1 MBAN̄G GƏ̄ 5
5
1Salomo̰ ndi dɔ ɓē ko̰o̰ gə̄ tə́ malang, əla gír dɔ ɓē ko̰o̰ gə̄ kə́ kadə bā Opəratə tə́ ō, dɔ nang yā Pilistin gə̄ tə́ ō, bátə́ ugə̄ń dɔ nin̄ dɔ nang kə́ Ejiptə tə́. Ɓē ko̰o̰ gə̄ ní əgānən̄ lambóo ō, rāān̄ kəla yān ō, bátə́ kadə̄ oyń. 2Yá̰á̰ ń Salomo̰ a əsa kə deē yān gēé kə dɔ ndɔ̄ gə̄ ní n toó: Jə́ngá kə́ kɔȳn i kəlōo dūbú ndohó ō, ndujə̄ kə́ lándə̄ kə́ kɔȳn i kəlōo dūbú kutə gidə i sɔ́sɔ́ ō, 3man̄g kə́ kɔr̄ gum̄də́ gə̄ kutə̄ kógə̄ḿ ō, man̄g kə́ kəhɔ dan madə̄ gə̄ tə́ dɔ mu tə́ kutə jōó ō, batə̄ gə̄ ɓú ō. Ba gotə dā̰ kə́ rang gə̄ kə́ tītə̄ lúm gə̄ kə jal̄ gə̄ kə dḛ́ḛ gə̄#5.3 Dḛ́ḛ: Á̰a̰ī Ndū 14.5 kə ndābə́ kə́ yḛmbə gə̄ ní, deē tə́dádə́ alé.
4Gō nang malang ń deē ra bā Opəratə tə́ anī i dɔ dáń mbɔ́r ɓē kə́ geleé tə́ kə no ɓēé ní, Salomo̰ o̰o̰ ɓē dɔ tə́, əla gír i Tipəsa bátə́ Gaja. Adə̄ mban̄g gə̄ kə́ gō nang ń noō tə́ malang əlan̄ dɔdə́ gíŕ tɔ́gə yān tə́. Lápə́ya to dɔ dán Salomo̰ tə́ kə madə̄ ɓēn gə̄ malang ń ndin̄ gīrə̄n̄ gidən ní. 5Dan ń Salomo̰ ndiń kə kumneé ní, de kə́ Juda tə́ gə̄ ō, kə́ Israel tə́ gə̄ ō, ndin̄ lápə́ya. Əla gír Beer Seba bátə́ ugə̄ń Dan ní, náā nəkɔ́ a ndi i gír kāgə̄ nduú yān nəkɔ́ tə́ ō, gír kāgə̄ kótə̄ yān nəkɔ́ tə́ ō.
6Sə́nda gə̄ ń a ndɔ́rə̄n̄ púsə rɔ̄ɔ̄ yā Salomo̰ gə̄ ní gángə̄n̄ loo ndadə́ gə̄ i gír loo dūbú kutə sɔ́ ō, ngé kal̄ sə́nda yān gə̄ i dūbú kutə gidə i jōó ō. 7Ngé ko̰o̰ ɓē kə́ kutə gidə i jōó gə̄ ń mban̄g Salomo̰ gə̄rādə́ ní, nin̄ kógə̄ḿ kógə̄ḿ a əlan̄ kə yá̰a̰ kəsaá nja kógə̄ḿ kem nāā kógə̄ḿ yā kadə̄ mban̄g Salomo̰ ō, de gə̄ malang ń a əsan̄ yá̰a̰ ta ɓē yān tə́ ní ō. Nin̄ a əndān kumdə́ gír mban̄g tə́ majə kadə̄ nal̄ yá̰á̰ kógə̄ḿ alé. 8Kōō ɔ́rjə ō, mu kə́ tutə ō, kə́ tām̄ yā sə́nda gə̄ tə́ ní, ngé ko̰o̰ ɓē gə̄ a əlan̄neé i loo ń mban̄g i tū tə́ ní, kə gō ń gān̄gə̄n̄neé dɔdə́ tə́ ní.
