Marcos 8
8
So' Jesús ỹiqui'ỹáxan so' cuatro mil siỹaxadipi
(Mateo 15.32-39)
1Saa'me noloqo'te ỹátaqta jalcote na' siỹaxadipi 'me huet'asop so' Jesús, qataxa qaỹa 'te ga' ỹalic. Chan'eesa so' Jesús ỹiỹáxanoovlo saua' lasoxoñii's, qana'chi 'enaaco':
2—Jaỹim ỹátaqta 'uo da' ỹichoxodénataxanaxac jénjo' siỹaxadipi. Qá'a sóxote ỹovi't naua' tres noloqo'te da' jaỹim huet'asop, qataxa sóxote qaỹa 'te ỹalic. 3Qomle da' 'uootaxa senapéga jen'me da' ỹic'atalo naua' l'acháqa'te da' maliaxa sa dequé'e, qana'chi 'uo qomle ga' copichiỹa'nỹi na' naq'aic, qá'a na' siỹaxadipi 'uo na' qaỹa'ague ga' chiỹoxogue.
4Qana'chi saua' lasoxoñii's ỹ'adetegueto':
—¿Qaláxa'sa toqo' da' qoỹanem ga' ỹalic jen'me siỹaxadipi, jénjo' souqát'a 'me totelégue?
5Qana'chi so' Jesús ỹina'to' saa'me 'enaac:
—¿Jái'chogamaxa laỹóqte' gaua' 'anqódii' pan?
Qana'chi jesaa'me 'enapega'to':
—Sietole.
6Chan'eesa so' Jesús ỹamaxalégue da' so' siỹaxadipi da' ñíiñi, qataxa lasaq'alo saua' pan, qana'chi netamenot ñi' Dios. Joca'li ỹim, qana'chi ỹanoovlo saua' lasoxoñii's, qaidi saa'me ỹaadóoue so' siỹaxadipi. 7Nataq'en huo'oi saua' níỹo'olqa. Qana'chi so' Jesús netameelóo'te saa'me, qana'chi damaxasoxolóo'te da' qoỹaadéegue. 8Qana'chi ỹima da' dequé'e so'me qataxa nodáxaicpi. Qaláxasa joca'li ỹim, qana'chi nesaxaỹilo saua' siete jan' nadetáxanaxaqui 'me n'oxona so' n'iỹóxot. 9Qana'chi jeso'me dequé'e, qam da' ỹóvi' cuatro mil. Qana'chi so' Jesús nichoxotétapegooue so' siỹaxadipi, 10qana'chi huenóchiinỹi jaso' licota, náictapee'to saua' lasoxoñii's da' ỹic'ádeta di' 'aléua Dalmanuta.
Na' fariseopi ỹiỹáxatapecot so' Jesús da' ỹa'uo ga'me sa qoỹauanápiỹi
(Mateo 16.1-4; Lucas 12.54-56)
11Qana'chi janac na' fariseopi da' sétaaque noqolgué'te' so' Jesús, qoỹiỹaxanot so'me, da' ỹaloxon ga'me n'anec 'me sa qoỹauanápiỹi chiỹoqo'ot na' piỹem. Qaláxasa so'me 'chi l'iináanataxanaxac. 12Qaláxasa so' Jesús 'chi decovi, qana'chi 'enaaco':
—¿Tá'nooqo'chi ỹiỹáxataaque jénjo' siỹaxadipi ga'me n'anec 'me sa qoỹauanápiỹi? Ỹátaqta 'eesa da'me 'ami senapegalo, naỹi sa 'te 'ami qoỹanema ga' n'anec.
13Qana'chi so' Jesús cá'ai so' siỹaxadipi, qana'chi ỹitaxa huenóchiinỹi jaso' licota, qana'chi tai'ta so' lasego jaso' peróna.
Jen' ỹaseedíỹi qa'en jan' pan 'me huétaaue na' fariseopi
(Mateo 16.5-12)
14Saa'me petelaxateguet joca'li da' ỹáchi' ga' jalo', na'chasóta jaso' 'oonole pan ca'li qonétanỹi jaso' licota. 15Qana'chi so' Jesús huaqátoovlo saa'me, 'enaac:
—Ma'chaxa qomle, 'avichiiỹa'aguet jen' ỹaseedíỹi qa'en jan' pan 'me huétaaue na' fariseopi qataxa ñi' Herodes.
