̄ dḭḭ̄n
2Kɔ́ɔ̄ɓē, nja i kóndóńg n
kə m̄-ɓāríī kadə̄ ī-dḭḭ̄m̄ ní?
Ḭ̄ ōō ɓār̄ alé!
M-ə́ga kɔŕ dɔ yá̰a̰ rāā
kə́ kə dɔ́nɔ́ tə́,
banī ḭ̄ ájə deē alé!
3Ḭ̄ ī-rāā ādə̄ m-á̰á̰ yá̰á̰
kə́ majaĺ i najə̄ rí tə́?
Ḭ̄ á̰á̰ yá̰á̰ kə́ tōr̄ rɔ̄jí
kanjə̄ rāā yá̰á̰ kógə̄ḿ
i najə̄ rí tə́?
Loo malang ń gīr̄ gidəḿ ní,
de gə̄ a ɔyn̄ i yá̰a̰ yā de gə̄
dɔ gúú tə́ tū tə́ ō,
a rāān̄ yá̰a̰ i kə dɔ́nɔ́ tū tə́ ō.
De gə̄ a rāān̄ i sarya kə naá ō,
a kɔ̄lə̄n̄ i naā ō ngóy.
4De kə́ un *ndū najə̄
rāań kəla gətóo ō,
de kə́ gān̄g sarya
kə gōó gətóo i kə́ bátə́ gə̄ tə́ ō.
De kə́ majaĺ ənī de kə́ rɔ̄kum rɔ̄ɔ̄ ō,
ngé rāā sarya gə̄ gāngə̄n̄ sarya kə gōó aĺ ō.
Najə̄ ń Nə́ɓā tūr̄ əda ní, əda na Babilon gə̄ a taān̄ loo
5Kɔ́ɔ̄ɓē əda na:
Yá̰á̰ ń a rāā yá̰a̰ dan nápar de gə̄ tə́ ní,
ə̄ndāī ma̰ȳ á̰a̰ī majə, ba ādī ɔr kumsí ō,
ādī yáāsí ngá̰ý ō!
A̰á̰ā̰, yá̰á̰ kógə̄ḿ kə́ to jákə́ ngá̰ý
a rāā yá̰a̰ dan ń ī-ndiīń kə kumsí ní.
Ré deē ənīsí i gotə anī,
ā ī-taāī kem alé!
6*Babilon gə̄ ń i gír de kə́
ngé rāā yá̰a̰ kə dɔ́nɔ́ gə̄ ō,
kumdə́ o̰o̰də́ aĺ ō ní, m-ā m̄-reē sedə́.
Nin̄-aw̄n̄ kə̄ loo gə̄ tə́
malang dɔ nang tə́
yā taā gō nang gə̄ ń i yādə́ aĺ ní.
7I de gə̄ kə́ majən̄ aĺ ngá̰ý ō,
ton̄ ɓōĺ ngá̰ý ō. I nin̄ kɔ́ gə̄ ngóy n
i ngé kɔjə yá̰á̰ kə́ gōtə́ yādə́ gə̄ ō,
ngé kɔjə yá̰á̰ ń tɔ́gə́də́ asə rāā ní ō.
8Sə́nda yādə́ gə̄ a̰ȳn̄
ngɔ̄də̄ tɔȳn̄ malya gə̄ ō,
ɔlən̄ tɔȳn̄ soó gə̄
kə́ ngé kaw̄ ndo̰ó̰ loo tíbí gə̄.
Ngé kal̄ sə́nda yādə́ gə̄
ḭḭn̄ i sa̰y n reēn̄ ō, nin̄-tḭ́ḭ̄n̄ bal ō.
Nin̄ əlan̄ ngɔ̄də̄ tītə̄
kə̄rō kə́ a risə kə̄
dɔ dā̰ tə́ yā kəsan beé.
9Nin̄ malang ní, reēn̄
i kɔy yá̰á̰ tə́ dɔ gúú tə́ ō,
ngur kɔy yá̰a̰ rāādə́
adə̄ kumdə́ i kété nodə́ tə́ ō.
