PĀ GƏ̄ 51
51
Ndɔ̄ȳ kə́ kadə̄ Nə́ɓā mā̰yń rɔ̄n dɔ deē tə́
1Pā kə́ kem makətūbə̄ yā ngār yā gōsə̄ pā gə̄ tə́. I pā yā Dabid. 2I dan ń ni sāā Batəseba nə̄yá̰ Uri ō Natan nge koō ta aw̄ rɔ̄n tə́ ō ní#51.2 K. 2: Á̰a̰ī 2 Sam 12.1.
3Nə́ɓā, á̰a̰ kum to ndoō yāḿ sɔɔ̄ń ndūí ń ə̄nī ní!
Ḭ̄ nge ka̰a̰ kum tō ndoō yā de gə̄,
ɔ̄r̄ yá̰á̰ kə́ gōtə́ aĺ yāḿ gə̄ ń m̄-rāā ní kɔ̄ɔ́.
4Yá̰á̰ kə́ gōtə́ aĺ n m̄-rāā ní ī-tə́go kɔ̄ɔ́ malang.
Ɔ̄r̄ majaĺ yāḿ kɔ̄ɔ́ ādə̄ m-ūnjə̄ njáý njáý.
5Tɔdɔ̄ yá̰á̰ kə́ gōtə́ aĺ gə̄ ń m̄-rāā ní m̄-ger̄.
Yá̰á̰ kə́ majaĺ ń m̄-rāā ní to ta kumḿ tə́ ngándáńg.
6I īkɔ́ ngóy kal kógə̄ḿ beē n m̄-rāā yá̰á̰ kə́ majaĺ seí ní.
Mā m̄-rāā yá̰á̰ ń i yá̰á̰ kə́ majaĺ ta kumií tə́ ní.
Adə̄ ré ā ə̄ndā najə̄ dɔḿ tə́ anī najə̄ i yāí ō,
ā ī-gān̄g sarya ɓáa yá̰á̰ kə́ kadə̄ deē əda dɔí tə́ a gətóo ō.
7Á̰a̰ā̰, kété pá tá kadə̄ ojəmə̄n̄ ní mā i de kə́ gōtə́ alé.
Əla gír i ndɔ̄ ń kó̰ó̰ḿ ndānə̄m̄neé tə́ ní n mā i de kə́ majaĺ ní.
8Banī ḭ̄ ī-sāā i kadə̄ najə̄ kə́ rɔ̄kum ndi kem deē tə́.
Ī-ndóōm̄ kum kedə̄ ngarā̰ kemḿ tə́.
9Ɔ̄r̄ yá̰á̰ kə́ majaĺ ń m̄-rāā ní kɔ̄ɔ́,
anī m-ā m-ūnjə̄ njáý njáý.
Ī-tə́gom̄, anī m-ā m̄-ndaa yā tɔȳ búy kūbə̄#51.9 Búy kūbə̄: Á̰a̰ī Teē 4.6.
10Ədam̄ najə̄ mā̰ȳ rɔ̄ yāí
na a adə̄m̄ rɔ̄nel̄ ngá̰ý.
Loo ń noō tə́ mā ń ī-tétə̄ kə̄ngāḿ rárák kɔ̄ɔ́ ní,
m-ā m̄-rāā rɔ̄nel̄.
11Ún kumií kɔ̄ɔ́ ta yá̰á̰ kə́ majaĺ gə̄ ń m̄-rāā tə́ ní.
Ɔ̄l̄ yá̰á̰ kə́ gōtə́ aĺ gə̄ malang ń m̄-rāā ní kɔ̄ɔ́.
12Nə́ɓā, ī-rāā ādə̄ kemḿ unjə̄ njáý njáý.
Ī-tūr̄ ndílə́ḿ ādə̄ téĺ kə́ kijə ō, ī-rāān ādə̄ ra ngan̄g ō.
13Ī-lōō tə̄ɓām̄ kɔ̄ɔ́ rɔ̄í tə́.
Ī-lōō tél taā Ndíl kə́ Táĺ yāí jīḿ tə́ kɔ̄ɔ́.
14Ī-tél kə rɔ̄nel̄ kajə ń ájəm̄ ní ādə̄m̄ gogə́ ō,
Ādə̄ ndíl kem ndaa əhɔm̄ kə̄ dɔɔ́ ō.
15Ngé mān̄ dɔ ndū najə̄ yāí gə̄ ní,
m-ā m̄-ndóōdə́ gō róbə yāí gə̄.
Loo ń noō tə́ ngé rāā majaĺ gə̄ a télən̄ yā reē gogə́ rɔ̄í tə́.
16Nə́ɓā, nge kajəḿ, úń mósə dɔḿ tə́ kɔ̄ɔ́.
Loo ń noō tə́ m-ā m-ə̄nī gotə yá̰á̰ kə́ gōtə́ ń ī-rāā seḿ ní.
17Kɔ́ɔ̄ɓē, ī-teē taḿ ādə̄ m̄-ɓōkíīneé tɔ̄ȳ.
18Ī-gḛy i kadə̄ m̄-tun̄ yá̰a̰ m-ādī alé.
Yá̰a̰ tun̄ kə́ róō horoó gə̄gē ā ī-ndigə alé.
19Yá̰a̰ tun̄ ń Nə́ɓā ndigə ní i de kə́ dɔn tetə ká káláńg.
Nə́ɓā! Deē ń kə̄ngān tétə̄ rárák kɔ̄ɔ́ ō,
kemən tɔ̄ɔ̄ táḿ táḿ kɔ̄ɔ́ ō ní, ī-mbātə́n alé.
20Ī-rāā kem majə kə Siyo̰.
Ndogə̄ mbal̄ kə́ gidə ɓē kə́ Jerusalem tə́ ní, ī-tél ī-rāā rang.
21Loo ń noō tə́ ā ī-ndigə yá̰a̰ tun̄ gə̄ ń a ndējə̄nī kə gōó ní.
Ā ī-ndigə yá̰a̰ ndējə̄ kə́ rāā kə kōó kə́ kadī kə taá malang ō,
yá̰a̰ tun̄ kə́ róō horoó ō.
Loo ń noō tə́ ā tunə̄n̄ man̄g kə́ bəra gə̄ dɔ loo tun̄ yá̰a̰ yāí tə́.
Currently Selected:
PĀ GƏ̄ 51: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
