JOB 6
6
Najə̄ ń Job tūr̄ əda ní: Ni nōō i madə̄n gə̄
1Anī Job tél əda na:
2Háy, m̄-ndigə ngá̰ý kadə̄ deē mbɔ̄jə́ kɔȳ wur kɔl yāḿ ō,
kadə̄ deē ɔjə kɔȳ yá̰á̰ kə́ tōr̄ ń rāām̄ ní kə gōó ō!
3Banī nin̄ ɔȳn̄ tɔȳ nán̄g ngárə̄ḿnjēý ké ta bā bo gə̄ tə́.
I tām̄ najə̄ ń noō tə́ n m-ɔ̄rəń najə̄ mbitə mbitə ní.
4A̰á̰ā̰, Nə́ɓā kə́ tɔ́gən i ngá̰ý túrə̄m̄ kə kum gərā yān gēé,
adə̄ dā̰ rɔ̄ḿ njíbə̄ kong kəga kə́ majaĺ ngá̰ý kə́ ta gərā yān gə̄ tə́.
Yá̰a̰ gə̄ malang ń Nə́ɓā a əlań ɓōĺ kə́ ngá̰ý kem de gə̄ tə́ ní,
əndān̄ rɔ̄də́ kə ta naá kə jī loo rɔ̄ɔ́ yā rɔ̄ɔ̄m̄.
5Ré kərō kə́ bembeé ra ta mu kə́ mbōl̄ tə́ anī, a mbutə kə̄ nōō tə́ a?
Ré man̄g ra ta mə́ro yān tə́ anī, a nōō a?
6Deē a əsa yá̰á̰ kə́ nel̄ aĺ kanjə̄ katə̄ a?
Man̄ kaa kə̄njá kə́ gójəró nel̄ a?
7Mā m̄-gḛy kɔdə rɔ̄ yá̰a̰ kəsa gə̄ ń noō alé, i yá̰a̰ kəsa kə́ yḛr gə̄.
8m̄-gḛy ngá̰ý kadə̄ adə̄mə̄n̄ yá̰á̰ ń m̄-dəje ní,
kadə̄ Nə́ɓā adə̄m̄ yá̰á̰ ń m-ə̄ndā kemḿ dɔ tə́ ní.
9Ādə̄ Nə́ɓā ndigə ba rējə̄m̄ tā.
Jīn ń a sāań rāā yá̰á̰ kə́ majaĺ seḿ ní,
ādə̄ un kə̄ dɔɔ́ ba əndań gōḿ adə̄ gír yāḿ gān̄g kɔ̄ɔ́ ɗer.
10M-ā m-ə́nge kem sɔl̄,
m-ā m-ə́nge rɔ̄nel̄ dan yá̰á̰ kə́ tōr̄ kə́ ngá̰ý tə́,
tām̄ dɔḿ ndígə̄nal ndū kə́ kun gə̄ yā Nge kə́ táĺ alé.
11Tɔ́gə́ḿ kə́ yā kadə̄ m-ə̄ndāń kemḿ dɔ yá̰á̰ tə́ n to rá?
Ta tɔ̄l̄ taḿ a to i ba̰ý á kadə̄ m̄-na̰yń kə̄ loo ngatə́rā tə́ yā ndiń kə kumḿ ní?
12m̄-ngan̄g tītə̄ mbal̄ a? Rāān̄ dā̰ḿ i kə gində̄ nə̄ngá kasaá a?
13Nge dḭḭ̄ḿ ń m̄-ndi m-ā m̄-ngóōn ní gətóo a?
Yá̰a̰ malang kə́ yā kadə̄ m̄-teēń kum kə́ tōr̄ tə́ a̰ȳm̄ kɔ̄ɔ́ a?
14Deē ń tɔ́gən gətóo kɔ̄ɔ́ ní, i gáŕ kadə̄ deē madə̄n a̰a̰ kum tō ndoō yān.
Aĺ ɓáa ni a əya̰ ɓōĺ ndíĺ Nə́ɓā kə́ tɔ́gən i ngá̰ý kɔ̄ɔ́.
15Ngákó̰ó̰ḿ gə̄ gól̄mə̄n̄ tītə̄ man̄ dɔ mbal̄ beé,
tītə̄ man̄ dɔ mbal̄ kə́ kem kārə̄n tutə káḿ káḿ kɔ̄ɔ́ beē.