Kum kedə̄ yā Salomo̰ tɔȳ yā de gə̄ malang
9Nə́ɓā rāā adə̄ kum Salomo̰ edə̄ ngá̰ý ō, ni ger̄ yá̰á̰ ngá̰ý ō. Ɓō ger̄ yá̰á̰ kə́ kemən tə́ i ngá̰ý tītə̄ ngárə̄ḿnjēý kə́ ta bā bo tə́ beē ō. 10Kum kedə̄ yā Salomo̰ tɔȳ kum kedə̄ yā ngáń kə́ dūn̄ ɓē tə́ gə̄ malang ō, tɔȳ kum kedə̄ gə̄ malang kə́ dɔ nang kə́ Ejiptə tə́ ō. 11Kum kedə̄ yān tɔȳ yā de gə̄ malang, tɔȳ yā Etan ń i Ejərahit ní ō, yā ngán Mahol ń i Heman ō, Kalkol ō Darda ō ní ō. Rīn ɓār̄ dan nápar de gə̄ malang ń ndin̄ girə̄n̄ gidən ní tə́. 12Kāgə̄ najə̄ gə̄ ń ni tétə̄ ní i dūbú mətá ō, pā gə̄ ń ni-rāā ní i dūbú kógə̄ḿ kə kalən kə́ mí ō. 13Ni-ɔr̄ najə̄ yā kāgə̄ sédər kə́ Liban ō, yā kámbə isopə ń a əɓa dɔ ndogə̄ mbal̄ tə́ ní ō. Ni-ɔr̄ najə̄ yā dā̰ gə̄ ō, yel̄ gə̄ ō, kur̄ kə́ kagə nang tə́ gə̄ ō, kānjə̄ gə̄ ō.
14De gə̄ teēn̄ dan gír de gə̄ malang ń oōn̄ najə̄ kum kedə̄ yā Salomo̰ tə́ ní kadə̄ reē oōn̄ kə mbīdə́ ō, mban̄g kə́ dɔ nang tə́ gə̄ malang ń oōn̄ najə̄ kum kedə̄ yā Salomo̰ ní əlan̄ de gə̄ kadə̄ reē oōn̄ kə mbīdə́ ō.
Salomo̰ əndā dɔ yá̰a̰ rāā kújə yā Kɔ́ɔ̄ɓē naā tə́
(Á̰a̰ī 2 Yá̰a̰ 2.2-15)
15Hiram mban̄g kə́ Tir i madə̄ Dabid kété. Dan ń ni oō kadə̄ əndān̄ Salomo̰ mban̄g gotə bɔbə̄n Dabid tə́ anī, əla ngé kəla yān gə̄ rɔ̄n tə́. 16Salomo̰ əla əda Hiram na: 17Ī-ger̄ kadə̄ bɔbə́ḿ Dabid ənge ta róbə rāā kújə́ kə́ yā kə̄ndā rī Kɔ́ɔ̄ɓē Nə́ɓā yān dɔ tə́ alé, tɔdɔ̄ madə̄ ba̰ā̰n gə̄ əya̰nən̄ adə̄ taā koō alé. Nin̄ ənīnən̄ rɔ̄ɔ̄ kə̄ ta loo gə̄ tə́. Ba ta tɔ̄l̄ ta anī Kɔ́ɔ̄ɓē rāā adə̄ tetədə́ rɔ̄ɔ̄. 18Ngɔlaā ní Kɔ́ɔ̄ɓē Nə́ɓā yāḿ rāā adə̄ loo gə̄ ń gīrə̄n̄ gidəḿ ní tél sɔlə̄n̄ tā: De kə́ yā rɔ̄ɔ̄m̄ gətóo ō, yá̰á̰ kə́ to kum kaȳ aĺ kə́ yā rāām̄ gətóo ō. 19Adə̄ m̄-gḛy rāā kújə́ kə́ yā kəndā rī Kɔ́ɔ̄ɓē Nə́ɓā yāḿ dɔ tə́ tītə̄ ń Kɔ́ɔ̄ɓē ədań bɔbə́ḿ Dabid ní. Ni-əda Bɔbə́ḿ na i ngōnən ń n-a n-əndān gotə̄n tə́ dɔ kōr̄ kāgə̄ mbang yān tə́ ní n a rāā kújə kə́ yā kəndā rīn dɔ tə́ ní. 20Ní, m̄-rāāī ɓɔ́ ba ə́da ngé kəla yāí gə̄ ādə̄ tə́gān̄ kāgə̄ sédər gə̄ kə́ Liban tə́ adə̄mə̄n̄. Tɔdɔ̄ ī-ger̄ kadə̄ deē yāí gə̄ gerə̄n̄ tə́gā kāgə̄ tɔȳ deē yāḿ gə̄. Ngé kəla yāḿ gə̄ a ɔsən̄ kíĺ ngé kəla yāí gə̄ kə̄ dɔɔ́ kem kəla tə́. Gō tə́ anī kutə nar ń ā ī-gān̄g dɔḿ tə́ tām̄ yā ngé kəla gə̄ tə́ ní, m-ā m-ādī i gidə kógə̄ḿ.
