Makətūbə̄ ń Pol ndang adə̄ Epejə gə̄ ní 3
3
Kəla ń Nə́ɓā adə̄ Pol ní
1Adə̄ mā Pol ń əhɔmə̄n̄ dəngáy najə̄ yā *Kərist tə́, tām̄ yāsí sḭḭ̄ de gə̄ ń i Jipə aĺ gə̄ tə́ ní, i tām̄ najə̄ ń noō tə́ n m̄-ndɔ̄yń Nə́ɓā ní. 2Kun ń Nə́ɓā unəm̄ rāań kəla tām̄ yāsí tə́ kə gō kem majə yānneé ní, sḭḭ̄ ōōī gotə. 3Nə́ɓā teē kumḿ dɔ yá̰á̰ kə́ to loo mundə̄ tə́ ń ni-núm̄ rāā tə́ ní. m̄-ndang najə̄ kə́ dɔ yá̰á̰ ní tə́ sḛ́ý m-ādə̄sí kété. 4Adə̄ ré ī-tə́daī anī, ā ī-gerī kadə̄ mā ní m̄-ger̄ yá̰á̰ kə́ dɔ Kərist tə́ ń i kə́ to loo mundə̄ tə́ ní. 5Yá̰á̰ kə́ to loo mundə̄ tə́ ngeé ń toō ń Nə́ɓā teē kum ngámbang kəla yān gə̄ ń ni-ɔr̄ kam̄də́ ní ō, *ngé koō ta yān gə̄ ō, dɔ tə́ kə ta kūl̄ Ndíĺneé ní, ni teē kum de kə́ kété gə̄ dɔ tə́ alé. 6Yá̰á̰ kə́ to loo mundə̄ tə́ ni n toō: De gə̄ ń nin̄ i Jipə aĺ gə̄ ní, a əngen̄ yá̰á̰ ń Nə́ɓā ngɔ̄m̄ tām̄ yā deē yān gə̄ tə́ ní, naā tə́ kə *Jipə gēé, i kə ta kūl̄ Najə̄ kə́ Majaá. Nin̄-rāān̄ rɔ̄də́ i rɔ̄ *Kərist tə́ ō, míndə́ Nə́ɓā ń ənī najə̄ yā Kərist Jeju tə́ ní, i tām̄ yādə́ nin̄ tə́ ō.
7m̄-tél nge rāā kəla kɔjə Najə̄ kə́ Majə ní kə tɔ́gɔ́, i kə ta kūl̄ yá̰á̰ ń Nə́ɓā adə̄m̄ sɔɔ̄ń kem majə yān ní. 8Mā i kə́ dūú ngá̰ý dan de gə̄ malang yā Nə́ɓā tə́, ɓá tā ba kɔjə de kə́ nin̄ i Jipə aĺ gə̄ najə̄ kə́ dɔ yá̰á̰ kə́ majə gə̄ yā *Kərist tə́ kə́ dum̄ deē ger̄ gír tə́ ní, i mā n Nə́ɓā adə̄m̄ rāań kem majə seḿ ní. 9Loo rāā ń Nə́ɓā a rāā yá̰a̰ yān gə̄ kə́ ton̄ loo mundə̄ tə́ ní, majə kadə̄ m̄-teēń kə̄ ndágá tām̄ yā deē ndul gə̄ tə́ malang. Ni ń i nge rāā yá̰a̰ malang ní, yá̰á̰ ń toō ń ni-núm̄ rāā ní ɓɔ̄ɔ̄ dɔ i jóo. 10I yā kadə̄ ngé ko̰o̰ ɓē gə̄ ō, kɔ́ɔ̄ yá̰a̰ gə̄ ō ń ndin̄ dɔ rā̰ tə́ ní, gerə̄n̄neé kum kedə̄ kə́ tayā tayā gə̄ yā Nə́ɓā ngɔlaā kə ta kūl̄ ngé kán̄ naā gēé. 11Yá̰á̰ ń Nə́ɓā rāā ngɔlaā kə ta kūl̄ Kɔ́ɔ̄ɓē yājí Jeju *Kərist ní, ni-núm̄ i jóó ngá̰ý no yá̰a̰ gə̄ tə́ malang. 12Kə ta kūl̄ ɓoojí naā kə Kərist ō, taā kə́ jə-taāī kemən ō ní, j-əngeī ta róbə kənī kemjí kaw̄ń rɔ̄ Nə́ɓā tə́. 13Adə̄ ī-lōōī kadə̄ wur kɔl gə̄ ń əsōn̄ dɔḿ tə́ tām̄ yāsí tə́ ní, ɔrə̄n̄ tɔ́gə́sí kɔ̄ɔ́, tɔdɔ̄ nge ń noō i kɔsə gɔn yāsí.
Tár yā Kərist
14I tām̄ najə̄ ń toō tə́ n m-ɔ́sə kejəḿ nang tə́ kə̄ no Nə́ɓā ń 15i Bɔbə̄ de gə̄ malang kə́ dɔ rā̰ tə́ ō, dɔ nang tə́ ō ní. 16Ādə̄ ni ń kɔsə gɔn yān al̄ naā páráńg ní, adə̄sí tɔ́gə kə ta kūl̄ Ndílneé. 17Ba kadə̄ *Kərist ndi kemsí tə́ kə ta kūl̄ taā kə́ ī-taāī kemən ō, ə́laī ngərasí kem tár tə́ ō, ī-raī ngan̄g dɔ tə́ ō. 18Loo ń noō tə́ ā ī-gerī yá̰á̰ ń ni-gḛy rāā tām̄ yāsí tə́ ní, naā tə́ kə ngé gə̄ malang yā Nə́ɓā. Ā ī-gerī ngālə̄n ō, laan ō, ngālə̄n kə́ kə̄ dɔɔ́ ō, ɗúun ō. 19Ā ī-gerī tár yā Kərist kə́ tɔȳ yá̰a̰ gə̄ malang, loo ń noō tə́ Nə́ɓā a ndi kemsí tə́ kə taá kə ta kūl̄ Ndílneé.
20Nə́ɓā asə rāā yá̰á̰ malang ń jə-dəjein̄ aláa jə-gírī ní. Ni-asə rāā kadə̄ tɔȳ dɔ. Ba a rāā yá̰a̰ gə̄ ní i kə ta kūl̄ tɔ́gə́ ń a rāā kəla kemjí tə́ ní. 21Adə̄ kɔsə gɔn i yān dan ngé kán̄ naā gə̄ tə́, kə ta kūl̄ *Kərist Jeju kə dɔ ɓāl̄ gə̄ malang. *Adə̄ i tītə̄ ń noō!
Currently Selected:
Makətūbə̄ ń Pol ndang adə̄ Epejə gə̄ ní 3: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
