JOB 3
3
Najə̄ ń Job ō, madə̄n kə́ mətá gə̄ ō ɔrə̄n̄ kə naá ní
(3—31)
Job nōō rɔ̄n, əda na ké kə n ndi kə kumneé i yā rāā rí ɓáý wa
1Ta tɔ̄l̄ ta anī, Job teē tan ɔr̄ najə̄. Ni ndɔ̄ĺ ndɔ̄ kojən.
2Najə̄ ń ni-ɔr̄ ní n toó:
3Ādə̄ ndɔ̄ kojəḿ gətóo ō, loo kə́ ndɔ̄ɔ́ ń deē əda na unən̄ mósə ngōn̄ kə́ dəngam ní gətóo ō!
4Ādə̄ loo kə́ kadaá kə́ ndɔ̄ ń noō tə́ tél loo kə́ risə til nding!
Ādə̄ Nə́ɓā kə́ dɔ rā̰ tə́ sāā ndɔ̄ ń noō to̰ alé!
Ādə̄ loo kə́ unjə̄ kow gətóo ndɔ̄ ń noō tə́!
5Ādə̄ loo kə́ ndul ō, loo kə́ risə til nding kə́ ɓádá ō,
dəjen̄ ndɔ̄ ní ba taān̄.
Ādə̄ kil̄ man̄ kə́ ndul ndí ndḭ́ i dɔ ndɔ̄ ní tə́!
Ādə̄ loo kə́ risə til nding əla ɓōĺ kemən tə́!
6Ādə̄ loo kə́ ndɔ̄ɔ́ kə́ ndɔ̄ ń noō tə́ ní, ndul tɔȳ gotə loo kə́ ndɔ̄ɔ́ gə̄ malang!
Ré a tə́dan̄ ndɔ̄ gə̄ anī, ādə̄ tə́danən̄ aĺ ō,
ré a tə́dan̄ nāā gə̄ anī, ādə̄ tə́danən̄ aĺ ō!
7A̰á̰ā̰, ādə̄ loo kə́ ndɔ̄ɔ́ kə́ ndɔ̄ ń noō tə́ i loo kə́ ndɔ̄ɔ́ kə́ teē yá̰a̰ aĺ ō,
ādə̄ kɔŕ rɔ̄nel̄ ɓār̄ ndɔ̄ɔ́ ndɔ̄ ń noō tə́ aĺ ō!
8Ādə̄ ngé ndɔ̄ĺ ndɔ̄ gə̄ ndɔ̄lə́n̄ loo kə́ ndɔ̄ɔ́ kə́ ndɔ̄ ń noō tə́,
ngé gə̄ ń i ngé ndól̄ Dā̰ man̄ kə́ bo kə́ majaĺ ngá̰ý#3.8 Dā̰ man̄ kə́ bo kə́ majaĺ ngá̰ý ní i dā̰ kə́ to tītə̄ mar beé. Gotə súū kə́ kɔr̄ jóo əda na i dā̰ kə́ nge túr̄ tə́yō̰ gə̄ kə́ dɔ rā̰ tə́. Ngé ndɔ̄ĺ ndɔ̄ gə̄ i ngé rāā mbōlí kə́ jóo gə̄. I nin̄ n i ngé rāā kadə̄ ndɔ̄ kə́rēý gə̄ i ndɔ̄ kə́ majaĺ ngá̰ý tām̄ yā kəla tə́ ní. dɔ ɓīī tə́ gə̄ ní.
9Ādə̄ loo kə́ ndɔ̄ɔ́ ngeé ń toō a̰a̰ tə́yō̰ kə́ ta gír loo tə́ alé!
ādə̄ əndā kemən dɔ loo tīī tə́ ba ngóō ta sétə́!
Ādə̄ a̰a̰ loo kə́ ta gír loo tə́ kə́ unjə̄ wororo alé!
10Tɔdɔ̄ ni-rāā yá̰á̰ kə́ yā kɔgə̄məń teē kem kó̰ó̰ḿ tə́ alé,
adə̄ ɓōólaā m-á̰a̰ń tápə̄ ngá̰ý ní.