21Dan ń Hiram oō najə̄ yā Salomo̰ anī, rɔ̄n nelə̄n ngá̰ý, adə̄ əda na: Kɔsə gɔn i yā Kɔ́ɔ̄ɓē ɓōólaā, tɔdɔ̄ ni-adə̄ Dabid ngōn̄ kə́ kumən edə̄ kadə̄ ndi dɔ gír de kə́ ngá̰ý gə̄ ń toō tə́. 22Gō tə́ anī Hiram əla əda Salomo̰ na n-oō kəla yān majə. Na n-ndigə̄ kadə̄n kāgə̄ sédər gə̄ ō, kāgə̄ sipəres gə̄ ō, malang ń gḛy ní. 23Ngé kəla yān gə̄ na a risən̄neé dɔ mbal̄ Liban tə́ yā kaw̄ń bátə́ kum kā̰ tə́. Na a tṵ́ṵ̄n̄də́ naā tə́ ba na a nēlə̄n̄də́ dɔ bā bo tə́ yā kaw̄ń loo ń nəkɔ́ Salomo̰ na a ɔjən tə́ ní. Ngé kəla yān gə̄ na a tútən̄ kāgə̄ gə̄ ní naā tə́ loo ní tə́, kadə̄ ngé kəla yā Salomo̰ gə̄ ɔy aw̄n̄neé. Ni Salomo̰ tá kə əgān kə yá̰a̰ kəsaá kadə̄ n-adə̄ de kə́ kem kújə yān tə́ gə̄.
24Hiram adə̄ Salomo̰ kāgə̄ sédər gə̄ ō, kāgə̄ sipəres gə̄ ō, kə gō ń kemən gḛy ní. 25Salomo̰ adə̄ Hiram gémē kem səmbē bo dūbú ɓú jōó kadə̄ i yá̰a̰ kəsa kə́ tām̄ yā de kə́ kem kújə yān tə́ gə̄ ō, adə̄n yibə̄ kə́ kumən unjə̄ majə səmbē bo ɓú jōó ō. Yá̰á̰ ń Salomo̰ a adə̄ Hiram kə dɔ ɓāl̄ gə̄ ní n noó. 26Kɔ́ɔ̄ɓē adə̄ Salomo̰ kum kedə̄ tītə̄ ń ədanneé ní, adə̄ mbənādə́ nin̄ kə Hiram to majə ō, nin̄ jōó mbak əhɔn̄ madə̄ naā ō.
Salomo̰ ɔy de gə̄ adə̄ rāān̄ kəla ngámba
(Á̰a̰ī 2 Yá̰a̰ 1.18; 2.1; 2.16-17)
27Mban̄g Salomo̰ ɔy de gə̄ dūbú kutə mətá dan ngán Israel gə̄ tə́ kadə̄ rāān̄ kəla ngámba. 28Kə dɔ nāā gə̄ ń noō ni-əla sedə́ dūbú kutə dɔ mbal̄ kə́ Liban tə́ kadə̄ mbélə̄n̄ gír naā. A rāān̄ nāā kógə̄ḿ dɔ mbal̄ Liban tə́ ō, nāā jōó kem ɓē yādə́ gə̄ tə́ ō. Ngol ngé rāā kəla ngámba gə̄ ní i Adoniram. 29Ngé kətō yá̰a̰ gə̄ i dūbú kutə sīrí ō, ngé tɔ́sə̄ mbal̄ gə̄ ń a rāān̄ kəla dɔ mbalá tām̄ yā Salomo̰ tə́ ní nin̄ i deē dūbú kutə̄ sɔ́sɔ́ ō. 30Ngāgəra dɔ ngé kəla gə̄ ń ngé ko̰o̰ ɓē yā Salomo̰ gə̄ tə́ndān̄də́ dɔ de gə̄ tə́ kadə̄ ran̄ sedə́ ta rāā kəla ní nin̄ i deē dūbú mətá kə ɓú mehḛ́, tə́dan̄də́ kə ngé rāā kəla alé. 31Mban̄g adə̄ ndūn kadə̄ ró̰ȳn̄ mbal̄ kə́ bo kə́ majə ngá̰ý gə̄ ō, kadə̄ tɔ́sə̄n̄ kadə ō, yā kəndāń gíŕ kújə yā Kɔ́ɔ̄ɓē. 32Ngé kəla yā Salomo̰ gə̄ ō, yā Hiram gə̄ ō, de kə́ Gebal gə̄ ō, tə́gān̄ kāgə̄ gə̄ ō, mbal̄ gə̄ ō, ba kánə̄n̄ kə̄ dɔ naā tə́ yā rāań kújə yā Kɔ́ɔ̄ɓē.
Currently Selected:
1 MBAN̄G GƏ̄ 5: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.