1 JA̰A̰ 3

Ngáń Nə́ɓā

1Á̰a̰ī táŕ kə́ ngá̰ý ń Bɔbə̄jí Nə́ɓā táŕjí kadə̄ ɓārə́nńjí ngánən gə̄ ní. Tɔdɔ̄ jḭḭ̄ i ngánən gə̄ rɔ̄kum. Ré de kə́ dɔ nang tə́ gə̄ gerə̄n̄jí aĺ anī, i tām̄ ger̄ ń nin̄-gerə̄n̄ Nə́ɓā aĺ tə́ ní ō. 2Kó tár yāḿ gə̄, ngɔlaā ń toō jḭḭ̄ i ngáń Nə́ɓā, ba jī loo kətojí kə́ ndɔ̄ń tə́ ń j-a jə-toī ní, ɔjən̄ kə̄ ndágá aĺ ɓáý. Jə-gerī kadə̄ ré Kərist a ɔjə rɔ̄n kə̄ ndágá anī, j-a jə-toī tītə̄n. Tɔdɔ̄ j-a j-a̰a̰ī kadə̄ ni a to i kum gotən. 3Ba náā nəkɔ́ ń əndā kemən dɔn tə́ tītə̄ ń noō ní, ādə̄ kɔ́ɔ̄ i kə́ unjə̄ njáý njáý tītə̄ ń Kərist i de kə́ unjə̄ njáý njáý ní.

4Náā nəkɔ́ ń rāā majaĺ ní, rāā i yá̰á̰ kə́ gō tə́ aĺ. Tɔdɔ̄ majaĺ i yá̰á̰ kə́ gō tə́ aĺ. 5Ī-gerī kadə̄ Jeju Kərist teē i yā kɔr̄ majaĺ kɔ̄ɔ́, ba ni tá majaĺ gətóo kemən tə́. 6Náā nəkɔ́ ń ndi kemən tə́ ní, a rāā majaĺ alé. Banī náā nəkɔ́ ń rāā majaĺ ní, i de kə́ a̰a̰ Jeju aĺ ō, gerə̄n aĺ ō.

7Ngánə́ḿ kə́ dūú gə̄, ādī deē kógə̄ḿ rāāsí ādə̄ ī-ndúmī alé. Deē ń rāā yá̰á̰ kə́ gōtə́ ní, i de kə́ gōtə́ tītə̄ ń Jeju Kərist i de kə́ gōtə́ ní. 8De kə́ nge rāā majaĺ i deē yā diabəl, tɔdɔ̄ diabəl rāā majaĺ i ta kəla gíŕ tə́ beē.

9Náā nəkɔ́ ń Nə́ɓā ojən ní, a rāā majaĺ alé. Tɔdɔ̄ kum kōō yā Nə́ɓā#3.9 Kum kōō yā Nə́ɓā i najə̄ yā Nə́ɓā ń de gə̄ ndóōn̄ ní (Luk 8.11; 1Pi 1.23). i kemən tə́, adə̄ ni-asə rāā majaĺ alé tām̄ i Nə́ɓā n ojən ní. 10Yá̰á̰ ń a ɔr̄ dɔ nin̄-ngáń Nə́ɓā naā tə́ kə ngán diabəl gēé ní n toó: Deē ń rāā yá̰á̰ kə́ gōtə́ aĺ ní, ni i yā Nə́ɓā aĺ ō, deē ń tár ngōkó̰o̰n aĺ ní, ni i yā Nə́ɓā aĺ ō.

Tár yā ngákó̰o̰ naā gə̄

11Tɔdɔ̄ najə̄ ń ōōī ta kəla gíŕ tə́ ní n toó: I kadə̄ jə-táriī naā. 12Ba i kadə̄ jə-toī tītə̄ Kain#3.12 Kain: Á̰a̰ī Tkg 4.1-18 ń ni i deē yā De kə́ Majaĺ adə̄ tɔ̄l̄ ngōkó̰o̰n ní alé. Ba ni-tɔ̄lən i tām̄ rí tə́? I tām̄ kəla rāān i kə́ majaĺ, banī yā ngōkó̰o̰n i kə́ gō tə́.