16Qana'chi saua' lasoxoñii's mai'chi nenatétapega't, 'eet'oi:
—'Enaac da'me, qá'a ỹasouaxat da' sa ñachóxosoq jaga' pan.
17Qana'chi so' Jesús ỹaỹáte'n saa'me, qaama'le 'enaaco':
—¿Tá'nooqo'chi 'autaqáitapiỹi da' sa 'anachíỹi jaga' pan? ¿Séele na'chi 'eeta't da' maliaxa sa 'auaatetonaxañii qataxa ga' 'auaỹáchiñii? ¿Ỹátaqta sa nedámite' joonaua naua' 'adiquidiaqtéldii'? 18¿Sa nauaidíñi joonaamaxa 'ad'ai'téldii', qataxa sa demachi'ỹape joonaamaxa 'adequetelalaacódii'? Qataxa ¿sa 'aueenachiỹo'? 19Ca'li secolaxatétapiilo saua' cincole pan da' siqui'ỹáxan so' cinco mil siỹaxadipi, ¿jái'chi laỹóqte' saua' nadetáxanaxaqui' 'me n'oxonal nesaxaỹilo so' n'iỹóxot?
Qaama'le 'enapega'to' saa'me:
—Doce.
20Qana'chi jeso'me ỹitaxa 'enaac:
—Qataxa ca'li secolaxatétapiilo saua' sietole pan da' siqui'ỹáxan so' cuatro mil siỹaxadipi, ¿jái'chi laỹóqte' saua' nadetáxanaxaqui' 'me n'oxonal nesaxaỹilo so' n'iỹóxot?
Qana'chi 'enapega'to' saa'me:
—Sietole.
21Qana'chi 'enapegalo saa'me, 'enaac:
—¿Maliaqo' da' qaỹa 'te 'auaỹáchiñiỹac?
So' Jesús ỹa'uo lec'atenaxanaxac so' qanam di' Betsaida
22Joca'li ỹivíded'a di' Betsaida, qana'chi qonauée'uo so' Jesús so' qanam, qana'chi qonachoxodeet'ot so'me, qaidi huaselelégue. 23Qaama'le so'me ỹacona'aguet na' louaq so' qanam. Qana'chi daqatee'guesop qa'en so' noic. Ỹim, qana'chi ỹ'amiñiilo naua' l'ai'te jaso' l'ali, qana'chi ỹipotelóo'te. Qataxa ỹinat so'me da' 'uootaxa sóxote 'uo ga' ỹilá'a. 24Qana'chi so'me qanam dec'atenaxan, qaama'le 'enaaco':
—Selót'a na' siỹaxadipi, qaláxasa 'ená'am jan' 'epaq, qaláxasa ỹiuótapiỹe't.
25Qana'chi so' Jesús ỹitaxa ỹipotelóo'te naua' l'ai'te, qana'chi ma'le nauanéegue. Huá'a, qana'chi ỹátaqta nauáachiiñi. 26Qana'chi so' Jesús ỹamaxa ga' l'acháqa' so'me. Qana'chi 'enapéga, 'enaac:
—'Ená'te 'áaue qomle na' noic, qataxa 'ená'te 'uo ga' 'au'axátem dójo'.
So' Pedro ỹ'axat so' Jesús da' na'chiso 'me qoỹ'axátet'aguet net'a nec'alaxaqui
(Mateo 16.13-20; Lucas 9.18-21)
27Joca'li ỹim dójo', qana'chi so' Jesús, náicapee'to saua' lasoxoñii's da' ỹic'ádeta na' noicpiolec 'me ná'ña di' Cesarea 'me ỹilotalégue so' Filipo. Joca'li hua'nỹi na' naq'aic, qaama'le ỹinatét'ape saua' lasoxoñii's, 'enaac:
—¿Jái'chi 'éeta ga' lepétaxac na' siỹaxadipi da' jaỹim?
