Makətūbə̄ yā Daniel 8

Yá̰á̰ kə́ nge ko̰ jōó ń Daniel a̰ā̰ ní:

I bal batə̄ ō bal bə̄yā̰ ō

1Kem ɓāl̄ ko̰o̰ ɓē kə́ nge ko̰ mətá yā mban̄g Baltajar ní, mā Daniel m-á̰a̰ yá̰á̰ kə́ rang gō nge ń m-á̰a̰ā̰ kété tə́ ní. 2Yá̰á̰ ń m-á̰a̰ā̰ ní n toó: Nī rāām̄ adə̄ m̄-rā i Sujə ń i ɓē kə́ ngan̄g ngá̰ý kə́ gō nang kə́ Elam tə́ ní kadə man̄ Ulay. 3M-ɔ̄r̄ dɔḿ dɔɔ́ anī m-á̰a̰ bal batə̄ kógə̄ḿ ra ta man̄ tə́, gajən i jōó. Gajən gə̄ ní ngālə̄n̄ ngá̰ý, banī kógə̄ḿ ngāl̄ tɔȳ madə̄. Nge ń ngāl̄ tɔȳ madə̄ ní əɓa i gō gogə́. 4M-á̰a̰ bal batə̄ ní ɔsə yá̰a̰ kə́ gajəneé kum kə̄ no ɓē tə́ ō, mbɔ́r ɓē kə́ ko̰ó̰ tə́ ō, mbɔ́r ɓē kə́ geleé tə́ ō. De kə́ rang kə́ asə dum tan gətóo ō, de kə́ asə taā yá̰a̰ jīn tə́ kəya̰ dɔɔ́ gətóo ō. Ni a rāā yá̰a̰ i tītə̄ ń kemən ndigə ní ō, a bo i mbéé kum kə̄ kété kété ō.

5m̄-ndi m-ā gír̄ najə̄ dɔ tə́, anī bal bə̄yā̰ kógə̄ḿ ḭḭ dām̄ kə́ no ɓē tə́ a̰ȳ ngɔ̄də̄ dɔ nang tə́ kə́ taá malang kanjə̄ kadə̄ njan ɔdə nang. Bal bə̄yā̰ ní gajən kógə̄ḿ kə́ bo ra dan kumən gə̄ tə́. 6Bal bə̄yā̰ ní reē bátə́ ugə̄ rɔ̄ bal batə̄ kə́ gajən i jōó gə̄ ń m-á̰a̰n ra ta man̄ tə́ ní tə́, ba əla ngɔ̄də̄ dɔn tə́ kə tɔ́gən gēé malang.

7Reē ugə̄ rɔ̄n tə́ anī kɔ̄r̄ rāān dɔn tə́. Ni ɔsən anī gajə kə́ jōó gə̄ tetən̄ ō, bal batə̄ ní teē əsō ō, kə́ kadə̄ dumə̄nneé gətóo ō. Ni tə́ɓā bal batə̄ ní kə njaneé ō, de kə́ kadə̄ taān jīn tə́ gətóo ō. 8Bal bə̄yā̰ ní reē bo ngá̰ý. Ba dan ń tɔ́gən i ngá̰ý al̄ naā anī gajən kə́ bo ní gān̄g tetə dip ba kə́ rang kə́ bo gə̄ sɔ́ əɓan̄ gotoó, kumdə́ sɔɔ̄ gír ɓē ō, no ɓē ō, mbɔ́r ɓē kə́ geleé ō kə́ ko̰ó̰ ō.