Nin̄ kánə̄n̄ de gə̄ ń
əhɔn̄də́ ta rɔ̄ɔ̄ tə́ ní kə̄ dɔ naā tə́.
Kutə de gə̄ ní i ngá̰ý,
tītə̄ nán̄g ngárə̄ḿnjēý beé.
10De gə̄ ngeé ń noō ní,
i ngé mbóo kə ngār gēé.
Nin̄ kídə̄n̄ ngé ko̰o̰ ɓē gə̄ ō,
ɓōlə́n̄ ɓē gə̄ kə́ de gə̄
ngɔ̄mə̄n̄ majə ngá̰ý gə̄ aĺ ō,
nin̄ ɔsən̄ nán̄g kə̄ dɔ naā tə́
yā taāń ɓē gə̄ ní malang.
11Nin̄ mānə̄n̄ tītə̄ nél man̄
kə́ əla kə tɔ́gɔ́ ō,
aw̄n̄ loo yādə́ ō.
Tām̄ yādə́ nin̄ tə́ ɓáa,
yá̰á̰ kə́ ngá̰ý yādə́ i tɔ́gə́də́.
Tɔ́gə́də́ i nə́ɓā yādə́.
Nge koō ta ɓāŕ Nə́ɓā ɓáý to̰
12Nəkɔ́ ń jóo toó ní,
i ḭ̄ n i Kɔ́ɔ̄ɓē ní. Ḭ̄ i Nə́ɓā yāḿ.
Ḭ̄ i de kə́ *Táĺ ō, ḭ̄ óy aĺ ō.
Kɔ́ɔ̄ɓē, ḭ̄ ī-gə̄rā *Babilon gə̄
yā rāań sarya sejí.
Ḭ̄ i mbal̄ yāḿ kə́ ngan̄g.
Ḭ̄ ī-mēr̄də́ kəndají,
najə̄ yá̰a̰ rāājí kə́ gōtə́ aĺ tə́.
13Kumií *unjə̄ njáý njáý ngá̰ý,
adə̄ ásə ka̰a̰ yá̰á̰ kə́ majaĺ alé.
Ḭ̄ ī-ndigə ka̰a̰ yá̰á̰
kə́ to kum̄ kaȳ aĺ alé.
Ɓá tā banī ngé gə̄ ń
a gólə̄n̄ madə̄də́ gə̄ ní,
ḭ̄ á̰á̰də́ kanjə̄ kəda yá̰á̰ kógə̄ḿ.
Dan ń de kə́ majaĺ gə̄
a nujən̄ ngé rāā yá̰a̰ gōtə́ tɔȳdə́ gə̄ ní,
ḭ̄ ə́dá yá̰á̰ kógə̄ḿ alé.
14Ḭ̄ ī-rāā de ndul gə̄ i kānjə̄ gə̄ tə́ ō,
ngán kur̄ gə̄ kə́ kɔ́ɔ̄də́ gətóó tə́ ō.
A̰á̰ā̰, i tām̄ rí tə́?
15*Babilon gə̄ əhɔn̄ de gə̄
tītə̄ loo kəhɔ kānjə̄ kə kuyūú beē.
Nin̄ tél reēn̄ sedə́ gogə́
kem réng yādə́ gə̄ tə́ ō,
rɔ̄də́ nel̄də́ tītə̄ kə́ a̰ȳn̄ i kɔ̄r̄ beé ō.
16Nin̄-tunə̄n̄ yá̰a̰
adə̄n̄ réng yādə́ gə̄ ō,
róōn̄ ndujə̄ yá̰á̰ kə́ kotə
majə rɔȳn̄neédə́ ō.
Tām̄ nin̄-əhɔn̄ kānjə̄ ngá̰ý ō,
əsan̄ yá̰á̰ kə́ nel̄ tadə́ ō, i kə ta kūl̄də́.
17Ndɔ̄ kógə̄ḿ nin̄ a lōōn̄ gír
kəla ń nin̄ a rāān̄ kə réng yādə́ ní tə́
yā tɔ̄ləń nápar de gə̄
kanjə̄ ka̰a̰ kum tō ndoō yādə́ a?
Currently Selected:
Makətūbə̄ yā Habakuk 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
