MATIYE 7
7
Ī-lōōī gān̄g sarya dɔ madə̄sí gə̄ tə́
(Á̰a̰ī Luk 6.37-38,41-42)
1Ī-gāngī sarya dɔ madə̄sí gə̄ tə́ alé, yā kadə̄ Nə́ɓā gāngəń sarya dɔsí tə́ aĺ ō. 2Tām̄ a gāngə̄n̄ sarya dɔsí tə́ i tītə̄ ń ī-gāngīneé dɔ madə̄sí gə̄ tə́ ní ō, a mbɔ̄jə́n̄ yá̰a̰ yā kadə̄sí i kem kār̄ tɔ̄jə̄ yá̰á̰ ń sḭḭ̄ ī-mbɔ̄jíīneé yá̰a̰ ādī tə́ ní ō. 3Ḭ̄ á̰a̰ buĺ mu kə́ kum ngōkó̰ó̰í tə́, banī á̰a̰ kāgə̄ kə́ bo kə́ kumií īkɔ́ tə́ aĺ ní i tām̄ rí tə́? 4Ḭ̄ ń kāgə̄ kə́ bo i kumií tə́ ní, loo kadə̄ ə́da ngōkó̰ó̰í na: Kə ra ɓam kadə̄ ɔ̄r̄ buĺ mu kə́ kumən tə́ kɔ̄ɔ́ i ba̰ý? 5Ḭ̄ i de kə́ nge gól̄ loo, ɔ̄r̄ kāgə̄ kə́ bo kə́ kumií tə́ kɔ̄ɔ́ pá tá ā á̰a̰ loo majə kadə̄ ā unəń buĺ mu kə́ kum ngōkó̰ó̰í tə́ kɔ̄ɔ́ ɓáý.
6Ī-lōōī tə́nī yá̰á̰ kə́ yā ɓōĺ gidə kadə̄ bísə gə̄ ō, ī-lōōī tə́nī məde yāsí gə̄ nang tə́ no kosong tə́ ō, na sōgə́ a tə́ɓān̄ njadə́ tə́ ō, télən̄ kə̄ rɔ̄sí tə́ tə́gā rə́yā̰n̄sí ō.
Dəje yá̰a̰ ō, sāā yá̰a̰ ō, gógə̄ ta róbə ō
(Á̰a̰ī Luk 11.9-13)
7Ī-dəjeī anī a adə̄n̄sí, ī-sāāī anī ā ə́ngeī, ī-gógī ta róbə anī a teēn̄ yā kadə̄sí. 8Tɔdɔ̄ nge dəje i nge taā ō, deē ń a sāā yá̰á̰ ní a ənge ō, ā teēn̄ ta róbə yā kadə̄ nge gógə̄ ta róbə ō. 9I náā kə́ dansí tə́ n ré ngōnən dəjen mápa anī, a un kūbə̄rū mbal̄ yā kadə̄n ní? 10Aláa ré dəjen kānjə̄ anī, a un lī yā kadə̄n ní? 11Sḭḭ̄ ń i ngé kem ndul gə̄ ní, ī-gerī kadə̄ ngáńsí gə̄ yá̰á̰ kə́ majə gə̄ anī, Bɔbə̄sí kə́ dɔ rā̰ tə́ a adə̄ ngé gə̄ ń dəjenən̄ ní yá̰á̰ kə́ majə tɔȳ loo ń noō aĺ a?
12Yá̰a̰ malang ń ī-gḛyiī kadə̄ de gə̄ rāān̄ sesí ní, ī-rāāī tītə̄ ń noō sedə́ ō. I yá̰á̰ ń toō bang n ndū najə̄ yā Moijə ō, ngé koō ta gə̄ ō, ɔjən̄sí kadə̄ ī-rāāī ní.
Ta róbə́ kə́ dūú
(Á̰a̰ī Luk 13.24)
13Údiī kə ta róbə́ kə́ dūú. Tɔdɔ̄ róbə́ kə́ bo mbo̰o̰ ō, kə́ laa binding ō, a tḭ̄ḭ̄ i ta deē. Ba ngé kunən gə̄ i ngá̰ý. 14Ba i ta róbə́ kə́ dūú ō, róbə́ kə́ kunən tōr̄ ngá̰ý ō n a aw̄ kə deé tū kajə tə́ ní, ba ngé kənge ta gə̄ i sḛ́ý beē.