9Ngōn̄ gajə kógə̄ḿ kə́ dūú teē tū nge kə́ kógə̄ḿ tə́ ba bo ngá̰ý kum kə̄ mbɔ́r ɓē kə́ geleé tə́ ō, kə̄ gír ɓē tə́ ō, kə̄ ɓē ko̰o̰ kə́ majə ngá̰ý tə́ ō. 10Bo bátə́ ugə̄ rɔ̄ de gə̄ kə́ dɔ rā̰ tə́ gə̄ tə́ ō. Ni-rāā adə̄ ngé kə́rēý gə̄ ngá̰ý dɔ dáńdə́ tə́ ō, tə́yō̰ gə̄ ngá̰ý ō, tə́sōn̄ nang tə́, ba ni tə́ɓādə́ kə njaneé. 11Ni bo bátə́ ugə̄ rɔ̄ ngār yā *de kə́ dɔ rā̰ tə́ gə̄ tə́. Adə̄ *yá̰a̰ tun̄ kə́ dɔ ndɔ̄ gə̄ ní ni ɔgə̄ kadə̄ tun̄ adə̄nən̄ kɔ̄ɔ́ ō, ni-rāā loo ń əndā kújə́ kə́ *táĺ yān tū tə́ ní loo kə́ karī tə́ ō. 12Əlan̄ de kə́ dɔ rā̰ tə́ gə̄ kem jīn tə́ naā tə́ kə *yá̰a̰ tun̄ kə́ dɔ ndɔ̄ gēé, sɔɔ̄ń kudə ń ni udə dan yá̰á̰ tə́ kə gōó aĺ ní. Gajə ní mbere najə̄ kə́ rɔ̄kum ənī nang tə́. Kəla rāān udə gírí majə kə́ njɔ́ḿ gə̄ tə́.

13Loo ń noō tə́ m-ōō ndū *de kə́ dɔ rā̰ tə́ kógə̄ḿ ɔr̄ najə̄. anī de kə́ dɔ rā̰ tə́ kə́ rang dəje nge ń a ɔr̄ najə̄ ní na: Yá̰a̰ gə̄ ń a rāān̄ yā rāā yá̰á̰ á nī əda najə̄n kété toō a rāān̄ yá̰á̰ i bátə́ rəngá̰ý tə́?

Yá̰á̰ tun̄ kə́ kə dɔ ndɔ̄ gə̄ ní a ɔgə̄n̄ tun̄ i bátə́ rə́ngáý tə́? Yá̰a̰ rāā kə́ gōtə́ aĺ ń najə̄ yá̰a̰ malang sák sák ní a o̰o̰ ɓē i bátə́ rə́ngáý tə́? A tə́ɓān̄ *loo kə́ táĺ ō, de kə́ dɔ rā̰ tə́ gə̄ ō kə njadə́ i bátə́ rə́ngáý tə́? 14Ni ədam̄ na:

I bátə́ kadə̄ loo tíbə ō tīī ō nja dūbú jōó kə ɓú mətá. Gō tə́ anī a tə́gon̄ *loo kə́ táĺ kadə̄ unjə̄ njáý njáý.

Kum yá̰á̰ kə́ nge ko̰ jōó ń Daniel a̰ā̰ ní

15Dan ń mā Daniel m̄-rā m-ā m-á̰á̰ yá̰á̰ ní ō, m-ā m̄-sāā kum kadə̄ m̄-ger̄ ō anī, yá̰á̰ kógə̄ḿ kə́ to tītə̄ deē reē ra noḿ tə́. 16Anī m-ōō ndū deē kógə̄ḿ kə̄ dan man̄ Ulay tə́ ɔr̄ najə̄ kə tɔ́gɔ́ əda na:

Gabəriyel, ɔ́jə deē ń toō kum yá̰á̰ ń a̰ā̰ ní ādə̄ ger̄! 17Gabəriyel reē ngɔr kadə loo ń m̄-rā tū tə́ ní tə́. Dan ń a reē ní ɓōĺ rāām̄ ngá̰ý adə̄ m-ə̄sō m̄-sébə kumḿ nang tə́ kɔ̄ɔ́. Ni ədam̄ na:

Ngōn̄ deē, majə kadə̄ ī-ber̄ kadə̄ yá̰á̰ ń á̰a̰ā̰ ní i tām̄ yā ndɔ̄ gə̄ kə́ ta ngóy tə́.

