JOB 7
7
Najə̄ ń Job tūr̄ əda ní, ni nōōn rɔ̄n kə̄ dɔ Nə́ɓā tə́
1I kəla ɓəlo n deē reē rāāá dɔ nang tə́ ní aĺ a?
Ndɔ̄ yāḿ gə̄ i tītə̄ ndɔ̄ yā ngé rāā kəla ngámba gə̄ beé,
2tītə̄ ɓəlo kə́ ra kum mbang tə́ kə́ ngur kaw̄ ndílí rāān ngá̰ý beē,
tītə̄ nge ndoō kə́ rāā kəla ba ra a ngóō kəgā yān beé.
3Yāḿ mā i tītə̄ ń noō ō: Kəndā kem dɔ tə́ yāḿ gotə to i karī asə nāā ngá̰ý,
m̄-tə́gā taḿ gíŕ yá̰á̰ kə́ tōr̄ rɔ̄ḿ tə́ ndɔ̄ɔ́ kə dɔ ndɔ̄ gə̄.
4m̄-to kə̄ nang tə́ sḛ́ý beē anī, m̄-gír̄ m-ə́da na: M-ā m-ḭ́ḭ dɔɔ́ i rə́ngáý tə́?
Ba ré m-ḭ́ḭ dɔɔ́ anī, m̄-gír̄ m-ə́da na: Loo a tíbə i rə́ngáý tə́?
M-á̰a̰ woy woy, m-ɔ̄r̄ najə̄ mbitə mbitə bátə́ ta gír loo tə́.
5Rɔ̄ḿ i kəde malang ō, ngɔngɔ̄ do malang ō.
Ndārə́ḿ ɔr̄ kɔ̄ɔ́ ō, rāā wī ō.
6Ndɔ̄ḿ mān̄ láẃ ngá̰ý tɔȳ goy kəlā#7.6 Goy kəlā, i kāgə̄ kə́ ɓírə̄n̄ kəlā gidə tə́ kadə̄ tə́lan̄də́ mbənā naā tə́ ɓáa əjōń kūbə̄ kə́ jī nge kəjō kūbə̄ tə́,
ndɔ̄ḿ təgā dan ń kəla kəndā kem dɔ tə́ yāḿ ugə̄ ta ngóý tə́ kɔ̄ɔ́ ní.
7Nə́ɓā, ādə̄ əga kemií dɔ tə́ na ndiḿ kə kumḿ i koō ngóy ō,
tá kumḿ a tél yā ka̰a̰ rɔ̄nel̄ gogə́ to̰ aĺ ō.
8Kum deē ń a̰a̰m̄ kété ní, a tél yā ka̰a̰m̄ gogə́ to̰ alé.
Kumií a ra dɔḿ tə́ ba m-ā m̄-gətóo kɔ̄ɔ́.
9Tītə̄ ń kil̄ man̄ a tḭ̄ḭń kɔ̄ɔ́ ō, a gətóoń kɔ̄ɔ́ ō ní, deē aw̄ ɓádá i yā teē to̰ alé.
10Deē ń aw̄ tītə̄ ń noō ní, a tél yā reē gogə́ kem kújə yān tə́ to̰ alé,
loo ń ndi tū tə́ kété ní a gerə̄n to̰ alé.
11Adə̄ m-ā m-ə́hɔ taḿ to̰ alé.
Yá̰a̰ tɔȳ dɔḿ, adə̄ i gáŕ kadə̄ m-ɔ̄r̄ najə̄,
Wurəḿ atə̄m̄, adə̄ m-ā m̄-nōō rɔ̄ḿ.
12Mā i bā bo, aláa dā̰ man̄, á ə̄ndā deē taḿ tə́ kadə̄ ngɔ̄mə̄m̄ a?
13Dan ń m-ə́da na ré m̄-to kem tə̄ráá anī i sóḿ tə́,
aláa na m-ā m-ə́nge kem sɔl̄ lɔm,
14anī ḭ̄ ə́la ɓōĺ kə́ ngá̰ý kemḿ tə́ kə ta kūl̄ nī kə́ majaĺ ngá̰ý gēé ō,
yá̰á̰ ń ɔ́jəm̄ ādə̄ m-á̰a̰ā̰ ní rāām̄ kə ɓōló ō.
15m̄-gḛy kənī kəlā.
m̄-gḛy yo, ba m̄-gḛy kəto kə̄ngā ngongərong alé!
16Kɔr asəm̄ ta rɔ̄ḿ tə́, m-ā m̄-ndi kə kumḿ ngándáńg alé.
Ə́ya̰m̄, tɔdɔ̄ ndɔ̄ḿ gə̄ a təgān̄ i mbée.
17Deē ndul i rí kógə̄ḿ á ī-rāān yá̰á̰ kə́ sáláńg tə́ ní?
Ni i rí kógə̄ḿ á usiī dɔn tə́ ní?
18Á ī-go̰ō̰n kə ndɔ̄ý kə ndɔ̄ gə̄ ní?
Á ī-nāān kə kum mbang gə̄ malang ní?
19I rə́ngáý tə́ n a asiī kəndā kumií gírə́ḿ tə́ jəke loo mundə̄ tə́ ní?
I rə́ngáý tə́ n ā ə́ya̰m̄ kadə̄ m-úr man̄ míndə́ḿ ní?
20Nge kum̄ deē ndul, kumií ra dɔḿ tə́ sew i tām̄ rí tə́?
m̄-rāā yá̰á̰ kógə̄ḿ kə́ majaĺ a?
m̄-téĺ yá̰á̰ kə́ kɔȳ tām̄ yāí tə́ i tū rí tə́?
21Ásə́ tə́gā taí dɔ mbātə́ najə̄ yāḿ tə́ aĺ a?
Yá̰á̰ kə́ gōtə́ aĺ ń m̄-rāā ní ásə kəya̰ gō kɔ̄ɔ́ aĺ a?
Tɔdɔ̄ ń toō ní, m̄-to i kum bumbə́rú tə́ kɔ̄ɔ́ ɓá.
Ā ī-sāām̄, banī mā m̄-gətóo kɔ̄ɔ́.
Currently Selected:
JOB 7: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
