Makətūbə̄ yā Daniel 10

Yá̰á̰ kə́ nge ko̰ mətá ń Daniel a̰ā̰ ní:

De kə́ o̰ō̰ kūbə̄ lḛ́ḛ

1Kem ɓāl̄ ko̰o̰ ɓē kə́ nge ko̰ mətá tə́ yā Sirus mban̄g kə́ Persə tə́ ní, ədan̄ Daniel ń a ɓāŕnən̄ na i Beltasar ní najə̄ yā Nə́ɓā kógə̄ḿ. Najə̄ ní i najə̄ kə́ rɔ̄kum ō, ɔjə i dɔ yá̰á̰ kə́ ngan̄g ngá̰ý gə̄ kə́ a rāān̄ yā rāā yá̰a̰ ō. Daniel ger̄ kum najə̄ ní i kə ta kūl̄ yá̰á̰ ń ni a̰ā̰ ní.

2Dan ngeé ń noō tə́ ní Daniel m-ə́hɔ ndoō dəmásə mətá, 3m-ə́sa yá̰á̰ kə́ majə ngá̰ý aĺ ō, m-ə́sa dā̰ aĺ ō, m-a̰y kasə *nduú aĺ ō, m̄-ndum yibə̄ aĺ ō, bátə́ kadə̄ dəmásə́ kə́ mətá gə̄ təgān̄neé. 4Kem nāā kə́ ta kəga dɔ tə́, kə ndɔ̄ nāā kə́ nge ko̰ kutə jōó gidə i sɔ́ ní, m̄-rā kadə bā kə́ bo tə́, adə̄ i kadə bā Tigər tə́, 5ba m-ɔ̄r̄ dɔḿ dɔɔ́ anī m-á̰a̰ deē kógə̄ḿ kə́ o̰ō̰ kūbə̄ *lḛ́ḛ ō, əhɔ ɓōdə̄n kə kəlā kəhɔ ɓōdə̄ kə́ rāā kə lɔ́ŕ kə́ Upajə ō. 6Rɔ̄n to tītə̄ mbal̄ *kərijolitə beé ō, ta kumən ndə́lē tītə̄ tel̄ man̄ beé ō, kumən gə̄ ton̄ tītə̄ ngel̄ gə̄ kə́ hor i tadə́ gə̄ tə́ beé ō, jīn gē njan gē ndə́lə̄n̄ tītə̄ gində̄ nə̄ngá kasə kə́ deē usə gidə adə̄ ndə́lē beé ō, loo ń a ɔr̄ najə̄ ɓáa kōō ndūn ɓār̄ tītə̄ kōō kósə de kə́ ngá̰ý gə̄ beé ō. 7Deē ní i mā Daniel ngót n m-á̰a̰n, banī de gə̄ ń seḿ ní a̰a̰nən̄ alé, ba ɓōĺ rāādə́ ngá̰ý adə̄ a̰ȳ aw̄ ɓɔ̄ɔ̄n̄ rɔ̄də́ kɔ̄ɔ́. 8Adə̄ i mə̄kɔ́ ngóy n m̄-rā kə kérə́ḿ m-ā m-á̰á̰ yá̰á̰ kə́ to kɔr kum ngá̰ý ń ndōbə̄m̄ ní. Tɔ́gə́ḿ sḛ́ý gə̄gē gətóó bátə́ ō, ta kumḿ tūr̄ kɔ̄ɔ́ ō, tetə ndaa ō, m̄-sɔl̄ yélélé ō. 9Deē ní ɔr̄ najə̄ adə̄ m-ōō ndūn. Ba ndūn ní rāām̄ adə̄ m̄-teē m-ə̄sō m̄-sébə kumḿ nang tə́ m̄-ɓīī ɓē kógə̄ḿ kə́ m-óý mámák kɔ̄ɔ́ ō.

10Anī jī deē kógə̄ḿ ɔdəm̄ ō, un əndām̄ dɔ rɔ̄ḿ tə́ adə̄ m-ɔ́sə kejəḿ nang tə́ ō, m̄-tə́ndā jīḿ nang tə́ ō, banī m̄-ndebə ngá̰ý. 11Ba deē ní ədam̄ na:

Daniel, kó tár yā Nə́ɓā, ə́hɔ rɔ̄í tɔgə ba ī-nāā ger̄ kum najə̄ gə̄ ń m-ā m-ɔ̄r̄ seí ní. Ḭ́ḭ ī-ra dɔɔ́, tɔdɔ̄ ngɔlaā ní əlamə̄n̄ i rɔ̄í tə́. Dan ń m-ōō beé anī m-ḭ́ḭ m̄-ra dɔɔ́, banī m̄-ndebə ngá̰ý ɓáý. 12Ni ədam̄ ɓáý to̰ na:

