MATIYE 8

Jeju tɔ̄l̄ bānjə̄ dɔ deē kógə̄ḿ tə́

(Á̰a̰ī Mark 1.40-45; Luk 5.12-16)

1Dan ń Jeju risə kɔ̄ɔ́ dɔ mbal̄ tə́ anī, kósə de gə̄ ngá̰ý unən̄ gōn. 2Anī nge bānjə̄ kógə̄ḿ reē rɔ̄n tə́ ngɔr, ɔsə non nang tə́ non tə́ ba ədan na:

Kɔ́ɔ̄ɓē, ré ī-ndigə anī, ādə̄ rɔ̄ḿ ūnjə̄ njáý njáý#8.2 Ūnjə̄ njáý njáý: Á̰a̰ī Leb 14.1-32. 3Jeju əla jīn ɔdənneé ba ədan na:

m̄-ndigə, ādə̄ rɔ̄í i kə́ unjə̄ njáý njáý! Kə̄ ta jī tə́ beē bānjə̄ ur̄ rɔ̄n tə́ kɔ̄ɔ́. 4Jeju ədan na:

Ī-lōō kəda deé kógə̄ḿ gotə yá̰á̰ ń toō, ba āw̄ ɔ́jə nge tun̄ yá̰a̰ rɔ̄í, ba ī-ndējə̄ yá̰a̰ kə gō ndū ń Moijə əda ní, kadə̄ kumdə́ teē dɔ tə́.

Jeju rāā adə̄ rɔ̄ nge kəla yā ngol áskar gə̄ ngáā

(Á̰a̰ī Luk 7.1-10; Ja̰a̰ 4.43-54)

5Jeju ugə̄ Kapernaum anī, ngol áskar gə̄ kógə̄ḿ reē rɔ̄n tə́ 6rāān ɓɔ́, ədan na:

Kɔ́ɔ̄ɓē, nge kəla yāḿ to ɓēé noō. Njan lígə̄rī ō, rɔ̄n tōrə̄n ngá̰ý ō.

7Jeju ədan na m-ā m-āw̄ yā rāā kadə̄ rɔ̄n ngáā.

8Banī ngol áskar gə̄ ní tél ədan na:

Kɔ́ɔ̄ɓē, m-ásə kadə̄ údə́ kújú looḿ alé, ba ə́da najə̄ kógə̄ḿ ngóý anī, rɔ̄ nge kəla yāḿ a ngáā. 9Tɔdɔ̄ mā ń i kə de kə́ bo gə̄ dɔḿ tə́ ní, m-āw̄ kə áskar gə̄ kə́ m̄-ndi dɔdə́ tə́ ō. Adə̄ ré m-ə́da ni kógə̄ḿ kə aw̄ anī, aw̄ ō, ré m-ə́da ni kə́ rang na kə reē anī reē ō, ré m-ə́da nge kəla yāḿ na kə rāā yá̰á̰ ń toō anī rāā yá̰á̰ ní ō.

10Dan ń Jeju oō najə̄ gə̄ ń toō anī, ɔr kumən ngá̰ý, adə̄ əda ngé gə̄ ń unən̄ gōn ní na:

Ādə̄ m-ə́dásí najə̄ kə́ bo ngá̰ý, m-á̰a̰ taā kem kə́ beē rɔ̄ deē kógə̄ḿ tə́ dɔ nang kə́ Israel tə́ aĺ ɓáý. 11Ādə̄ m-ə́dásí, de gə̄ ngá̰ý a ḭḭn̄ no ɓē tə́ ō, dūn̄ ɓē tə́ ō, yā reē ndi ta kār̄ yá̰a̰ kəsa tə́ kə Abəraham ō, Isaak ō, Jakob ō, kem Ɓē ko̰o̰ kə́ dɔ rā̰ tə́ tə́. 12Banī ngé gə̄ ń Nə́ɓā rāā Ɓē ko̰o̰ tām̄ yādə́ tə́ ní, a tə̄ɓān̄də́ ndágá kɔ̄ɔ́ kadə̄ nin̄ i kum til tə́. Loo ń noō tə́ nin̄ a nōōn̄ ō, a máyā̰n̄ ngān̄gdə́ ō.

13Gō tə́ anī Jeju əda ngol áskar gə̄ ní na kə tél kə aw̄ ɓēé na a adə̄nən̄ yá̰á̰ ń taā kem ní. Anī rɔ̄ nge kəla yā ngol áskar gə̄ ní ngáā kum mbang nəkɔ́ ń noō tə́.

Jeju rāā adə̄ rɔ̄ ngé mo̰y gə̄ ngá̰ý ngáā

(Á̰a̰ī Mark 1.29-34; Luk 4.38-41)

14Jeju udə kújə yā Piyer tə́ anī, a̰a̰ umən kə́ dəyá̰ to kə mo̰y gajaá. 15Ni ɔdə jīn ɓáa mo̰y gajə ní əya̰n. Dəyá̰ ní ḭḭ dɔɔ́ rāā yá̰a̰ kəsa adə̄n.

16Loo tíbí anī, de gə̄ reēn̄ rɔ̄ Jeju tə́ kə de gə̄ ngá̰ý kə́ ndíĺ kə́ majaĺ gə̄ i kemdə́ tə́. Ni-tə̄ɓā ndíl gə̄ ní kə najə̄ kə́ tan tə́ ō, rāā adə̄ ngé mo̰y gə̄ malang ngáā ō. 17Ni-rāā yá̰á̰ ní i yā kadə̄ najə̄ ń Ijai nge koō ta əda ní reē udəń gírí, əda na:

Ni un nujə yājí gə̄ ō,

ɔy mo̰y yājí gə̄ ō dɔn tə́.

