Marcos 7
7
Naa'me ỹisepaxanaqtet da' nichaalataxac ga' siỹaxaua
(Mateo 15.1-20)
1Qana'chi noqochíi'uo na' fariseopi so' Jesús, qataxa 'uo na' dapaxaguenataxáatapeec na' naqátaxacpi 'me chiỹaqá'a di' Jerusalén. 2Jeso'me 'me ỹauáachidiỹi joca'li da' huo'oi saua' lasoxoñii's so' Jesús da' diqui'ỹáxanalo naua' loua' 'me paxáchiilo. Da'me náaue da' sa qoỹipaguelégue da' n'onataguec da' qoỹiỹoi' naua' noua'. Chan'eesa qoỹíitapegalo saa'me. 3(Qá'a na' fariseopi qataxa ỹima na' laỹi judiopi, na'me quétapegue' da' n'onataguec so'me huá'au lapidílpi da' sa dequé'e da' 'uootaxa maliaxa sa ỹiỹoi' naua' loua', na'chidáta da' v'iỹílaqtalégue da' niỹóxoc. 4Da' 'uootaxa chiỹaqá'a ga' menaqa', sa dequé'e da' maliaxa sa ỹí'et da' n'onataguec da' ỹiỹoi' naua' loua'. Qataxa 'uo jen' laỹipi n'onataguec 'me quétapegue': nataxa 'éet'ec qoỹiỹo jan' ỹómaxaqui, qataxa jan' náco'na, qataxa jan' taxaqui, qataxa na' n'ochaxala'.) 5Chan'eesa so'me fariseopi qataxa na'me dapaxaguenataxáatapeec na' naqátaxacpi, ỹinatétapeec so'me, 'enaac:
—¿Tóoqo'chi naua' 'adasoxoñii's 'chi sa quetegue da' n'onataguec so'me huá'au qadapidílpi? Qana'chi da' diqui'ỹáxanalo naua' loua' 'me paxáchiilo.
6Qana'chi so' Jesús 'enaaco':
—Ỹátaqta 'ami tachiilo naua' l'aqtaqa so' l'aqtáxanaxanec ñi' Dios lenaxat Isaías, ca'li 'ami ỹ'axat'alo, 'ami 'me 'oñíitapeela't da' 'ami lec'óqo'te ñi' Dios, ca'li ỹidíñi da' 'enaac:
Jénjo' siỹaxadipi da' jaỹim ỹi'ỹoxodéetac, 'chi 'en na' nedégaxat,
qaláxasa jañi' liquidiaqte jaỹim qaỹá'a qa'en.
7Ỹátaqta qaỹa 'te náaue da' jaỹim ỹi'ỹoxodéetac,
qá'a na'me lapaxaguenataxanaxacpi mai'chi laqátaxac na' siỹaxadipi.
8Qá'a 'ami 'oquíi'ỹai jen' laqátaxacpi ñi' Dios, qana'chi 'oquiỹiilo naua' n'onataico na' siỹaxadipi: 'oquíitapegue' da' n'onataguec da' qoỹiỹo jan' náco'na qataxa jan' ỹómaxaqui, qataxa jalcote jen' laỹi 'me 'av'íchii.
9Qataxa 'eesapego', 'enaac:
—Qá'a da'me 'oquiitelóo'te naua' mai'chi 'an'onataguecódii', qana'chi ma'te 'oquíi'ỹai naa'me laqátaxaco ñi' Dios. 10Qá'a so' Moisés joca'li 'enaac: “Ỹátaqta 'auqo'cha ga'me 'adet'a, qataxa jaga' 'adat'e,” qataxa 'enaac: “Ga' ỹisouen ga' let'a qataxa jaga' lat'e, qana'chi ga'me qoỹalaat.” 11Qaláxasa 'ami 'ad'aqtaquii di' ga' siỹaxaua huaỹotelégue da' 'enapéga ga' let'a 'uootaxa jaga' lat'e da' 'enaac: “Sa 'am 'te ỹicochiỹa, qá'a ỹima na' jaỹim huet'ot sen Corbán” (da'me 'enaac, sóxote qoỹanot ñi' Dios). 12Qomle 'ad'aqtaquii dójo', qana'chi 'ami 'ená'am da' sa 'auasiñim ga'me da' lecochiỹa ga' let'a 'uootaxa jaga' lat'e. 13Naqaida 'me ỹí'et da' 'ami qaỹa 'te 'auañíỹaỹi na' laqátaxacpi ñi' Dios, qá'a 'chi n'onatagueco naa'me 'oquíitapegue'to 'me quétaỹi da' 'oñíita. Qataxa jalcote na' laỹi 'av'íchiitac 'me 'ená'am da'me dójo'.
