PĀ GƏ̄ 9
9
Kɔ́ɔ̄ɓē i nge kajə ngé ndoō gə̄
1Pā kə́ kem makətūbə̄ yā ngār yā gōsə̄ pā gə̄ tə́. A dānə̄n̄ gō i kə kənde kə́ ndū dūú. I pā yā Dabid.
2Kɔ́ɔ̄ɓē, m̄-ndigə ɓōkíī tɔ̄ȳ kə ngarā̰ kemḿ gēé malang ō,
m̄-ndigə kənī gotə yá̰a̰ malang kə́ majə ngá̰ý gə̄ ń ī-rāā ní ō.
3Nə́ɓā kə́ dɔɔ́ sa̰y ngá̰ý,
m-ə̄nī pā kə rīí ō, m̄-ndām̄ kə rɔ̄nelēé ō, najə̄ yāí tə́.
4Madə̄ ba̰ā̰ḿ gə̄ télən̄ kə gōdə́ ō, bḭ́ḭ̄n̄ kə́ njadə́ əhɔ dɔ nang aĺ ō,
oyn̄ kə̄ ta kumií tə́ noō ō.
5Tɔdɔ̄ ḭ̄ ī-rɔ̄ɔ̄ dɔḿ tə́ ō, ī-gān̄g sarya yāḿ ō.
Ī-ndi dɔ kōr̄ kāgə̄ mbang yāí tə́, ḭ̄ i nge gān̄g sarya kə́ gōtə́.
6Ḭ̄ ɔ́jə rāā yá̰á̰ kə́ tōr̄ kə nápar de gə̄ ń noō.
Ī-rāā ādə̄ de kə́ sew aĺ gə̄ oyn̄.
Ɔ̄r̄ rīdə́ kɔ̄ɔ́ dɔ nang tə́ kə́ njɔ́ḿ gə̄ tə́.
7Gír yā madə̄ ba̰ā̰ḿ gān̄g kɔ̄ɔ́, ni asə yá̰a̰ to̰ aĺ bátə́.
Ī-nujə ɓē yān gə̄ sák sák kɔ̄ɔ́,
a əga kem de gə̄ dɔ ɓē yān tə́ to̰ alé.
8Kɔ́ɔ̄ɓē o̰o̰ ɓē ngándáńg!
Ni-rāā adə̄ kōr̄ kāgə̄ mbang yān ndi ngan̄g yā rāań sarya.
9I ni n i nge ko̰o̰ ɓē kə gōó majə dɔ de gə̄ tə́ ō,
nge gān̄g sarya yā gír de gə̄ kə gō róbə́ kə́ súmūú ō ní.
10Kɔ́ɔ̄ɓē i loo ɓɔ̄ɔ̄ rɔ̄ yā deē ń rāān̄ kumən ndoō tə́ ní,
i loo ɓɔ̄ɔ̄ rɔ̄ yā de kə́ wur kɔl əsō dɔn tə́.
11Kɔ́ɔ̄ɓē, ādə̄ ngé gə̄ ń gerə̄n̄ rīí ní əndān̄ kemdə́ dɔí tə́,
tɔdɔ̄ ḭ̄ ə́yá̰ ngé gə̄ ń a sāānī ní kɔ̄ɔ́ alé.
12Kɔ́ɔ̄ɓē ń kōr̄ kāgə̄ mbang yān ndi Siyo̰ ní,
j-ənī pā j-ɔsiīneé gɔnən.
Yá̰á̰ kə́ to ɓōĺ gə̄ ń ni-rāā ní ə̄nīī mbērən
dan gír de gə̄ tə́!
13Tɔdɔ̄ i ni n i nge ndəle nja nge tɔ̄l̄ deē ní,
ni i nge rāā ba̰ā̰. Dɔn ndígə̄nal
ngé rɔ̄ tō ndoō gə̄ ń nōōn̄ kə̄ dɔn tə́ ní alé.
14Kɔ́ɔ̄ɓē, á̰a̰ kum tō ndoō yāḿ!
Á̰a̰ rɔ̄sɔl̄ kə́ asə naā beē ń madə̄ ba̰ā̰ḿ gə̄ əlan̄ dɔḿ tə́ toó.
I ḭ̄ n i nge kɔrə̄m̄ kɔ̄ɔ́ ta yo tə́ ní.
15Loo ń noō tə́ m-ā m̄-tə́dá yá̰a̰ malang ń
ndḛḛ̄ kadə̄ m̄-ɓōkíī tɔ̄ȳ ní
dan ngé kán naā gə̄ kə́ Siyo̰ tə́ rang ɓáý ō,
m-ā m̄-rāā rɔ̄nelí ḭ̄ nge kajəḿ ō.
16Nápar de kə́ rang gə̄ əsōn̄ kem bəlo ń nin̄ kɔ́ gə̄ ndērə̄n̄ tə́ ní,
əlan̄ njadə́ kum gūmbə̄ ń nin̄ kɔ́ gə̄ əyān̄ ní tə́.
17Kɔ́ɔ̄ɓē rāā adə̄ de gə̄ ger̄nən̄ i kə ta kūl̄ sarya ń nəkɔ́ gān̄g ní.
Gūmbə̄ yā de kə́ sew aĺ tél əhɔn nəkɔ́.
18Ādə̄ de kə́ sew aĺ gə̄ tél aw̄n̄ gogə́ ɓádá,
nápar de gə̄ ń noō malang ń dɔdə́ a ndígə̄nal dɔ Nə́ɓā tə́ ní.
19Banī dɔ Nə́ɓā a ndígə̄nal dɔ nge rɔ̄ tō ndoō tə́ aĺ i kə́ bátə́ gə̄ tə́.
Kəndā kem dɔ Nə́ɓā tə́ yā ngé rɔ̄ tō ndoō gə̄ ní gotə a to karī alé.
20Kɔ́ɔ̄ɓē, ḭ́ḭ dɔɔ́! Ādə̄ tɔ́gə deē ndul tɔȳ yāí alé!
Āw̄ kə gíŕ nápar de kə́ rang gēé ta loo gān̄g sarya yāí tə́!
21Kɔ́ɔ̄ɓē, ə́la ɓōĺ kə́ ngá̰ý kemdə́ tə́,
ādə̄ gíŕ nápar de gə̄ ń noō gerə̄n̄ kadə̄ nin̄ i deē ndul gə̄!
Currently Selected:
PĀ GƏ̄ 9: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