Kāgə̄ ō kanə̄n ō
(Á̰a̰ī Luk 6.43-44)
15Ī-ngɔ̄mī rɔ̄sí tām̄ yā ngé koō ta kə́ rɔ̄kum aĺ gə̄ tə́. A reēn̄ kə̄ rɔ̄sí tə́ a gidədə́ i gidə batə̄ gə̄, ba kemdə́ i kem soó gə̄ kə́ a nārə̄n̄ yá̰a̰ kul̄ gə̄. 16Ā ī-gerīdə́ i kəla rāādə́ tə́. Deē a əja kan̄ kāgə̄ nduú dɔ kōn̄ ngɔkərɔ tə́ aĺ ō, a əjan̄ kan̄ kótə̄ dɔ kōn̄ ngar̄ tə́ aĺ ō. 17Kāgə̄ kə́ majə a an̄ i kan̄ kə́ majə, ba kāgə̄ kə́ majaĺ a an̄ i kan̄ kə́ majaĺ. 18Kāgə̄ kə́ majə kə́ yā kadə̄ a̰a̰n̄ kan̄ kə́ majaĺ ní gətóo ō, kāgə̄ kə́ majaĺ kə́ yā kadə̄ a̰a̰n̄ kan̄ kə́ majə ní gətóo ō. 19Kāgə̄ gə̄ malang ń anə̄n̄ majə aĺ ní, a tə́gān̄də́ yā ɓōkə́də́ horoó. 20I beé ní ā ī-gerī ngé koō ta kə́ rɔ̄kum aĺ gə̄ i kəla rāādə́ tə́.
Kɔr̄ najə̄ ō, rāā yá̰a̰ ō
(Á̰a̰ī Luk 13.25-27)
21I ngé gə̄ ń a ədamə̄n̄ na:
Kɔ́ɔ̄ɓē, Kɔ́ɔ̄ɓē! Ní n a udən̄ kem Ɓē ko̰o̰ kə́ dɔ rā̰ tə́ malang ní alé, banī i ngé gə̄ ń a rāān̄ yá̰á̰ ń kem Bɔbə́ḿ kə́ ndi dɔ rā̰ tə́ ndigə ní tá. 22Ndɔ̄ sarya tə́ anī de gə̄ ngá̰ý a ədamə̄n̄ na:
Kɔ́ɔ̄ɓē, Kɔ́ɔ̄ɓē! J-oō najə̄ ta Nə́ɓā tə́ ba j-əda de gə̄ i kə rīí aĺ a? Jə-tə̄ɓā ndíĺ kə́ majaĺ gə̄ i kə rīí aĺ a? Jə-rāā yá̰á̰ kə́ yáā gə̄ ngá̰ý i kə rīí aĺ a? 23Tā anī m-ā m-ə́dádə́ wáńg na:
m̄-ger̄sí sḛ́ý aĺ bátə́! Ī-téliī kə̄ gogə́ nú, na sḭḭ̄ i ngé rāā majaĺ gə̄!
Kújə́ kə́ jōó gə̄
(Á̰a̰ī Luk 6.47-49)
24Adə̄ deē malang ń oō najə̄ ń m-ə́dásí toō ō, rāā yá̰a̰ gə̄ ń m-ə́dá ní ō anī, a to i tītə̄ de kə́ nge kum kedə̄ kə́ rāā kújə yān dɔ mbal̄ tə́. 25Man̄ edə, adə̄ bā taā loo reē ta kújə́ tə́ ō, nél əla dɔ kújə́ tə́ kə ngangāá ngá̰ý ō, ba kújə́ ní tetə alé, tɔdɔ̄ əndān̄ ngəran i dɔ mbal̄ tə́. 26Ba deē ń oō najə̄ ń m-ə́dásí toō, ba rāā yá̰a̰ gə̄ ń m-ə́dásí ní aĺ ní, a to i tītə̄ de kə́ mbóó kə́ rāā kújə yān dɔ nán̄g ngárə̄ḿnjēý tə́. 27Adə̄ dan ń man̄ edə adə̄ bā taā loo bátə́ ugə̄ ta kújə́ tə́ ō, nél əla dɔ kújə́ tə́ kə ngangāá ngá̰ý ō anī, kújə́ ní tetə ba əsō nujə sák sák kɔ̄ɔ́.
Jeju ɔjə yá̰a̰ i kə́ de kə́ kɔ́ɔ̄ yá̰a̰ gə̄ tə́
28Dan ń Jeju tɔ̄l̄ ta najə̄ gə̄ ń toō anī, loo ndóō deē yá̰a̰ yān ɔr kum kósə de gə̄ ngá̰ý. 29Tɔdɔ̄ ni-ndóōdə́ yá̰a̰ i kə tɔ́gɔ́, ba i tītə̄ yā ngé ndóō de gə̄ ndū najə̄ yādə́ gə̄ alé.
Currently Selected:
MATIYE 7: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
