JOB 4
4
Elipaj əda na: Deē ń Nə́ɓā əndan ní rɔ̄n nelə̄n
1Loo ń noō tə́ Elipaj ń i de kə́ Teman ní ɔr̄ najə̄ kə Jóbó əda na:
2Ré j-ɔr̄ najə̄ anī, ā ɔ́r ta tə́ a?
Ba i náā n asə ndi tan mbóó ní?
3Ḭ̄ i nge kɔjə kósə de gə̄ yá̰a̰,
de gə̄ ń jīdə́ sār̄yā kɔ̄ɔ́ ní, ḭ̄ ī-rāā adə̄ jīdə́ tél ngan̄g gogə́ rang.
4De gə̄ ń asən̄ ra dɔɔ́ to̰ aĺ ní, najə̄ kɔrīí undə́ dɔɔ́.
De gə̄ ń kejədə́ oy yélélé ní, ḭ̄ ī-rāā ādə̄ kejədə́ tél ngan̄g gogə́ rang.
5Ba ré ta i dɔí tə́ adə̄ yá̰á̰ kə́ tōr̄ teē dɔí tə́ anī, tɔ́gí gətóo kɔ̄ɔ́.
Ré i ḭ̄ n yá̰á̰ kə́ tōr̄ ɔdiī ɓáa, á̰a̰ woy woy.
6I dan ń ī-ndi majə ní ngóy n ā ī-ɓōĺ Nə́ɓā ní a?
I yá̰a̰ gə̄ ń ə̄ndā kemií dɔdə́ tə́ ní ngóy n əndān̄ ngəra hálí kə́ majə ní a?
7Ī-gír̄ á̰a̰ā̰: I de kə́ najə̄ gətóo dɔn tə́ kə́ rá n oy aĺ ní?
Deē a̰a̰ de kə́ súmūú gə̄ loo gətóó tə́ kɔ̄ɔ́ i loo kə́ rá tə́?
8Yá̰á̰ ń m-ə̄ndā ma̰ȳ m-á̰a̰ā̰ majə ní n toó: I ngé ndɔr̄ yá̰á̰ kə́ gōtə́ aĺ gə̄ ō,
i ngé dubə̄ yá̰á̰ kə́ tōr̄ gə̄ ō n a əjan̄ yá̰á̰ kə́ gōtə́ aĺ gə̄ ō, yá̰á̰ kə́ tōr̄ gə̄ ō ní.
9Koō kə́ teē ta Nə́ɓā tə́ tɔ̄l̄də́ ō, koō kə́ teē kó̰nən tə́ o̰o̰də́ kə́ hor tə́ ō.
10Nə́ɓā rāā adə̄ asədə́ nōō tītə̄ ɓɔl ō,
ni tétə̄ ngān̄g ngán ɓɔl gə̄ ń noō kɔ̄ɔ́ ō.
11Ré dā̰ kə́ yā kəsa gətóo anī, kagə oy yo ɓō ō,
ngán ɓɔl gə̄ tḭ̄ḭ̄n̄ naā kɔ̄ɔ́ gíŕ kó̰ó̰də́ tə́ ō.
12M-ə́nge najə̄ kógə̄ḿ loo mundə̄ tə́ jəke,
adə̄ mbīḿ oō yṵ́r̄ najə̄ ní.
13Dan ń nī kə́ ndɔ̄ɔ́ gə̄ a dáȳn̄ kə gír̄ yā deé kə̄ loo gə̄ tə́,
dan ń deē ɓīī ɓīī kə́ gōn əsō ní,
14ndílə́ḿ a̰ȳ ō, dā̰ḿ ndām̄ ngangan ō, kem kə̄ngāḿ ndew yakə yakə ō.
15Néĺ kógə̄ḿ tóo ta kumḿ pelele, rāā adə̄ bḭḭ̄ḿ ḭḭ mugugu.
16Deē kógə̄ḿ ra kə njan kə́ dɔɔ́, ba m̄-ger̄ ta kumən alé,
ndíl deē ra ta kumḿ tə́.
Loo to kúkúkú ba gō tə́ anī m-ōō ndū deē ɔr̄ najə̄ əda na:
17Deē ndul i súmūú tɔȳ Nə́ɓā a?
Deē ndul unjə̄ njáý njáý tɔȳ nge rāān a?
18Ré ngé kəla gə̄ yā Nə́ɓā nəkɔ́ gə̄gē ni-ənī kemən adə̄də́ alé,
ré de gə̄ yā Nə́ɓā kə́ dɔ rā̰ tə́ gə̄gē ni-a̰a̰ háĺ kə́ gōtə́ aĺ rɔ̄də́ tə́ anī,
19deē ndul gə̄ ń rāān̄də́ i kə nánjá ō, rɔ̄də́ i nán̄g ō,
asən̄ tɔ̄l̄də́ tītə̄ loo tɔ̄l̄ kón̄g beé ō ní,
loo kadə̄ ni-ənī kemən adə̄də́ i ba̰ý?
20Dəloí bátə́ kadə̄ loo tíbə ń ní, a rúndə̄n̄də́.
Nin̄ a gətóon̄ i kə́ njɔ́ḿ gə̄ tə́, kanjə̄ kadə̄ usə deē dɔdə́ tə́.
21Gángə̄n̄ kəlā kújə tandā yādə́ gə̄ kɔ̄ɔ́ aĺ a?
Nin̄ oyn̄ sɔɔ́ń kum kedə̄ yādə́ kə́ gətóo.
Currently Selected:
JOB 4: SARDC
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.