14So' Jesús ỹitaxa ỹiỹáxanooue so' siỹaxadipi. Qana'chi 'enaaco':
—Jaỹim 'anaquiáxañiỹa ỹima da'me 'oñíita, qataxa 'auaỹáchiñiit'eguet da' senaac, 'eet'oi: 15Sa na'chiga ga' jaloq ga' siỹaxaua da'me ỹalic, qana'chi ỹ'étec da'me lesepaxanaxa da' nichaalataxac. Qaláxasa naa'me chiỹoqodápii'nỹet jañi' liquidiaqte, naqainaua 'me ỹauóte da' lesepaxanaxa ga'me. 16'Ami 'me 'auaỹáchiñii da' 'anaquiáxanaxaquii, n'óota da' 'anaquiáxañiichiiñi.
17Joca'li cá'ai so' Jesús so' siỹaxadipi, qana'chi táaue so' 'emec, qana'chi saa'me lasoxoñii's ỹinatétrapeec so'me ga' náaue da'me daloqtenaxáatapega. 18Qana'chi 'enaaco' so'me:
—¿Qa'chi ỹivid'o' da' 'oñíita da' sa 'auaỹáchiñii da'me dójo'? ¿Séele sa 'auaỹáchiñiỹo' da' sa na'chiga ga' jaloq ga' siỹaxaua da'me ỹalic qana'chi ỹ'étec da'me lesepaxanaxa da' nichaalataxac? 19Qá'a jen' nalicpi sa táaue jañi' liquidiaqte. Na'chánata jan' letá'am. Ỹim, qataxa sa ỹiuatáuo.
Naqaida da' 'enaac so' Jesús ca'li ỹichoxotetelégue da' ỹima na' nalicpi ỹoqovíchiỹi. 20Nataq'en ỹitaxa 'enaaco':
—Qaláxasa jen' chiỹaqa'nỹet jañi' liquidiaqte naqáina 'me paxáchiỹi qa'en da' nichaalataxac. 21Qá'a jañi'me liquidiaqte na' siỹaxaua na'chañi 'me chiỹaqáaue na' sa nó'in leenataxacpi, da' sétaaque nichíua'te' jaga' sa loua, qataxa da' nequeséeguetaxa, naláataxanaxac, 22qataxa da' necacháxac, noqopichidíỹaxac, qataxa na' sa nó'inpi, nesepegaxanaxac, nauochidíỹaxacpi, quiỹáxanaqtáqaic, n'aqtaqa lai't, ỹ'oxodénaxac, sa naỹáten. 23Ỹima jénjo' sa nó'inpi chiỹaqáaue jen' lauel ga' siỹaxaua, naqáina 'me ỹ'étec da'me lesepaxanaxa da' nichaalataxac.
