1 JA̰A̰ 2
2
Kərist dḭḭ̄jí
1Ngánə́ḿ kə́ dūú gə̄, m̄-ndang najə̄ ń toō m-ādə̄sí i yā kadə̄ ī-rāāī majaĺ alé. Ba ré deē kógə̄ḿ rāā majanī, jḭḭ̄ i kə nge rɔ̄ɔ̄ dɔjí tə́ kógə̄ḿ kə́ ndi rɔ̄ Bɔbə̄n Nə́ɓā tə́, adə̄ i Jeju Kərist ń i de kə́ nge rāā yá̰á̰ kə́ gō tə́ ní. 2Ni-tun̄ yá̰a̰ i tām̄ majaĺ yājí gə̄ tə́. Ba tun̄ yá̰a̰ yān ní i tām̄ majaĺ yājí jḭḭ̄ gə̄ tə́ ngóy alé, ba i tām̄ majaĺ yā de gə̄ malang kə́ dɔ nang tə́ ō.
3Ré jə-rāāī yá̰a̰ kə gō míndəneé anī, i nge ń noō n ɔjə kadə̄ jə-ger̄niī ní. 4Deē ń əda na n-gerə̄n, banī rāā yá̰a̰ kə gō míndəneé aĺ ní, i de kə́ nge sor̄, adə̄ najə̄ kə́ rɔ̄kum gətóo kemən tə́. 5Deē ń rāā yá̰á̰ ń ni-əda ní anī, kɔ́ɔ̄ táŕ Nə́ɓā rɔ̄kum. I loo ń noō tə́ n jə-gerī kadə̄ jḭḭ̄ i kemən tə́ ní. 6Deē ń əda na n-ndi na i kemən tə́ ní, majə kadə̄ kɔ́ɔ̄ njə̄rā tītə̄ ń Jeju nəkɔ́ njə̄rań ní.
Yá̰á̰ kə́ kijə kə́ kəda kadə̄ yā rāā
7Kó tár yāḿ gə̄, yá̰á̰ ń m̄-ndang najə̄ kə́ dɔ tə́ m-ādə̄sí ní, i gō míndə́ kə́ kijə alé, banī i kə́ jóo, adə̄ i yá̰á̰ ń sḭḭ̄ ōōī ta kəla gíŕ tə́ ní. 8Ɓá tā ba i gō míndə́ kə́ kijə n m̄-ndang m-ādə̄sí ní, tām̄ loo kə́ risə til nding a mān̄ i mbée, ba loo kə́ unjə̄ kow kə́ rɔ̄kum to kɔ̄ɔ́ ɓá. Rɔ̄kum yān ɔjə rɔ̄n kə̄ ndágá i kem Kərist tə́ ō, kemsí sḭḭ̄ tə́ ō.
9Deē ń əda na n-ndi na i kum loo kə́ unjə̄ kow tə́, ba im̄ ngōkó̰o̰n ní, ni i kum til tə́ ɓáý. 10Deē ń tár ngōkó̰o̰n ní ndi i kum loo kə́ unjə̄ kow tə́, adə̄ yá̰á̰ kə́ tītə̄ bə̄dē kə́ kadə̄ əga deē kadə̄ əsō gətóo kemən tə́. 11Ba deē ń im̄ ngōkó̰o̰n ní ndi i tilií ō, njə̄rā i kum til tə́ ō, ger̄ loo ń ni a aw̄ kə̄ tū tə́ ní aĺ ō, tām̄ til utə̄ kumən kɔ̄ɔ́.
12Ngánə́ḿ gə̄, m̄-ndang makətūbə̄ m-ādə̄sí yā kədańsí na majaĺ yāsí gə̄ i kə́ mā̰ȳ rɔ̄ dɔ tə́ kɔ̄ɔ́ kə ta kūl̄ rī Jeju ń ī-taāī kemən ní. 13m̄-ndang makətūbə̄ m-ādə̄sí sḭḭ̄ bɔbə̄ ngán gə̄, yā kədańsí na sḭḭ̄ ī-gerī nge ń ndi ta kəla gíŕ yá̰a̰ gə̄ tə́ ní kɔ̄ɔ́#2.13 Nge ń ndi ta kəla gíŕ yá̰a̰ gə̄ tə́ ní: Á̰a̰ī Ja̰a̰ 1.1.
14Sḭḭ̄ ngánə́ḿ kə́ dūú gə̄, m̄-ndang makətūbə̄ ń toō m-ādə̄sí i tām̄ sḭḭ̄ ī-gerī Bɔbə̄jí. Sḭḭ̄ bɔbə̄ ngán gə̄, m̄-ndang makətūbə̄ ń toō m-ādə̄sí i tām̄ sḭḭ̄ ī-gerī nge ń ndi ta kəla gíŕ yá̰a̰ gə̄ tə́ ní. Sḭḭ̄ balsáa gə̄, m̄-ndang makətūbə̄ m-ādə̄sí i tām̄ tɔ́gə́sí to ō, najə̄ yā Nə́ɓā to kemsí tə́ ō, ī-tetiī de kə́ majaĺ#2.14 De kə́ majaĺ i Sətan. rɔ̄ɔ̄ ō.