De gə̄ ń sāān̄ kun gō Jeju ní

(Á̰a̰ī Luk 9.57-62)

18Jeju a̰a̰ kósə de gə̄ ngá̰ý gīrə̄n̄ gidən anī, əda na kə n-teēn̄ bā kə̄ gidə kə́rēý tə́. 19Nge ndóō de gə̄ ndū najə̄ kógə̄ḿ reē rɔ̄n tə́ ba ədan na:

Ngoləḿ, loo malang ń ā āw̄ tū tə́ ní m-ā m-ún gōí. 20Jeju ədan na:

Njā̰ gə̄ aw̄n̄ kə bəlodə́ gə̄ ō, yel̄ kə́ dɔɔ́ gə̄ aw̄n̄ kə ɓēdə́ gə̄ ō, banī Ngōn̄ deē aw̄ kə loo kə́ yā kəlań dɔn ta tə́ alé.

21De kə́rēý dan ngé ndóō yá̰a̰ yān gə̄ tə́ ədan na:

Kɔ́ɔ̄ɓē, ādə̄m̄ ta róbə ādə̄ m-āw̄ m̄-dubə̄ bɔbə́ḿ pá tá. 22Banī Jeju tél ədan na:

Un gōḿ, ba ə́yá̰ ngé gə̄ ń oyn̄ kɔ̄ɔ́ ní ādə̄ dubə̄n̄ nīń yādə́ gə̄.

Nél balway oō ta Jeju

(Á̰a̰ī Mark 4.35-41; Luk 8.22-25)

23Jeju al̄ kem toó, anī ngé ndóō yá̰a̰ yān gə̄ unən̄ gōn. 24Néĺ kə́ bo ngá̰ý əsō kum bā bo tə́, adə̄ bəngál man̄ a rāā yā kun dɔ to. Ba Jeju tá to a ɓīī i mbée. 25Anī ngé ndóō yá̰a̰ yān gə̄ ndɔ́tə̄n̄ kə̄ rɔ̄n tə́ ngɔr, ndól̄nən̄ dɔ ɓīī tə́ ba ədanən̄ na:

Kɔ́ɔ̄ɓē, ájə́jí na tají a tḭ̄ḭ̄.

26Jeju ədadə́ na:

Sḭḭ̄ ngé taā kem mámák aĺ gə̄, ī-ɓōlíī i tām̄ rí tə́?

Tā anī ḭḭ dɔɔ́ ndán̄g nél ō, bā bo ō, anī loo tél to kúkúkú. 27Ɔr kum de gə̄ ngá̰ý, adə̄ ədan̄ na:

Deē nəkɔ́ ń toō i náā á nél gə̄gē, man̄ bā bo gə̄gē, oōn̄ tan beé?

Jeju tə̄ɓā ndíĺ kə́ majaĺ gə̄ kem de gə̄ jōó tə́

(Á̰a̰ī Mark 5.1-20; Luk 8.26-39)

28Dan ń Jeju ugə̄ gidə bā kə́rēý tə́ gō nang yā de kə́ Gadara gə̄ tə́ anī de gə̄ jōó kə́ ndíĺ kə́ majaĺ gə̄ i kemdə́ tə́ teēn̄ bəlo yo gə̄ tə́, a ɔjən̄ non. Ndíĺ kə́ majaĺ gə̄ rāān̄ kum de gə̄ ní ndoō tə́ ngá̰ý ō, de gə̄ ní rāān̄ yá̰a̰ majaĺ ngá̰ý ō, adə̄ deē asə kun róbə́ loo ngeé ń noō tə́ alé. 29De gə̄ ní unən̄ ndūdə́ kə̄ dɔɔ́ ngá̰ý ədanə̄ń na:

Ngōn̄ Nə́ɓā, yāí i rí sejí? Ī-reē laā i rāājí yá̰á̰ kə́ tōr̄ tə́ kété no ndɔ̄ tə́ a?

30Ɓūtə̄ kosong kə́ ngá̰ý gə̄ ran̄ sa̰y sḛ́ý, a əsan̄ yá̰a̰. 31Anī ndíĺ kə́ majaĺ gə̄ ní rāān̄ Jeju ɓɔ́ ədan̄ na:

Ré ī-tə̄ɓājí anī, ə́lájí kem kosong gə̄ ń noō tə́. 32Loo ń noō tə́ ni ədadə́ na kə aw̄n̄. Ɓáa nin̄-teēn̄ kem de kə́ jōó gə̄ ní tə́, ba aw̄ tūrə̄n̄ naā kem kosong gə̄ ní tə́. Anī kə̄ ta jī tə́ noō bor̄ gə̄ ní ɓə̄ngān̄ naā ɓuk, ḭḭn̄ ta kóongó mbal̄ tə́ kə̄ bāá kə̄ bāá, ba oyn̄ malang kum man̄ tə́.

33Ngé kul̄ bor̄ gə̄ ní a̰ȳn̄ naā aw̄n̄ ɓēé, ɔjən̄ gotə yá̰á̰ ń rāā yá̰á̰ ní malang ō, ɔjən̄ gotə najə̄ yā ngé ndíĺ kə́ majaĺ gə̄ ní ō. 34Loo ń noō tə́, de kə́ kem ɓēé gə̄ malang reēn̄ rɔ̄ Jeju tə́. Dan ń nin̄-a̰a̰nən̄ anī, rāānən̄ ɓɔ́ kadə̄ kə teē kɔ̄ɔ́ gō nang yādə́ tə́.

Currently Selected:

MATIYE 8: SARDC

Highlight

Copy