Jaso' ỹauo ỹaqá'a lase 'me ỹ'amaqten so' Jesús
(Mateo 15.21-28)
24Qana'chi cá'ai ga' huét'a so' Jesús, taỹa di' 'aléua Tiro qataxa di' Sidón. Qana'chi joca'li táaue ga' 'emec, sétaaque da' qaỹa 'te nóm'a so'me, qaláxasa sa nañoxot da' nañoxóchiñi. 25Pasá'a qataxa 'uo jaso' ỹauo 'me nómt'a so'me, jaso' lat'e jaso' 'añole 'me 'uo so' lé'ec nataqtáqaic. Jaso'me nec'áta so' Jesús, qana'chi ỹisocoto naua' liliictel. 26Jaso'me ỹauo ỹaqá'a lase, chiỹaqáaue na' sirofenicia lé'ecpi. Jaso'me nec'áta so' Jesús da' ỹiỹaxanot, qaidi ỹ'odáiỹi so' lé'ec nataqtáqaic jaso' lec'oqte. 27Qaláxasa so' Jesús 'enapego' jaso'me 'enaac:
—Ỹa 'amachí'ỹa na'me ỹátaqta nec'óqo'tepi da' 'uáiñi dequé'e, qá'a sa nó'in da' qodeuoxotáxanec ga' jaloq na'me, qana'chi qoỹanem na' pioxodipi.
28Qana'chi ỹ'ato' jaso'me:
—'Eesa da'me qonaac, 'am ỹasoxola', qaláxasa ỹivíd'a na' pioxodipi 'me net'ot na' p'áñi ga' niqui'ỹáxala', jen'me ỹalict'aguet na' n'áqañi jaloq lesochi ga'me nec'óqo'tepi.
29Qana'chi so' Jesús 'enapego' jaso'me, 'enaaco':
—Ỹátaqta ỹiỹamqáchiiñi da'me 'auenaac. Naỹi n'óota da' 'av'iỹílaq, qá'a so'me né'ec nataqtáqaic sóxote cá'ai jaga' 'ac'oqte.
30Qana'chi ca'li ỹivíta ga' l'acháqa', qana'chi jaso'me ỹilalégue jaso' lec'oqte da' huetalégue ga' l'ochaxala', sóxote cá'ai jaso'me so' lé'ec nataqtáqaic.
So' Jesús n'óota qa'en so' chiỹoxosec qaláqaic
31Qana'chi so' Jesús ỹitaxa cá'ai di' 'aléua Tiro, qana'chi talégue di' Sidón qataxa na' noicpi di'me 'aléua Decápolis, cha ỹivídetaxasó'ma jaso' peróna 'me huá'a di' Galilea. 32Huá'a, qana'chi qoỹauecot so' siỹaxaua 'me chiỹoxosec qataxa qaláqaic. Qana'chi qoỹiỹaxanot so'me, qaidi huaselelégue so'me. 33Qana'chi so' Jesús ỹacona'aguet so'me, cá'ai qa'en so' siỹaxadipi, qana'chi ỹisetoou'lo naua' liaxatal naua' lequetélalaaco qataxa natóxoỹilo, qana'chi ỹipoteuó'o so' lacháxat. 34Ỹim, qana'chi ỹilosée'mec na' piỹem, qana'chi ñaxadíseguem naua' laỹa'chi, qana'chi 'enapego' so'me, 'enaac:
—¡Efata! —da'me 'enaaco': ¡'An'ouáchiỹiỹi nequetélalaaco!
35Huá'a, qana'chi ma'le demachíỹaac so'me siỹaxaua, qataxa ỹiỹamqáchiiñi so' lacháxat, qana'chi 'ónaxaic da' dose. 36Qana'chi so' Jesús huaqátetapeelégue da' qaỹa 'te ỹ'axat da'me dójo'. Qaláxasa joca'li netenec da'me laqátaxac, qana'chi nataq'en chaxa qonetenec da' qoỹ'axátetac da'me. 37Qana'chi ỹátaqta let'ádaic da'me n'aalaxa, qana'chi qoỹinaac:
—Ỹátaqta ỹiỹamqáchiiñi ỹima na' ỹ'étetac, qá'a ỹivíd'a da' demachi qa'en na' d'añaiỹi na' laqaic, qataxa na' qaỹaua 'te l'aqtaqa.
Currently Selected:
Marcos 7: PLGNT93
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.