16Kɔ̄sə̄ man̄ kə́ dɔ mbalá kə́ tɔ̄ɔ̄ kɔ̄ɔ́ gə̄ rāān̄ adə̄ man̄ ḭḭ ngá̰ý kem kārə̄n tə́,
dan ń néjə#6.16 Néjə i man̄ kə́ to tītə̄ kɔ̄sə̄ ba ndaa túĺ túĺ tītə̄ búy kūbə̄ beé. Dan ń kūl̄ o̰o̰ ngá̰ý anī a ḭḭ dɔ rā̰ tə́ a dəse tun tun, ba gətóo dɔ nang yājí tə́ laā. kə́ dɔ mbalá gə̄ yḛḛ̄n̄ kɔ̄ɔ́ ní.
17Ngā nəngāá anī, man̄ dɔ mbal̄ iī kɔ̄ɔ́.
Dan ń mbang ɔsə ngá̰ý anī, man̄ dɔ mbal̄ iī sa̰a̰ kɔ̄ɔ́ kə̄ loo nəkɔ́ ń noō tə́.
18Ɓūtə̄ ngé njə̄rā mbā gə̄ əya̰n̄ róbə kundə́ kɔ̄ɔ́,
ba aw̄n̄ kumdə́ kə̄ mángá, gō tə́ anī tadə́ tḭ̄ḭ̄.
19Ɓūtə̄ ngé njə̄rā mbā gə̄ kə́ Tema ndəlen̄ man̄ kə kumdə́,
ɓūtə̄ ngé njə̄rā mbā gə̄ kə́ Saba əndān̄ kemdə́ dɔ man̄ dɔ mbal̄ tə́.
20Banī nin̄ ndə̄ngān̄ rɔ̄də́ tām̄ kəndā kə́ əndān̄ kemdə́ dɔ tə́ tə́:
Dan ń reē ugə̄n̄ wól man̄ dɔ mbal̄ tə́ anī, kəndā kem dɔ man̄ tə́ yādə́ ní gotə i rɔ̄sɔl̄.
21Tá sḭḭ̄ ī-toī i tītə̄ ń noō tām̄ yā madə̄sí tə́!
Dan ń á̰a̰ī yá̰á̰ kə́ majaĺ ngá̰ý rāā yá̰a̰ anī, ɓōĺ rāāsí.
22Nja kógə̄ḿ m-ə́dásí na: Ī-ndējə̄mī yá̰a̰,
ɔ̄rī dɔ yá̰a̰ kənge yāsí gə̄ ādə̄mī,
23ī-gāngīneé dɔḿ jī madə̄ ba̰ā̰ kógə̄ḿ tə́,
ájəmīneé jī deē kógə̄ḿ kə́ kumən o̰o̰n aĺ tə́ a?
24Ɔ́jəmī ādə̄ m̄-ger̄, anī m-ā m-ūtə̄ taḿ.
Ɔ́jəmī yá̰á̰ kógə̄ḿ ń m-ə́dá kə́ to mbóo tū tə́ ní.
25Najə̄ kə́ gōtə́ i najə̄ kə́ a adə̄ deē do a?
Ī-gɔríyɔ̄mī i dɔ rí tə́?
26I najə̄ ń m-ɔ̄r̄ ní n ī-sāāī gɔŕyɔ̄ a?
De kə́ əndā kemən dɔ yá̰á̰ kógə̄ḿ tə́ to̰ alé a ɔr̄ i najə̄ kə́ mān̄ kə nélé.
27Kadə̄ āwī bátə́ ī-túgī wə̄lā dɔ ngōn̄ hal tə́ a?
Kadə̄ ígiī kə madə̄ tasí a?
28Majə! Á̰a̰mī, adī kumsí ra ta yāḿ tə́,
ba ə́damī ké m̄-gól̄sí i mbée wa.
29I beé ní ādī asəsí!
M-ə́dá ɓáý to̰, ādī asəsí!
Najə̄ ní i najə̄ kə́ dɔ háĺ kə́ gōtə́ yāḿ mā tə́.
30Ta ndo̰ḿ əda najə̄ kógə̄ḿ kə́ gōtə́ aĺ i mbée a?
Taḿ ger̄ nāā wur kɔl aĺ i mbée a?
Currently Selected:
JOB 6: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.