15Ī-táriī dɔ nang ń toō aĺ ō, yá̰á̰ kə́ tū tə́ gə̄ aĺ ō. Ré deē kógə̄ḿ tár dɔ nang ń toō anī, tár yā Bɔbə̄ Ngōn̄ gətóo kemən tə́. 16Tɔdɔ̄ yá̰á̰ kə́ dɔ nang tə́ laā gə̄ malang, adə̄ i ngur yá̰a̰ ō, ndə̄ngā yá̰a̰ ō, kɔjə rɔ̄ kə́ tām̄ yá̰a̰ kənge tə́ ō ní, ḭḭn̄ i rɔ̄ Bɔbə̄ Ngōn̄ tə́ alé, ba i dɔ nang tə́ laā. 17Ba dɔ nang ń toō ō, ngur yá̰á̰ kə́ tū tə́ gə̄ ō, a mānə̄n̄ kɔ̄ɔ́. Banī deē ń rāā yá̰á̰ ń Nə́ɓā ndigə ní, a ndi ngándáńg.
Nge rɔ̄ɔ̄ Kərist
18Ngánə́ḿ kə́ dūú gə̄, jə-ndiī i kum mbang kə́ ta tɔ̄l̄ ta tə́. Ba tītə̄ ń ōōī kadə̄ nge rɔ̄ɔ̄ Kərist kógə̄ḿ a reē ní, ngɔlaā ngé rɔ̄ɔ̄ Kərist gə̄ ngá̰ý reē ugə̄n̄ kɔ̄ɔ́ ɓá. I tītə̄ ń noō n jə-gerīiń kadə̄ jə-ndiī i kum mbang kə́ ta tɔ̄l̄ ta tə́ ní. 19Nin̄-teēn̄ i danjí tə́, banī nin̄ i deē yājí gə̄ alé. Tām̄ ré nin̄ i deē yājí gə̄ anī, a ndin̄ sejí. Ba nge ń noō ɔjə kə̄ ndágá kadə̄ nin̄ i deē yājí gə̄ alé.
20Banī sḭḭ̄ ə́ngeī Ndíĺ kə́ Táĺ ń Kərist adə̄sí ní ō, sḭḭ̄ malang ī-gerī najə̄ kə́ rɔ̄kum ō. 21Ré m̄-ndang makətūbə̄ m-ādə̄sí anī, i tām̄ ger̄ kə́ sḭḭ̄ ī-gerī najə̄ kə́ rɔ̄kum aĺ alé, banī i yā kədańsí na ī-gerī najə̄ kə́ rɔ̄kum ō, najə̄ kə́ sor̄ kógə̄ḿ kə́ teē dan najə̄ kə́ rɔ̄kum tə́ gətóo ō.
22I náā n i de kə́ nge sor̄ ní? I deē ń nējə̄ əda na Jeju i Kərist aĺ ní aĺ a? Nge rɔ̄ɔ̄ Kərist i de kə́ tītə̄ ń noō. Ni-mbātə́ i Bɔbə̄ ō Ngōn̄ ō. 23Tɔdɔ̄ deē ń mbātə́ Bɔbə̄ Ngōn̄ ní, mbātə́ i Ngōn̄. Ba deē ń əda najə̄ yā Ngōn̄ tan tə́ anī, Bɔbə̄ Ngōn̄ i seneé#2.23 K. 23: Á̰a̰ī Mat 10.27; Ja̰a̰ 5.23; Ja̰a̰ 15.23.
24Najə̄ ń ōōī ta kəla gíŕ tə́ ní, ādī i kemsí tə́. Ré yá̰á̰ ń ōōī ta kəla gíŕ tə́ ní i kemsí tə́ anī, sḭḭ̄ ī-ndiī i kem Ngōn̄ tə́ ō, Bɔbə̄n tə́#2.24 Ndi kem Ngōn̄ tə́ ō Bɔbə̄n tə́ ō ní kumən na i ra dɔ najə̄ yān tə́ ō. 25Ba míndən ń ənī adə̄jí ní, i kadə̄jí ndi kə kumuú kə́ ngándáńg.
26m̄-ndang makətūbə̄ m-ādə̄sí dɔ yá̰a̰ gə̄ ń noō tə́ i tām̄ yā ngé gə̄ ń a sāān̄ rāāsí kadə̄ ī-ndúmī tə́ ní. 27Ba Ndíĺ kə́ Táĺ ń ə́ngeī jīn tə́ ní i kemsí tə́, adə̄ ā ī-sāāī kadə̄ i deē kógə̄ḿ tá kə ndóōsí yá̰a̰ alé. Ndíĺ kə́ Táĺ ń ni-adə̄sí ní ndóōsí yá̰a̰ malang. Tá yá̰á̰ ń Ndíĺ kə́ Táĺ ndóōsí ní, i yá̰á̰ kə́ rɔ̄kum ba i sor̄ alé. Adə̄ tītə̄ ń ni ndóōsí yá̰á̰ ní, ī-ndiī kemən tə́.
28I beé ní, ngánə́ḿ kə́ dūú gə̄, ī-ndiī kemən tə́, yā kadə̄ ndɔ̄ ń ni a teē hɔy tə́ anī, jə-ndiī kanjə̄ sōl̄ yá̰á̰ kógə̄ḿ ō, kanjə̄ kadə̄ jḭḭ̄ i sa̰y rɔ̄n tə́ kə rɔ̄sɔlɔ̄ɔ́ ndɔ̄ télən tə́ ō. 29Ré ī-gerī kadə̄ ni i de kə́ gōtə́ anī, náā nəkɔ́ ń rāā yá̰á̰ kə́ gōtə́ ní, i de kə́ Nə́ɓā ojən.
Currently Selected:
1 JA̰A̰ 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