28Qana'chi saa'me 'enapega'to':
—'Uo na' 'éetapega 'am Juan 'me chiláxanataxanaxaic, qataxa 'uo na' 'éetapega 'am Elías, qataxa 'uo na' 'éetapega da' 'auachíỹaqaaue so'me huá'au 'me Dios l'aqtáxanaxanecpi.
29Qana'chi ỹina'to' saa'me, 'enaac:
—Qaláxasa 'ami, ¿jái'chi ga' 'aupíchiitapega da' jaỹim?
Qana'chi so' Pedro 'enaaco':
—'Am 'me na'chi'am ga' qoỹ'axátet'aguet net'a nec'alaxaqui.
30Qaláxasa so' Jesús huaqatelégue so'me da' qaỹa 'te 'uo ga' ỹ'axátem dójo'.
So' Jesús ỹ'axát'a da' nalaataguec
(Mateo 16.21-28; Lucas 9.22-27)
31Huá'a, qana'chi d'aqtaxanema saa'me, 'enaac:
—Jen'me siỹaxaua lec'óxot ỹátaqta jalcote qomle da' ne'queténaxac, qataxa sa ỹiuoteneguet qomle na'me na' ỹ'axaicáchiipi, qataxa na' lasoxola'pi na' netaxaỹáxanaxanecpi da' qodosápegue' ñi' Dios, qataxa jen'me dapaxaguenataxanapeec na' naqátaxacpi. Qataxa ỹ'axatema saa'me da' so'me tát'a da' qoỹalaat, qaláxasa qomle ỹinoxodéegue gaua' tres noloqo'te, qana'chi ỹitaxa n'iỹílaxaseguem.
32Ỹátaqta ỹ'axatetelégue da'me tát'a. Qana'chi so' Pedro na'chi ỹiỹotái'ỹa so'me, huá'a, qana'chi nelaxa. 33Qaláxasa so' Jesús neselec da' ỹilápegoovlo saua' lasoxoñii's, qaama'le nelaxa so' Pedro, 'enaac:
—Jaỹim 'ocá'ai, 'am ỹó'o paiỹac Satanás, qá'a da'me 'adeenataxac sa 'ená'am da' leenataxac ñi' Dios. Na'chidáta da' 'auená'am naua' 'chi leenataxaco ga' siỹaxaua.
34Qana'chi so' Jesús ỹiỹáxanoovlo saua' lasoxoñii's nataq'en na' siỹaxadipi. Qana'chi 'enaaco':
—Da' 'uo ga'me sétaaque jaỹim 'equegue, n'óota da' cha'li ỹiguem ga' mai'chi leenataxac, qana'chi jaỹim 'equegue, na'chidi da' 'uootaxa jaỹim ỹileetalégue. 35Qá'a ga' sétaaque mai'chi nec'alaxatela't, qana'chi ga'me daqat da' nichaalataxac; qaláxasa ga' daqat da' nichaalataxac, ỹasouaxat da' jaỹim quétapegue' qataxa ỹasouaxat da' n'aqtac, qana'chi ga'me qonec'alaxatéegue qomle. 36Qá'a ¿jái'chogamaxa chiỹoxotaỹi ga' siỹaxaua da' 'uootaxa nemat ỹima jen'me huetalégue jen' 'aléua, qaama'le da' nichaalataxac daqat? 37Qá'a ¿jái'chogamaxa ỹiseeténec ga' siỹaxaua, da' qaidi n'iỹílaxatela't da' nichaalataxac? 38Qá'a ga' nepecoxolecaỹim qataxa da'me ỹ'aqtaxanaxac, da' detaxáaue jen' siỹaxadipi 'me qosee'guesop ñi' Dios qataxa loicoló'olpi, qana'chi jen'me siỹaxaua lec'óxot nataq'en ỹátaqta nepecoxolégue ga'me, qomle ỹivíta da' n'iỹílaq da' naquétaaue da' l'edáxac ñi' let'a qataxa na' lamaxa'spi 'me huaỹamqaicpi.
Currently Selected:
Marcos 8: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
