Makətūbə̄ ń Pol ndang adə̄ Epejə gə̄ ní 4

Rɔ̄ Kərist i kógə̄ḿ beē

1I beé ní, mā ń i dəngáy kə gō ɓoo naā yāḿ kə Kɔ́ɔ̄ɓēé ní, m̄-rāāsí ɓɔ́ kadə̄ háĺsí ndetə naā kə ɓār̄ ń Nə́ɓā ɓāŕsí ní. 2Ɔ́jiī rɔ̄sí aĺ ō, ādī dɔsí sɔl̄ ō, ə́reī wursí njam ō. Ī-tə́gāī tasí dɔ naā tə́ sɔɔ̄ń táŕ kə́ ī-táriī naā ō. 3Kem kógə̄ḿ ń *Ndíĺ kə́ Táĺ rāā adə̄ to dɔ dáńsí tə́ ní, ə́hɔī rɔ̄sí tɔgə ba ī-rāāī ādī to gotoó kə ta kūl̄ ndi kə naá kə kem kə́ sɔl̄ lɔmɔɔ́, tām̄ kem sɔl̄ lɔm i yá̰á̰ ń a do̰ō̰sí naā tə́ ní. 4Rɔ̄ i kógə̄ḿ beē ō, Ndíĺ i kógə̄ḿ beē ō, tītə̄ ń Nə́ɓā ɓārəńsí kadə̄ ə̄ndāī kemsí dɔ yá̰á̰ kə́ kógə̄ḿ beē tə́ ní ō. 5Kɔ́ɔ̄ɓē i kógə̄ḿ beē ō, taā kem i kógə̄ḿ beē ō, *batém i kógə̄ḿ beē ō. 6Nə́ɓā i kógə̄ḿ beē, ni i Bɔbə̄ de gə̄ malang. Ni-o̰o̰ ɓē dɔ de gə̄ tə́ malang ō, rāā kəla kə ta kūl̄də́ malang ō, ndi kemdə́ tə́ malang ō.

7Ɓá tā ba yá̰a̰ gə̄ ń Jeju adə̄ ngá̰ý kə gō kem ndaa yānneé ní, jḭḭ̄ kógə̄ḿ kógə̄ḿ ní, náā nəkɔ́ ɓáa ənge yān kə́ sɔɔ̄ dɔn danaá. 8Tɔdɔ̄ ndangən̄ kem makətūbə̄ yā Nə́ɓā tə́ na:

Dan ń ni-aw̄ ta kaw̄ dɔɔ́ ní, ɓəlo gə̄ ń ni-əhɔdə́ ní aw̄ sedə́ ō,

yá̰a̰ yān ní ni-adə̄ de gə̄ karī ō#4.8 K. 8: Á̰a̰ī Pā 68.19.

9Tá kaw̄n kə̄ dɔɔ́ ní kumən na i rí? Nge ń noō ɔjə kadə̄ kété ní ni-risə aw̄ gíŕ nángāá. 10Ba nge ń risə aw̄ gíŕ nángāá ní, i nge ń aw̄ dɔɔ́ dɔ rā̰ tə́ ní ō, yā kadə̄ yá̰a̰ malang ń Nə́ɓā rāā ní, ni i tū tə́ ō, taā loo tū tə́ ō. 11Ba yá̰a̰ gə̄ ń ni-adə̄ de gə̄ karī ní, i ngámbang kəla gə̄ ō, *ngé koō ta gə̄ ō, ngé kɔjə Najə̄ kə́ Majə yān gə̄ ō, ngé ngɔ̄m̄ yá̰a̰ kul̄ gə̄ ō, ngé ndóō de gə̄ yá̰a̰ ō. 12I tītə̄ ń noō n ni-rāań adə̄ de gə̄ yā Nə́ɓā asənə̄ń rāā kəla yān ní, yā kadə̄ ngé kán̄ naā gə̄ ń i rɔ̄ *Kərist ní tɔgənə̄ń, 13bátə́ kadə̄ jḭḭ̄ malang ní taā kem yājí i kógə̄ḿ beē ō, ger̄ Ngōn̄ Nə́ɓā yājí i kógə̄ḿ beē ō. Loo ń noō tə́ ní, j-a jə-téliī de gə̄ kə́ jə-tɔgiī j-asiī naā kə Kərist ō, jə-majə j-ɔtī kə taá tītə̄n ō. 14Loo ń noō tə́ jḭḭ̄ i ngán gə̄ kə́ bəngál man̄ səlādə́ kə̄ yóō kə̄ laā to̰ aĺ ō, nél yá̰a̰ ndóō kə́ tayā tayā gə̄ dáȳ sedə́ aĺ ō, jḭḭ̄ i ngán gə̄ kə́ ngé gól̄ de gə̄ kə ngam yādə́ kadə̄ ndúmə̄n̄ ní gólə̄n̄jí aĺ ō. 15Banī j-a j-ədaī najə̄ kə́ rɔ̄kum kə tárá, adə̄ j-a jə-tɔgiī tū yá̰a̰ gə̄ tə́ malang kum kə̄ rɔ̄ nge ń ni i dɔm dɔ ní tə́, adə̄ i kum kə̄ rɔ̄ *Kərist tə́. 16I kə kūl̄neé n rɔ̄ Kərist ń i ngé kán̄ naā gə̄ malang ní, téləń yá̰á̰ kə́ kógə̄ḿ beē ní ō, ta rɔtən gə̄ kə́ tū tə́ gə̄ ɓoon̄də́ naā tə́ malang majə ní ō. Adə̄ ré ngán rɔ̄ gə̄ ní rāān̄ kəla kə gōó anī, rɔ̄ malang a tɔgə ō, a aw̄ kum kə̄ kété kə ta kūl̄ tár ō.