11M-óy kem kó̰ó̰ḿ tə́ kɔ̄ɔ́ aĺ i najə̄ rí tə́?
m̄-teē kem kó̰ó̰ḿ tə́ oy anī m-óy kɔ̄ɔ́ aĺ i tām̄ rí tə́?
12Deē əndā kejən gə̄ jōó ta naā tə́ taāməń i tām̄ rí tə́?
m-ə́nge mba jōó m-íl i tām̄ rí tə́?
13Nə́ngētə́ ɓōólaā m̄-to loo yāḿ jəke ɓádá.
Loo ń noō tə́ m-ā m̄-ɓīī ō, m-ā m-ɔ̄r̄ koō ō,
14naā tə́ kə mban̄g gə̄ ō, ngé kadə̄ kɔjə kə́ dɔ nang tə́ gə̄ ō,
ngé tél rāā loo kə́ nujə kɔ̄ɔ́ gə̄ gogə́ rang tām̄ yādə́ nin̄ kɔ́ gə̄ tə́ ō.
15Aĺ anī mā i naā tə́ kə ngār gə̄ kə́ ngé kənge lɔ́r gēé,
ngé gə̄ ń sə́lē arjā̰a̰ i ngá̰ý kem kújə yādə́ gə̄ tə́ ní.
16Aĺ anī m̄-gətóo tītə̄ ngōn̄ kə́ teē nīń kə́ əlanən̄ gíŕ nángāá kɔ̄ɔ́ beē,
tītə̄ ngán gə̄ kə́ a̰a̰n̄ loo kə́ unjə̄ kow aĺ beē.
17Ngé kem ndul gə̄ a rāān̄ deē yá̰á̰ kə́ tōr̄ ɓádá aĺ ō,
de gə̄ ń kɔr rāādə́ ní a taān̄ koō loo ń noō tə́ ō.
18Dəngáy gə̄ malang ndin̄ majə loo ń noō tə́,
nin̄ oōn̄ ndū nge ngɔ̄m̄ loo to̰ alé.
19De kə́ dūú ō, de kə́ bo ō asən̄ naā loo ń noō tə́ ō,
gāngə̄n̄ dɔ ɓəlo jī kɔ́ɔ̄n tə́ loo ń noō tə́ ō.
20Nə́ɓā rāā adə̄ ojən̄ nge rɔ̄ tō ndoō adə̄ a̰a̰ loo kə́ unjə̄ kow i tām̄ rí tə́?
Ni-rāā adə̄ ngé gə̄ ń wurdə́ ɔldə́ ngá̰ý ní ndin̄ kə kumdə́ i tām̄ rí tə́?
21Nin̄ ngóōn̄ yo ba yo reē alé.
Nin̄ sāān̄ yo sāā kə́ o̰o̰də́ tɔdɔ̄ tɔȳ sāā yá̰a̰ kənge.
22Ré əngen̄ i bəlo yodə́ anī, rɔ̄də́ a nel̄də́ ngá̰ý ō, a rāān̄ walya ō.
23Deē ń ger̄ róbə́ kə́ yā kun aĺ ní, i tām̄ rí tə́ n Nə́ɓā rāā adə̄ ni-ndi kə kumneé ní?
Tá i ni n Nə́ɓā ənī ndogə̄ kógə̄ḿ dɔn tə́ ngɔ̄m̄nneé ní.
24Yá̰a̰ kəsaḿ i síkə̄ nōō yāḿ gə̄ ō, m̄-tó̰ō̰ kə gír naá tītə̄ man̄ kə́ a nūgə́ kə tɔ́gɔ́ ō.
25Yá̰á̰ ń m̄-ɓōlə́n ngá̰ý kemḿ tə́ ní n reē rāām̄ ní ō,
yá̰á̰ ń kété m̄-ndi kə sōlōó kekəre najə̄n tə́ ní n teē dɔḿ tə́ ní ō.
26Yá̰á̰ ń na i ndi jəke ō, ndi kə́ lápə́yaá ō, kɔr̄ koō ō ní, m̄-ger̄də́ to̰ alé,
Banī i yá̰á̰ kə́ tōr̄ tōr̄ gə̄ tá teēn̄ dɔḿ tə́.
Currently Selected:
JOB 3: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