Daniel, ī-lōō ɓōĺ! Tɔdɔ̄ əla gír ndɔ̄ ń ī-gḛy gerə̄ń kum yá̰a̰ gə̄ ń rāān̄ yá̰a̰ ō, ī-gḛy sɔlə̄ń dɔí kə̄ kə̄ no Nə́ɓā yāí tə́ ō ní, Nə́ɓā oō ndɔ̄ȳ yāí adə̄ m̄-reē i tām̄ najə̄ kɔrīí tə́. 13Ngār kə́ dɔ ɓē ko̰o̰ yā Persə gə̄ tə́ tā̰ā̰m̄ rɔ̄ɔ̄ bátə́ ndɔ̄ kutə jōó gidə i kógə̄ḿ, banī Misel ń i ngār kógə̄ḿ kə́ dan ngār gə̄ ń nin̄ i kété no madə̄də́ gə̄ tə́ ní reē dḭḭ̄m̄. adə̄ əhɔmə̄n̄ adə̄ m̄-rā kadə mban̄g kə́ Persə tə́. 14m̄-reē i kɔjiī yá̰á̰ ń ndɔ̄ń tə́ a rāā gír deē yāí gə̄ ní tə́ kadə̄ ī-ger̄. Tɔdɔ̄ yá̰á̰ kə́ ka̰ā̰ kə́ rang to noó ɓáý, ba yá̰á̰ ní a rāā yá̰a̰ i kem ndɔ̄ gə̄ kə́ ndɔ̄ń tə́ ní tə́.

15Dan ń deē ní a ɔr̄ najə̄ gə̄ ń noō seḿ ní, m-ə́la dɔḿ nang tə́ kɔ̄ɔ́ ō, m-ɔ̄r̄ najə̄ aĺ ō. 16Banī deē ní ɔdə ndāŕ taḿ. Anī m̄-tḛḛ̄ taḿ m-ɔ̄r̄ najə̄. M-ə́da deē ń ra noḿ tə́ ní na:

Kɔ́ɔ̄ḿ, yá̰á̰ ń m-á̰a̰ā̰ ní rāā adə̄ ɓōĺ rāām̄ ngá̰ý ō, rāā adə̄ tɔ́gə́ḿ gətóó bátə́ ō. 17Dan ń tɔ́gə́ḿ mā nge kəla yā kɔ́ɔ̄ḿ ń ra toó gətóo ō, koōḿ gətóo ō ní, m-ā m-ɔ̄r̄ najə̄ kə kɔ́ɔ̄ḿ i ba̰ý? 18Loo ń noō tə́ yá̰á̰ kə́ to tītə̄ deē ní tél ɔdə rɔ̄ḿ ɓáý to̰ ō, adə̄m̄ tɔ́gə gogə́ rang ō. 19Gō tə́ anī ədam̄ na:

Kó tár yā Nə́ɓā, ī-lōō ɓōĺ! Ādə̄ kemií sɔl̄ lɔm! Ə́hɔ rɔ̄í tɔgə! Dan ń deē ní a ɔr̄ najə̄ seḿ ní m̄-tél m-ə́ngé tɔ́gə gogə́ rang, adə̄ m-ə́dan na:

Kɔ́ɔ̄ḿ, ɔ̄r̄ najə̄, tɔdɔ̄ ādə̄m̄ tɔ́gə kɔ̄ɔ́. 20Ni-tél un najə̄ ɔr̄ ɓáý, əda na:

Ī-ger̄ kum reē ń m̄-reē rɔ̄í tə́ ní a? Ngɔlaā m-ā m̄-tél yā kaw̄ gogə́ yā rɔ̄ɔ̄ mban̄g kə́ Persə ɓáý. M-ā m̄-teē ba mban̄g kə́ Gərek a reē. 21Banī yá̰á̰ ń ndagnən̄ kem makətūbə̄ najə̄ kə́ rɔ̄kum tə́ ní, m-ā m-ə́daī kété kadə̄ ōō. De kə́ rang kə́ rāā seḿ kadə̄ m̄-rɔ̄ɔń de gə̄ ń noō gətóo, ba i Misel ń i ngār yāsí ní ngóy.

Currently Selected:

Makətūbə̄ yā Daniel 10: BS

Highlight

Copy