Ndi kə́ loo deē yā Kərist tə́

17Adə̄ najə̄ ń m-ə́dásí, ba m-ə́dásí ɓáý to̰ kə rī Kɔ́ɔ̄ɓēé ní n toó: Ī-lōōī kun háĺ de gə̄ kə́ nin̄ i Jipə aĺ gə̄ ō, gír̄ kə́ kemdə́ tə́ i gír̄ kə́ kanjə̄ kumən gə̄ ō ní. 18Gír̄ yādə́ i gír̄ kə́ kum til tə́. Ndi kə kumuú ń Nə́ɓā adə̄ ní, nin̄ i tū tə́ alé, sɔɔ̄ń ger̄ yá̰a̰ aĺ kə́ ngarān̄g kemdə́ tə́ ō, kem ngan̄g yādə́ ō. 19Rɔ̄də́ sɔl̄də́ to̰ alé, adə̄ rāān̄ háĺ kə́ majaĺ ō, yá̰á̰ kə́ yḛr kə́ tayā tayā gə̄ ō, kanjə̄ kəhɔ rɔ̄də́ dɔ tə́.

20Ba sḭḭ̄ ī-ndóōī najə̄ yā *Kərist i kadə̄ ī-rāāīń beé alé. 21Ré ōōī najə̄ yān ō, ré ndóōn̄sí yá̰á̰ kə́ ngé yān gə̄ tə́, kə gō najə̄ kə́ rɔ̄kum ń to kem Jeju tə́ ní ō anī, 22yá̰á̰ kə majaĺ gə̄ ń ī-rāāī kété jóó ní, majə kadə̄ ī-lōōī gírí. I beé n ā ī-lōōiń gíŕ háĺsí kə́ jóó tə́ ní. Tām̄ yá̰á̰ kə́ majaĺ gə̄ ń gólə̄n̄sí kété ní, a nujən̄ i deē. 23Əya̰ī ādī Ndíĺ ń adə̄n̄sí ní rāā gír̄ yāsí adə̄ téĺ kə́ kijə. 24Úniī gō hál de kə́ kijə ń Nə́ɓā əndān kadə̄ teēn ní: I de kə́ gōtə́ ō, kə́ *táĺ ō, kə́ kə ta kūl̄ najə̄ kə́ rɔ̄kum.

25Tām̄ ń toō tə́ ní, ə́ya̰ī sor̄ kɔ̄ɔ́,

ādə̄ deē kógə̄ḿ kógə̄ḿ ɔr̄ najə̄ kə́ rɔ̄kum kə madə̄neé#4.25 K. 25: Á̰a̰ī Jaka 8.16,

tɔdɔ̄ jḭḭ̄ malang ní, jḭḭ̄ i ngán rɔ̄ naā gə̄. 26Ré wōn̄g rāāsí anī, ī-lōōī rāā majaĺ, ādī mbang udə dɔ wōn̄g yāsí tə́ alé. 27Ādī *diabəl ta róbə kadə̄ o̰o̰ń ɓē dɔsí tə́ alé. 28Kadə̄ de kə́ ɓogə kété ɓogə to̰ alé, ba rāā kəla kə́ majə kə jīneé, yā kadə̄ ni-əngeń yá̰á̰ kə́ yā kadə̄ ngé gə̄ ń ndoō rāādə́ ní. 29Ādī najə̄ kə́ majaĺ teē tasí tə́ alé, banī i najə̄ kə́ majə tá, yā kadə̄ ngé gə̄ ń oōn̄ ní rāā majə sedə́ ō, aw̄n̄neé kum kə̄ kété ō. 30*Ndíĺ kə́ Táĺ ń rāā rɔ̄n i tə́ré yá̰á̰ kə́ Nə́ɓā əndā dɔsí tə́, ɔjəń kadə̄ sḭḭ̄ i yān gə̄ tām̄ yā ndɔ̄ ń a gāngəń dɔ de gə̄ tə́ ní, ī-lōōī rāān kadə̄ rɔ̄n nelə̄n alé. 31Ādī wur katə̄ ō, kum kil kóróró ō, wōn̄g ō, lur ō, tájə̄ ndū ō, kem ndul kə́ tayā tayā gə̄ ō, gətóon̄ dɔ dáńsí tə́. 32Ī-rāāī majə kə naá ō, ādī kumsí o̰o̰sí kə madə̄sí gēé ō. Ī-mā̰yī rɔ̄sí dɔ naā tə́, tītə̄ ń Nə́ɓā mā̰yń rɔ̄n dɔsí tə́ sɔɔ̄ń ɓoo naā yāsí kə *Kərist ní ō.

Currently Selected:

Makətūbə̄ ń Pol ndang adə̄ Epejə gə̄ ní 4: BS

Highlight

Copy