18Dan ń a ɔr̄ najə̄ seḿ ní kumḿ i kə́ m̄-sébə nang tə́ kɔ̄ɔ́ ō, m̄-ɓīī ɓīī kógə̄ḿ kə́ m-óý mámák kɔ̄ɔ́ ō. Ni-ɔdəm̄ ba un udəm̄ dɔɔ́ gogə́. 19Gō tə́ anī ədam̄ na:

Yá̰á̰ ń a reē dan ń gír wōn̄g a gān̄g ní, m-ā m-ɔ́jiī kadə̄ ī-ger̄. Tɔdɔ̄ ndɔ̄ ń kadə̄ gír gāngəń ní i kə́ ɔjən̄ kɔ̄ɔ́. 20Bal batə̄ ń á̰a̰ á gajən i jōó ní i mban̄g Medə gə̄ ō Persə gə̄ ō. 21Bal bə̄yā̰ i mban̄g Gərek. Gajən kə́ bo ń ra dɔ dán kumən gə̄ tə́ ní i mban̄g kə́ ta kəga dɔ. 22Dan ń gajən tetə ní, kə́ rang kə́ sɔ́ gə̄ ń əɓan̄ gotoó ní, i ɓē ko̰o̰ kə́ sɔ́ gə̄ kə́ a ton̄ gotə nge kə́ kété tə́, banī tɔ́gə́də́ a to tītə̄ yā nge kə́ kété alé. 23Dan ń gír ko̰o̰ ɓē yādə́ gān̄g ō, ngé rāā majaĺ gə̄ rāān̄ yá̰a̰ majaĺ adə̄ al̄ naā ō anī, mban̄g kógə̄ḿ kə́ rāā nban̄g ngá̰ý ō ger̄ loo gól̄ de gə̄ ngá̰ý ō a ḭḭ yān dɔɔ́. 24Tɔ́gən a aw̄ i kum kə̄ kété kété, ba tɔ́gə́ ní ḭḭ i rɔ̄n nəkɔ́ tə́ alé. Ni a nujə loo nujə kə́ to ɓōĺ ngá̰ý ō, kəla rāān a udə gírí ō. Ni a nujə de kə́ ngan̄g gə̄ kɔ̄ɔ́ ō, a nujə gír de kə́ *táĺ gə̄ kɔ̄ɔ́ ō. 25Kumən edə̄ ngá̰ý adə̄ a gól̄ madə̄n gə̄. A ɔsə rɔ̄n kə̄ dɔɔ́, adə̄ dan ń loo a to lápə́ya ngá̰ý ɓáa ni a nujə kósə de kə́ ngá̰ý gə̄ kɔ̄ɔ́. Ni a ḭḭ yā rɔ̄ɔ̄ ngār kə́ dɔ ngār gə̄ tə́ banī a əsō kəsō kógə̄ḿ kə́ a tétə̄ rárák kanjə̄ kadə̄ jī deē ɔdə rɔ̄n. 26Banī yá̰á̰ kə́ ɔjə loo kə́ a tíbə ō a tīī ō ń á̰a̰ā̰ ní, tītə̄ ń ədan̄neé ní, i najə̄ kə́ rɔ̄kum. Ba yá̰á̰ ń á̰a̰ā̰ ní ādə̄ to loo mundə̄ tə́, tɔdɔ̄ i tām̄ yā ndɔ̄ gə̄ kə́ sa̰y ngá̰ý ɓáý tə́. 27Kum mbang ń noō tə́ ɓáa mā Daniel tɔ́gə́ḿ ur̄ wak kɔ̄ɔ́ ō, gō tə́ anī m̄-rāā mo̰y ndɔ̄ ngá̰ý ō. Dan ń m-ḭ́ḭ dɔ mo̰y tə́ ɓáa m̄-rāā kəla yā mban̄g. Yá̰á̰ ń m-á̰a̰ā̰ ní rāām̄ kə ɓōló ngá̰ý ō, de kə́ ger̄ kum gətóo ō.

Currently Selected:

Makətūbə̄ yā Daniel 8: BS

Highlight

Copy