13Ngákó̰ó̰ḿ gə̄, ré de kə́ dɔ nang tə́ gə̄ imə̄n̄sí anī, ādī ɔr kumsí alé. 14Jə-gerī kadə̄ jə-teēī kɔ̄ɔ́ jī yo tə́ ba j-udiī tū ndi kə kumuú tə́, i tɔdɔ̄ jə-táriī ngákó̰ó̰jí gə̄. Deē ń tár gətóo kemən tə́ ní, ndi i jī yo tə́ ɓáý. 15Tá náā nəkɔ́ ń im̄ ngōkó̰o̰n ní, ni i nge tɔ̄l̄ deē. Ba ī-gerī kadə̄ nge tɔ̄l̄ deē i deē ń ndi kə kumuú kə́ ngándáńg gətóo kemən tə́ ní. 16Jḭḭ̄ jə-gerī tár i kə ta kūl̄ yá̰á̰ ń toō: Jeju Kərist oy i tām̄ yājí tə́. Ní, majə kadə̄ jḭḭ̄ j-oyiī tām̄ yā ngákó̰ó̰jí gə̄ tə́ ō. 17Ré deē kógə̄ḿ aw̄ kə yá̰a̰ kənge kə́ dɔ nang tə́ laā ō, a̰a̰ ngōkó̰o̰n kə́ yá̰a̰ tōr̄ rɔ̄n ō, ba kumən o̰o̰n tām̄ yān tə́ aĺ ní, ni-táŕ Nə́ɓā i ba̰ý? 18Ngánə́ḿ kə́ dūú gə̄, ādə̄ jə-táriī kə najə̄ kə́ tají tə́ aĺ ō, kə ta ndo̰jí aĺ ō, banī kə yá̰a̰ rāājí kə́ rɔ̄kum.

Ndi kə̄ no Nə́ɓā tə́ kanjə̄ sōl̄ yá̰a̰

19I loo ń noō tə́ n j-a jə-gerī kadə̄ jḭḭ̄ i yā najə̄ kə́ rɔ̄kum ō, kemjí a tetə kə̄ nang tə́ kə̄ no Nə́ɓā tə́ ō ní. 20Tɔdɔ̄ ré kemjí əhɔjí kə najá anī, Nə́ɓā i kə bo tɔȳ kemjí ō, ni-ger̄ yá̰a̰ malang ō. 21Kó tár yāḿ gə̄, ré kemjí əhɔjí kə najá aĺ anī, j-a jə-sōlī yá̰á̰ kógə̄ḿ ta kum Nə́ɓā tə́ alé. 22Ká ré i yá̰á̰ rí gə̄gē n jə-gədeī jīn tə́ anī, j-a j-əngeī. Tɔdɔ̄ jə-rāā yá̰a̰ i kə gō míndəneé ō, jə-rāāī yá̰á̰ kə́ nelə̄n ō. 23Ba yá̰á̰ ń ni-əda kə gō míndən ní n toó: I kadə̄ jə-taāī kem Ngōnən Jeju Kərist ō, jə-táriī naā ō, tītə̄ ń ədań ní. 24Ba deē ń rāā yá̰a̰ gə̄ ń Nə́ɓā əda kə gō míndən ní, kɔ́ɔ̄ ndi kem Nə́ɓā tə́ ō, Nə́ɓā ndi kem kɔ́ɔ̄ tə́ ō. Ba yá̰á̰ ń jə-gerīneé kadə̄ ni-ndi kemjí tə́ ní, i Ndíĺ kə́ Táĺ ń ni-adə̄jí ní.

Currently Selected:

1 JA̰A̰ 3: SARDC

Highlight

Copy